العمل والعبادة ... الغرب والعرب ( موضوع للنقاش ) [الأرشيف] - ملتقى المغتربين السوريين

مشاهدة النسخة كاملة : العمل والعبادة ... الغرب والعرب ( موضوع للنقاش )

mlam7 jr7

03-24-2012, 01:34 PM

السلام عليكم ... واعذروني عالكلام باللغة العامية ...
حبيت ناقش معكون موضوع من زمان عم فكر فيه وكل ما طرحتو عحدا رد بوجهي بعصبية ...
الكلام مو للكل بس بشكل عمومي ...
العمل ولا العبادة ولا التنين مع بعض ؟
وليش إذا نحنا ما بدنا نعمل بجدية وبنشاط منصير نستعمل الدين كوسيلة لنهرب من عملنا ؟؟
منصلي أوقات الإمتحانات ومنصير نقرأ قرآن أكتر ما ندرس بكتبنا ؟
ليش نحنا العرب منفكر إنو العبادة هي الحل لنتوفق بحياتنا ومنترك العمل وإنو اليهود والأوروبيين ( هنن كفار وما عندون دين وما بيصلوا ) و كل هالتطور اللي هنن فيه هو عبارة عن ملذات الحياة الدنيا الفانية ؟؟ أو يمكن // اللي ما بيطول العنب بيقول عنه حامض //؟
الإنسان الغربي بلا دين وبلا تاريخ وما بيعرف أصله ونسله الحقيقي من مين .
بس ناجح أكتر من الإنسان العربي !!
الإنسان العربي اللي صنع الحضارة ... اللي اخترع القوانين الفيزيائية والرياضية والكيميائية ودرس الطب و إلخ .
بوقتنا الحالي لو نقارن الإنسان العربي بالغربي ...
العربي متمسك بعاداته وتقاليده ودينه بس بيفيق الساعة 10 وما بيفطر وبيدك أواعيه بسرعة وبيتأخر عن شغله وبيروح عالشغل وهو عم يتأفأف ليشرب قهوة وبيقضيها بالشغل عقصص مع صحابو اللي هنن نفس الحالة وبيهرب من الشغل قبل ما يخلص ... بيرجع عالبيت بيلاقي ولاده بالحارة بيتغدا و بيحمل حاله وبيروح عالقهوة ليشرب أركيلة أو عالشباب رفقاته بيدخنوا وبيلعبوا ورق شدة !!! ( بدون تعميم )
الغربي ماعنده دين يتمسك فيه ولا عادات وتقاليد بتحكمه بس بيفيق الساعة 6 بيفطر وبيشرب قهوته الصباحية وبيروح عشغله عالوقت ووقت الشغل ما فينه يحك راسه وبيطلع بعد موعد إنتهاء الدوام بساعة ليكون متأكد إنه أنهى عمله وبيرجع عالبيت بيستريح وبعدين بيطلع بيعمل رياضة أو بيروح مع صحابه عالسينما وآخر الليل بيجي ليقرأ كتاب أو ما إلى ذلك وما بدي عدد شو بيعمل لأنو كتير ...
غريب هالشي ... 22 دولة عربية مو قدرانيين يحرروا أصغر الدول العربية من الإحتلال ؟؟
إسرائيل خلال 50 سنة قدرت تعمل من الأراضي الفلسطينية اللي احتلتها جنة والعرب نايمين ...
معناتا إذا نحنا ما بدنا نشتغل ما لازم نحط الدين كسبب ونتكئ عليه ... اليهود كفار ومفسدين في الأرض ونحنا منعرف هالشي بس مننكر إنو بيشتغلوا أكثر منا بعشرين ضعف ؟
هنن بيعملوا ليطوروا حالون ونحنا كل عملنا لنعرف كيف نطلعون غلط ونكشف أخطائون ونفضحون ونجيب آيات من القرآن ضدون
ونفضح ممارساتون اللاإنسانية مع الفلسطينيين ونسجل فيديوهات كيف إنه هنن جبانيين ونحنا أبطال ... مستعدين لكل هاد وإنو نجاهد ضدون كمان ونستشهد ونموت ... بس لا تقول لواحد عربي أدرس وأصنع متل اللي عم تصنعه إسرائيل ...
إسرائيل وصلت لهون لأنهن ناس بيشتغلوا ... ونحنا بدنا نطلعون من بلادون بالجهاد والتفجيرات وهي الطرق اللي انقرضت ...
بس ما فكرنا إنو ندرس كيف نعمل طائرة متل طائراتون ولا نووي متلون ولا قنابل ولا نوع من أنواع الأسلحة
ولا حتى تكنولوجيا ترفع اقتصادنا !
كل بلاد العالم صارت دول ( تأكل مما تزرع وتركب مما تصنع ) إلا الدول العربية
فالعربي بيشتري السيارة اليابانية والأمريكية والألمانية والكورية حتى الإيرانية
بيشتري الموبايل الفينلندي (نوكيا ) والآي فون الأمريكي حتى الموبايل الصيني بس مو مستعد يصنع هاتف قرص !
بيشتري الطيارة الفرنسية والأمريكية يسافر فيهون ...
والطيارة الروسية والأمريكية ليحارب فيها إسرائيل ( أمريكا ) ويا ريت حارب !
وآخر شي العربي بيصدر لبرا الأركيلة والمعسل والشنكليش والمكدوس وأهم الشي النفط اللي مكبر راس العرب وكأنو هنن اللي صنعوه !!!
العربي دائماً بيسب الغرب على هالتقاليد البالية واللباس الفاضح والعادات اللادينية بس يوم بيمرض ما بيثق غير بالدوا المهرب
ويوم السياحة بلدو بتصير بنظره صحرا وأول وجهة عأوروبا ليعمل سياحة !!
والعربي كل حديثو إنو العرب مضطهدين ببلاد الغرب ... بس أول ما يفكر يسافر بيحلم بالشغل عندون !!
الغرب بيجوا عبلادنا ليعملوا طرقات وأبنية ومصانع والعرب بيروحوا عالغرب بيفتحوا شاورما ومطاعم ومحلات خضرة !!
وأخيراً الثورات ...
بكل الثورات العربية اللي قامت .. كانت تقوم ببلد وباقي البلاد تدعي لهلبلد بس ما حدا بيساعد حدا !!

والغرب عطول كفار وبيكرهوا العرب ( وهي الحقيقة ) بس فرنسا اللي قتلت مليون و 300 ألف جزائري فاتت عليبيا بصفة البطل !
حقها تفوت هيك .. بما إنو مصر أقوى الجيوش العربية عندها حدود مع ليبيا بس من عاصمتها القاهرة طلع صوت النداء والصراخ للناتو !!!
بعتذر عن الإطالة بس الخلاصة ( يا إما منعمل ومنصير متلون ومنفهم إنو بالدنيه الله سبحانه وتعالى رح يحاسبنا ويرزقنا على عملنا مو على عبادتنا)

يا إما ما لازم نسب ونشتم ناس مقضيين حياتون دراسة وعلم ليتطوروا ونحنا نايميين ومندعي الله سبحانه يرزقنا !!
وفي الختام سلام ...

Sanaa

03-24-2012, 06:44 PM

اولا أهلا و سهلا فيك ..

تانيا ... طرحك مهم و جوهري للغاااية ...

تالتا ... الشي يلي حضرتك ذكرته هو جملة من التناقضات المفصلية فعلا بحياتنا ... و بصراحة بحاجة لنقاش معمق و موضوعي ...

هلأ انا بدي أكد بداية أنو الدين ما بيعني ( صلاة و صيام و قرآن ... ووو بس ) ... الدين أوسع من هيك بكتييير ... و هون المشكلة !!

مشكلتنا بالفهم الخاطئ للدين ... و يلي بيفهم الدين صح ... بيعرف انو ديننا الحنيف بيدعي دايما للعمل ... و بيعتبر " العمل .. عبادة " ... " و قل اعملوا فسيرى الله عملكم و رسوله و المؤمنون " !

و كمان بيعرف تماما ... انو المفروض نتحمل مسؤولياتنا بشكل كامل و نقوم بأعمالنا على أكمل وجه ... " و إذا عمل أحدكم عملا .. فليتقنه " !

رب العالمين طبعا ... هو السبب الأول لتوفيقنا بكل امور حياتنا .... و هاد الشي لازم و ضروري .... بس مع ضرورة الأخذ بالأسباب !!

الدين بيأمرنا بالتوكل على رب العالمين ... بس مو التواكل .... التوكل مع الأخذ بالأسباب ...

و الأخذ بالأسباب بيعني العمل و المثابرة و القيام بكل الواجبات بدون تقصير ( مع التوكل و طلب التوفيق من رب العالمين ) !!

يعني مو يقعد الواحد ببيتو ... ما عم يعمل شي ... و يقول يا ربي ارزقني !! كيف بدو يجي الرزق هيك ... " اسعَ يا عبدي لاسعى معك " !

و بالتالي المشكلة مو بالدين و العبادة ... المشكلة بالمفهوم الخاطئ السائد المتعلق بالدين و العبادة !!

المشكلة التانية ... و يلي ما بيصير نهملها او نتجاهلها ... انو الغرب عندهم مناخ و بيئة مناسبة و مشجعة للعمل و التطوير و التحديث وووو ...

اما بالدول العربية ...... !! للأسف الشديد ... إذا شخص بدو يلتزم و يشتغل من قلبو فعلا ... يعتبر غلطان و حامل السلم بالعرض .... و لا تستبعد انو زملاؤه بنفس الشغل رح يحاولوا يبعدوه !!

النقطة المهمة هون ... انو في عقول عربية جبارة .. و في امكانيات لا يمكن الاستهانة فيها موجودة بالدول العربية .... بس ما في فرص مناسبة ...

و ما في احتضان ملائم لهالكفاءات ( كرمال هيك بيفضلوا يسافروا للدول الغربية على امل يلاقوا الشي يلي بيطمحوا له ) .... بدليل وجود أدمغة عربية رهيبة عايشة بالدول الغربية !

احيانا الشخص بيصير معو حالة يأس و احباط ! بيفرضو عليه الواقع المحيط .... لما ما بيلاقي اي اهتمام او تقدير لامكانياتو ... بيقرر يوقف و يعيش متل مو الناس التانية عايشة !!

طبعا أنا ما عم حاول برر ... و ما عم اقول انو هيك تصرف صح .... بس هاد الواقع فعلا ... و هاد يلي عم يصير ... و هاد يلي عم يوصلنا لهون !!

كلنا بنتحسر لما بنشوف الدول الغربية ... يلي ما بتعرف شو هاد الدين .... هي مثال للحضارة و التطور و الرقي !! مع انو الدين الحق هو منبع الحضارة و الرقي و التطور !

يعني فعليا ... نحنا بناخد الدين نظريا ..... و للأسف بنشوف التطبيق العملي لتعاليم الدين العظيمة .... بالبلاد الغربية !!!!!! ( من أسوأ التناقضات ) ....

باختصار .... العبادة الحقيقية و الالتزام بالدين الحقيقي .... و الرجوع لتعاليم رب العالمين ........... هو الحل الأمثل لكل هالمشاكل و التناقضات !!!

الدين ( بمعناه الحقيقي ) .... هو علاج المشكلة .... هو مو سبب فيها ابدااا !! السبب فينا نحنا كبشر .... السبب بعدم ادراكنا و التزامنا بجوهر الدين الحقيقي !!!

حقيقة أنا بدي اشكرك كتير على طرحك القيّم .... و هو موضوع مناسب للنقاش بامتيااااز ....

بدي اعتذر منك على حذف جزئية بسيطة جدا من الموضوع .... لأنو هالجزئية ممكن تكون سبب لأخد و عطا ... و نقاشات حادة .... و بالتالي مشاكل ( نحنا بغنى عنها )

خاصة انو كل واحد عندو قناعة خاصة بهالموضوع .... و طبعا هالجزئية مخالفة لسياسة الملتقى يلي بتمنع النقاشات السياسية و الدينية البحتة ... لتجنب اي مشاكل بين الاعضاء ....

لذلك الأفضل نبقى بالعموميات ... دون التطرق لتفاصيل مثيرة للجدل !!! كرمال يكون النقاش موضوعي اجتماعي ... ما بدنا النقاش يتحول لخلافات سياسية دينية !!

مرة تانية بشكرك كتير .... كتير عجبني طرحك .... بانتظار آراء الجميع ...

و أكيد الي عودة ان شا الله ...

بالمناسبة أنا نقلت الموضوع من " المجلة " .. لقسم " الحوار " ... لياخد حقو بالنقاش ...

تحيتي و تقييمي ....

mlam7 jr7

03-24-2012, 10:52 PM

بشكرك عالرد كتير وعإهتمامك وقرائتك للموضوع .. أنا موضوعي بيدور حول محور إنتي ذكرتيه // الدين بيأمرنا بالتوكل على رب العالمين ... بس مو التواكل .... التوكل مع الأخذ بالأسباب ... // لأنو بيحترق الواحد يوم بيشوف دينو الأفضل وهو رافع رايتو بالإسم و غيره عم يطبقه بحذافيره ...

mlam7 jr7

03-24-2012, 11:03 PM

بس ما فهمت الجزء اللي انحذف عن سوريا ليش ؟
حقيقة بدنا ننكرها ... بعرف مو هاد القسم للنقاش بهيك شي بس كمان أنا كسوري بهتم بقضية بلدي أكتر ما إهتم بأي قضية غيرا !!!

Sanaa

03-25-2012, 12:31 AM

اولا ... اهلا فيك ... موضوعك بيستحق القراءة و النقاش فعلا ...

بالنسبة للجزء يلي انحذف ... كان بيتضمن ليبيا و سوريا مع تلميح ديني ( أدعية الفجر وو ... )

المهم ... انا معك انو القضية السورية و العربية هي اساس اهتمامنا الحالي كسوريين و كعرب بشكل عام .... حذف هالجزئية مو المقصود منو التقليل من أهميتها إطلاقااا !!

على العكس تماما (انا بعتقد انو بظل الظروف الحالية ).... يلي رح يقرا الموضوع .... رح يهتم أكتر شي بالجزئية المحذوفة ... لأنو مهمة جدااا ... و لأنو هي الشغل الشاغل للكل حاليا !

و هون المشكلة ... لانو النقاش ممكن ينقلب سياسي ديني !! و هاد يلي ما بدنا ياه ... لأنو هالنوع من النقاشات عم يتسبب بمشاكل و مشاحنات كتيير ( نظرا لاختلاف الآراء ) !

نحنا مو ضد يتم النقاش بهيك موضوع مهم ... و لكن سبق و انفتح المجال لنقاشات سياسية ... و النتائج كانت سلبية جدا ... و ما جاب النقاش اي فايدة او نتيجة ...

تجنبا لأي مشاكل او حساسيات بين الأعضاء .... رجعت سياسة الملتقى القديمة (عدم الدخول بنقاشات سياسية او دينية بشكل مباشر ) !

الجزئية يلي انحذفت كانت بسيطة كمساحة ... بس كانت غاية في الأهمية و الواقعية و نقطة مثيرة جدا للجدل .. لدرجة انو ممكن البعض يعتبرها محور الموضوع ( بدل المحور الاساسي ) ...

بتمنى منك تقدّر الموقف ....

مع كل الاحترام إلك و لكامل موضوعك ( بما فيه الجزء يلي انحذف ) ....

mlam7 jr7

03-25-2012, 09:23 AM

انس.

03-25-2012, 04:04 PM

شكرا لك....

*الموضوع المطروح فيه فكرة رئيسية وافكار ثانوية كثيرة متشعبة

* تداخل الافكار يجعل من الصعوبة على البعض الحوار فيه

*بعض الافكارالمذكورة :

... تخلف العرب

....نظرة العرب للدين

....تفوق الغرب

...عجز العرب عن تحرير فلسطين

تخلف العرب ناتج عن اسباب كثيرة منها ( تسلط الحكام - الفقر - الجهل - الابتعاد عن الدين - تقليد الغرب في النواحي السلبية فقط )

تقدم الغرب ناتج عن الالتزام بالعلم وتقديسه ولكن لاننسى ان الغرب ليس حضارة فقط ففيه من السلبيات الكثير

الشذوذ والانحرافات والانتحار والمخدرات والمافيا وووو

الانجد في امريكا المشردين والذين يفترشون الارصفة

.....
بالنسبة للدين لماذا لاتكون نظرتنا اكثر شمولا

الم تصل حدود الدولة الاسلامية الى فرنسا والصين في عصور الاسلام الذهبية

عندما كان المسلمون يطبقون تعاليم دينهم بشكل صحيح .....!!

الم تكن مؤلفات العلماء المسلمين تدرس في كل العالم عندما كان الغرب غارقا في ظلام القرون الوسطى

اذا هناك نظرتان للحياة نظرة الغرب المادية والحياة تنتهي بموت الانسان

ونظرة الاسلام للحياة بوجود العنصرين معا العمل والعبادة

اذا العمل والعبادة في ديننا يجب ان يترافقا معا لتحقيق النظرة الصحيحة

واي خلل في احدهما سيتركنا الله وشأننا ولن نجد نصرا منه

اعتذر فالموضوع الديني هنا معقد وشائك وبحجة لتفصيل كبير وليس مكانه هنا

اخيرا

بعض الناس يتسائلون عن طيبة اذا كان الحق معنا فلماذا لاينصرنا الله دون ذكر دولة معينة ولنقل ان دولة شعبها مظلوم لسنة او سنتين والحق معه فالى متى ؟؟؟

وهنا يأتي مثال فلسطين الذي ذكر في الموضوع اليس شعبها مظلوما وقدم الشهداء على مدى ستين عام او اكثر
ولماذا عجز العرب عن انقاذها ؟؟؟

على كل حال التعميم لايجوز وهناك من العرب من حقق تقدم حضاري على الطريقة الغربية مثل الامارات العربية وقطر

وهناك من الدول الغربية من يعيش على المساعدات .....

في النهاية سا طرح سؤال افتراضي واترك الاجابة لكم

اذا احضرنا لدولة عربية متخلفة الافراد الذين يحكمون بلد اوروبي ديمقراطي متطور هل سينجحون في قلب حال هذا البلد من التخلف الى التطور

وسؤال بالاتجاه المعاكس اذا احضرنا حكام دولة متخلفة ليقودوا بلدا اوربيا ناجحا هل سيبقى ناجحا ؟؟؟؟
الخلاصة
مشكلتنا تبدأ من الحاكم وتنتهي عند الفرد
عندما يكون الحاكم عادلا ويكون الفرد رضع التربية الصحيحة من امه ومدرسته
نكون قد وضعنا قدمنا في بداية الطريق الصحيح

لان الله اخبرنا انه سيغير حالنا عندما نبدأ نحن بالتغيير ونعزم عليه

"" ان الله لايغير ما بقوم حتى يغيروا ما بأنفسهم """

mlam7 jr7

03-25-2012, 07:01 PM

مشكور أخ أنس عالتعليق ولقرائتك للموضوع ...

بالنسبة إنو الموضوع فيه كتير افكار أخي هي مو أفكار ... هي أمثلة بتدل على صحة الفكرة الأساسية للموضوع ...

أنت قلت :

تخلف العرب ناتج عن اسباب كثيرة منها ( تسلط الحكام - الفقر - الجهل - الابتعاد عن الدين - تقليد الغرب في النواحي السلبية فقط )

بس العرب مو بس سوريا ومصر وهي الدول ... العرب الإمارات والسعودية وقطر والكويت وباقي الخليج ...

وبدون ما نحكي عن العمران اللي سببه النفط ... وين العرب من التكنولوجيا ؟ الطائرات ؟ الموبايلات ؟ أقل شي السيارات ؟

تسلط الحكام بالدول العربية حكام الخليج مو متسلطين بس الشعب ما بدو يشتغل بس ماسكين الدين وبس ... طيب بس بيسافر الطالب العربي ليدرس برا مو تحت سلطة حاكمه ونفس النتيجة .. والفقر ... العرب أقل نسبة بين شعوب العالم بالفقر ... الهند والصين أفقر من العرب بكتير بس تكنولوجياً أقوى بكتير !

أخي والجهل ما بيتعدى عحدى نحنا اللي منروحلوا برجلينا ... الابتعاد عن الدين هي شغلة رح نتحاسب عليها بالآخرة وهاد شي شخصي .. بلاد الغرب مافي دين بالمرة .. بس في عمل ....

أما الغرب ففيه سلبيات كتيرة وماحدا بينكرها بس مرات الشخص اللي عندو سلبيات بنفس الوقت هو شخص بيقوم بعمله عأكمل وجه ... متل (برلسكوني) سلبياته مفضوحة امام كل العالم بس أحسن من ألف زعيم عربي !!

بس في فكرة إنو أنا موضوعي مو ديني أبداً لأنو شفت ردك ورد الأخت سناء بيدافع بشكل عن الدين ...

نحنا منعرف إنو الإسلام بيحض على العمل بس الموضوع عن اللي زرعوا عملون بالتواكل عالدين ومنتظرين الثمرة ومو عرفانيين سبب تأخرها
ومشكور كتير عالرد والنقاش وتقبل مروري والنقد بصدر رحب وشكراً :z025:

Sanaa

03-25-2012, 11:13 PM

يعطيكي العافية عالجهود وإذا هيك مو مشكلة ... الغاية من الموضوع هو النقاش
وإذا متل ما قلتي إنو يمكن يصير النقاش حول الفكرة المحذوفة فهاد الشي بيضيع محور النقاش وما بدنا ياه ...
بس يمكن آخر جزء بالموضوع صفي بلا ترابط ... بس مو مشكلة ^^
بشكر اهتمامك

شكرا لتفهمك ....

بالنسبة للجزء الأخير ... انا حاسة انو تمام ... يمكن انت لأنو في افكار كتبتها و راحت ... حاسس انو في نقص !

بس يلي بيقرا الموضوع بشكل عام ... ما بعتقد رح يحس بعدم وجود ترابط بآخر جزء :)

تحيتي لك ... و باننظار كل جديدك

Sanaa

03-25-2012, 11:33 PM

في النهاية سا طرح سؤال افتراضي واترك الاجابة لكم

اذا احضرنا لدولة عربية متخلفة الافراد الذين يحكمون بلد اوروبي ديمقراطي متطور هل سينجحون في قلب حال هذا البلد من التخلف الى التطور

وسؤال بالاتجاه المعاكس اذا احضرنا حكام دولة متخلفة ليقودوا بلدا اوربيا ناجحا هل سيبقى ناجحا ؟؟؟؟

بالنسبة لهدول السؤالين .. أكيد الجواب عليهم " لااء " ... و هون في نقطتين :

النقطة الأولى :
ببساطة انت عم تفترض وضع اشخاص ( نشأوا و اتربوا ببيئة معينة و اتشربوا كل افكارها و اتعودوا على نمط حياة معين مرتبط بهالبيئة ) بمكان مختلف كلياً بكل ما فيه ....

و بالتالي رح يحتاجوا وقت كتير كبير ليقدروا يتكيفوا مع معطيات الوضع الجديد ( المختلف تماما عن واقعهم ... ) ... طبعا " إذا قدروا يتكيفوا " ...

لكل مجتمع من المجتمعات خصوصيته ... من المستحيل تطبيق سياسات و أفكار مجتمع معين على مجتمع تاني بدون اجراء تعديلات بتتناسب مع طبيعة كل مجتمع على حدا ...
فــ كل شخص بالعالم هو عبارة عن جزء من مجتمعه ... و افكار الشخص و معتقداته و قناعاته مُستقاة من البيئة يلي بينتمي لها !! و هاد بيعني انو كتير صعب لاي شخص ينخرط بمجتمع جديد و مختلف ... و يقدر يأثر فيه بشكل فعّال و إيجابي !!

و النقطة المهمة التانية:
أنو مهما حاولت هالمجموعة ( المفترضة ) تغير و تغير .... هل رح تقدر تغير كل الأفراد بالمجتمع !!
نحنا لما بنحكي عن مجتمع معين ... بنكون عم نحكي عن مجموعة كبيرة كتير من الأفراد .... المجتمع مو مرتبط بمجرد شخص او عدة اشخاص !!

و بالتالي اجراء أي تغيير بأي مجتمع بحاجة لجملة متكاملة و مترابطة من التغييرات الجذرية يلي بتبتدي من داخل كل فرد بالمجتمع ... و بتشمل كل نواحي الحياة ...

( و طبعا متل ما ذكرت .. إن الله لا يغير ما بقوم حتى يغيروا ما بأنفسهم )

انس.

03-25-2012, 11:58 PM

Sanaa

03-25-2012, 11:59 PM

مشكور أخ أنس عالتعليق ولقرائتك للموضوع ...

بالنسبة إنو الموضوع فيه كتير افكار أخي هي مو أفكار ... هي أمثلة بتدل على صحة الفكرة الأساسية للموضوع ...

أنت قلت :

بس العرب مو بس سوريا ومصر وهي الدول ... العرب الإمارات والسعودية وقطر والكويت وباقي الخليج ...

وبدون ما نحكي عن العمران اللي سببه النفط ... وين العرب من التكنولوجيا ؟ الطائرات ؟ الموبايلات ؟ أقل شي السيارات ؟

تسلط الحكام بالدول العربية حكام الخليج مو متسلطين بس الشعب ما بدو يشتغل بس ماسكين الدين وبس ... طيب بس بيسافر الطالب العربي ليدرس برا مو تحت سلطة حاكمه ونفس النتيجة .. والفقر ... العرب أقل نسبة بين شعوب العالم بالفقر ... الهند والصين أفقر من العرب بكتير بس تكنولوجياً أقوى بكتير !

أخي والجهل ما بيتعدى عحدى نحنا اللي منروحلوا برجلينا ... الابتعاد عن الدين هي شغلة رح نتحاسب عليها بالآخرة وهاد شي شخصي .. بلاد الغرب مافي دين بالمرة .. بس في عمل ....

أما الغرب ففيه سلبيات كتيرة وماحدا بينكرها بس مرات الشخص اللي عندو سلبيات بنفس الوقت هو شخص بيقوم بعمله عأكمل وجه ... متل (برلسكوني) سلبياته مفضوحة امام كل العالم بس أحسن من ألف زعيم عربي !!

بس في فكرة إنو أنا موضوعي مو ديني أبداً لأنو شفت ردك ورد الأخت سناء بيدافع بشكل عن الدين ...

نحنا منعرف إنو الإسلام بيحض على العمل بس الموضوع عن اللي زرعوا عملون بالتواكل عالدين ومنتظرين الثمرة ومو عرفانيين سبب تأخرها
ومشكور كتير عالرد والنقاش وتقبل مروري والنقد بصدر رحب وشكراً :z025:

فعلا كلامك صحيح و لكن بشكل نسبي ... :)

على الرغم من وجود مشكلات مجتمعية تعتبر العائق الأساسي امام مبادرات الأفراد و ابداعاتهم ( و الأمثلة على هالشي كتيير ) ... ما فينا ننكر انو الأفراد بحد ذاتهم عندهم نوع من الاتكالية و قلة الإحساس بالمسؤولية ...

بس السؤال هون ليش يا ترى ؟؟!!

أكيد هاد الشي مو مولود معهم بالفطرة !!
هاد شي مكتسب .... ابتداء من العائلة المحيطة و انتهاء بالمجتمع بشكل كامل !!

بالغرب الكل متعود ع العمل و العلم لأنو هاد الشي الطبيعي هنيك ... المجتمع الغربي من زمان هيك و استمر هيك من جيل لجيل ...
بالمقابل المجتمع العربي مبني ع الروتين و البيروقراطية و الاتكالية و كمان استمر هيك من جيل لجيل !!!

المجتمع العربي اتعود يعتمد على غيرو ... على مبدأ ... طالما هنن عم ينتجوا و يبتكروا ... خلص نحنا بنستهلك يلي عم ينتجوه ... و بلا وجع راس !!

سبق و ذكرت بمشاركتي السابقة شغلة واقعية جدا ... احيانا بيكون فعلا في شخص ( عربي ) مختلف و مميز ... هاد الشخص غالبا بتلاقيه عم يعاني كتير بحياتو ... لأنو عايش ضمن منظومة مجتمعية ما بيقدر لحالو يغيرها !!

و بالعكس ما بيلاقي أي دعم لامكانياتو و لأفكارو و لجهودو ... و مهما صبر ... طالما هو جزء من هالمنظومة ... رح يوصل لنقطة ييأس فيها ( اما بيقرر يسافر لبرا ... او بيقرر يكمل حياتو بما يتناسب مع هالمنظومة !!)

تغيير هالمنظومة بحاجة لتغيير جذري ... لانو هاد نمط حياة متأصل و متوارث من جيل لجيل !!

اهم شي .. وجود نية حقيقة للتغيير ( بمعنى ما ننتظر غيرنا يتغير ... لحتى نقرر نحنا نتغير ... لو كل واحد ابتدا من نفسو ... بشكل تدريجي رح نلاقي ملامح التغيير عم تشمل المجتمع بشكل كامل .. ) .....

نحنا بنقدر فعلا نكون احسن و بنقدر نطور مجتمعاتنا ... لما بتتوفر النية الحقيقية عند الكل ( من أصغر فرد ... لأكبر فرد بالمجتمع ) ... مع ضرورة اقتران النية بالعمل الجدي الفعّال ( مع الاتكال على رب العالمين ) ....

دمعة فرح

03-26-2012, 12:33 AM

بسم الله ...

بصراحة الموضوع غاية في التميز والروعة
كل الافكار اللي انطرحت كنت فكر فيها بداخلي ..
وكل التساؤلات جاوبت عليها سناء .. ابسط مثال انه الموظف العربي بيفيق متأخر وبيوصل على شغله متأخر
لو رجع لمفهوم الدين الصحيح ومليون خط تحت كلمة صحيح .. لكان عرف انو ربنا سبحانه وتعالى بيوزع الارزاق بعد الفجر
وهوه نايم للضهر وبيقول يارب ارزقني .. وعلى هالموال !
واذا واحد منا مر بضيق او مشكلة .. فرش سجادة الصلاة وقال يارب !
بتنحل مشكلته من هون بينسى ربه من هون ( مو الكل )
الغرب عرف يقسم وينظم وقته على طريقة الدين الصحيح .. بس هنن ما عم يعملو هيك كرمال الدين
وانما لقو بهالشي الحياة الطبيعية والحلوة ..
اما نحنا !! فحدث ولا حرج ..
اعتذر لاني ما تطرقت لكل زاوية بالموضوع لكن الاخوة سناء وانس وحضرتك كفيتو ووفيتو
واولا واخيرا ..{ ان الله لا يغير ما بقوم حتى يغيرو ما بانفسهم واذا اراد الله بقومٍ سوءً فلا مرد له وما لهم من دونه من والٍ }

تحيـآآآتي لحضرتك اخي ..
وتم التقييمـ

mlam7 jr7

03-26-2012, 01:59 AM

شكرا لك ايضا .....

وموضوعك يحفز على الحوار والتقاش

اتوقع اننا متفقين كما ذكرت انت ان الموضوع ليس دينيا

فالدين لاعلاقة له ابدا بتخلفنا

تخلف العرب ناتج عن الفهم الخاطئ في الدين

ولو طبقنا تعاليم الدين الصحيح لعادت الدولة الاسلامية كما كانت في عصورها الذهبية

من ناحية ثانية من قال لك ان حكام الخليج غير متسلطين ؟؟؟

متسلطين ونص وخمسة ؟؟؟؟؟

هل يستطيع احد في الخليج ان يقول لانريد هذا الامير او هذا الملك ونريد انتخابات ووووو

اليس تسلطا ان يموت امير وتكون ثروته 250 مليار دولار ؟؟؟؟؟

وليس صحيحا ان الدول العربية من اغنى الدول اذا علمنا ان الناتج الوطني لاسبانيا اكبر من الناتج الوطني لكل الدول العربية مجتمعة ( الرسمي طبعا وليس المسروق)

حكام العرب همهم جمع ثرواتهم الشخصية فقط وليس بناء مصانع ثقيلة او خفيفة

وليس نشر العلم والتطور والبحث العلمي علما ان الصهاينة ينفقون على البحث العلمي اضعاف اضعاف ماينفق العرب عليها

من هنا ذكرت ان اول سبب في تخلفنا هم وش البسطة حكامنا الافاضل

وبمناسبة ذكر الصهاينة فهم ليس وحدهم في مواجهتنا هناك من من يقف ورائهم ويساندهم امريكا واوروبا

ولايمكن للدول العربية ولو كانوا مئة دولة ان يفعلوا شيئا لو استمروا على حالتهم هذه

حكيك صح أخي أنس وحكام العرب كلون صدقني سعر كراسيهون الخشب اللي بيقعدوا عليها أغلى من العقول اللي بروسون

يوم منحكي عن حكام الخليج إنه متسلطين سياسياً صح ...
بس حياة المواطن بعيداً عن السياسة شو ناقصو ليكون مبدع ؟

المواطن الخليجي عنده كل الشروط اللازمة لأي طالب لأنو يصمم ويخترع شي ... وشوف أي طالب من طلاب الخليج بيرسم أو بيعمل إنجاز بسيييييييط بيتكرم ومصاري ومراكز وجوائز

يعني هي المواطن العربي فينك تطلع عليه وهو بحالة الفقر ( في كتير بمصر والسودان والمغرب العربي وببلاد الشام ) كيف بيعمل و بتطلع عليه وهو بحالة جيدة ( دول الخليج ) كيف بيعمل !!

وفعلاً الإستعمار للبلاد العربية والحروب اللي مرت فيها بلادنا أخرنا كتير لورا بس ما بدنا ننسا اليابان بعد هيروشيما بـ 15 سنة بالضبط أنتجوا دولة اقتصادية رائدة عالمياً وما عندون لا مورد ولا نفط ولا غيره

معناتا في أمل إنو نتخلص من عقدة الحروب والإستعمار .

والله يصلحنا يا رب ... ومشكور عالمناقشة الرائعة أخ أنس

mlam7 jr7

03-26-2012, 02:08 AM

واولا واخيرا ..{ ان الله لا يغير ما بقوم حتى يغيرو ما بانفسهم واذا اراد الله بقومٍ سوءً فلا مرد له وما لهم من دونه من والٍ }

تحيـآآآتي لحضرتك اخي ..
وتم التقييمـ

وإنتي أضفتي الزبدة أختي دمعة ... مشكورة كتير لمرورك :z025: