يوميات طبشورة

[انس.]

الحلقة الاولى
كان بزمانو واحد اسمو زهدي طبشوره عم يقول لحالو لك كيف العالم عم يصير معا مصاري !! لك والله شغله صعبه كتير ومالا دوا
فككر انو يقدم على قرض ويعمل شي مشروع بعد دوامو بالوظيفه المهم بعد ماطلعت روحو طلع القرض 200 الف على زمن دولار خمسين ليره تكركب كتير وماعرف يشتغل فيون شي وكل واحد من رفقاتو ينصحو شكل لحتى فتل راسو وداخ بارضو وكربج تمام.
بعدين نصحوا اريح شي الدهب وراح اشترى فيون ليرات دهب انكليزيه مرسوم عليهم سوق اكسفورد وقلعه لندن وادنبره ......وهوه اشتراهم من هون وصار الدهب يطلع من هون
...... و نقشت معو ابن المحظوظه لك ليرات دهب هدول مو طناجر نحاس
ويلي اشتراهم ب 200 الف صارو ب 500 صاحبنا ماباع قال ليرتي عشره ووقت يصيرو 2 مليون رح بيعون ضغري (هيك بالضاد) ،،،،،وصلوا للمليون ونص وماباع وبلش يرجع شوي شوي وهوه يقول ما بعت بمليون ونص معقول بيعهم ب مليون و400 ...... مستحيل والف الف مستحيل على قوله النابلسي ان ابيعهم ........ مليون و300 هئ. مليون و200 هئ
لك بيع يازلمه شو صرلك بلا جنان. هئ. ،،،،،،، مليون وقرشك خمسه ياجميل رد مابرد ياهنا ردي مابدي ....... يبعتلك الهنا يا زهدي طبشوره لك بيع بيع رح انتف ريشي بيع

وهوه عبس ....... مارح نبيييييع ........!! ايه ....... شربوا مطر

رجعوا الدهبات لل 200 الف وضاع الحلم ياولدي ولو اني كنت اعرف خاتمتي ماكنت بدأت

اخد ال200 ورجعون للبنك مشان مايصرفون ومشان يخفف فوائد على حالو بعد مادفع 120 الف فوائد القرض محسومين من راتبو بالتقسيط
انكسر خاطرو وانجلط وسافر عن طريق المغرب ترانزيت السويد دبي صنعاء ومنها بمركب الى مقديشو
اخ يازهدي يا طبشوره لك خليك عند خط الفقر ولاتحلم تصير غني مو احسن ماتصير بالصومال

[انس.]

حلقة 2
السيد طبشورة اخد قرض وفلس وهاجر عالصومال ...دخل بين الصومالية والبعض قالوا له اشتغل على اتفاقية ولما انتهى من كتابتها بعد تعب وجهد لم يوافقوا عليها ....

طلب زهدي ثمن اتعابه فوافقو على اعطائه 12 مليون شلن ( العملة المحلية) ... طبعا هو كان متفرغا لعمله ولايعلم عن امور العملات كثيرا ففرح وظن نفسه صار من اصحاب الملايين وصار يفكر بالهجرة للسويد
اخذ الشلنات لسوق الحمدية تبع مقديشو طلعو بيسووا 10 الاف دولار فقط .... كالصاعقة نزل الخبر عليه ( ولي الليرة 8 شلن طلعت الليرة دح )....
اعترض كثيرا لدى من وظفوه على تفاهة المبلغ .. ولكنهم اشهرو السلاح في وجهه قائلين : حقك فشكة بسوق الغلا
فتيل وراء در وتدحكل من وشنا وامشي نظام منضم متل الالف وحميد ربك انو ماعبيناك بشوال عالبحر ...!!!
اخد دولاراتو طبشورة وانحشر بمركب مزدحم بالمهاجرين الى ميناء الحديدة ومنه الى صنعاء حيث طار الى استنبول ... طبعا الاتراك اوعى من اليمنية لم يتروكه بل وضعوه في مخيم كيليس ولكنه سوري ... هرب ليلا واتجه الى صديق له قام بتهريبه برا الى بلغاريا ومنها الى رومانيا اوكرانيا بولندا ثم اخيرا مركبا صغيرا من ميناء جدانسك في بحر البلطيق الى ميناء استوكهولم ..... في رحلة شاقة كلفته اكثر من عشرة الاف دولار ...

[ماهرالفيزو]

:tfker::mhtar::tfker:

[Sanaa]

مسكين هـ الزهدي طبشورة ... اديش معتر !!
حالو حال كتير من السوريين للأسف :(


ما كان حدا يتخيل انو السوري يجي يوم و يعاني كل هالمعاناة ...
و يتشنطط كل هالشنططة ....!!!


و يفوت بـ دوامة مالها نهاية ....
دوامة من الاسى و الحيرة و التشتت *_*

الله يفرج عن كل السوريين ..


الفكرة واقعية و حقيقية ...
و اسلوبك سلس و مشوق ....

يعطيك العافية



ناطرين باقي الحلقات ^_^

[ماهرالفيزو]

وما اكثر الطباشير في وطنـــــــــــــــي

[انس.]

ح3
وصل طبشورة الى السويد بعد رحلة متعبة وشاقة ... بصراحة هو توقع ان يتلقفه الامن ويستضيفه بكاسة شاي ..لكن ذلك لم يحصل .. تلقفته مجموعة من الصليب الاحمر هو ومن كان معه على المركب ...قدموا لهم الالبسة والطعام واخذوهم الى مركز استقبال .. كانت الرعاية جيدة .... بعد يومين ٍسألوه عن جوازه وفيما اذا كان بصم باحدى الدول قبل قدومه ... كان طبشورة طيبا حيث افاد انه لاداعي للبصمة فهو يعرف القراءة والكتابه !!! ضحك البوليس من جوابه .....
فيما بعد علم طبشورة عن البصمة وانه كان سيعود الى الدولة التي بصم فيها في حال علموا بها ... المهم قدم طلبا للحصول على جواز سويدي وصولا للاقامة والجنسية فيما بعد ..... علم ايضا انه سيتلقى راتبا طيلة عامين حتى يتأقلم مع جو البلد وسيقدمون له دورات لتعليم اللغة بالاضافة لمحاضرات تعريفية وتأهيلية ......لطيبته صار يقارن معاملة الغريب له مع معاملة اخوة لنا في كل شيء .. جنسية ؟؟ تبا هم مخيمات قدموا ... ضحك على نفسه من المقارنة عيب عليك ياطبشورة هذه المقارنة كل دولة حسب امكاناتها وحسب قدرتها ثم ان اخوتنا لايستطيعون اكثر من ذلك كتر خيرهم والاعداد ؟؟ عند اخوتنا عددنا كثير جدا منيح يلي رضيوا يحوننا ناقصهم هنة .... وجايين بدنا نقاسمهم اللقمة كمان ....
هنة يلي فيهم مكفيهم بعدين هون دول متقدمة مو عالم تاسع وعاشر ... ودخيلك ياطبشورة شو عطوا يعني ل الفين تلاتة عشرة ولك خمسين الف ... اخوتنا استقبلوا مئات الالوف ... خلص طبشورة خليك منصف ولاتقسى على اخوك ابن امك وابوك يلي خلفوك ...لك بس تقيلة عنجد حطونا بخيم وحطوا حراسة علينا مشان ما نهرب لمدنهم ونعمل شوشرة ... خلص طبشورة ذوق على دمك الشغلة شغلة ارقام بس فقط لاغير.... لو عدد قليل كانوا حطونا بعيونهم وعطونا الجنسية كيف لكن اخوة هدول مو شوربة ....
بعد مرور شهر احس طبشورة بالعدمية واللا مبالاة افتقد احساس لازمه طوال حياته افتقد الشعور بالخوف الشعور بالمستقبل افتقد للهموم افتقد للمشاكل والنرفزات لزمامير السيارات للزحمة للسباب والشتائم ... افتقد كل شيء ... كانت الامور تسير بشكل روتيني قاتل ..كل شيء متوفر وانسيابي ..وجهه البوليس ان لايقدم بطاقته حتى للبوليس الا اذا ابرز الشخص المقابل انه بوليس حقا .... تبا لذلك ....
هامت روحه مع الماضي ,, بحسرة ,,,, كانت الكلمات التي يسمعها ... شكرا سيدي ... اهلا سيدي .... صباح الخير سيدي ....تفضل سيدي .... بس مشكلتهم انو هنة فري كتير ..... زاغ نضروا طبشورة والتوئت رقبتو من كتر مافتلت ...ههههه ضحك من قلبه مابتكمل مع بني آدم الا يثقبا من شي نقطة ......

[انس.]

ح4
خلال عدة ايام استلم طبشورة بطاقته المؤقتة وعلم انها ستبقى معه ثلاثة شهور ثم بعد ذلك سيستلم البطاقة الدائمة .... عليه الان ان ينخرط في المجتمع الجديد ويتعلم لغتهم كانت لغة هندية اوروبية تتبع الى فرع اللغات الجرمانية الشمالية ... سمع هذه الجملة لكنه لم يفهم منها شيئا .... المهم انه سيتعلمها مهما عانى من ذلك ..... تخيل نفسك تعيش في مجتمع ولاتتكلم لغته ستكون متل الاطرش بالزفة والاخرس كمان : كذا مرة نسي طبشورة وسأل البياع : باديش هي معلم ؟؟ لاء راعينا حبيب قبل حتى مايرفع حواجبو البياع استغرابا ؟.......


في قسم الهجرة كان هناك مترجما وعرف طبشورة انه بعد خمس سنوات سيصبح مواطنا سويديا .... اي بتكون انحلت برجع على بلدي شو بدي بالهشنططة ..... شو هاللغة هي ..... بعد الكبرا جبة حمرا ....
استفاق باكرا على غير العادة اليوم اول راتب سيحصل عليه من دون عمل ياعيني ياطبشورة طول عمرك بتشتغل متل التور ومابتحصل الا فرنكات ياعيني ....عم يقولوا الف يورو.... ياسلام سلم الحيطة بتتكلم .....

في تلك الايام المعدودة من وصوله لم يحتاج لشئ .... كان الطعام يقدم مجانا ولم يضطر حتى لشراء قطعة خبز
بعد انتظار بسيط وصل دوره واستلم من الموظف 1800 كرونة ؟؟؟
سأله باستغراب ليش مو الف يورو ؟؟ لم يفهم الموظف عليه كالعادة واكتفى بابتسامة خفيفة معتقدا انه يشكره بسبب وجه طبشورة الدائري حيث تظنه مبتسما دائما ولكنها في الحقيقة خلقة ربانية ولا يد له فيها
كان يقف بجانبه مهاجرا صار له شهرين فجاوبه : ههههه لاء سلبة هي شغلة الالف يورو اصلا هون بيتعاملوا بالكرونة مو باليورو ....
طبشورة : كل فكري انو اتحاد اوروبي وعملة موحدة شو القصة ؟؟ بعدين اديش بتسوى هالكرونة ؟
المهاجر : الدولار 6 كرونة ... لاتطلع الة حاسبة انا بقلك بيطلعوا 300 دولار واطمن بعد تلت شهور بس تصير معك بطاقة الاقامة الدائمة بجيبتك بيصير راتبك حوالي 7000 كرونة يعني تقريبا 1200 دولار
طبشورة : يسلمو حبيب وانا كنت مستني الف يورو هلأ ....... ماشي الحال كرونة مكرونة كلو ماشي لنشوف اخرتا


دس طبشورة النقود في جيبه وتوجه الى الفندق ...
لم يصدق طبشورة انهم وضعوه في فندق اربعة نجوم ريثما يجدوا له بيتا مناسبا ...

كانت الحكومة السويدية تقدم السكن حسب حجم العائلة ومنهم من حصل على بيتا جيدا حسب ماهو متوفر لدى قسم الهجرة ..كان موعودا ببيت صغير ربما غرفتين ليستطيع ان يتابع حياته ....

[Sanaa]

على الرغم من كل " الميزات " ... يلي ممكن نلاقيها بـ بلاد تانية ...
ما في شي ممكن يغنينا عن حضن وطنا .....
لك حتى سلبياتو ... بنشتاقلها ..... و بنستفقدلها ...
بـ بساطة .... لانو وطنا .....!!

البطل " زهدي " ... كان هالمرة محظوظ ....
انو قدر وصل ع السويد .... بـ امان و سلامة ...
كلنا بنعرف اديش في سوريين ما قدروا يوصلوا اصلا .... !!
هربوا من الموت بـ بلدهم .... لقوه ناطرهم ع الطريق :(


الشي التاني .... انو مهما قدمت الدول التانية للسوري ...
و مهما حصل على مزايا ووووو .....
رح يبقى غريب .... و رح يتم التعامل معو على أنو غريب !


زهدي ... شخصية مرسومة و موصوفة بـ عناية و دقة فائقة ....
هو فعليا عبارة عن نموذج و مثال حي .... عن معظم السوريين يلي وصلوا لهنيك .....


الشي المميز جدا بـ سردك .... الواقعية ....
عم تقوم بـ توصيف الواقع ... بـ طريقة دقيقة مشوقة و طريفة جدا :)

حاسة حالي ... بعرف حدا اسمو زهدي طبشورة فعلا ...
و عم يحكيلي شو صار معو بـ السويد ... بـ التفصيل ! :)
و هاد بيدل طبعا على حرفيتك العالية بـ الكتابة ......

شكرا الك ...
و ناطرين التتمة طبعا ^_^

[انس.]

ح5
تعرف طبشورة على أفراد من الجالية السورية هناك ... كانت جالية تكبر بسرعة ... خلال عامين دخل مايزيد عن 15 الف سوري ......

خلال الاسبوع الاول لم تهضم معدته خبز السمون او الوجبات السريعة .... كانت غالية الثمن أيضا تعلم أن يحضر الطعام بنفسه ودلوه على فرن صاحبه سوري يقدم الخبز الذي تعودت معدته على تناوله طيله سنواته العجاف التي عاشها ... شعر بالحسرة على نفسه وعلى بلده ... اجت الحزينة تفرح ..... طوال حياته عاش مهموما فعائلته تنتمي لطبقة الكوارث ... يرن الهاتف صباحا : كيفك طبشورة ابن اختك بالمشفى طرئتوا هوندايه ........ وبعد اسبوع .... يازهدي خالك بالمشفى اجتو جلطه ..... ويمكن بنفس اليوم .... ابنك رسب بصفو ,,, واختك عم تلد قيصرية .... والشهر يلي بعدو ابن حماك اجا اخلاء من بيتو بالحواكير افا الرازي بدو يروح بيتو بالقص و ستك وقعت وانكسر حوضا وركبولا مسمار ... وهكذا من طابوسة لطابوسة ولسان حالو :: له له والله زعلتني على عمي وخالي وستي وابني وجدي وابن مرت خال عمة كنة سلف ابن حمايي... ليه هيك عم يصير معنا .....ليش ليش ليش

استلم زهدي بطاقة الصراف الالي لاستلام راتبه الشهري وتفرغ لداسة اللغة السويدية 13 ساعة باليوم بعد ان علم ان هناك مكأفات مالية تصل ل 30 الف كرونة في حال اتقن اللغة ب 9 اشهر فقط محدثا نفسه : انا امي جابتني ب9 شهور مارح لحق اتعلم هالسنسكريتي بالهمدة !! بلحق ونص وخمسة كمان

طبعا بعد اتقان اللغة سيقوم بتعلم مهنة ما يستطيع ا ن يعيش من خلالها .........الحنفية ستنقطع يوما ما .... وحتى الدراسة او تعلم حرفة يمكن ان يكون مجانا على حسابهم .... شي متل الكذب والافلمة .....

تجول في الاسواق ... كان العراقيين سبقوا السوريين في الهجرة للسويد واعدادهم أكبر .... كل بلد فيها مشاكل تجدهم هنا ... تجد صومالية وافغان ايضا ومعظمهم هبط من الفضاء على السويد حسب طلب القانون كي يستطيعون الحصول على الاقامة وهنا فهم طبشورة قصة البصمة اذا بصم في احدى الدول الاوربية على اللجوء لايحق له ان يطلبها في دولة ثانية وسيعود من حيث اتى لذلك افضل طريقة ان يأتي تهريب ......

كأن حظ طبشورة انقلب في السويدعن حظه سابقا ..... تعرف على فتاة سويدية تعشق اللغة العربية وهي مجال دراستها وتتكلم عربي مكسر ايضا ... تعرف عليها في احد المطاعم وبالاصح هي تعرفت عليه عندما وجدته يدندن أغنية عربية شهيرة : تيرشرش دغ الماني
يا بو الشويرا الحمره و ناشرها ع الرمانه
دغ الماني دغ الماني
طولك يا عود الريحان و العيون الغزلاني
دغ الماني دغ سويدي كلو ماشي

صاحت الفتاة انت اربي... صه ؟؟... ......
رد طبشورة : اي اربي اربي ,,,,,,, صح مدري صه متل مابدك
.......... اربي شوي لنتعرف
يتبــــــــــــــــــــــــــــــــــــــــــــع

[Sanaa]

ههههههه فعلا مسكين بيطلع من طابوسة لـ طابوسة ...

بس شكلها هلأ كل طوابيس حياتو رح تنشف ...
و الحياة بلشت تورجيه سنها " تضحكلو يعني " :)


و القصة شكلها بلشت تحلى و تشوق اكتر .....
ان شاء الله تكون الحلقة السادسة قريبة ههههه


متـــابعة ...............

[انس.]

ح6
كانت جوانا مولعة بتاريخ الشرق بالاضافة الى تخصصها الدراسي ايضا وأخبرته انها قامت بزيارات متعددة الى مصر وسورية والامارات ... كانت ودودة ومحببة ... لها قوام جميل...... نحيلة ...ابتسامتها حاضرة.... وتملك شعرا أحمر اللون ووجه طفولي مليء بحبات النمش التي أكسبتها مزيدا من الجاذبية .....
كانت أسرع صداقة مرت على طبشورة ... شعر بالسرور معها وصارت لقاءاتهم شبه يومية وكانت جوانا تزيد معلوماتها عن الشرق وتتعلم مفردات ومصطلحات جديدة من زهدي... كانت تعابيره تضحكها فيما كان يبذل جهدا كبيرا عند محاولته ايصال معنى مصطلح عامي اليها ...
أطلعته بدورها هي على المعالم الاساسية باستوكهولم ... الحدائق والمنتزهات و التجمعات التجارية

بعد يومين فقط اقترحت عليه ان يسكن مع عائلتها لمدة شهر ليستطيع تعلم اللغة بشكل سريع ويستطيع ان يكسب مكأفاة اتقان اللغة ....

صداقة غريبة فعلا قال في نفسه ولم يكن في خيال زهدي في يوم من الايام ان يتعرف على سويدية ... ايه يادنيا غريبة عجيبة ......

في غالب أحاديثهم كان يحدثها بشكل مختلط فصحى وعامي.... ربما أراد أن يظهر نفسه كمثقف أو أنه كان يقلدها باعتبارها كنت تتحدث باللغة الفصحى حسب ماتعلمتها في الجامعة بالمقابل هي تعلمت منه بعض الكلمات العامية وصارت تقلده .....

- جوانا : هل انت متزوز زهدي ؟ ....وأالم أيدا أنكم تنادو بأدكم بأبو ... أنت أبو سو ؟؟

- زهدي : يكتم ضحكة عالية من طريقة كلامها ويحولها الى ابتسامة : كلا لست متزوز .... لسه اقصد لم يرد الله بعد ........ ( بس قصدي لكن) ... بينادولي أبو الزوز

_ جوانا : زوز ؟؟؟

زهدي : هههههه معك حق هاد دلع لزهدي نحنا هيك بالشرق كلشي منحب ندلعو .... مالك علييي يمين

تقاطعه جوانا : مامأنى .. مالك الليي يمين ؟؟

هون زهدي كربج شوي وتلبك قال لها يعني متل حلفان بالله بس أنو بدون مايحلف او انو معناها ان كل انواع اليمين مستعد ان احلفها لتصدقي ... هية عادة منقولا لما بدنا نأكد كلامنا ان صح مية بالمية .. شوبدك بالطويل خلينا بالمهم شو كنت عم قلك انا ؟

جوانا تضحك من قلبها ؟؟ ما مأنى سو بدك بالطويل ؟؟

زهدي : هوهوهو علينا....... يعني شوبدك بطولة السيرة خلينا بالمفيد....... يعني لندع الاشياء غير المهمة والتي تكون حديثا طويلا غير مهما ...... فهمتي شلون عليي ؟

جوانا : ههههه...... زريف انتة ابو الزوز

زهدي : وانتي زريفة كمانة...... يحرء حريشك شو قشطة

جوانا : يهرء هريشك ؟؟ ممكن شتيمة ؟؟

زهدي : لاءة مو شتيمة...... هي تقال للتحبب متل (غيت اوت اوف هير) بالانكليزي

اخ يأبو زهدي الشاغوري عينك تشوف ابنك زهدي بالسويد شو عم يبدع وانتي يلي كنت تقول عنو فاشل ومارح يصير بحياتو ...

كانت عائلة جوانا مؤلفة من خمسة افراد الام والاب وجوانا واخويها مارك وبيتر ..

.. حزم زهدي حقيبته وانتقل للسكن مع جوانا ......

[Sanaa]

شو مهضوم هـ الزوز ( يعني هالجوز ) ... جوانا و طبشورة هههههه
شكلها الأحداث رح تصير مشوقة اكتر ....
و زهدي ... رح تتزهزه حياتو و تتلون ... بعد ما كانت ابيض و اسود ! :)


الحلو انو اتفرعت القصة ....
و صار فيها كذا خط .....
و انقلبت مجريات الأمور " بالنسبة للبطل " .....
و الأحلى طريقة السرد الممتعة و الطريفة .....


ناطرين التتمة طبعا ^_^

[انس.]

ح قبل الاخيرة

استفاد زهدي كثيرا من اقامته مع عائلة جوانا و صار تعلم اللغة اسهل بكثير في ظل تواجد من يحاوره طيلة الوقت وخاصة ان العائلة كانت محبة للاجتماع والتآلف سريعا ... كانوا يجلسون سوية ويضحكون كثيرا وكانت جوانا هي المترجمة لمعظم الاحاديث ولكن حقيقة ان دور الترجمة كان يتناقص بشكل ملحوظ بسبب سرعة زهدي بتعلم اللغة ......
كانو يسألوه وهو يجيب بطريقة مضحكة غريبة .. سألوه مثلا ماذا يحدث عندكم ؟؟ فيجيب : ويده للاعلى لك شو بيعرفني ؟ ضاعت الطاسة والطابة وراحت الفكرة واجت السكرة وحساب السرايا ما اجا على حساب الكرايا ووين كنا ووين صرنا وليش عملوا وليش عملنا وهاد ضدنا وهاد يمنا وكلشي مخربط بس واضح وبدك مين يفتح ويفهم وبدك مين عندو قلب ومين عندو احساس وبدك مين يشوف ومين يسمع وكاني ماني وماحدا لحدا وكل حدا نايم على خدو وماعم يسمع حدا لوكان حدو ......

لنكن واقعيين جوانا أحبت طبشورة لأنها كانت تبحث عن شيء مختلف كانت محبة للتغيير وذلك يفسر سبب دراستها لتاريخ الشرق .. صارحته بحبها بعد مرور شهر واحد فقط وهكذا قرر أن يستمر بالاقامة في بيت العائلة حتى اشعار آخر بعد أن جعلت جوانا أبيها يدعوه لذلك !!
تذكر طبشورة وجه الزعيم في الواد سيدالشغال وقوله :: دول ناس طييين أوي ياااا خااااال :: هههههه طلعوا السويديين أطيب وأطيب...
عاش في صراع رهيب فيما يحاول أن ينسى كل ماضيه مع مايحتويه من مآسي وعذابات وصولا للانسلاخ عنه نهائيا وبين ذكريات لاتريد أن تتركه في سبيله .....معلقة به تعلق الرضيع بثديي أمه ......

تبا لكل الماضي سأنساه وٍسأغير اسمي... لطالما كرهه ..أباه سماه على اسم جده , وطبشورة أيضا لا أريد أن يذكرني أحدهم به ... أخذ يحدث نفسه ...

في مكتب القاضي يسأله : ماهو الاسم الذي ترغب أن نكتبه في سجلاتنا ...؟
يجيب زهدي طبشورة : وودي باركر ..... وودي بدلا من زهدي وباركر بدلا من طبشورة !!

طبعا الاسم بذل مجهودا كبيرا لانتقائه بمساعدة صديق سوري تعرف اليه بأحد اللقاءات اسمه استيفان ديلما بعد أن أخبره أن اسمه الحقيقي اسماعيل كمخة .......وقام بتبديله في المحكمة

ضحك باركر كثيرا عندما أخبره ستيفان باسمه الحقيقي وذكره بفارس الحلو في مسلسل أبو الهنا حيث كان يملك نفس الاسم وتذكر طريقة ضربه لاولاده وطريقته المضحكة في الضرب على بطنه مرارا وتكرارا .... آخ يابلد ..

حقيقة وللانصاف جزء كبير من اصدقائه السوريين استنكروا فعلته بتغيير اسمه وعدوه نكرانا للجميل الذي أغدقه عليه أهله والوطن والماضي وقالو ان من ليس له ماضي ليس له مستقبل وان طريقته في الانكار معيبة ومخجلة ....

هنا باركر دافع عن نفسه بقوله : أنو نكران وأنو جميل وأنو هنا ..لك شوبدي اتذكر منك يا سفرجل كل عضة بغصة
هلأ اذا غيرت اسمي..... رح يتكركب الوطن يعني ؟؟ وياسيدي اذا انا مو منيح بيكون الوطن خلص مني وارتاح من همي


أقنع باركر ابو جوانا بمشروع سيجعله يضاعف ثروته مرات عديدة خلال سنتين فقط .......

[Sanaa]

حلوو ... مبروك على طبشورة الاسم الجديد الشيك " وودي باركر " :)
و هون بدي عقب على نقطة مهمة حضرتك ذكرتها .....

رفقاتو لاموا لانو غير اسمو .... و هون أثرت قضية حقيقية و مهمة فعلا ....
و هي اعتماد الناس على معايير غير ذات قيمة ... لإطلاق الأحكام ع الآخرين !!!
مشكلة من ضمن مشاكلنا الكتيرة ......

اعتبروا تغيير الاسم ... خيانة للوطن !!
ربطوا ما بين الاسم ... و درجة الإخلاص و الولاء للوطن !
ليش يا ترى ... الأشخاص يلي عم يخونوا الوطن و يأذوه فعلا ... اسماءهم أجنبية ؟؟
و لا عربية صرفـــة ؟؟؟؟!!!!!

طبعا انا ما عم قول انو انا مع تغيير الشخص لاسمو ... بس كمان مو ضد هالشي
هاد الموضوع شخصي ...... و مو المفروض يتم الربط بينو و بين درجة الارتباط بـ الوطن !



كـ العادة سرد ممتع ....
و فكر خصب .....

ناطرين الحلقة الأخيرة ...
و النهاية يلي بنتمنى تكون سعيدة .... لـ طبشورة أو باركر ^_^