الشام هي رائحة البن بالبزورية
وعجقة سوق الحميدية
وصلاة العيد بالاموي
وزيارة قصر العظم
هي اكل الدرا المشوي بالروضة
والبوظة عند دامر
هي تلجات بلودان
وزهر الغوطة
هي سيران الشادروان
والمشاوي بالفيجة
والبطيخة بالنبع
وكرز مضايا وسفرجل الاشرفية وجانرك بسيمة ووادي بردى
هي النومة بارض الديار بعد الشطف
والياسمين والنارنج والكباد
هي شرب مية الفيجة الباردة من الحنفية بيوم صيف
وعرقسوس رمضان والتمر الهندي وتوت الشام
الشام هي اجتماع العيلة وسكوت الجميع بالبيت والمحلات
ولايبقى سوى الراديو لنسمع المساعد جميل والرائد هشام وطبعا الأستاذ مصباح المتهم
بمعظم القضايا في حكم العدالة كل يوم ثلاثاء
هي مايطلبه الجمهور يوم الأربعاء لمشاهدة ... أحدث الأغاني
هي موسيقى غدا نلتقي يوميا قبل النوم
هي سوق الجمعة آخر الليل وخبز التنور مع الفول عند بوز الجدي وجمعة الشباب الحلوة
هي روحة الشلة على حمام السوق وأكلة التسقيية بالسمنة مع الصنوبر..... جووات الحمام
هي طلعة مضايا مع الشلة والرعبة من دوريات التفتيش
أن تكشف البواط الإيطالية وجاكيتات الجلد..... يللي لابسينها
هي الكنافة النابلسية عند أباظة
هي شاورمة أبو العبد يللي بدك تاكللك شي عشرة ولسا بدك أكتر
هي الشوكلامو بالتوليدو جنب جنينة الجاحظ .....أيام ماكان.. توليدو
لكل شامي ومحب للشام
كلمات رائعة بتوصف الام الحنون (( الشام ))
