أواسيك... بقلم محمد عبد الوهاب جسري
إالى عيون الوطن
إلى كل المحبـين والعاشـقين، ومن هم في حبهم متخاصمين
إلى كل من وقف معي من المشجعين.....
باللهجة العامية القريبة إلى البدوية.... أواسيك
أحبك ..... أطبطب جراحك ..... أداويك
ألمس خدودك ... أمسح جفونك .... أرشف مآسيك
أضمك لصدري .... من بردك أنا أدفيك
أرفع وجهي للسما وأنادي إلهي يشوف نيتي ويعطيني ويعطيك
صبر افتقدناه ...... حلم وعلم... ياريتهم موجودين فيّ وفيك
لا حبيبي .... لا تطلع بعيوني ..... لاتشوف دموعي .. أخجل أجاريك
لا حبيبي .... لاتفتح صدري ..... ممكن تشوف قلبي كيف معلق فيك
ممكن تشوفو كيف بيرقص لما بيسمع اسمك ....لما أنا أناديك
ممكن تشوف صورتك معلقة بجدرانه ممكن تسمع أغانيك
رح تمضى السهرة ... رح يجي بكرا ... وأنت بتعرف اني رح أتصل فيك
رح قللك لا تزعل حبيبي ... خليك متأكد ان المكتوب لك رح يجيك
عيش برضا .. عيش بسعادة ... عيش بهنا .. عيش حياتك متل ما بتأمر معاليك
حبيبي لا تسابقني بالهوى أنا متأكد انها رح تفشل مساعيك
حبي الك اكثر ... حبي الك أكبر...حتى صرت أنت الملك و صرنا نحنا المماليك
أنا أطبطب جراحك ..... أنا أداويك
شوفني كيف رافع ايدي للسما ..... وأدعيلك ربي لكل الخير يهديك
وأدعيلك ربي .... كل العمر مع اللي تحبو يسعدك ويهنيك
حبيبي أنا ، ما يهون علي أتركك ما أواسيك
حبيبي أنا يصعب علي أجافيك
حبيبي أنا .... مكتوب علي أحبك وطول العمر أداريك
بكرا بعاتبني القمر وبقللي ليش مع غيري قضيت لياليك
بقول له عذرا أنا شايف حبيبي هو القمر ... فتني وغدر فيك
سامرني ... فرحني .... داواني وخلاني أنسى أماسيك
خلاني أطير و أحلق في عالم تاني ....ومن ذاكرتي أمسحك وأمحيك
رح يفرح القمر ويلتفت لعندك وبابتسامة يحاكيك
ويقلـّك أنا مسامح بس قول لي شو عملت بهالعاشق الولهان فيك
بقلم محمد عبد الوهاب جسري
