أكلة حلو خفيفة ظريفة وخاصة للعزابية هههه



المغشوشة .. ( أم النارين ) .. العصملية


رح نشتري كيلو كنافة ناعمة نية ( مو مطبوخة )

بتكون على شكل خيطان رفيعة وطرية

نفرك الكنافة باليد حتى تصير متل الشلل يعني بنفرفردها مشان ما تظل معجنة وملزقة على بعض ..

بيلزمنا صينيتين من نفس القياس ..

ندهن الصينية بالسمن وبعدين رح نمد الكنافة بالصينية حسب السماكة اللي بنرغب فيها ...
ورح نكبس الكنافة بالصينية التانية لمدة 10 دقايق ..

بعد كبس الكنافة بنغمرها بالسمن الدايب ونقليها عالغاز على نار هادية حتى تحمر

وبس تحمر ويصير اللون اللي بدنا اياه .. بنصفي السمن منيح

وبنفس الطريقة رح نكرر العملية مشان نحصل على طبقة تانية من الكنافة المقلية المحمرة ..

وهيك رح يصير عنا طبقتين جاهزات من الكنافة ..

...................................

بنجي للحشوة :

في ناس بتحشيها قشطة .. أو جبن .. أو مهلبية

والأفضل تكون قشطة مع فستق حلبي مجروش ( نص الحبة )

وإن شاء الله بنشرح طريقة صنع ( القشطة المغشوشة اللي بالسوق ) هههه في حلقات قادمة ..


بنحط الطبقة الأولى من الكنافة المقلية الجاهزة

وفوقها القشطة المخلوطة بالفستق الحلبي

وبعدين الطبقة التانية من الكنافة

وبهالوقت بكون القطر جاهز وسخن

وبنسكبو عليها ... وبنزيَن الوش على حسب الرغبة

وبالأخير بيطلع معنا هيك شي



وصحتين وعافية ...

وخبرونا بالنتائج بعد التجريب
وخاصة ( ماهر الفيزو )

ملاحظة : عيار القطر لازم يكون
كاس ماء + كاس ونص سكر مع ذرة حمض الليمون ويفضل الشبَة