وتم يسبح مسافه بعيده عن السيف .. ويغوص فالبحر ويطلع .. استرخى على ظهره .. وشاف خيوط الشمس وهي تشق ظلمة الليل والنجوم تختفي مع طول الشمس في السماء .. استمتع بالمنظر الخلاب .. ورجع يسبح للسيف وقعد على رمال البحر الناعمه .. يتأمل البحر والغيوم اللي تسبح في السماء .. قام ولبس وركب السياره راجع ادراجه للبيت .. اول ما دخل البيت شاف امه وابوه قاعدين يتريقون .. سلم عليهم ..
ام فارس: ابوي انته .. اصب لك شاي ؟
فارس: اي الغاليه
بوفارس يطالعه بنص عين: وين كنت ؟
فارس: كنت رايح البحر ..
بوفارس: الاخ رومنسي ..
فارس ببرأه ضحك على باله ان ابوه يمازحه ..
بوفارس: شو اللي يضحكك؟
فارس انمحت من ويهه الابتسامه والتفت على ابوه باستغراب ..
فارس: نعم ..
بوفارس: الله ينعم عليك .. وقام طلع يتمشى فالحوش ..
فارس تم مكانه ويطالع امه باستغراب .. قام بيروح غرفته ..
ام فارس مسكته من ايده: اقعد ابوي وين رايح ..
فارس: امي انا بروح انام .. لاتقعدوني حق غدا ولا غيره ..
ام فارس: يا ولدي شو فيك تعال ..
فارس مشي ومارد على امه ..
دخل غرفته وهو يفكر في كلام ابوه ..
فارس" شو فيه الوالد هالكم يوم مو طايقني .. وينقزني فالكلام .. آآه .. هم من ولا من بتحمل "
خذ له شور سريع .. وحذف نفسه على السرير .. ونام بعمق لين اذن الظهر .. دخل عليه عبدالعزيز يقعده للصلاه ..
عبدالعزيز: فارس .. قوم اذن الظهر ..
فارس: ان شاء الله ..
طلع عبدالعزيز وهو متعجب من نومة اخوه لين الظهر ..
قام فارس بتكاسل .. وتوضأ وصلى فالغرفه .. ونزل الصاله ..
فارس: ايماني .. صبي لي شاي ..
ايمان: من عيوني ..
مريم: فارس .. تودينا بيت عمي اليوم ..
فارس: روحوا مع الدريول ..
مريم: بابا خذه معاه عشان بيشتري خيمه حق الحوش ..
فارس: زين بيرجع .. روحوا بعد ما يرجع ..
مريم: عاد نبي نروح نتغدا هناك ..
فارس وتنهد: ولا يهمكم اجهزوا .. كلكم بتروحون؟ ..
فاطمه: اي الا ماما .. بتطلع مع بابا المغرب ..
فارس: اها .. زين انا بروح فوق اريح .. ولما تجهزون نادوني .. وراح غرفته ..
كلهم تموا يطالعون بعض باستغراب .. حتى جاسم حس ان فارس فيه شي ..
دخل غرفته وتم يدور جواله .. فارس" الظاهر فالسياره ما نزلته معاي .. خل اروح اجيبه "
راح ياخذ الجوال ورجع الغرفه .. اول ما شاف التلفون . لقى تقريبا 4 مكالمات .. توقع ان المتصل محمد ولد عمه .. ولما شيك على الارقام .. طلع محمد متصل مره ومناف 3 مرات .. لما شاف رقمها بطل عيونه .. فارس " مناف متصله وما رديت .. فديتها " على طول اتصل فيها .. وهي ردت بسرعه ..
مناف: فارس انا آسفه ..
فارس: ......................
مناف: فارس والله اني آسفه ارجوك سامحني ..
فارس مبتسم: تزعل الدنيا كلها علي وما بهتم .. بس زعلج يهمني ..
مناف سكتت ما توقعت هالرد منه .. كانت خايفه انه يهاوشها .. ولما اتصلت مارد خافت انه ما راح يرجع يتصل مره ثانيه ..
مناف: والله قلبك كبير يا فارس .. انا ما استحق هالطيبه منك ..
فارس: ولا يهمج يا مناف .. قلت لج انا مازعل منج ..
مناف: امس ما قدرت انام .. عاتبت نفسي .. والاحساس بالذنب ذبحني .. مادري ليش اتصرف معاك جي ..
فارس: انتي خايفه مني ؟
مناف: ها ؟؟ اخاف .. من ايش بخاف؟
فارس: يمكن خايفه اني استغلج .. او العب بمشاعرج .. او امسك عليج شي ..صح .. وعشان هالشي انتي وايد متحفظه وجامده معاي .. سمعي يا بنت .. انا عندي خوات واخاف واغار عليهم من نسمة الهوا .. يعني ما برضى عليج وانتي وحده منهم ..
مناف بصدمه" يعدني وحده من خواته !! "
يكمل فارس: ومثل ما قلت لج .. انا احس نفسي مسؤل عنج .. اقصد انتي وهلج ..
مناف " حيرني "
يكمل فارس: يعني لا تحطين بيني وبينج حدود .. وماحب المجاملات .. مابي اعور راسج زياده .. بالكلام .. كل شي بتعرفينه مع الوقت ..
مناف: والله مادري شقولك يا فارس .. احرجتني ..
فارس: انا ملاحظ عليج انج جامده وجاده وايد معاي .. ممممم ليش تخفين مشاعرج؟
مناف: مشاعري ؟؟ شتقصد؟
فارس " شو خربطت انا ": انا اقصد يعني ليش جامده .. ليش تخفين عني الضحكه .. الكلام الطيب والاسلوب الحلو عني ..
مناف ببرأه: اها .. لاني اخاف ..
فارس: لاتخافين من شي .. ومني انا مممممم .. خافي بس شوي ..
مناف: هههههههههههه ..
فارس" فديت هالضحكه": اي قلت لج ضحكي .. ابي اسمع هالضحكه ..