بوفارس: حيالله المعرس ..
فارس بطل عيونه: هاا ..
بوفارس بعصبيه: ها فعينك ..
فارس عصب: شو فيك علي هالكم يوم ؟؟
بوفارس: لا بعد تعال اضربني ..
فارس مسك اعصابه: محشوم .. بس تصرفاتك غريبه معاي
بوفارس: لا تراددني ..
فارس نزل راسه: السموحه منك ..
بوفارس: تعال معاي برا ابيك ..
فارس: انشاء الله .. ومشى ورا ابوه .. طلعوا الحوش .. وقعد بوفارس وطلب من ولده يتم واقف ..
بوفارس: قولي .. متى تبي تعرس ؟
فارس مستغرب من السؤال: اعرس ..
بوفارس: اي تعرس .. ولا مالك نيه ..
فارس: الوقت الحالي مافكر فالزواج ..
بوفارس باسلوب استفزازي: اي ي ي ي .. زين قولي شخبار ولدك ان شاء الله الحين احسن ..
فارس بطل عيونه: ولدي ؟!! اي ولد ؟
بوفارس: اللي تتراكض فيه الاسبوع اللي فات فالمستشفى؟
فارس فهم شو يقصد ابوه .. نزل راسه وقعد عند ريول ابوه .. بوفارس استغرب ..
فارس: يبه .. هالولد ماات ..
بوفارس قام من مكانه: ها ؟؟ مات ..
فارس بحزن: مات بين ايديني يا يبه .. آآه .. ليش ذكرتني ليش ..
بوفارس: فارس انا ضعت .. من يكون هالولد .. ولدك ؟
فارس: لا يا يبه لا .. وقال لابوه سالفة مناف كامله ..
بوفارس حس بالذنب لانه ظن السوء في ولده وشك فيه .. وما كان يعامله عدل ..
بوفارس: السموحه منك يا فارس .. انا غلطان ..
فارس قام وباس راس ابوه: مسموح الغالي ..
بوفارس: لا حول ولا قوة الا بالله .. والحين شو مسوين هم ؟
فارس: على الله يا يبه .. شوي جيرانهم يطرشون لهم .. او الام تروح الشؤون الاجتماعيه .. والمشكله مو كل شهر يعطونهم .. شهر يعطونهم وشهرين لأ ..
بوفارس: يعني الصغير مات عشانه ما يحصل الاكل ..
فارس: واحنا نتبطر على النعمه ..
بوفارس: الحمدلله على كل حال .. والحين شو وضعهم ..
فارس: مادري .. من بعد المستشفى رجعتهم البيت .. ماقدر اكلمهم لان مالي علاقه فيهم لا اخوهم ولا من قرايبهم .. وماقال لابوه انه شوي وبيموت في مناف .. تموا ساكتين فتره .. وجاتهم ام فارس ..
وجاتهم ام فارس ..
ام فارس: شو فيكم ؟
بوفارس يصطنع الابتسامه: ولا شي قاعدين نسولف عن الشغل ..
ام فارس: فارس يبه شو فيك؟
فارس: ولا شي الغاليه .. بس ابي انام تعبان وايد ..
بوفارس: روح ارتاح يبه ..
ام فارس استغربت من معاملة بوفارس حق ولدها" شو سالفتهم هالثنين .. الصبح شوي وبيتهاوشون والحين ما فيهم شي"
قام فارس يبروح الغرفه .. ومسكته امه من ايده ..
ام فارس: وين يبه؟
فارس: بروح ارتاح شوي امي ..
ام فارس: ماتبي تتغدى؟
فارس: لا رفعوا لي .. باكل لي قعدت من النوم ..
بوفارس: تركي الولد يروح يرتاح ..
ام فارس: فديت عمرك .. لو بغيت شي نادني ..
فارس وهو رايح: ان شاء الله
بوفارس: ياهل عشان ادارينه هالكثر ..
ام فارس: فديت عمره .. احس فيه زعلان ولدي فديته
بوفارس: ما عليه شر .. ولا تقعدين توسوسين ..
تموا الشياب قاعدين فالحوش شوي ..
بوفارس: ام فارس .. يوم الاربعاء نبي نروح نخطب حق عبدالعزيز ..
ام فارس فرحانه: فديته ولدي ..
بوفارس: هو قال يبي صديقت مرايم اخته .. وانا سألت عن اهلها ..
ام فارس: من هي من صديقات مريم؟
بو فارس: اللي دوم تجينا ..
ام فارس: اي عرفتها .. والله هالبنت ما عليها زود ..
بوفارس: مريم كلمتها .. والبنت متقبله فكرة الزواج .. ومتقبله عبدالعزيز .. بس انا مو مطمن مادري ليش ؟؟
ام فارس: ليش؟
بوفارس: مادري من كلمني بوسعود ذاك اليوم وخوفني .. قالي انه حاس بشي غريب وخوف ناحية الموضوع ..
ام فارس: ان شاء الله ما بيصير الا كل خير ..
بوفارس: ان شاء الله .. المهم انتي كلمي الولد عشان نحدد يوم نتصلهم ونشوف متى فاضين ونمر عليهم ..
ام فارس صار الغالي ..
وتموا الشياب يسولفون ..
اما فارس اول ما راح الغرفه .. ارتمى على السرير وتم يسترجع احداث ذيك الليله .. وكأنه يسمع الاصوات في راسه .. مسك راسه وغمض عيونه بقوه وحس ان وده يصرخ بأعلى صوته .. تم فتره على هالحال .. لين ما حس انه هدى شوي .. خذ جواله واتصل بمناف ..
مناف: هلا فارس .
فارس: شو اخبارج ؟
مناف: الحمدلله .. شفيك؟
فارس: مافيني شي ..
مناف: تعبان فيك شي ..
فارس: لا ولا تعبان ولا فيني شي .. ليش ؟
مناف: صوتك متغير ..
فارس: لا مافيني شي ..
مناف: الحمدلله ..
فارس: زين انا مابطول عليج .. بس كنت حاب اسمع صوتج قبل ما نام ..
مناف" فديته": خلاص روح ارتاح الحين ..
فارس: يلا مع السلامه ..
مناف: الله وياك ..
سكر منها وهو مبتسم غمض عيونه ونام بعمق ..

الساعه 4 ونص العصر بيت بومحمد .. البنات استانسوا مع عيال عمهم .. وجاسم ارتبش مع الشباب .. دخل خالد على ابوه المكتب .. سلم عليه وقعد ..
بومحمد: شخبار بنات عمك .. ان شاء الله مستانسين؟
خالد: الحمدلله .. متونسين مع الريم والشباب ..
بومحمد: ليش فارس ولد عمك ما تغدى معاكم ؟
خالد: عنده شغل ما قدر
بومحمد: شخبار علي اخوك؟ تغدى معاكم ولا تم فالغرفه؟
خالد مبتسم: لا نزل معانا وتغدى .. بس كان وايد هادي .. تغير علي اخوي عن قبل .. وايد تغير
بومحمد: الله يهديه ان شاء الله ..
خالد" اخيرا رضى عليه الوالد": ان شاء الله .. زين يبه بغيتك في موضوع ..
بومحمد مبتسم: تفضل ابوي قول اللي بخاطرك ..
خالد متوتر: يبه انا .. احم .. وسكت فتره ..
بومحمد" وحليلك يا خالد .. متوتر اكيد يبي يخطب .. بس مو عارف شلون يفتح الموضوع معاي "
خالد: احم .. يبه انا .. انا .. ممممممم .. قررت اتزوج ..
ابتسم بومحمد: هاي الساعه المباركه يا بو وليد ..
خالد منحرج: تسلم والله ..
بومحمد: ومن اللي حاط عينك عليها؟
خالد منزل راسه: مريم بنت عمي محمد ..
بومحمد مستاس: والنعم ببنت اخوي والله ..
خالد" سلامي عليك الوالد" ..
تم بومحمد يسولف مع ولده فتره .. ودخل عليهم علي .. سلم وباس راس ابوه وقعد ..
علي: خلود شو هالوناسه ..
ابتسم خالد و رد عليه بومحمد: اخوك بيعرس ان شاء الله ..
علي مستانس: مبروك بو وليد .. تستاهل والله .. ومن بنته ؟
خالد: بنت عمي ..
علي: من فيهم عاد .. هم 3؟
خالد: ان شاء الله مريم ..
علي: والله تستاهل .. ومريم وايد طيبه و مؤدبه .. بالمبارك خالد .. وقام باس اخوه
خالد: فديتك اخوي .. الله يبارك فيك والفال لك ان شاء الله ..
بومحمد كان مستانس على محبة عياله لبعض .. وبحكم علاقة علي بخالد القويه حس ان علي وايد فرحان لاخوه .. تموا الشباب يسولفون مع ابوهم لين اذن المغرب طلعوا كلهم المسيد ..
بومحمد: سلطان . قم يلا توضأ وراك صلاه ..
سلطان: ان شاء الله ..
جاسم: عمي .. ابي اروح معاكم ..
بومحمد: مبتسم بس ريولك تعورك يبه والمسيد بعيد شوي واحنا نروح مشي ..
جاسم بحزن: عمي بس انا احب اصلي فالمسيد ..
فاضل: انا بشيلك واححنا نمشي ..
جاسم مستانس: Yes
بومحمد: بارك الله فيك يا يبه .. زين جاسم قوم توضأ لا نتأخر عن المسيد ..
فاضل: يلا الجسمي .. عشان اشيلك .. وتتذكر طول عمرك اني شلتك و وديتك المسيد ..
خالد: بل بل .. ذليته وانت للحين ما شلته ..
الكل: هههههههههههههههههه
راحوا الشباب المسيد وتموا البنات .. صلوا في البيت وبعدين تموا يسولفون مع بعض ..
ايمان: الريم .. وين ساره ؟