فارس قام عنهم: الله يساعدكم يالمقاليع ..
طلع فارس من الميلس وهو ماسك جواله ويشيك عليه .. دخل غرفته واتصل بحب حياته مناف ..
في بيت بومحمد .. الكل مجتمع على السفره ..
بومحمد: وين رحتوا اليوم ؟
محمد: عندنا شغل يبه ؟
بومحمد: مليت من شغلكم ؟ شو هالشغل ؟
علي: رحنا نودي البانشيات العزبه حق يوم الثلاثاء ..
بومحمد: زين وليش ما خليتوا الصبيان يودونهم .. وشو اللي مطلعكم كلكم من الفجر ..
علي: رحنا استعرضنا شوي ..
بومحمد: بعدين البانشيات في العزبه شلون تودونها العزبه ؟
خالد " صادوه" ..
فاضل: الغالي .. شيكنا عليها ورحنا نتسابق شوي .. كنا مودينا الكراج ..
بومحمد" والله ما يندرى شو وراكم انتوا": زين ومن راح معاكم ؟
محمد: عيال عمي عبدالعزيز وفارس ..
بومحمد: الله يستر منكم انتوا ..
الريم: يبه ..
بومحمد مبتسم لبنته: هلا يبه ..
الريم: يبه ابي اوح مع بنات عمي اشتري لي شي حق عشى الملجه ..
بومحمد: من بيوديهم ؟
الريم: مادري يمكن مع الدريول ومرت عمي .. او مع عمي ..
بومحمد: زين يبه .. متى بتروحون ؟
الريم: مادري يمكن بكره او الاحد ..
بومحمد: مو مشكله يبه .. روحي معاهم ..
دخلت اسماء راحت عند ابوها و كانت خانقتها العبره .. التفت عليها بومحمد يطالعها باستغراب ...
بومحمد: شو فيج بابا ؟
اسماء ما قدرت تمسك عمرها اكثر وصاحت ..
بومحمد خاف عليها .. وام محمد قامت من مكانها راحت عندها ..
بومحمد يمسح دموعها: ليش هالدموع ؟ حد هاوشج ؟
اسماء: بابا .. هئ هئ هئ ..
بومحمد: عيونه انتي شو فيج تكلمي .. التفت على ام محمد .. جيبي لها ماي الله يرضى عليج ..
قامت ام محمد تجيب ماي .. سقاها بومحمد وحضنها ..
بومحمد: كلميني بابا شو فيج ؟
الكل كان يطالع اسماء بخوف ..
اسماء: بابا .. الولد .. وصاحت ..
بومحمد: اي ولد شو فيج ؟
اسماء: الولد فالتلفزيون مات .. وامه تصيح عليه ..
الكل ضحك عيها: ههههههههههه ..
بومحمد: وينه .. وشلها وراح معاها الصاله ..
اسماء: خلص .. مسكينه امه تصيح عليه ..
شلها بومحمد ورجع فيها المطعم ..
بومحمد: كانت اتابع فلم وصيحها ..
علي: رقيقه اسماء ..
خالد: فديت هالرقه والله ..
ام محمد: طيرت قلبي .. انا اقول شو فيها ..
بومحمد: انا على بالي جايه من برا ..
محمد: وحليلج اسومه ..
بومحمد: كملوا غداكم ما صار شي .. حضن اسماء وتم يتغدا ..
في بيت سلمان ..
هنادي: خالي اما اليوم بتاكل من ايدي خوش غدا .. والله فات يوسف هالغدا
سلمان: اخاف يصير فيني شي ..
هنادي: خاااالي .. ليش تحطمني ..
الجوهره: هههههه .. لا هو قصده انه لو ما كل بيصير فيه شي ..
سلمان: هههههه .. اي نعم هاي قصدي ..
هنادي: صج عاد .. متفقين علي ..
سلمان: فديت هنوده الطباخه .. يلا ذوقينا من ايدينج الحلوات ..
هنادي ابتسمت بدلع: لا اكل من المطعم .. محد يمد يده على غداي ..
سلمان والجوهره: هههههههههه ..
سلمان: عفيه هنوده ذوقينا من طباخج الحلو ..
هنادي: باعذبكم ..
الجوهره: ما نعيدها بس ذوقينا ..
هنادي: ممممم .. لا ترجوني اكثر ..
سلمان مسك يدها: موووح .. يلا يالليدي هنادي .. سامحينا وارأفي بحالي ..
هنادي: زين كسرت خاطري .. جوجو يلا وراي نجهز الغدا ..
سلمان: فديتها والله .. اللي باكل من يدها ..
هنادي: اليوم بسامحك .. بس لا تعيدها ..
الكل: هههههههه ..
راحوا البنات يجهزون الغدا مع الخدامه .. بعد ما تغدوا راحت الجوهره تسوي لهم الشاي والقهوه ..
سلمان: ماشاءالله عليج يا هنوده .. نفسج فالاكل غير عن جوجو ..
هنادي: بالعافيه خالي .. بس شلون نفسي غير ؟
سلمان: جوجو طبخت هالاكله من قبل .. بس كان لها طعم غير .. وانتي طبختيها اليوم ولها طعم غير .. ماشاءالله عليكم يا بنات اختي .. الله يرزقج يا هنوده بذاك اللي ما يفكر الا في بطنه ..
هنادي: ههههه .. شدعوه خالي .. تبيني اخذ واحد دب ..
سلمان: هههههه .. دخلت الجوهره .. ومعاها الشاي والقهوه ..تقهواو بعدين كل من راح يقيل ويرتاح .. سلمان دخل غرفته وعلى طول شغل الكمبيوتر وطرش الفلم مع الصور على ايميل سميث .. تمغط وراح انسدح على السرير ونام على طول من التعب .. لانه راح مواصل ..
يوم الجمعه كان حافل بالنسبه للكل .. الشباب وخلصوا من التفجيرات بسلامه .. وتونسوا على البانشيات .. بس هاليوم كان مميز بالنسبه لفاطمه .. اللي قلبها دلها على رسالة يوسف .. استنشقت عبير الورقه بابتسامه ناعمه من شفاها الحلوه ..
فاطمه " فديت هالريحه والله .. اميزها عن بعد كيلو .. فديتك يا يوسف وفديت كلامك والله " .. طوت الرساله وخشتها في جيبها وركضت على غرفتها وهي طايره من الوناسه .. شافتها مريم ونادتها ..
مريم: فطوم ..
فاطمه وهي تركض: بعدين بعدين ..
مريم باستغراب: بعدين !! شو سالفتها فطوم الهبله .. هزت راسها وكملت طريقها رايحه الصاله .. لقت ابوها مستلقي ومعاه عبدالعزيز .. قعدت عند ابوها ..
مريم: بابا ..
بوفارس مغمض عيونه: هلا بابا ..
مريم مبتسمه: ليش ما تقيلون فوق ؟
بوفارس: اخوج نام ؟
مريم طلت في ويه عبدالعزيز: اي .. وغرقان فالنوم ..
بوفارس: كنا نسولف وسكتنا والظاهر انه نام من التعب ..
مريم: زين قوم روح فوق بابا ..
بوفارس: لا يبه بغط لي شوي لين يأذن العصر ..
مريم باست راس ابوها: تبي اقعدك قبل الاذان ؟
بوفارس ابتسم: اي يبه .. جزاج الله الف خير يا قلبي .. والله يوفقج وين ما تروحين وسدد خطاج يا رب العالمين
مريم ابتسمت لابوها باحراج: آمين .. راحت وجابت لحاف صغير ولحفت ابوها وابتسمت له وراحت غرفتها وهي فرحانه بدعوات ابوها ..
...................
يتبع
الذين يشاهدون الموضوع الآن: 4 (0 من الأعضاء و 4 زائر)
مواقع النشر (المفضلة)