البنات خذوا فاطمه وراحوا فوق بسرعه عشان يحشون .. اما فارس رن جواله ( عالي مستواه ) عبدالعزيز قعد مع امه شوي .. بوفارس راح يتصل يبشر بوخليفه ..
بوفارس: السلام عليكم والرحمه ..
يوسف: وعليكم السلام ورحمة الله وبركاته ..
بوفارس: شحالك يبه .؟
يوسف: طيب الله يسلمك ..
بوفارس: انا قلت لك بكون اول من يبارك لك .. مبروك يا يوسف ..
يوسف تذكر الرساله .. ويهه صار احمر وتم ساكت فتره ..
يوسف: الله يبارك فيك .. بس اسمحـ ......
يقاطعه بوفارس: هالكلام ما منه فايده .. وانت اثبت لي انك جاد .. ودخلت من الباب .. هالله هالله بفاطمه .. تراها غاليه .. مو بس انت اللي تغليها ..
يوسف ابتسم: فاطمه بحطها بعيوني ..
بوفارس: بارك الله فيك يبه .. والله يوفق لكم ..
يوسف: الله يسلمك الغالي ..
بوفارس: ما عطلك عن شغلك يبه .. خل اتصل بخالك وابشره ..
يوسف: الله يسلمك ..
سكر يوسف من بوفارس وكان مستانس .. سجد وتم يحمد ربه .. اما بوفارس فكان مرتاح ليوسف وايد .. اتصل بسلمان يبشره ..
بوفارس: حيالله النسيب والله ..
سلمان بفرح: الله يحيك ..
بوفارس: شو اخباركم ؟
سلمان: الحمدلله .. ومن صوبكم ؟
بوفارس: والله الحمدلله ما نشكي باس .. شو اخبار يوسف ولدنا ..؟
سلمان: يوسف طيب يسرك حاله ..
بوفارس: الحمدلله .. بشره ان البنت موافقه .. وحياكم الله ..
سلمان: الله يحيك .. خلاص عيل بنخلي باقي الكلام بين الحريم ..
بوفارس: حياهم الله ..
سلمان: الله يحيك الغالي ..
بوفارس: عزيز وغالي يبه .. ما عطلك ..
سلمان: الله وياك ..
سكر سلمان واتصل بيوسف يبشره .. يوسف سوا نفسه مايدري .. رد على خاله ..
سلمان: حيالله معرسنا ..
يوسف: الله يبشرك بالخير يا خالي ..
سلمان: والله تستاهل يا ولد خليفه .. الله عطاك على قد نيتك ..
يوسف: الله يسلمك يا خالي ..
سلمان: زين خل اتصل على البنات ابشرهم ..
يوسف: الله وياك خالي ..
يوسف وفاطمه كانوا اسعد ثنين فالعالم .. واخيرا تحقق حلمهم بانهم يكون لبعض ..
اتصل سلمان للجوهره يبشرها .. و وايد فرحت بهالخبر .. وبعدين اتصل بهنادي .. وهنادي قامت تصرخ من الوناسه ..
هنادي: ياااااااااااااااااااااااااااااااااااي .. واي فديت اخوي والله .. يستاهل يوسف ..
سلمان: خفي يا بنت .. عن الصراخ ..
هنادي: فديت اخوي والله اني فرحانه له ..
سلمان: فديت قلبج والله .. زين جوجو بتجي ..
هنادي: باكلمها الحين ..
سلمان: خل نتجمع كلنا عشان نحط النقاط على الحروف .. وتزورونهم وتحددون كل شي مع الحريم ..
هنادي: ان شاءالله خالي .. بكلم جوجو الحين ..
سلمان: بارك الله فيج ..
سكر منها واتصل على يوسف مره ثانيه ..
يوسف: هلا خالي ..
سلمان: انت وين ؟
يوسف: انا فالمغسله ..
سلمان: مطول ؟
يوسف: لا خلاص الحين بستلم السياره ..
سلمان: عيل تعال البيت خواتك بيجون عشان نحدد موعد ويروحون يقابلون الحريم ..
يوسف: ان شاءالله ..
سلمان: بارك الله فيك ..
يوسف كان وايد فرحان ..
اتصل بوفارس يبشر اخوه وابوه بهالخبر الحلو ..
بومحمد: هلا والله محمد شحالك اخوي ؟
بوفارس: طيب الله يسلمك .. اعلومكم ؟
بومحمد: الحمدلله ..
بوفارس: فاطمه وافقت على اللي متقدم لها ..
بومحمد فرحان: مبروكين يا حمد .. والفال حق الباقي ..
بوفارس: الله يسلمك الغالي ..
بومحمد: الله يتمم على خير ..
بوفارس: الفال حق الباقي ..
بومحمد: ان شاءالله .. زين بشرت ابوي ؟
بوفارس: لا للحين .. انت اول واحد اقوله ..
بومحمد: زين امرك ونروح بيت ابوي ؟
بوفارس: زين .. عيل انتظرك ..
بومحمد: صار ..
سكر بومحمد وراح يبشر اهله بهالخبر الحلو ..
بومحمد: فاطمه بنت عمكم بتملج قريب ..
محمد: والله يستاهل بوخليفه ..
خالد: والله ريال والنعم فيه ..
فاضل: يستاهلون والله ..
علي: بنت العم ما عليها زود بعد .. مره والنعم فيها .. و بوخليفه خوش ريال .. صج ما يتفوت ..
ام محمد: يستاهلون الله يبارك لهم .. خل اتصل بمزنه ابارك لها ..
بومحمد: والله فرحت بهالخبر ..
الريم: تستاهل فطيم والله .. خل اتصل اقطعها شوي ..
فاضل وعلي: هههههههه ..
بومحمد: شو بعد تقطعينها ..
الريم: باستعبط عليها شوي ..
الكل: هههههه ..
التلفونات في بيت بوفارس اشتغلت .. كل من اتصل يبارك لهم .. بوفارس وبومحمد راحوا بيت ابوهم يبشرنهم بهالخبر الحلو ..
هيا: تستاهل الدلوعه ..
بوفارس: عاد هاذي اللي خذت قلب ابوها ..
هيا: فديتها والله .. وبعدين رفيج عزوز ما عليه كلام .. محد ذم لي فيه .. و امه وابوه ناس طيبين ..
بومحمد: الله يوفقهم ان شاءالله ..
الجده: حليلها فطيم والله .. الله يرزقها الذريه الصالحه ..
الكل: آمين ..
الجد: الدور والباقي على اللي ما عرسوا .. علوه وفروس .. غدوا ريايل وما يبون العرس .. شوله ؟
بومحمد: ما يفكرون فالعرس الحين ..
الجد: شو ما يفكرون فالعرس الحين .. فروس ريال شكبره .. قد حمود ولدك .. وللحين ما عرس .. علوه خلص دراسته شو ينطر بعد ..
بوفارس: يا يبه شباب وللحين الدنيا غارتهم ..
الجد: لوع الله جبدهم .. خل يعرسون احسن لهم ..
بوفارس: وليش ما قلت عزوز ؟
الجد: لا هاذي خلوه علي .. انا بزوجه ..
الجده: والله ينخاف منك انت ..
الجد: شو بعد تخافين ..
الجده: سوالف المغازل وياه .. هيا يمه عطيني التلفون خل اتصل ابارك حق مزنه ..
هيا: ان شاءالله يمه ..
تموا الشياب مع بعض يسولفون .. الجده اتصلت تبارك لام فارس .. الفرحه عمت بيت بوفارس وبيت يوسف ..
مر على هالاحداث الحلوه تقريبا 4 ايام .. اليوم هو اليوم الموعد لفاطمه و يوسف .. اول لقاء لهم بيكون فالمحكمه
فاطمه ومريم وفارس كانوا في سياره وحده .. عبدالعزيز و ابوه وعمه في سياره .. يوسف كان مع سلمان .. تلاقوا فالمحكمه .. دخلوا على القاضي و زوجهم .. فرحة فاطمه ويوسف ما تنوصف .. طلعوا من عند القاضي وكلن سلم على الثاني وبارك له ..
يوسف: ممكن ابارك حق زوجتي ..
بوفارس: ممكنين بعد .. تعال يبه ..
بوفارس مسك يوسف من يده وراحوا صوب البنات .. قرب يوسف من فاطمه ..
يوسف: مبروك فاطمه ..
فاطمه كانت منزله راسها وترجف من الخوف ..