مناف كانت وايد فرحانه باهتمام فارس لها .. كلام الممرضه عن فارس زاد تعلقها فيه وحبها له .. الساعه 7 فارس طلع من المستشفى رايح بيت مناف .. ام مناف كانت تنتظر فارس على احر من الجمر .. اولم ا وصل فارس شاف ام مناف واقفه عند الباب تنتظر .. قرب من باب البيت .. نزل وفتح لها باب السياره اللي ورا خذ الاغراض من يدها وحطها بصندوق السياره.. ركبت ام مناف وفارس سكر الباب .. صبح عليها واتجهوا للمستشفى .. وصلوا الساعه 8 بالضبط .. كانت الدكتوره عند مناف فالغرفه تشيك عليها .. سلمت عليها ام مناف وسألتها عن حالة بنتها
الدكتوره: ما شاءالله عليها احسن اليوم .. وان شاءالله بكتب لها ورقه عشان ترجع البيت الظهر ..
ام مناف: الحمدلله .. جزاج الله الف خير ..
الدكتوره: الله يسلمج يمه .. بكتب لج اجازه يا مناف حق نهاية الاسبوع .. الثلاثاء والاربعاء والخميس بكتبتهم لج اجازه ..
مناف: مشكوره يا دكتوره ..
الدكتوره: بس لا تذبحين نفسج عشان رجيم وغيره .. وانا موصيه زوجج عليج ..
مناف " فديته زوجي والله " ..
ام مناف: يعني اليوم بترجع البيت ؟
الدكتوره: ان شاءالله ..
ام مناف: الحمدلله على كل حال ..
الدكتوره سكرت ملف مناف: ما عليكم شر ان شاءالله .. ولا نبي نشوفج هني مره ثانيه يا مناف ..
مناف مبتسمه: ان شاءالله ..
الدكتوره طلعت من الغرفه .. مناف حضنت امها بوناسه ..
ام مناف: سمعتي الدكتوره شقالت ..
مناف: ان شاءالله ما عيدها ..
ام مناف كانت جايبه ريوق وشاي وقهوه .. حطت حق بنتها وجهزت لها الاكل على الطاوله ..
ام مناف: خل احط حق الريال ما قصر معانا ..
مناف: جزاج الله خير يمه ..
ام مناف غرفت له من الريوق وصبت له شاي .. طلعت عند باب الغرفه ونادت عليه .. فارس كان واقف عند باب الغرفه ويكلم الدكتوره يسألها عن حالة مناف .. بعد ما راحت الدكتوره عن فارس وطمنته على مناف .. راح صوب ام مناف ..

فارس: آمريني يمه ..
ام مناف: تعال يبه اكل لك لقمه ..
فارس: جزاج الله خير .. والله جوعان ومن امس ما كلت شي ..
ام مناف: ان شاءالله ابوي ..
دخلت الغرفه وطلعت له الريوق .. خذه منها وراح الاستراحه وتريق بروحه .. اتصل له محمد ولد عمه وهو يتريق
فارس: هلا والله ..
محمد: صباجك حب يا كل الحب ..
فارس: احلى يا رايق ..
محمد: هههههه .. انت وين ؟
فارس: فالمستشفى ..
محمد: شو تاكل ؟
فارس: والله ما قصرت امها .. جايبه معاها ريوق وحطت لي منه ..
محمد: عليك بالعافيه ..
فارس: انت وين حمودي ؟
محمد: فالدوام ..
فارس: متى وصلت المكتب ؟
محمد: الساعه 7 ..
فارس: زين تمرني ..
محمد: عيوني لك والله .. رئيس القسم يطلع ويدخل ومحد يكلمه ..
فارس: سلامي عليك يا رئيس القسم انته ..
محمد: ولوو .. كل شي لعيونك يهون ..
فارس: احم احم .. فديتني والله ..
محمد: يا دلع انته ..
فارس: زين باخلص اكلي وبروح ارجع الصينيه ..
محمد: زين انا بعد نص ساعه باطلع لك ..
فارس: سلام حبيبي ..
محمد: سلام ..
سكر فارس من محمد وكمل اكله .. كان ياكل ومستمتع ..
فارس " كل يوم باكل من هالاكل الزين .. اذا الام نفسها حلو فالاكل جي عيل البنت شلون .. آيه عليج يا مناف اموت فيج .. متى نجتمع في بيتنا بس " ..
خلص اكله وخذ الصينيه رجعها الغرفه لهم .. شكر ام مناف على الاكل واستأذن منها .. طلع من المستشفى راح البيت خذ له شور وريح شوي .. انسدح فالصاله وغفى لين الساعه 11 .. أذن الظهر وقام بكل نشاط .. توضأ وراح المسيد صلى وطلع من المسيد راح المستشفى .. ام مناف كانت تنتظر فارس عند الباب .. اول ما شافها خاف ومشى بسرعه ناحيتها .. كانت تناظره والحزن فعيونها ..
فارس: ها يمه .. خير ان شاءالله ..
ام مناف: يبه الساعه 12 بيرخصون بنتي .. ابيك تشوف لي الدكتوره مادري وينها لي ساعه اكلم هالممرضات ولاحد منهم ترد علي .. كلمت هذيك البنت وصرخت في ويهي حسبي الله عليها ..
فارس فار دمه: شووو .. تصرخ عليج ؟ اوريج فيها ..
ام مناف: خلهم عنك يبه .. بس شوف لي الدكتوره الله يرضى عليك ..
فارس تنرفز: باشوف لج الدكتوره وبسنع لج اللي ما تستحي على ويها ..
مشى فارس بسرعه صوب قسم الممرضات وكان معصب .. ام مناف شافته معصب لحقته وحاولت تهديه بس ما لحقت عليه .. فارس وصل عند المكتب صرخ على الممرضات باعلى صوته ..
فارس: انتوا تستهبلون على الناس ..
رئيسة الممرضات تكلمت بعصبيه: انت وين داخل ؟؟ تصرخ وتزف ..
فارس: امي تكلم موظفاتج ولاحد منهم يرد عليها .. ولما كلمتج رفعتي صوتج عليها ..
رئيسة الممرضات: عن من تتكلم انت .. اطلع من هني ولا بنادي لك الأمن يطلعونك من هني ..
فارس ضرب ايده على الطاوله بقوه .. رئيسة الممرضات حست بالخوف .. ام مناف وصلت عند فارس وترجته يسكت ..
ام مناف: الله يهديك يا يبه .. خلهم عنك ..رر