آه لو هالكرسي بيحكي ... كان بيصرخ كان بيشكي ...
وبيتأفأف وبيتلوع ويمكن حتى ينوح ويبكي ...
هالكرسي عايف أفطاسه... ما حدا عم بيعبي رأسه ...
وكله بيتغنى بإحساسه... وبالحقيقة كله بيحكي...
هالكرسي بيعمل عمايل بيعمل للأصلع جدايل... بيخفي لصحابه الرزايل...
بركي بيصحوا مرة بركي... عالكرسي صاحب معالي ...سيفه على شعبه بيلالي...
وبيعمل حاله نضالي... وبالمخفي عم يشرب وسكي...
واللي بيقعد ما بيتزحزح... ما بيتحرك ما بيتلحلح ...وبأحلامه بيطير بيشطح ...
وبيقلك هالكرسي ملكي ...ما بيتنازل عنه أبداً ...ما بيتخلى عنه أبداً...
وبيتمنى يضلو أبداً مع أنو ما بيعرف يحكي ...
هالكرسي بطل يتحمل ...والباشا كل ماله بيتقل ...ولما الكرسي قالو ارحل ...
صار الباشا ينوح ويبكي ...آه لما الكرسي بيحكي ...