{ نهاية حبك إعدامي } رووووووووووعه

[رامون]

جاسم رفع راسه يطالع عمته باستغراب .. هيا كانت عيونها مليانه دموع وهي تشوف الصوره اللي بيد جاسم ..
جاسم: عميمه .. منو هاذي ؟
هيا: هاا .. هاذي .... وقعدت على الارض وقبلها يدق بسرعه ..
جاسم: عميمه .. هاذي عبدالرحمن ..
هيا رفعت راسها وتمت اطالع جاسم بصدمه: عبدالرحمن ؟
جاسم: اي هو عبدالرحمن اعرف شكله .. ماقدر انساه
هيا بخوف: ليش ماتقدر تنسى شكله ؟ وين شفته جاسم ؟
جاسم: يوم كنت فالمستشفى ..
تقاطعه هيا: وين فالمستشفى .. وسحبت جاسم وهي تمسح على ويهه ..
جاسم استغرب منها: عميمه .. شفته فالحلم .. كنا انا وهو نمشي في روضه حضره وحلوه .. كلها شجر وانهار شفته وكلمني ..
هيا: شو قالك ؟
جاسم رفع الصوره: تم يسولف معاي .. هو وايد طيب .. وقالي انه هناك من 9 سنين .. ويوم سألته عن اهله قالي هناك بعيد .. ماعرفت وين عميمه .. وهو قالي انه وايد مستانس ومرتاح .. كان وايد طيب معاي .. وماشفت احد غيره ..
هيا حظنت جاسم بقوه وتمت تشهق وهي تصيح .. جاسم خاف على عمته .. قام بسرعه ونزل يبلغ امه ..
دخل الصاله وعلى طول قال لامه ..
جاسم: يمه لحقي .. عميمه هيا تصيح ؟
ام فارس بخوف: شو فيها ؟
الكل قام من مكانه وراح حق هيا .. اول من دخل كان خالد .. قعد جنب عمته وحظنها ..
خالد: عميمه شو فيج .. شي يعورج ؟
هيا كانت تصيح كأنها ياهل .. هيا اطلقت دموع كانت حبيسة عيونها الحزينه .. دموع ما راح تنتهي على فقدانها عبدالرحمن اللي حبته طول عمرها ..
دخلت ام فارس و وراها ام محمد وسكروا الباب وراهم على طول ..
ام محمد: هيا فديت قلبج شو فيج ؟
هيا ما كانت ترد على حد منهم كانت تصيح ودموعها حرقت خدودها ..
مسكتها ام محمد وحظنتها .. شافت صورة عبدالرحمن في يدها ..
ام محمد: شو فيج يا هيا كلميني ..
خالد: يمه انا بروح اشوف يدتي .. طلع من الغرفه وكانت يدته المسكينه توها تركب الدري ..
اليده: وينها هيا ؟
خالد: فالغرفه يمه ..
اليده: فديت عمرك خذني لها .. ريولي عورتني من هالدري ..
خالد مسك يدته: ان شاء الله الغاليه .. مشى معاها ودخلها الغرفه .. اليده ما ستحملت شكل هيا وهي وسط دموعها ..
اليده: يعلني افداج يا هيا ..
هيا راحت عند امها وتمت تصيح .. وكانت تتكلم بس ماقدروا يفهمون شي من كلامها من كثر صياحها ..
اليده: يا بنتي شو فيج .. كلميني عدل ..
هيا تحاول تهدي نفسها: يمه عبدالرحمن .. يمه ..
اليده: يا رب ترحمنا برحمتك .. الله يرحمه عبدالرحمن ..
هيا: يمه جاسم شافه ..
اليده: شافه ؟؟ وين ؟
هيا: شافه في منامه .. وقلت لها الكلام اللي قاله لها جاسم بالحرف ..
اليده ما قدرت تستحمل وصاحت: يمه الله يرحمه فرحان .. مستانس عند رب العالمين .. يمه لاتصيحين عليه .. فرحي له ربج راضي عليه .. شافه جاسم فالجنه .. مرتاح ومستانس .. لا تعذبينه بدموعج يا يمه .. فرحي له
الله يرحمك يا عبدالرحمن ..
ام فارس وام محمد قعدوا على الارض جنب هيا وتموا يواسونها .. اما خالد فكان واقف ومو فاهم شي .. بس عرف سبب حزن عمته وعزفها عن الزواج .. طلع من الغرفه وراح عند ابوه وعمه .. وقالهم اللي صار ..
بومحمد: عبدالرحمن ..
خالد: والله هاي اللي فهمته يا يبه ..
بوفارس: الله يرحمك يا عبدالرحمن .. خالد يبه .. عبدالرحمن كان مالج على عمتك .. وقبل العرس توفى في حادث .. وعمتك من بعده رفضت وردت كل من تقدم لها
خالد: الله يصبرها والله ..
بومحمد: لا حول ولا قوة الابالله ..
بوفارس: ناد لي الجسمي فديتك ..
خالد: ولا يهمك ..
راح خالد ونادى الجسمي اللي كان في صدمه من منظر عمته .. مشى عند ابوه وكان ويهه احمر وخانقته العبره
جاسم: نعم يبه ..
بوفارس: شو فيك يبه ؟
جاسم: ما ماا فيني شي .. وفجأه صاح بصوت مسموع ..
بوفارس حضن ولد: شو فيك حبيبي ؟ ليش تصيح .. وحط يده على قلب جاسم اللي كان يدق بسرعه .. فديت قلبك يبه .. ليش خايف ؟
جاسم: عميمه مسكينه .. وصاح زياده ..
بومحمد مسح على راس جاسم: فديت قلبك يا جاسم .. هي بس تعبانه شوي ..
بوفارس: معليه يبه .. ما عليها شر عمتك ..
جاسم وسط دموعه: مسكينه والله كانت تصيح وايد ..
بوفارس حضن جاسم لصدره: فديتك يا جاسم حنون والله .. تعال اغسل ويهك وتعوذ من الشيطان وعمتك ما عليها شر .. شاله بوفارس و وداه يغسل ويهه وسقاه ماي .. ودخل الصاله لقى الباقي في حيره ..
بوفارس: فطيم يمه تعالي اخذي اخوج ..
فاطمه قايمه صوب ابوها: ان شاء الله بابا .. خذت جاسم وقعدته في حضنها ..
بوفارس: اتصلي في عزيز وابوي شوفيهم وين خل يجون ..
فاطمه: ان شاء الله ..
طلع بوفارس وراح عند اخوه بو محمد ومع خالد كلهم راحوا فوق عند هيا الحزينه ..

[رامون]

اتصلت فاطمه حق اخوها ..
فاطمه: عزوز .. وين انتوا ؟
عبدالعزيز: قريب عند البيت
فاطمه: تعالوا بسرعه .. ابوي يقول تعالوا
عبدالعزيز بخوف: شو صاير ؟
فاطمه: عميمه هيا تعبانه ..
عبدالعزيز: خلاص جاين ..
سكرت من عبدالعزيز والتفت على مريم اللي كانت ميته من الخوف ..
فاطمه: مريوم شو فيج ؟
مريم: خايفه على عميمه ..
فاطمه: ان شاء الله ما عليها شر ..
الريم: فديتها عميمه والله ..
ايمان: ان شاء الله ما عليها شر ..
مريم: ايمانوا يا ليت عندي قلبج .. ماشاء الله عليج قويه ..
فاطمه: زين مرايم اخذي جاسم عندج باتصل حق فارس .. خذت مريم جاسم المنهار .. قامت فاطمه وطلعت برا تتصل حق اخوها .. شافت يدها وعبدلعزيز جاين صوبها ..
اليد: وين هيا ؟
فاطمه: فوق يدي ..
ركض اليد بسرعه فوق .. وعبدالعزيز كان وراه .. اتصلت فاطمه لفارس وكانت معصبه ..
فارس: هلا والله فطيم ..
فاطمه بعصبيه: انت وينك ؟
فارس مستغرب: موجود ..
فاطمه: يا فارس الواحد ما يشوفك لا انت ولا ولد عمك محمد .. شو عندكم شو اللي صاير ؟
فارس استغرب " شو عرفها ان محمد معاي؟ ": ليش تصارخين شو فيج ؟
فاطمه: الدنيا منقلبه عندنا وانتوا ولا على بالكم ..
فارس: خوفتيني شو صاير ؟
فاطمه: عميمه هيا تعبانه ..
فارس: هاا عميمه .. خلاص جاين ..
فاطمه: فارس .. اووه شو فيه ذي سكر ..
فارس التفت على محمد: عميمه هيا تعبانه ..
محمد: قول غيرها ..
فارس: فطيم توها مكلمتني والاهل محتشرين هناك ..
محمد: حرك بسرعه زين ..
وصلوا بيت اليد سلطان .. دخلوا وهم مفزوعين الكل استغرب دخول محمد مع فارس .. واولهم مريم وايمان والريم .. التفت فارس على الريم اللي ما شالت عينها من عليه ..
فارس: وينهم ؟
ايمان: فوق في غرفة عمتي ..
ركضوا الثنين مع بعض ودخلوا الغرفه .. وسط صياح هيا كان في ذهول من دخول محمد مع فارس ..
فارس: عسى ماشر عميمه ..
بومحمد: ما عليها شر ..
خالد مسك فارس: تعال معاي .. وطلع معاهم محمد .. خالد قالهم قصة عمتهم .. وايد تضايقوا .. وحزنوا على عمتهم ..
فارس: زين نجيب مطوع يقرى عليها ؟
خالد: امي تقرى عليها ..
محمد: ليكون يصير فيها شي من الصدمه ؟
فارس: الله لا يقول ..
طلع بومحمد من الغرفه: محمد ..
التفت محمد على ابوه بخوف: نعم يبه ..
بومحمد: تعال وراي ..
محمد: ان شاء الله .. وراحوا يتكلمون على الدري ..
بومحمد: شو صاير لك ؟ شو هالسرعه اللي رجعت بها من السفر ؟
محمد منحرج من ابوه: السموحه الغالي .. بس صارت لي ظروف
بومحمد بعصبيه: واي ظروف هاذي اللي خلتك تترك بيتك وعيالك ؟
محمد: يبه ظروف
بومحمد: اي ظروف ..
محمد انتفض: يبه انا مختلف مع زوجتي .. ومابغيت حد يعرف شي ..
بومحمد منصدم من الخبر اللي سمعه: مختلف مع زوجتك ؟ عسى ماشر يبه
محمد: ماشر بس خلافات عاديه ..
بومحمد فهم ان ولده ما يبي يقوله: زين وليش مارحت تكلمها ؟
محمد: كلمتها وهي راسها يابس ..
بومحمد: الله يهديها ..
محمد: طلبت يبه ..
بومحمد: تم .. آمرني ..
محمد: ما يأمر عليك العدو .. لاتقول لاحد اني مختلف مع زوجتي .. بقولهم اني توني راجع ..
بومحمد: ان شاء الله .. بس كبر عقلك ولا تتسرع وتعاند ..
محمد: ان شاء الله .. وباس راس ابوه واستسمح منه ..
رجعوا ادراجهم عند غرفة هيا .. وتموا ينتظرون فتره .. لين ما هدتها ام محمد وامها .. طلعت ام فارس مع بوفارس ..
ام فارس: الحمدلله على كل حال .. ان شاء الله ما عليها شر .. بس يبه عزيز لا يطلع هالكلام لاحد من خواتك
عبدالعزيز: ان شاءالله الغاليه ..
ام فارس: والتفتت على خالد ومحمد وفارس اللي كانوا قاعدين جنب بعض و وجهة لهم نفس الكلام ..
خالد: ان شاء الله مرت عمي ..
ام فارس ابتسمت لخالد: لا قولي عمتي ..
خالد ابتسم: ولا يهمج عمتي ..
بومحمد: بارك الله فيكم .. الله يتمم على خير .. يلا شباب نزلوا تحت وان شاء الله بنجي احنا بعد شوي ..
الكل: ان شاء الله ..
دخل فارس الصاله وراه الشباب .. محمد و عبدالعزيز وخالد .. محمد اول ما دخل ركضوا له عياله وهو حضنهم بحنان وشوق .. تم يبوسهم ويلاعبهم .. فارس قعد عند خواته مع عبدالعزيز .. طبعا فاطمه كانت معصبه على فارس ..
فارس يطالعها مبتسم: فديت المعصبين انا ..
فاطمه تدلع عليه: صج عاد .. وصدت عنه ..
فارس: لا ما قدر على الدلع انا ..
فاطمه لفت عنه بغرور ودلع ..
فارس قرب منها ومسك يدها: اموت فالدلع ..
فاطمه سحبت يدها: خير الشيخ شو تبي ؟
فارس: طالب القرب الشيخه ..
فاطمه: ما نزوج ..
فارس: افاا .. ليش ؟ واحد مزيون غرشوب حده مثلي تردونه ..
فاطمه: اي .. لانك قاطع هلك من الحين .. لو قبلنا فيك بتلته بنتنا ..
فارس: هههههههههه .. عين العقل يا بنت محمد .. بعدي عليج .. تعالي ابوس راسج ..
فاطمه ادزه عنها: مناك اشوف .. على قولة بوفارس يالهايت ..
فارس: هههههههههههه .. هيتني ابوج شو اسوي فيه ..
فاطمه: هههههههه .. تستاهل ..
فارس: فديت ابوي انا .. التفت على خواته ايمان ومريم .. شو اخباركم الحوريات .؟
مريم مبتسمه: الحمدلله ..
ايمان شاقه الحلج: تمام بوالشباب ..
فارس: انتي متى بتصيرين انثى ..
ايمان: هههههههههه .. تستخف دمك اخوي ..
فارس: لا دمي اصلا خفيف اختي .. والتفت على الريم اللي ما شالت عينها من على فارس من دخل وهو لاحظ هالشي .. شو اخبارج الريم ؟
الريم منحرجه: الحمدلله ..
فارس استغرب من ردها وخجلها ..
فارس: اخبارج مع المدرسه ؟
الريم: تمام ..
فارس: شدي حيلج ..
الريم: ولا يهمك .. " واي بدى يسأل عني .. معقوله يفكر فيني "
تموا قاعدين مع بعض كلهم وبعدين نزلت ام فارس و وطلبت منهم انهم يرجعون البيت ..
ام فارس: فارس يبه .. خذ خواتك ورحوا البيت ..
فارس قام عند امه: يمه اخبار عميمه الحين ؟
ام فارس: الحمدلله .. احسن .. زين يبه روحوا البيت وانا وابوك بنجي بعدين .. و وجهة كلامها لمحمد .. محمد يبه بعد انت اخذ اختك و روحوا البيت امك وابوك بيتمون معانا ..
محمد: ان شاء الله مرت عمي .. قام من مكانه والتفت على فاطمه اللي كانت سرحانه .. تم يناظرها لين انتبهت له اول ما تلاقت عيونهم ابتسم محمد وصد .. فاطمه استغربت من حركته .. وتمت تفكر
طلع فارس ومعاه مريم وايمان .. اما عبدالعزيز خذ معاه جاسم وفاطمه .. محمد خذ اخته وعياله معاه .. خالد طلع بروحه ..
في سيارة عبدالعزيز كان عبدالعزيز يتناقش مع فطيم موضوع البحث ..
عبدالعزيز: زين اختي .. انا عطته البحث وهو بيشيك عليه ..
فاطمه: حلو .. زين متى بيرجعه ؟
عبدالعزيز: والله مادري عنه ؟ تدرين خل اتصل له اسأله ..
فاطمه: لا ماله داعي خل اخته تاخذ راحتها .. انا ما وراي شي ..
عبدالعزيز ينكت: وراج جسووووم ..
فاطمه وجاسم: ههههههه ..
فاطمه: حركات بعد عزوز ..
عبدالعزيز: اعجبج انا .. زين سكتي خل اكلم الريال .. عبدالعزيز كان متصل ومخلي التلفون على السبيكر ..
يوسف: هلا والله بوسعود ..
فاطمه سمعت صوته وغمضت عيونها مبتسمه ..
عبدالعزيز: الله يحيك الغالي .. شحالك ؟
يوسف: الحمدلله .. انت علومك ؟
عبدالعزيز:الحمدلله نشكر الله ..
يوسف: تأبرني كتير خيو ..
عبدالعزيز: يالله شو بتحكي لبناني انته ؟
يوسف: ولووو .. حنا لها ..
عبدالعزيز: هههههههه .. شعنده قلب بدوي ..
يوسف: باردون خيو .. طلعت بالغلط .. تأبرني ..
عبدالعزيز: يا الله يا الله شو مهضوم خيو ..
يوسف: لا انت اللي مهضوم بن عمي ..
عبدالعزيز: عم تحرجني يا أبضاي ..

[رامون]

يوسف: ولو يا معلم ..
فاطمه كانت تسمع حس يوسف وهي فرحانه .. و راحت عالم ثاني ..
عبدالعزيز: عليك سوالف يا بوخليفه .. زين قولي ..
يوسف: آمرني حبيب قلبي ..
عبدالعزيز: شو اخبار البحث ؟
يوسف: والله للحين ما وديته البيت ..
عبدالعزيز: للحين هايت يعني ..
يوسف: همممممم .. تقدر تقول جي ..
عبدالعزيز: زين لما هلك يشوفون البحث ويشيكون عليه عطني خبر عشان اخذه مره ثانيه ..
يوسف: ولا يهمك الغالي ..
عبدالعزيز: زين انا بوصل هلي البيت .. انت وين ؟
يوسف: قريب حولكم ..
عبدالعزيز: زين انا رايح البيت لو قريب اسبقني الميلس .. بنزل هلي وبجيك ..
يوسف: من هناك ؟
عبدالعزيز: شوف فضول وعلوه .. ما شفتهم اليوم
يوسف: صار حبيبي .. الحين بكلمهم وانتظرك في الميلس ..
عبدالعزيز: صار .. سلاااام ..
سكر من يوسف والتفت على فاطمه اللي كانت اطالع الصوب الثاني وسرحانه ..
عبدالعزيز: وين سرحتي اختي ؟
فاطمه التفت عليه وهي مبتسمه: هلا .. معاك ما سرحت
عبدالعزيز ابتسم لها وفضل السكوت .. حس ان اخته بالها كان مشغول .. التفت على جاسم اللي نام على السيت اللي ورا من التعب .. وصلوا البيت وكان يوسف صاف سيارته و فاضل صاف سيارته ..
عبدالعزيز: الحبايب وصلوا ..
فاطمه: من ؟
عبدالعزيز: بوخليفه . . وعيال عمي ..
فاطمه " فديته بوخليفه": اهاا ..
عبدالعزيز: زين فطومه .. شلي الجسمي فديته نام ..
فاطمه: ان شاء الله .. نزلت وفتحت الباب اللي ورا .. شلت اخوها وراحت داخل .. اما عبدالعزيز راح عند الشباب فالميلس .. لقت مريم وايمان وفارس قاعدين فالصاله .. سلمت وخذت جاسم غرفته .. خذت لها شور سريع وبدلت ملابسها ونزلت عندهم ..

........................
ان شاء الله يعجبكم الجزء وانتظروني في جزء جديد

تحياتي للجميع
انشاء الله تكون نالت اعجابكم

اخوكم الوفي

الرامون

[رامون]

الحين نروح بيت بوفارس .. عبدالعزيز كان مع امه .. كانت ام فارس تنصح ولدها وتقوله عن مسؤلية العرس ..
عبدالعزيز كان مو مرتاح وماله نفس يسمع كلام امه ..
عبدالعزيز: يمه .. الله يخليج .. سكري على هالموضوع
ام فارس باستغراب: ليش يمه ؟ شو فيك ؟!
عبدالعزيز: مادري .. حاس بضيقه .. من تطرون هالموضوع استضيق .. مابي اتكلم فيه الحين ..
ام فارس: اذكر ربك يا يبه .. انت اللي بغيته
عبدالعزيز: مادري يا يمه .. لا تكلميني فيه الحين .. وحط راسه في حضن امه .. تمت ام فارس تقرى على ولدها وتواسيه ..

الساعه 1 بالليل .. فارس دخل البيت وهو مو على بعضه .. راح غرفته على طول .. خذ له شور سريع واتصل بمناف اللي كانت نايمه .. قعدها من النوم ..
مناف: هلا
فارس: مناف قومي ابي اتكلم .. متضايق
مناف بطلت عيونها بخوف: شفيك فارس ؟!!
فارٍس كان متردد يقولها اللي صار .. بس حس انه متضايق وايد ولازم يفضفض ..
مناف بخوف: فارس تكلم شفيك ؟ شصاير؟
فارس: آآه يا مناف .. اليوم واحد من ربعنا طالع من بيتهم جاينا القهوه وعلى طريقه شاف .... . وقالها السالفه كامله ..
مناف: لا حول ولا قوة الا بالله .. الله يصبرها .. الله يستر على بناتنا ان شاء الله ..
فارس: انا ما شفت الموقف بعيوني ولا عشت اللي عاشه رفيجي .. بس من شفت ويهه وسمعت السالفه حسيت كأني انا اللي شفتها وكلمتها .. كانت تترجاه .. يالله عليه هالاخو ..
مناف: لا حول ولا قوة الا بالله ..
فارس: مناف: كسر حوضها من الترفس .. ويها رايح من الضرب اللي جاها منه ..
مناف لا شعوريا: فديت قلبك يا فارس .. لا تتضايق .. الله يعينها هالبنت .. الله بياخذ حقها ان شاء الله ..
انت لا تفكر فالموضوع وايد ..
فارس وتنهد: آآآآه يا مناف آآآه
مناف بحنان: سمالله عليك يا فارس .. قوم صل لك ركعتين .. ونام .. ولا تفكر في الموضوع فديتك .. بقعدك الصبح قبل الصلاه ..
فارس: فديتج يا مناف .. تمي معاي شوي .. احس اني ضايق ..
مناف: ان شاءالله ..
تم فارس يتكلم مع مناف فتره .. وبعدين هي اصرت عليه انه يقوم يصلي وينام .. قام فارس صلى ونام وحس براحه بعد ما صلى .. اما مناف تمت تفكر في فارس ..
مناف " فديت قلبه .. صرت جزء منه .. الحين يوم تضايق لجئ لي وفضفض لي .. الله يحفظه " تمت مناف تحاتي فارس وقلبها عليه .. غطت لها كم ساعه و وعت مع اذان الفجر .. اتصلت لفارس تقعده للصلاه ..
فارس بتعب: هاا ..
مناف: فارس .. قوم اذن الفجر ..
فارس: مناف ..
مناف: هلا فديتك
فارس: فديت قلبج والله ..
مناف انحرجت: زين قوم الحق على المسيد قبل ما يقيوم الصلاه ..
فارس: اختي الحين بتجي تقعدني او اخوي الصغير ..
مناف: زين قوم فديت يلا ..
فارس: ان شاء الله يا قلبي ..
مناف: اول ماترجع من المسيد اتصل فيني ..
فارس: ولا يهمج .. سكر منها ودخلت عليه فاطمه ..
فاطمه: فارس .. انت قاعد
فارس: اي .. جاني اتصال ..
فاطمه: زين يلا فديتك بابا نزل ومعاه جاسم ..
فارس: عزيز قعد ولا للحين ؟
فاطمه: اي قعد .. باقي انت قوم قبل ما يقيم الصلاه ..
فارس بتعب: زين .. شو فيكم اليوم ؟
فاطمه: من ؟
فارس: ولا شي .. خلاص قمت .. قعد على السرير تمدد وبعدين دخل يتوضأ ..
فاطمه لما دخلت على اخوها انتبهت انه كان يتكلم فالتلفون .. تمت تفكر في فارس اخوها .. احتارت في غموضه وتصرفاته ..
فاطمه" فارس اخوي .. شو مخبي.. ؟! تصرفاته غريبه .. من يكلم فالتلفون ليل نهار .. معقوله اخوي يحب ؟ لو يحب شكله مغرم الولد .. بعدين دامه يحب ليش ما يتزوج .. اخوي يلعب .. لا لا مستحيل ما يسويها الله يحفظه .. وتصرفاته مع محمد ولد عمي .. آآه من محمد هاذي .. بعد محمد متغير .. نظراته لي سؤاله عني .. غريب هالانسان ليش اختفى فتره عن الانظار وطلع مره وحده .. هالثنين مسوين شي كبير .. الله يستر منهم بس "
راحت غرفتها .. صلت ورجعت تنام مره ثانيه ..
رجع فارس من المسيد .. واتصل بمناف اللي كانت خايقه عليه وتحاتيه ..
فارس: هلا مناف ..
مناف بخوف: فارس تأخرت فديتك ..
فارس بجرأه: مناف .. خفتي علي ؟
مناف انحرجت وماردت عليه ..
فارس: مناف .. يا قلبي انتي ..
مناف تغير الموضوع: اخبارك الحين .. ان شاء الله احسن ..
فارس" فديت اللي تغير الموضوع": اي الحمدلله .. نمت براحه ..
مناف: الحمدلله ..
تموا ساكتين فتره .. مناف كانت تفرك اصابعها ببعض من التوتر والخجل من كلام فارس .. اما فارس فكان مغمض عيونه ويتذكر لما لبسها الاسواره ذيك الليله .. فتح عيونه وكسر حاجز الصمت بكحه مستقصدها ..
فارس: كح كح كح ..
مناف: سمالله عليك ..
فارس: ايه عليج يا مناف .. " شكلها بدت تحب"
مناف: شفيك فارس ؟
فارس: مستانس ..
مناف: ان شاء الله دوم ..
فارس يستعبط: ما سألتيني على سبب الوناسه ؟
مناف" بيتصفق هالولد وايد يستعبط": ممممممم .. ليش ؟
فارس: مو قايل لج .. ههههههههه
مناف عصبت: سخيف ..
فارس: ايه عليج مناف ..
مناف: زين يلا بسكر بروح ..
فارس: بتسكرين ولا بتروحين ؟ حددي موقفج لو سمحتي ..
مناف: عاااد ..
فارس: اموت فالدلع انا ..
مناف انحرجت: زين فارس لازم اسكر ..
فارس: ان شاء الله دلوعتي ..
مناف" بيذبحني .. يتغزل فيني واااي": مع السلامه ..
فارس: وتتغلى دلوعة فارس ..
مناف: شهالكلام ..
فارس: يزعلج ؟
مناف سكتت ..
فارس: عيل خليني اقول اللي اقوله ..
مناف بصوت واطي: لازم اسكر ..
فارس: مناف قبل ماتسكرين ممكن اقول شي ..
مناف: تفضل ..
فارس خذ نفس عميق: مناف احبج ..
مناف انصدمت .. تمت ساكته .. حست انها تحلم ..
مناف " يحبني " ..
فارس: مناف .. يلا روحي خلصي شغلج حبيبتي ..
مناف: ها .. !!
فارس: باكلمج اول ما روح المكتب ..
مناف مو مستوعبه: ان ن ن ان شاء الله .. سكرت وهي مو عارفه توصف شعورها ..
مناف" يحبني .. يحبني .. يحبني .. طالعه من قلبه .. واااي مو مصدقه .. فارس يحبني .. " شعورها اللي ماعرفت توصفه كان الاحساس بالحب الصادق من ناحية فارس .. فرحة مناف ما تنوصف .. في هاللحظه .. حست نفسها اسعد انسانه فالكون كله .. اما فارس فكان مستانس اكثر منها .. هو لما اعترف لها بحبه اول مره حس من مناف انها فاكره فارس معجب فيها لفتره وبس .. مع انه كان صادق بس هي كانت وايد حذره معاه .. بس اليوم لما قالها انه يحبها حس ان قلبها نبض بالحب .. من اهتمامها له ..
فارس " احبج يا مناف .. حبج عصف بقلبي .. آآه يا قلبي انتي يا مناف " حط راسه وغط له ساعه قبل ما يروح المكتب ..

الساعه 8 ونص .. وكعادتها ام فارس وجاسم فالمطعم ام فارس تحضر الريوق وجاسم يسولف معاها .. لان اليوم الجمعه واجازه فتحضر الريوق وقت متأخر .. فارس قعد من الساعه 6 ونص عشان يروح المكتب ويشوف شغله اللي اهمله من فتره .. اما جاسم كان قاعد مع امه كعادته .. يسولف معاها وهي تحضر الريوق ..
جاسم: يمه ..
ام فارس: هلا يمه ..
جاسم: كلمي ابوي .. نبي نروح البحر ..
ام فارس: فديتك كلمته عن امس و وافق بس تدري انشغلنا بموضوع اخوك ..
جاسم: زين خل نروح اليوم ..
ام فارس: لا يبه .. شلون نروح واحنا ما جهزنا شي ولا خبرنا بيت عمك .. ما يصير ..
جايم حط يده تحت خده: اوووووه .. زين بس نروح نتمشى ..
ام فارس تضحك عليه: ههههههه .. نرتب لها الاسبوع الجاي .. اوعدك اكلم ابوك و بيت عمك ..
جاسم: زين زين .. بنشوف ..
ام فارس: روح قعد ابوك يلا ..
جاسم ماسك العكاز: زين ..
ام فارس " هههههه .. عليك حركات يا جسوم .. الله يحفظك فديتك "
راح جاسم يقعد ابوه اللي كان توه مخلص من صلاة الضحى ..
جاسم: يبه ..
بوفارس مبتسم: هلا والله هلا ..
جاسم باس راس ابوه: شحالك يبه ؟
بوفارس: طيب طاب حالك فديتك .. اخوانك قعدوا ؟
جاسم: بس فارس .. راح المكتب
بوفارس: شعنده ؟ اليوم جمعه ..
جاسم: مادري يبه
بوفارس: عزيز قعد ولا للحين
جاسم: للحين نايم ..
بوفارس: ممممم .. زين يلا ننزل فديت طولك ..
جاسم: ان شاء الله ..
بوفارس يطالع جاسم: تعال اشيلك يبه
جاسم: لا عادي .. اقدر امشي ..
بوفارس يتحرش: انا ودي اشيلك يالدب ..
جاسم: انا دب .. زين شلني عشان تعرف .. لو انا دب او رشيق ..
بوفارس يضحك: شوي شوي يا غصين البان ..
جاسم وبوفارس: هههههههههههههه .. نزلوا وهم يسولفون ويضحكون .. دخلوا على ام فارس اللي الابتسامه كانت منوره ويها ..
ام فارس: يا هلا والله .. يا حي هالشوف ..
جاسم: حددي موقفج ؟ انا ولا بوفارس ؟
ام فارس منحرجه: جسووووم
بوفارس: ههههههههه .. التفت على ام فارس .. شحالج الغاليه .. ؟
ام فارس: طيبه الحمدلله .. شلون كانت نومتك؟
بوفارس: الحمدلله .. حلوه
تموا يسولفون شوي .. وبوفارس وجاسم تريقوا وشربوا شاي احمر .. التفت بوفارس على زوجته وسألها ..
بوفارس: شعنده فارس رايح المكتب ؟ الناس جمعه ورانا صلاه
ام فارس: فديته يقول يبي يخلص كم شغله ..
بوفارس " لوتي فروس .. اوريه": ما قال متى بيرجع ؟
ام فارس: يمكن يرجع مع الغدا ..
بوفارس: اها ..
دخل عليهم عبدالعزيز اللي كان ويهه متغير ..
عبدالعزيز: اهلا بالجميع ..
بوفارس: اهلا وسهلا ..
ام فارس: فديت قلبك انا .. يسعد صباحك ..
عبدالعزيز" اي صباح الله يهديج": هلا والله الغاليه .. وباس امه على راسها .. التفت على جاسم .. حيالله بومحمد .. شحالك
جاسم: الله يحيك ..