قاموا الشباب ولموا اغراضهم راجعين العاصمه .. ركبوا البانشيات وشلوا اغراضهم .. توزعوا فالسياير .. ومسكوا الخط .. مروا على مكان التفجير .. وقف سلمان يلتقط بعض الصور للحفره قبل ما يروحون ..
كملوا دربهم وهم طالعين .. خالد طول الطريق كان مغمض عيونه ما يبي يشوف شي .. وصى سلمان انهم اول ما يطلعون من المنطقه ويدخلون العاصمه يقوله ..
خالد: اول ما ندخل العاصمه قولي ..
سلمان: ان شاءالله .. وكان مستغرب من خالد .. لانه مايدري بسالفته ..
دخلوا العاصمه وسلمان نبه خالد ..
سلمان: دخلنا يبه ..
خالد فتح عيونه وشهق: اعوذ بالله من الشيطان الرجيم .. سلمان دوس بسرعه .. خالد تخرع لانه شافها تمشي جنب السياره مشي عادي وسرعة السياره كانت 160 وهي تمشي بكل هدوء واطالع خالد ..
سلمان: شفيك يبه ؟
خالد: ماتشوفها ؟
سلمان التفت صوب خالد: اشوف من ؟
خالد تم يقرى المعوذات وهو مغمض عيونه .. وسلمان كان محتار من كلامه وتصرفاته .. وصلوا قريب بيت بوم محمد ..
سلمان: خالد يبه .. عسى ما شر ؟
خالد فتح عيونه بخوف: ها ؟؟ راحت .. التفت صوب الجامه ومالقاها .. تنفس براحه ..
سلمان " بسمالله .. شفيه خالد .. من اللي يشوفها وانا ماشوفها ؟ " ..
اول محطه كانت بيت بومحمد .. وصلوا الساعه 11 ونص .. قد اذن الاذان الاول ..
محمد: يلا شباب نلحق على المسيد ..
سلمان: بارك الله فيك .. والسموحه أخرتكم على الصلاه ..
محمد: ولا يهمك .. نزلوا اخوان محمد وراحوا داخل على طول .. سلموا على بعض وحركوا الباقي ..
المحطه الثانيه كانت بيت بوفارس .. نزل فارس وعبدالعزيز ..
فارس: انزل عندنا سلمان وخذ راحتك ..
سلمان: لا يبه بروح البيت اتسبح واروح المسيد ..
فارس: زين خذ راحتك عندنا .. جان على الملابس حاضرين لك ..
سلمان: ما تقصر يبه .. ملابس عندي بالشنطه ورا مشكور يبه .. بس البنات فالبيت خل اروح اتطمن عليهم ..
فارس: بارك الله فيك ..
يوسف: خالي انا بانزل مع بوسعود ..
سلمان: على راحتك .. اللي تشوفه .. التفت على فارس .. ما قصرتوا شباب ويعطيكم العافيه .. جميلكم هاذي ماراح انساه لكم .. والله يقدرني وارجع لكم نص اللي سويتوه لي ..
عبدالعزيز: نعين ونعاون فديتك .. وحاضرين لك باي وقت ..
سلمان: جزاكم الله خير .. يوسف .. خذ شنطتك ..
يوسف: ان شاءالله خالي ..
خذ يوسف شنطته و ودع خاله .. دخلوا الشباب بيت بوفارس .. البنات كانوا قاعدين فالصاله ..
ايمان: تعالوا شوفوا ..
مريم وفاطمه: شو ؟
ايمان: رفيج عزيز المزيون عندنا ..
فاطمه نقزت عند الدريشه اطالعه .. قلبها كان يدق بسرعه ..
فاطمه " فديت قلبه .. فديت هالشوف والله .. محلاه هالولد .. الله يحفظه " ..
مريم: ماشاءالله عليه .. مزيون .. الله واكبر عليه ..
ايمان: وتلوموني يوم قلت لكم مزيون ..
مريم: اول مره اشوفه عدل ..
ايمان: شوفي شعره ..
مريم: اي شعر .. محلق رقم 3 ..
ايمان: اقصد القصه خطيره .. جنه فالجيش ..
مريم: شوفيه بالنطلون والتي شيرت مرتب وجسمه حلو ماشاءالله ..
فاطمه " وانا بعد اول مره اشوفه عدل .. وااي قلبي .. تفصلني عنه بس كم خطوه .. ايه عليه يجنن " ..
ايمان: هي .. يلا رجعوا فارس بيدخل ..
مريم: شكلهم كلهم داخلين هني ..
فاطمه: غريبه ما دخلوه الميلس ..
ايمان: يمكن يروح فوق معاهم ..
رجعوا بسرعه على الكراسي .. دخل عليهم فارس ..
فارس: مرحبا خواتي ..
البنات: هلا والله ..
فارس: لا تطلعون من الصاله .. رفيج عزيز بيدخل .. بيروح فوق ..
البنات: ان شاءالله ..
طلع عنهم فارس وسكر الباب وراه .. دخل عبدالعزيز و راه يوسف .. ام فارس كانت طالعه من المطبخ .. وشافتهم .. سلموا عليها وشافت يوسف ..
يوسف: شحالج يمه ؟
ام فارس: طيبه الله يسلمك ..
عبدالعزيز: الغاليه .. هاذي يوسف ..
ام فارس: والنعم والله .. حياك الله يبه .. التفت على عبدالعزيز .. هالله هالله بولدنا يا عزيز .. لا تفشلنا
عبدالعزيز: ولا يهمج الغاليه ..
يوسف: ما تقصرين يمه .. وعبدالعزيز ما عليه زود ..
ام فارس: البيت بيتك يبه ..
فارس: بسكم سوالف .. ورانا مسيد .. يمه وين ابوي ؟
ام فارس: ابوك راح المسيد مع الجسمي فديت طوله ..
فارس: زين احنا بنروح بتجهز للمسيد قبل ما يقيم الصلاه ..
ام فارس: زين يبه .. اخذوا راحتكم ..
طلعوا الشباب فوق .. وام فارس حبت يوسف .. دخل قلبها ..
ام فارس " ويهه سمح هالولد .. الله يحفظه " ..
دخلت على بناتها الصاله ..
ام فارس: يا بنات لاحد يروح فوق .. رفيج اخوكم فوق ..
البنات: ان شاءالله ماما ..
الشباب دخلوا وكل واحد خذ له شور سريع .. طلعوا من البيت متوجهين للمسيد .. وهم طالعين البنات كانوا يطلن عليهم من الدريشه .. فاطمه هامت بيوسف .. وايمان ومريم كانوا يتغزلون في وسامته وجماله ..
في بيت بومحمد .. الوضع غير .. بومحمد راح المسيد ومعاه فهد وسلطان .. وسلطان كان محتج .. لانه كان يبي يروح بيت عمه حق جاسم ..
دخلوا الشباب البيت وكلن توجه لغرفته ويتسبح عشان يلحقون عى الصلاه .. خلصول وركضوا على المسيد ..
اما سلمان استقبلوه بنات اخته بابتسامه حلوه منهم ثنتينهم ..
الجوهره: هلا خالي ..
سلمان: هلا والله يبه ..
هنادي تبوس راس سلمان: هلا خالي .. يوسف وينه عنك ؟
سلمان: هلا يبه .. يوسف راح مع ربعه ..
هنادي: هالولد من عرف هالشباب وهو هايت ..
سلمان: هههههه .. عليج سوالف يا هنوده ..
الجوهره: خالي بتصلي هني ؟
سلمان: لا بروح المسيد .. ان شاءالله بلحق على الصلاه ..
الجوهره: زين .. خل اروح اجهز لك ثيابك على ما تتسبح ..
سلمان: بارك الله فيج ..
سلمان خذ له شور سريع وطلع راح المسيد .. خلصوا الشباب من الصلاه وكلن رجع بيته ..
في بيت بوفارس ..
بوفارس: حيالله من جانا ..
يوسف: الله يحيك الغالي ..
بوفارس: شو اخبار سلمان ؟
يوسف: الحمدلله طيب ..
بوفارس: الحمدلله .. بوسعود يبه قولهم يجهزون الغدا بسرعه ..
عبدالعزيز: ان شاءالله ..
جاسم: يبه ..
بوفارس: ليبه ..
جاسم: يبه ابي اروح مع الشباب ناخذ افلام العصر ..
بوفارس: وانت ما تشبع من الافلام .. من كم يوم رايح ماخذ فلم .. واليوم بعد ..
جاسم: يبه شو فيك .. احنا نأجر الافلام .. وننسخها فالبيت ونرجعها ..
بوفارس: شياطين ..
جاسم: ونسوي نشخه ثانيه نأجرها على الربع في الفريج وفالمدرسه ..
فارس: الجسمي .. مب هين بعد ..
جاسم: عيل شلون .. تدري كم جمعنا من هالخطه ؟
فارس: كم ؟
جاسم: 1500 ..
بوفارس: ماشاءالله ..
جاسم: هاي احنا تونا بادين من شهر بس .. يعني عطنا كم شهر وبنصير من اصحاب الملاين ..
الكل: هههههههههه ..
جاسم انحرج: صج .. ليش تضحكون ..
يوسف مسح على راس جاسم: الله يحفظك ..
دخل عبدالعزيز و وراه الصبي شايل الغدا .. رتبوا السفره وتغدوا الشباب .. اما الحريم تغدوا داخل فالمطعم .. فاطمه قلبها مع يوسف ..
مريم: ماما ..
ام فارس: عيونها ..
مريم: بنروح بيت يدي اليوم ؟
ام فارس: اكيد ..
ايمان: عيل متى بنروح نتشرى حق عشى الملجه ؟
ام فارس: عندنا السبت ..
فاطمه: متى حددتوا العشى ؟
ام فارس: الاثنين ان شاءالله ..
ايمان بغلاسه: بدى العد التنازلي .. ههاااااااي ..
مريم: وجع يا ايمانو ..
فاطمه وام فارس: ههههههههه
دخل عليهم فارس: يازينكم وانتوا تضحكون ..
ام فارس: هلا يبه .. تبون شي من صوبكم ؟
فارس: ما قصرتوا .. بس نبي شاي وقهوه ..
ام فارس: ان شاءالله يبه .. الحين بنجهز لكم الدلال ..
فارس: بارك الله فيكم ..
طلع من المطعم رايح الميلس .. دخل على الريايل ..
بوفارس: ها يبه وين القهوه والشاي ؟
فارس: الحين يجهزونهم ..
بوفارس: زين ..
دخل الصبي شايل الدلال .. قام عبدالعزيز يصب لهم .. تموا يسولفون .. قام بوفارس بيطلع ..
فارس: وين الغالي ؟
بوفارس: بروح اقيل شوي ..
رن جوال فارس والرنه كانت عالي مستواه كتم الرنه .. طالعه بوفارس ..
بوفارس بخبث: ليش ما ترد ..
فارس: ها يبه ردينا ..
بوفارس وفارس: ههههههههههه
جاسم وعبدالعزيز ويوسف طالعوهم باستغراب ..
فارس: يبه ترا انا اقول لو تروح تقيل احسن لك ..
بوفارس مبتسم: انت بعد روح قيل يبه ..
فارس يضيع السالفه: لا بقعد مع الشباب شوي ..
بوفارس: لا قيل مع اللي خبري خبرك ..
فارس: يبه .. عاااد ..
الشباب: هههههههه ..
عبدالعزيز: صادوه ..
بوفارس يضحك: ههههههه .. التفت على جاسم .. ها الجسمي بتجي تقيل معاي ؟
جاسم: اول قولي ..
بوفارس: شو اقولك يبه ؟
جاسم: بتخليني اروح اجيب فلم ..
بوفارس: بخليك .. يلا تعال ..
جاسم بفرح: يس .. وركض عند ابوه .. شله بوفارس وطلع عنهم ..
عبدالعزيز: شو سالفتك انت وابوي مع التلفون ؟ ليكون تغازلون ؟
فارس التف عليه: لا والله .. هاي انت مع يدك المقلوع اللي تغازلون ..
عبدالعزيز ضحك بصوت عالي: ههاااااااااااي ..
يوسف: ههههه ..
الذين يشاهدون الموضوع الآن: 3 (0 من الأعضاء و 3 زائر)
مواقع النشر (المفضلة)