فارس: خل اتصل بفيصل عشان الحق امر عليه ..
محمد: تعال شو سويت مع مدرسته ؟
فارس: اصبر خل اكلمهم بعدين بقولك ..
فيصل: هلا فارس ..
فارس: شحالك فيصل ؟
فيصل: الحمدلله ..
فارس: انت وين ؟
فيصل: راجع البيت ..
فارس: ها كل شي تمام مع المدرس ؟
فيصل بوناسه: اي افا عليك ..
فارس: زين متى بتوصل البيت خل اكلم امك عن العزبه ..
فيصل بوناسه: انا كلمتها وحنيت عليها لين وافقت ..
فارس مبتسم: زين والله .. بس لازم اكلمها احسن ..
فيصل: ان شاءالله .. بس اوصل البيت وباتصل فيك ..
فارس: انتظرك ..
فيصل: مع السلامه ..
سكر من فارس وراح البيت بسرعه .. عشان يتصل حق فارس ويكلم امه ..
محمد: زين قولي شو سويت ؟
فارس: دخلت عليهم وغسلتهم هناك ..
محمد: زين سويت فيهم ..
فارس: الاخصائي مو عاجبه يقولي من تكون عشان تتدخل بحياة الولد .. قلت له مو شغلك من اكون .. قلت له يجيب المدرس .. واعطيه من الزين بعد .. عصب الاخصائي الا يقولي انت داخل مدرسه مو قسم شرطه .. قلت له والولد داخل مدرسه يعني مكان يتعلم فيه مو ينضرب فيه .. الاخصائي يقولي .. الولد غلط واستحق الضرب .. رديت عليه وقلت له .. عمر الضرب ما كان اسلوب في التعليم والتأديب .. والولد ما غلط .. بس انتوا اجبرتواه يغلط .. ولكل فعل ردة فعل .. الا المدرس يقولي هالولد ينفصل .. قلت له ليش يالشيخ ؟ ما عجبتهم طريقة كلامي وانا كنت قاصد استفزهم .. فيصل طول الوقت واقف عند الباب .. قلت لهم .. شوفوا يا جماعه والله العظيم اللي بيمس شعره من فيصل مب احسن له .. وربي لاوصلها لاكبر راس .. الا يقولي الاخصائي .. ماله داعي اسلوب التهديد يا اخ فارس .. رديت عليه باستهزاء .. انا ما اهددكم انا احذركم .. مابي يجيني في يوم يشتكي .. طلعت عنهم من غير ما اسمع شو بيقول الاخصائي ولا المدرس .. خذت فيصل و وديته الصف .. لو تشوف فرحته فيني وانا امشي معاه فالممرات ..
محمد: وحليله .. بس زين سويت فيهم ..
فارس: المشكله انهم يشوفون انهم مو غلطانين ..
محمد: مشكله اللي ما وراه ظهر يسنده ..
فارس: شوف لو فيصل لسانه طويل ولا قليل ادب ترا من حقهم يتخذون اجراء الضرب معاه .. بس الولد في حاله
محمد: عدل كلامك .. عيل عيالكم ظهرهم قوي ..
فارس: عيال من ؟
محمد: علينا .. انت والمدام ..
فارس: هههههههه ..
رن جوال فارس والمتصل فيصل ..
فارس: هلا فيصل ..
فيصل: كلم امي ..
فارس: زين ..
ام مناف: السلام عليكم ..
فارس: وعليكم السلام .. شحالج يمه ؟
ام مناف: طيبه طاب حالك يبه ..
فارس: يمه معليه اودي العيال معاي العزبه ؟
ام مناف: معليه يا ولدي .. فيصل جنني امس وهو يحن علي ..
فارس: هههههه .. خلهم يجون يستانسون مع العيال عندنا .. برجعهم فالليل ان شاءالله ..
ام مناف: خير ان شاءالله .. بس هالله هالله فيهم يا ولدي .. اطالع الله وهالثنين ..
فارس: فيصل وعبدالله اخواني واحطهم بعيوني ولا يهمج ..
ام مناف: جزاك الله خير يالنشمي ..
فارس: تسلمين لي .. زين يمه خل يتغدون وبمر عليهم بعد ساعه ..
ام مناف: ان شاءالله ..
فارس: فيصل عندج ؟
ام مناف: هذا هو كلمه ..
فارس: هلا فيصل .. تغدوا وجهزوا ..
فيصل: ان شاءالله ..
فارس: جيبوا لكم ملابس للسباحه .. ولا تدري بس جهزوا شنطة ملابسكم .. و تغدوا وبامركم ..
فيصل ما فهم شي من كلام فارس: زين زين ..
فارس: قبل ما وصل باتصل لك ..
فيصل: اوكي ..
سكر فارس من فيصل و طرش رساله لمناف ..
(( حياتي جهزتي شنطة اخوانج ؟ بمر عليهم بعد ساعه تقريبا .. كلمي فيصل )) ..
مناف كانت بالمحاضره .. قرت المسج .. استأذنت من الدكتور وطلعت من المحاضره .. اتصلت باخوها ..
فيصل: ها مناف ..
مناف: فصول طلع الملابس الجديده اللي انا مرتبتها امس .. وحطهم في شنطه لك ولعبود ..
فيصل: اي ملابس ؟
مناف: اللي فالكبت فوق .. انا مرتبتهم امس .. وحاطه معاهم فوطكم ..
فيصل: صبري خل اروح الغرفه .. راح الغرفه واخته معاه عالخط ..
مناف: شفتهم فوق ؟
فيصل: اي ي ي .. زين بس هاي ؟
مناف: اي ملابسك انت وعبود ..
فيصل: زين باحطهم فالشنطه .. زين بروح اتغدا امي تناديني ..
مناف: فصول بقولك ؟
فيصل: هااا ..
مناف: وجع شنو ها بعد ..
فيصل: نعم ..
مناف: لا تسوي شيطانه انت وعبود .. خلكم هادين ..
فيصل: زين زين ..
مناف: زين فديتك .. يلا مع السلامه ..
فيصل: مع السلامه ..
سكرت مناف ورجعت لقاعة المحاضره .. محمد و فارس رجعوا للعزبه .. وشافوا الشباب متجمعين في الاستراحه دخلوا الخيول الاسطبلات وراحوا عند الشباب ..
عبدالعزيز: فاتكم الاستعراض ..
فارس: يالنذول ما انتظرتونا ..
علي: راحت عليكم ..
محمد: اشوفكم مغبرين ..
علي: شنسوي بعد .. الحين يبيله نطب المسبح ..
فارس: لا تروحون البنات هناك ..
علي: ولين ..
محمد: يه من امس وانتوا متنقعين .. عطوهم فرصه ..
فارس موجه كلامه ليوسف: متى بيجي سلمان ؟
يوسف: بيمر العصر ان شاءالله ..
فارس: كلمته ؟
يوسف: اي ..
محمد: يلا نحرك ..
فارس: يلا ..
علي: وين ؟
فارس: بنروح العاصمه وبنرجع .. تبون نجيب لكم شي واحنا راجعين ؟
علي: لا سلامتكم ..
محمد: تعالوا معرسنا وينه ؟ ماله حس اليوم ؟
فارس: اي والله ..
فاضل: معرسنا راح يقنص ..
فارس: شعنده ؟
فاضل: مادري والله .. خذ الطير وراح ..
فارس: اي ي ي .. زين يلا حمودي ..
محمد: قدام ..
طلعوا من الاستراحه .. وركبوا السياره .. شافهم بوفارس ..
بوفارس: على وين ؟
فارس: الله يستر من الوالد ..
محمد: ليش ؟
فارس: اخاف يعرفهم ؟
محمد: ووووي فروس ..
بوفارس قرب من السياره: وين رايحين ؟
فارس: بروح اخذ عيال واحد معاي فالشركه بجيبهم يلعبون مع اليهال ..
بوفارس: بترجعون العاصمه ؟
محمد: لا هو ينتظرنا عند المحطه ..
بوفارس: اي ي ي .. زين لا تتأخرون على الغدا ..
فارس: ان شاءالله يبه ..
حركوا وطلعوا من العزبه ..
محمد: تتوقع عمي بيتذكر اشكالهم ؟
فارس: والله مادري .. بس هو ما شاف الا فيصل .. الثاني ما كان معانا ..
محمد: ان شاءالله ما راح يتذكره عدل .. انت خلهم يلوثون مع العيال بعيد ..
فارس ضحك على كلام محمد: هههههههه .. اي والله يلوثون بعيد ..
محمد: ههههه .. زين مني افكر عنك .. يالتنك ..
فارس ومحمد: هههههههههه ..
كملوا دربهم للعاصمه .. اتصل فارس بفيصل لما قرب من بيتهم ..
فيصل: هلا ..
فارس: ها جاهزين ..؟
فيصل: اي ..
فارس: انا توني داش فريجكم ..
فيصل: زين الحين بنطلع ..
سكر من فارس وراح ينادي عبدالله ..
فيصل: عبود فارس وصل .. يلااااااا
عبدالله نقز من حضن امه وبسرعه راح يركض .. ام مناف قامت وراهم عشان تكلم فارس .. وصل فارس عند بيتهم و سوا هرن .. طلعوا له وهم مبتسمين ..
فارس: حيالله الشباب ..
عبدالله: هلااااا ..
فارس: ههههه .. شحاله الريال ؟
عبدالله: طيب ..
فيصل: فارس امي تبيك عند الباب ..
فارس فتح الباب حق عبدالله: ان شاءالله يبه .. التفت على محمد .. محمد خذ الشنطه وحطها ورا ..
محمد نزل من السياره: ان شاءالله ..
راح فارس عند الباب ..
فارس: آمريني يمه ..
ام مناف: ما يآمر عليك العدو .. بس ما وصيك عليهم يبه .. هالله هالله فيهم وحط بالك عليهم .. وان غلطوا عندك اياهم ..
فارس: ولا يهمج الغاليه .. بحطهم فعيوني ..
ام مناف: بارك الله فيك يبه ..
فارس: الغاليه قاصركم شي ؟ محتاجين شي للبيت ؟
ام مناف: ما تقصر يبه .. بس قول لفيصل يتصل لاخته ويطمن قلبي ..
فارس: ان شاءالله ..
ام مناف: الله يحفظكم ..
فارس: مع السلامه ..
رجع عند السياره وشاف فيصل وعبدالله وابتسم لهم .. ركب السياره ..
فارس: شحالكم شباب ..
فيصل: طيبين ..
فارس: فيصل تذكر محمد ولد عمي ..
التفت عليهم محمد مبتسم ..
فيصل مبتسم: اي اتذكره ..
محمد: شحالك ؟
فيصل: الحمدلله ..
محمد: ان شاءالله تتونسون معانا ..
عبدالله: فارس طيب .. ياليته اخوي ..
فيصل نزل راسه بحزن .. محمد حزن على كلام عبدالله ..
فارس يلطف الجو: زين شباب تغديتوا ؟
فيصل: اي الحمدلله ..
عبدالله: فارس ..
فارس: هلا يبه ..
عبدالله: خاطري في ايس كريم ..
فيصل: عبود اسكت ..
فارس: عادي يبه ..
فيصل: بعلم عليك مناف ..
فارس: يا فيصل خله يطلب اللي يبه ..
فيصل: خلاص مايبي .. وطالع عبدالله بغضب ..
عبدالله نزل راسه: خلاص مابي ..
فارس: يا فيصل خله على راحته ..
وقف فارس عند سوبرماركت .. طالعهم من المرايه ..
فارس: يلا نزلوا خل ناخذ شي للطريق ..
عبدالله ما نزل وتم منزل راسه ..
فارس: عبود يلا انزل ..
عبدالله: لا خلاص مابي ..
فارس: ما عليك من فيصل الدب ..
عبدالله: لا خلاص عادي مابي ..
فيصل: عبود انا آسف .. وباس راسه .. يلا انزل ..
محمد تم يطالعهم وهو مبتسم " الله يخليهم لبعض" ..
عبدالله طالع فيصل وابتسم: مب معصب علي ؟
فيصل: لا .. يلا انزل ..
نزل عبدالله وهو فرحان .. مسك يد فارس ودخل معاه السوبرماركت .. كان يطالع الاغراض و هو مو مصدق عيونه .. محمد كان يراقبهم وهو فالسياره .. كان يشوف نظرات الاندهاش اللي بعيون عبدالله ..
فارس: يلا يبه اخذوا اللي تبونه ..
عبدالله خذ له ايس كريم .. وشوكلاته وعصير .. اما فيصل خذ له شوكلاته جالكسي بس .. فارس استغرب منه ..
فارس: بس هاي اللي تبيه فيصل؟ خذ اللي تبيه لا تستحي يبه ..
فيصل: من زمان وانا في خاطري اذوق الجالكسي ..
فارس ماقدر يحط عيونه بعيون فيصل .. صد عنه .. دفع وطلع من السوبرماركت معاهم .. ركبوا السياره وفالطريق عبدالله خلص الايس كريم .. وغطت عينه .. اما فيصل كل الجالكسي بتلذذ .. تم يطالع الطريق ..
فارس: فيصل ..
فيصل: نعم ..
فارس: تحب الخيول ؟
فيصل: يعني .. بس ولا مره شفت خيل من قرب ..
فارس: اليوم بتشوف الخيل ..
فيصل مستانس: والله ..
فارس: ان شاءالله ..
وصلوا العزبه وفيصل حس بتوتر وشوية خوف .. محمد التفت على فيصل ..
محمد مبتسم: قعد اخوك وصلنا ..
فيصل انبهر بالعزبه ..
فيصل: عبود .. عبود قوم وصلنا ..
عبدالله يفرك عيونه: نعم ..
فيصل: قوم يلا وصلنا ..
عبدالله يتمدد: زين زين ..
فتح فيصل باب السياره ونزل وهو يطالع العزبه بانبهار ..
فيصل: الله حلو المكان ..
فارس: تعال خل اوديك اعرفك على الشباب ..
فيصل مسك عبدالله: يلا عبود ..
مشوا ورا فارس وهم حاسين باحراج .. فارس نادا على سلطان وجاسم ..
فارس: جاسم .. جاسم ..
جاسم اللي كان مشغول مع الطيور التفت على فارس باستغراب ..
جاسم: نعم ..
فارس: تعال ..
جاسم: ان شاءالله ..
فارس: هاذي اخوي جاسم .. قد عبود تقريبا .. واللي معاه سلطان قدك يا فيصل .. وفهد اخو سلطان بس ما يتكلم
عبدالله: شلون ؟
فارس: انولد وهو ما يقدر يتكلم ولا يسمع ..
عبدالله: زين شلون تكلمونه لو تبون منه شي ؟
فارس: بالاشاره ..
عبدالله: شلون ؟
فارس مبتسم: نأشر له بيدنا ..
عبدالله: اهاا ..
قربوا الشباب من فارس وعلى روسهم علامات تعجب ..
فارس: جاسم .. هاي عبدالله وأشر على عبدالله .. وهاي اخوه فيصل وأشر على فيصل ..
جاسم ابتسم: اهلا ..
فارس: هاي جاسم اخوي .. وسلطان ولد عمي وفهد اخو سطان ..
فيصل ابتسم: شلونكم ..
سلطان: الحمدلله ..
فارس: سلطان يبه اخذوا ضيوفكم وتعرفون شغلكم ..
سلطان مبتسم: ان شاءالله ..
فيصل راح مع جاسم وسلطان .. اما عبدالله كان متوتر مسك فارس وما راح معاهم ..
فارس: شو فيك عبود ؟
عبدالله: .............
فارس: زين تعال معاي ..
محمد: فروس حطيت شنطتهم في غرفتنا ..
فارس: مو مشكله ..
محمد: ليش ما راح عبدالله معاهم ؟
فارس مبتسم: يمكن يستحي .. وطالع عبدالله ..
محمد مسح على راسه: وحليله ..
راحوا صوب الفيلا .. دخلوا الصاله والحريم كلهم متيمعين قاعدين يطالعون التلفزيون .. اول ما دخلوا فارس ومحمد البنات تغطوا عدل .. واستغربوا من اللي معاهم ..
ام فارس: فارس يبه من هالولد ؟
فارس مبتسم: هاذي عبدالله البطل ..
عبدالله كان منزل راسه ومستحي ..
فاطمه راحت عنده: وااي فديته يجنن ..
عبدالله مسك فارس من الاحراج ..
فارس: ههههه .. عبود يبه ليش مستحي ..
ام فارس: تعال يبه ..
عبدالله طالع ام فارس وما رتاح لها .. نزل راسه ..
فاطمه: تعال فديتك ..
مسك يد فاطمه وقعد معاها ..
فاطمه: شكله مو غريب علي .. كأني شايفته في مكان .. او يشبه حد ؟
مريم مسحت على راسه: وااي يجنن ..
البنات تيمعوا حول عبدالله وتموا يبوسونه ويلاعبونه ..
ام محمد: ماشاءالله عليه مزيون هالولد ..
محمد: بس مو احلى مني ..
ساره: مسكين اللي مصدق نفسه ..
ام محمد: ههههههه .. فديته محمد ولدي مزيون ..
فارس: عيل ما شفتي فارس .. اللي من حلاه يقط الطير من السما ..
الكل: ههههههههه
ام محمد: عليك سوالف ..
محمد: يمه ما عليج من فارس وايد يغار مني ..
ام محمد: لا فديته فارس ما يغار منك .. الا يحبك ويموت فيك ..
فارس: اي والله في هاذي صدقتي ..
ساره: ترا اغار منك يا فارس ..
فارس مبتسم: وانا اغار منج يا ساره ..
ساره ويها صار احمر وانحرجت ..
محمد: بس يا جماعه لا تتهاوشون علي ..
ام محمد: وا فديت ولدي والله ..
دخل بوفارس واستغرب من عبدالله اللي البنات متجمعين حوله ..
بوفارس: من ولده ؟
ام فارس: ولد رفيج فارس ..
فارس: وذاك اخوه ؟
ام فارس: وينه ؟
فارس: مع الشباب برا ..
ام فارس: وحليلهم ..
فارس: يلا نبي غدا ..
ام فارس: ان شاءالله بنجهز الحين .. التفت على البنات .. يلا يا بنات ..
البنات: ان شاءالله ..
قامت ام فارس و ام محمد والبنات وراهم ..
فارس: عبود تعال اوديك عند فيصل ..
عبدالله مسك يد فارس وطلع معاه .. تم محمد فالصاله بروحه مع ساره .. حط راسه في حضنها وغمض عيونه
ساره: شو فيك حبيبي ؟
محمد: تعبان ابي انام ..
ساره: حياتي جدامك كم يوم وانت تعبان ..
محمد: طلعت الظهر فهالشموس تهلك ..
ساره: يعطيك العافيه حياتي .. تمت تهمز راسه وتمسح على ويهه .. فارس رجع الصاله وشاف محمد في حضن زوجته طلع .. بس قبل ما يطلع سمع الحوار اللي دار بينهم ..
فارس " دامك تحب ساره وش لك بحب غيرها ؟ .. الله يهديك يا محمد " .. طلع الاستراحه عند الشباب ..
فارس: ها المعرس .. ما بينت اليوم ؟
خالد: رحت اقنص شوي ..
فارس: حلاه عليك والله ..
خالد مبتسم: وين مرتي ..
فارس: ولين يا مرتك .. ذبحتنا ..
خالد: هههههه .. كلمني احمد بن راشد من شوي ..
فارس: من ملج هو الثاني وما عدنا نشوفه .. شو مشكلتكم يالمعرسين ؟
خالد: نحب ياللي مو معرس ..
خالد وفارس: ههههههه ..
طلعوا من الاستراحه وراحوا صوب المسبح .. خالد شاف اسماء اخته وناداها ..
خالد: اسامي ..
اسماء: نعم ؟
خالد: نادي لي مريم من المطبخ ..
اسماء: زين ..
فارس: اذكر ربك يا ريال ..
خالد: ههههههه ..
راحت اسماء تنادي مريم .. مريم جاتهم وهي مبتسمه ..
مريم: هلا فارس ..
خالد: اونج ما تدرين اني اللي طالبج ..
مريم بخجل: مادري ..
فارس: هييي انت لاتحرج اختي .. شوف ويها صار احمر ..
خالد وفارس: ههههههه
مريم عصبت وصدت بتروح عنهم وسحبها خالد من يدها ..
خالد: تعالي ..
مريم: بروح اجهز معاهم الغدا ..
فارس: قعدي مع ريلج انا باخذ مكانج فالمطبخ ..
خالد: اول مره تقول شي عدل ..
فارس: سود الله ويهك ..
خالد و مريم: هههههه
راح فارس عنهم .. وخالد مسك يد مريم وتم يطالع عيونها ..
خالد: رفعي راسج حياتي .. خليني اشوف هالعيون اللي ذابحتني ..
مريم: خالد ..
خالد: عيونه انتي ..
مريم: فديتك والله ..
خالد: اموت في كلامج يالغاليه ..
مريم رفعت راسها: زين خالد ابي اروح اجهز معاهم ..
خالد: يا حياتي تروحين وتخليني ؟
مريم: بس ..
خالد حط يده على حلجها: لا بس ولا غيره .. ضغط على يدها .. ابيج بقربي يا مرايم .. من زمان وانا احلم بهاللحظه .. اني امسك ايدج واتأمل جمالج ..
مريم بدلع: خالد ..
خالد: يا لبيه خالد انتي ..
مريم: بعد الغدا بنقعد مع بعض ..
خالد: حاضرين لج بنت العم ..
مريم: زين خل اروح لهم المطبخ الحين ..
خالد: الغاليه ممكن طلب ؟
مريم مبتسمه: آمرني ..
خالد: يا ربي على الذرابه والادب فالكلام ..
مريم: عاد خالد ..
خالد مبتسم: فديت خالد على شفاهج .. زين حبي ابي عصير برتقال من ايدينج الحلوات .. بشرط ما تسوين الا لي انا .. مابي ولاحد عالغدا يشرب عصير الا انا ..
مريم مبتسمه: من عيوني ..
خالد: فديت عيونج والله ..
مريم راحت وخالد كان يراقبها وهي رايحه .. ابتسم وتنفس براحه ..
خالد: الحمدلله على كل حال ..
مريم دخلت المطبخ وفاطمه وايمان يشوفونها ويضحكون ..
مريم: شو فيكم ؟
فاطمه: ولا شي ..
مريم: عميمه شوفيهم ..
ام محمد مبتسمه: وحليلكم يا بنات ..
فاطمه وايمان: هههههههه ..
هيا: زين يلا ودوا الاكل الميلس صوب الريايل ..
ايمان: ان شاءالله ..
شلت ايمان صحن .. وفاطمه شلت صحن وراحت وراها .. ايمان دخلت ومالقت حد .. حطت الصحن على الطاوله وطلعت .. شافت فاطمه في ويها ..
ايمان بخبث: رتبي السفره انتي .. وشردت ..
فاطمه: ايمانو يالسيخفه ..
دخلت الميلس ورتبت السفره حطت الاكواب والماي .. حطت الصحن الاول .. ولما رجعت تاخذ الصحن الثاني من على الطاوله انفتح باب الميلس .. شافت شخص واقف يطالعها بانبهار .. فاطمه ارتبكت وعدلت شيلتها ..
يوسف: السموحه الغاليه .. وطلع بسرعه ..
فاطمه تمت واقفه مكانها وحست ان العالم تجمد من حولها ..
فاطمه " فديته يجنن " .. دخلت عليها ايمان ..
ايمان: فطوم شو فيج واقفه ؟
فاطمه ارتبكت: ها .. مافيني شي .. نزلت الصحن الثاني على السفره .. وخذت الصحن اللي بيد ايمان وطلعوا مع بعض راجعين للمطبخ .. دخلت فاطمه وهي مبتسمه كانت طول الوقت سرحانه .. وقفت عند الباب والباب تفكر وسرحت بعالم ثاني ..
هيا: فطيم شو فيج ماما .. ؟
فاطمه التفت على عمتها وهي مبتسمه: ما فيني شي ..
هيا: من اللي ماخذ عقلج ؟
فاطمه: ويه يا حسره من بياخذ عقلي ..
هيا: هههههه .. يلا تعالي نتغدا ..
فاطمه: مالي نفس اكل الحين ..
هيا: ليش فديتج ؟
فاطمه: باكل بعدين ..
هيا: على راحتج حياتي ..
راحت هيا داخل وتجمعوا الحريم في الصاله والريايل في الميلس .. اما فاطمه طلعت تتمشى فالعزبه ..
يوسف بعد ما طلع من الميلس ابتسم بفرح ..
يوسف " فديت قربها والله " ..
في ميلس الريايل بوفارس كان يطالع فيصل بشك ..
بوفارس " انا وين شايف هالولد ؟ شكله مو غريب " .. تم يتفكر في فيصل ..
بوفارس: فارس يبه هاي اخوه الكبير ؟
فارس: اي يبه .. اسمه فيصل ..
بوفارس: والنعم يا فيصل ..
فيصل: الله ينعم بحالك ..
بوفارس: تعال تغدا يبه ..
فيصل: تغديت قبل ماجي ..
بوفارس: تعال كل لك لقمه بس ..
فيصل: ما تقصر بس شبعان ..
بوفارس: ماشاءالله عليه .. زين على راحتك يبه ..
عبدالله: فارس ..
فارس: هلا يبه ..
عبدالله: ابي ماي ..
فارس: يا جاسم ..
جاسم: نعم ..
فارس: جيب ماي لعبدالله ..
جاسم: ان شاءالله ..
فارس: خذ عبود ..
عبدالله: مشكور .. شرب الماي وقعد جنب فيصل .. فصول خل نطلع برا شوي ..
فيصل: زين ..
وهم طالعين ناداهم سلطان: فيصل ..
فيصل: لبيه ..
سلطان: وين ؟
فيصل: بنتمشى شوي ..
سلطان: بنتغدا وبنجيكم ..
فيصل: بالعافيه ..
الذين يشاهدون الموضوع الآن: 6 (0 من الأعضاء و 6 زائر)
ضوابط المشاركة
|
|
||
|
|
|
|
|
|
||
رد مع اقتباس
مواقع النشر (المفضلة)