{ نهاية حبك إعدامي } رووووووووووعه

[رامون]

طلعوا الشباب الاربعه في سياره وحده .. كلهم ركبوا سيارة يوسف .. فارس ومحمد تموا فالميلس شوي وبعدين طلعوا يتمشون .. الشباب راحوا السينما وتونسوا وايد .. بعد هالوناسه كلن توجه لبيته .. يوسف كان متحرقص يبي يقرى رد فاطمه على رسالته .. اول مادخل البيت استلمه سلمان وتم يسولف معاه يمكن نص ساعه .. ويوسف يكلمه بس باله مع الرساله ..
يوسف: زين خالي بروح اخذ لي شور وببدل وبرجع لك ..
سلمان: زين انتظرك ..
راح يوسف غرفته سكر الباب وطلع الرساله من جيبه .. قرب الرساله من خشمه عشان يستنشق ريحة فاطمه .. عقد حواجبه لانه ما شم الريحه اللي تعود عليها .. فتح الرساله وهو مبتسم .. قرى الرساله و ابتسامته بدت تختفي .. بدى يتنفس بسرعه .. حس بالتوتر والقلق .. عرق و ويهه صار احمر .. قعد على السرير وهو مستغرب من اللي قراه .. كانت الرساله الموجهه ليوسف مشابه للرساله اللي وصلت فاطمه .. كانت كالتالي ..
(( الغالي يوسف ..
انت كونك شخص محترم .. مصلي وتخاف ربك .. قلبك تعلق بفاطمه .. وانت قررت انك تدخل من الباب .. فاعتقد انها بانتظار هالخطوه منك .. لا تخيب ظنها فيك .. وظني انا بعد .. ابغي اكون اول من يبارك لك ..
تحياتي .... )) ..
يوسف بلع ريقه بصعوبه .. قرى الرساله مره ثانيه .. ماعرف كيف يعبر عن شعوره ..
يوسف " من ممكن يكون هالشخص .. يالله طحت من عينهم ؟ بس من يكون هالشخص ؟ وهل ممكن انه قرى غير اخر رساله طرشتها ؟ ومن متى يراقبنا ويعرف بهالشي ؟ وليش كتب لي رساله وما واجهني ؟" ..
تساؤلات وايد كانت في بال يوسف .. تم قاعد على السرير يفكر ويقلب الافكار في مخه ..
يوسف " معقوله يكون عبدالعزيز ؟ او فارس؟ او بوفارس ؟ ولا حد من عيال عمها ؟ بس اليوم كلهم معاي وكانوا طبيعين مثل كل يوم .. فارس كان طبيعي ويضحك معاي .. بوفارس دخل الميلس وقعد يسولف معاي .. عبدالعزيز طول الاسبوع معاه ولا حسيت بتغير من ناحيته .. فاضل وعلي مثل ما هم ؟ محمد بعد عادي وطبيعي معاي .. من ممكن يكون هالشخص ؟ معقوله تكون احد خواتها او امها ؟ لا مستحيل .. يالله اللي مستغرب منه ليش كتب لي رساله ما جاني و واجهني ؟ وش الغرض من كتابته للرساله ؟ هل فاطمه تدري او لأ ؟ من متى كان يدري هالشخص ؟ يا ربي وش اللي يصير حولي ؟ معقوله يكون خالي سلمان ؟ لا لا لا .. هو ما يروح بيت بوفارس وايد .. من ممكن يكون هالشخص ؟ " .. تم يوسف يفكر ويفكر .. سلمان طق الباب ودخل .. يوسف على طول خبى الرساله في الدرج .. سلمان حس ان يوسف فيه شي .. كان متلخبط ومو على بعضه ..
سلمان: وينك تأخرت يا ريال ..
يوسف: ها ..
سلمان: للحين ما تسبحت ؟
يوسف: ها .. لا كنت اتكلم فالتلفون .. الحين بتسبح ..
سلمان " اي تلفون اللي تتكلم فيه يا يوسف .. تلفونك تحت فالصاله .. شسالفته هالولد ؟" ..
سلمان: زين خلص عشان نتكلم في موضوعك ..
يوسف: ان شاءالله ..
سلمان طلع وراح عند هنادي .. يوسف خذ له شور سريع وانضم لهم ..
سلمان: نعيما ..
يوسف: الله ينعم عليك ..
سلمان: عن اذنج هنوده ..
هنادي: عندكم اذاني .. شتبون في اذني ..
سلمان: هههههه .. تصبحين على خير ..
هنادي: وانت بخير خالي ..
طلعوا الشباب وراحوا غرفة يوسف ..
سلمان: شفيك يوسف .. احسك مو على بعضك ؟
يوسف: مصدع ..
سلمان فهم ان يوسف ما يبي يتكلم في اي شي ..
سلمان: زين عيل ارتاح انت .. وبخصوص موضوعك ووقت ما ترتاح نتكلم فيه ..
يوسف: اسمحلي خالي ..
سلمان مبتسم: مسموح الغالي .. يلا يبه تصبح على خير ..
يوسف: وانت بخير خالي ..
طلع سلمان وهو يفكر في يوسف .. اما يوسف المسكين ماقدر ينام من كثر التفكير ..
( يا ترى من يكون هالشخص ؟ وهل يوسف بيوفي بوعده لفاطمه ؟ )
" قالت انت السهد قلت الليل جاني .. والليالي كيف تصبر عن قمرها .. قالت انت العمر وايامي ثواني .. والثواني طولت كيف اختصرها " ..

[رامون]

الساعه 2 ونص بالليل .. يوسف حايس في غرفته مو عارف يقعد على حيله .. يقرى الرساله ومتوتر .. خايف ان فاطمه صار لها شي .. خايف ان فاطمه اهلها دروا .. تم يفكر ويفكر .. ما غمض له جفن .. طلع من الغرفه وراح صوب غرفة سلمان .. طبعا سلمان هو والليل صاروا اصحاب .. كان سلمان يقرى كتاب على ضوء خفيف فالغرفه .. دخل عليه يوسف ولقاه قاعد .. سلمان سكر الكتاب وتم يطالع يوسف القلق .. يوسف تقدم من السرير وقعد جنب خاله ..
سلمان: قولي وش في خاطرك يبه ..
يوسف نزل راسه و زفر زفرة قلق ..
يوسف: خالي انا لازم اروح اخطب فاطمه ..
سلمان مبتسم: ان شاءالله .. هالاسبوع نروج لهم ..
يوسف: اقرب وقت الله يخليك ..
سلمان: حاضرين لك والله .. بس شفيك قلق ومتوتر ؟
يوسف: ها .. قلق .. لاني مستحي منك شوي ..
سلمان: افا عليك يا بوخليفه .. واخيرا بنفرح فيك .. الله يوفقك بفاطمه اختيارك ..
يوسف ابتسم: الله يسلمك يا خالي ..
يوسف حس بالراحه شوي لانه تأكد ان مو خاله سلمان اللي كتب له الرساله ..
سلمان: يوسف ممكن اسألك سؤال ؟
يوسف بخوف: تفضل ..
سلمان: لو رحنا بيت بوفارس وقالوا ان البنت محيره لاحد عيال عمها .. لا تزعل ..
يقاطعه يوسف: لا خالي ارجوك لا تخوفني ..
سلمان استغرب من ردة فعل يوسف ..
يوسف " ليكون اهلها دروا و بيزوجونها واحد من عيال عمها غصبن عنها .. باموت لو صار هالشي " ..
سلمان: شفيك يوسف .. انت مو على بعضك من رجعت من برا .. شصاير ؟
يوسف: ما فيني شي .. بس الله يخليك خالي لا تخوفني ..
سلمان ما حب يناقش يوسف المتوتر ..
سلمان: ان شاءالله .. زين متى نروح لهم ؟
يوسف: اول كلم بوفارس ونحدد يوم نزورهم فيه ..
سلمان: ان شاءالله ..
يوسف قام من مكانه بيطلع ..
يوسف: مشكور خالي .. وعقبالك ..
سلمان اكتفى بابتسامه ..
يوسف: تصبح على خير .. لو قعدت لين الفجر قعدني ..
سلمان: بأذن الله ..
طلع يوسف وهو يفكر في خاله والغموض اللي يحيط سلمان .. دخل الغرفه وشاف الرساله .. بلع ريقه بصعوبه خذ الرساله حطها مع باقي رسايل فاطمه .. انسدح على السرير وحاول ينام بس كان متوتر ويفكر في الموضوع وايد .. لان اللي حيره هو الشخص اللي كاتب الرساله ..
يوسف " يالله يا ترى من يكون هالشخص .. فشله شلون بجابلهم .. المشكله مو عارف من يكون .. بس اتمنى ما صار شي على حبيبة قلبي فطومه .. ايه عليها الرقيقه .. بس انا بدخل من الباب باذن الله" ..
يوسف الحيران تم يفكر طول الليل .. اما فاطمه اللي كانت في عالم ثاني .. حالتها حاله البنت ..

طلعت الشمس معلنه عن بدء يوم جديد .. خالد فتح عيونه على رنة الموبايل .. مريم كانت متصله تقعده للدوام ..
خالد: هلا حبيبتي ..
مريم: صباح الخير حبيبي ..
خالد: صباح المرايم والله ..
مريم مبتسمه: فديت قلبك .. يلا حبيبي صحصح الساعه 6 بالضبط ..
خالد: ان شاءالله يا قلبي ..
مريم: عفيه فديت قلبك .. كلمني لي وصلت المكتب ..
خالد: ان شاءالله ..
سكرت من خالد وهي مبتسمه .. قامت ونزلت عند امها وابوها .. دخلت وسلمت عليهم ..
ام فارس: مرايم يمه .. جيبي الحليب من الثلاجه ..
مريم: ان شاءالله ..
بوفارس: شو اخبارج مع خالد يا عروسه ؟
مريم منحرجه: الحمدلله ..
بوفارس: كل شي تمام ؟
مريم: الحمدلله كل شي تمام ..
بوفارس: الله يهنيكم ان شاءالله .. والفال حق الباقي ..
ام فارس: آمين يا رب العالمين ..
بوفارس: زين خلصتي جهازج ولا بعدج ؟
مريم: تقريبا ..
بوفارس: شو باقي لج ؟
مريم: الفستان .. والعقد .. وبعض الاشياء مثل ملابس وعطور ..
بوفارس: عسى مو قاصرج شي يمه ؟
مريم: الحمدلله مو قاصرني شي .. وخالد ما يقصر ..
بوفارس: يسلم راسه ولد اخوي ..
ام فارس: والله ما عليه قصور .. ورايته بيضه الولد .. قايم في بنتي وحاطها بعيونه ..
بوفارس: خالد ريال الله يحفظه ..
مريم كانت تسمع تمدح امها وابوها في خالد .. وكانت طايره من الوناسه .. دخلت عليهم ايمان و وراها عبدالعزيز ..
ايمان: بابا حبيبي .. وباست راسه ..
بوفارس مبتسم: هلا والله حبيبة ابوها ..
ايمان: اليوم عندي امتحان .. ادعوا لي ..
بوفارس: موفقه يالغاليه ..
عبدالعزيز: وين جسوم ؟
ام فارس: راقد ..
عبدالعزيز: سمالله عليه تعبان ولا فيه شي ؟
بوفارس: لا ما فيه شي .. الولد أجز .. خلص امتحاناته امس ..
ايمان: يا حظه والله ..
عبدالعزيز: ما بقى على امتحاناتج شي انتي بعد ..
ايمان: باقي لي اسبوع بس .. بس احسه طويل وايد ..
مريم: بيمر بسرعه بتشوفين .. بس لان عندج دراسه وامتحانات تحسين الوقت ثقيل ..
ايمان: الا احس الوقت يغلس علي ..
الكل: ههههههه ..
ام فارس: الله يوفقج يمه ..
بوفارس: متى بتطلع نتايج جسوم ؟

[رامون]

ام فارس: الاسبوع الجاي ..
دخلت عليهم فاطمه و وراها فارس .. سلموا على امهم وابوهم وقعدوا يتريقون .. فاطمه ما كانت على بعضها .. صبت لها حليب وتمت تشرب بهدوء .. وفارس كان اهدى منها ..
بوفارس: شعندك قاعد من وقت اليوم ؟
فارس: ابي اخلص اشغال المكتب .. بنأثث ولازم اشرف على العمال .. واراقبهم ..
فاطمه من سمعت كلمة ( اراقبهم ) بدت تتنفس بخوف ..
بوفارس: يعطيك العافيه ..
ام فارس: اسوي لك سندويش يبه ؟
فارس: مالي نفس ..
ام فارس: اسوي لك نسكافيه ؟
فارس: اي ..
تم يلعب بالشوكه اللي جدامه وهو ساكت ..
ايمان: بابا توصلني اليوم ؟
عبدالعزيز: مب جايه معاي ؟
ايمان: خاطري بابا يوصلني ويمر ياخذني ..
بوفارس: عيوني لج ..
ايمان بوناسه: يااااي ..
بوفارس: فديت قلبج والله .. زين يلا قومي لبسي عباتج ..
ايمان: ان شاءالله ..
راحت تلبس عبايتها وهي مستانسه ..
بوفارس: فارس شو هالمزاج ؟
فارس: مافيني شي ..
فاطمه حطت كوب الحليب وقامت عنهم ..
بوفارس: وين يبه ؟
فاطمه: بروح البس ..
بوفارس: زين فديتج ..
عبدالعزيز: وانتي مب رايحه الجامعه ؟
مريم: بلا بس بيمر علي خالد .. ومحاضرتي الساعه 8 ..
عبدالعزيز: احم احم .. بيمر عليها خالد ..
بوفارس: حركات والله ..
فارس: على قولتك يبه .. حركات ..
مريم: بس اشتغلوا ..
الكل: هههههه ..
دخلت ايمان: بابا .. يلا انا جاهزه ..
بوفارس: يلا فديتج ..
طلع بوفارس وراح يوصل ايمان المدرسه .. فارس راح الغرفه بدل وطلع على طول .. فاطمه راحت الجامعه .. مريم انتظرت خالد يمر عليها .. عبدالعزيز راح الجامعه .. جاسم كان نايم .. ام فارس تمت تعابل البيت مع الخدامات .. فارس راح المكتب واتصل بنماف اول ما وصل ..
فارس: حياتي ..
مناف: هلا والله يا قلبي .. صحصحت ؟
فارس: اي والله صحصت ..
مناف: شلونك ؟
فارس: لوني ابيض ..
مناف: هههههه ..
فارس مبتسم: فديت هالضحكه والله ..
مناف: انت فالمكتب حبيبي ؟
فارس: اي توني واصل ..
مناف: تريقت حبيبي ؟
فارس: لا والله .. جان انتي بتريقيني ..
مناف انحرجت: ..........
فارس" فديت اللي انحرجت": زين الساعه كم اول محاضره ؟
مناف: الساعه 8 ..
فارس: زين حياتي ابي اجيب الغرض اللي قلت لج عنه متى ؟
مناف: حبيبي انا آسفه عشان ذاك اليوم .. بس انشغلت مع الدراسه ..
فارس: عادي حياتي .. الغرض عندي .. بس ابي اجيبه لج ..
مناف: زين تقدر تمر اليوم ؟
فارس: الساعه كم حبيبتي ؟
مناف: الساعه 9 فالليل ..
فارس: ممممممم ..
مناف: مشغول هالحزه ؟
فارس: لا مو مشغول .. ولو مشغول افضي نفسي لج .. انتي قلبه اللي ينبض ..
مناف: حياتي يا فارس ..
فارس: يعني لقائنا الساعه 9 بالليل ..
مناف: حبيبي لقاء من ؟
فارس: لقائنا ..
مناف: مافي لقاء .. بس توصل الطلبيه وتروح
فارس: لا لا لا لا ..
مناف: حبيبي ودي اشوفك بس اخاف امي تقعد ؟
فارس: حياتي تبين امر عليج وقت متأخر اكثر ؟
مناف: ممممم .. امي تنام من وقت مع اخواني .. بس حبيبي اخاف تقعد ..
فارس: زين بس عن خاطري ابي اشوفج دقيقه عند الباب ..
مناف: ممممم .. زين بس ماقدر اطول حبيبي ..
فارس مبتسم: ولا يهمج الغاليه ..
مناف" فديت قلبه والله .. شوفتي في دقيقه فرحته " ..
فارس: وين رحتي يا قلبه ؟
مناف: معاك حبيبي ..
دخل خالد على فارس ..
خالد: السلام عليكم ..
فارس: زين باكلمك بعدين ..
مناف: زين حبيبي ..
فارس: عليكم السلام يا مدير .. شحالك ؟
خالد: طيب .. انت شو مسوي ؟
فارس: عايشين .. صج اللي سمعته يالنسيب ؟
خالد" قالت لي مرايم بيقطعوني": شو اللي سمعته ؟
فارس: مودي المدام الجامعه اليوم ؟
خالد: فروس انت مردك بتعرس .. وصدقني بقعدك لك مثل العظمه فالبلعوم ..
فارس: هههااااااي .. في احلامك يا حبيبي ..
خالد: اضحك الحين واصبر علي بعدين .. ان ما لتهتك ..
فارس: انتظر هاليوم بس ..
خالد: شد حيلك ..
فارس مبتسم: ان شاءالله .. اقعد ولد عمي .. شو تشرب ؟
خالد: والله شارب مع المدام ذيك القهوه اللي صحصحتني عالصبح ..
فارس: اخاف شربت قهوه بس ..
خالد: وجع يا فروس ..
فارس: هههههههه ..
تموا فالمكتب يسولفون شوي .. وبعدين راحوا يخلصون اشغالهم ..
الساعه 10 ونص الصبح .. سلمان خذ جواله واتصل على بوفارس ..
بوفارس: حيالله بوخليفه ..
سلمان: هلا والله .. الله يحيك ..
بوفارس: شحالك يبه ؟
سلمان: طيب الله يسلمك .. اعلومك الغالي ؟
بوفارس: الحمدلله ما نشكي باس .. وينك ما تبين هالايام ؟ تتغلى علينا ..
سلمان: هههههه .. ما تغلى .. بس مشغول مع الاهل عشان تجهيزات العرس ..
بوفارس: بارك الله فيك .. والله يتمم لكم على خير ..
سلمان: الله يسلمك الغالي .. والفال لكم ..
بوفارس: والله بتشوف لي بنت 18 سنه راضي ..
سلمان: ههههه .. تعيد شبابك ..
بوفارس: ههههه .. لا غير ام فارس ما يدق له قلبي ..
سلمان مبتسم: الله عليك يا بوفارس .. زين الغالي هالاسبوع انت مشغول ؟
بوفارس: آمرني يبه ..
سلمان: ما يامر عليك العدو .. بس بغيت امركم هالاسبوع ..
بوفارس: حاضرين لك الغالي .. لو بغيت نتشاوف اليوم ما عندي مشكله ..
سلمان" خير البر عاجله": خلاص نتشاوف اليوم الساعه 8 ونص يناسبك ؟
بوفارس: حياك والبيت بيتك يالغالي ..
سلمان: ما عليك زود .. ما طول عليك الغالي ..

[رامون]

بوفارس: حياك الله ..
سكر سلمان من بوفارس والتفت على يوسف اللي القلق والتوتر بانوا على ويهه .. بلع ريقه بصعوبه ..
يوسف: ها بشر خالي ؟
سلمان: ان شاءالله بقابله اليوم الساعه 8 ونص ..
يوسف تنفس براحه ..
يوسف: الحمدلله ..
سلمان: يوسف الله يخليك صارحني .. شفيك ؟
يوسف: لا ولا شي خالي .. بعدين بتعرف ..
سلمان: على راحتك .. زين انا برجع الشغل تبي شي ؟
يوسف: لا يسلم راسك ..
سلمان: الا بسألك ؟
يوسف: تفضل ..
سلمان: متى بتخلص امتحاناتك ؟
يوسف: خلصت امس اخر ماده الحمدلله .. ونهاية الاسبوع بتطلع النتايج ..
سلمان: ماشاءالله عليك .. زين مب رايح الدوام انت ؟
يوسف: اليوم ماخذ اجازه ..
سلمان: زين انا بمشي ..
يوسف: الله وياك ..
طلع سلمان وهو محتار في تصرفات يوسف .. بس هو ما حب يضغط عليه .. خلاه على راحته .. يوسف غطى ويهه بيدينه وهو يفكر في فاطمه .. كانت كاسره خاطره .. كان خايف عليها .. طالع ساعته وتم يحسب الوقت لين الساعه 8 ونص المسا .. حس ان الوقت يعانده وما يمر بسرعه ..
فاطمه كانت قاعده فالكفتريا مع لطيفه .. كانت ساكته ولطيفه تسولف ..
لطيفه: فطوم شفيج اليوم ؟
فاطمه: مافيني شي ..
لطيفه: مو عاجبتني اليوم .. من مضايقج ؟
فاطمه: ولا حد ..
لطيفه: شوفي مناف جايه من بعيد ..
فاطمه: وينها ؟
لطيفه وأشرت على مناف: هناك ..
فاطمه شافت مناف وهي مبتسمه .. مناف بادلت فاطمه نفس الابتسامه .. قربت مناف منهم .. سلمت عليهم وقعدت ..
مناف: شحالكم يا بنات ؟
لطيفه: الحمدلله ..
فاطمه: تمام .. انتي شو اخبارج ؟
مناف: الحمدلله .. اخباركم مع الامتحانات ؟
لطيفه: سكتي .. احس اني مو مستوعبه شي .. اشوف الورقه ولا اعرف وش اكتب فيها ..
فاطمه: مو منج ..
لطيفه: شقصدج يعني ..
مناف وفاطمه طالعوا بعض وضحكوا ..
مناف وفاطمه: ههههههههه ..
لطيفه: احلفوا انتوا الثنتين ..
فاطمه: عليج حركات يا لطوف ..
لطيفه: مناف .. الله جابج .. من شوي لو تشوفين فطوم .. تقولين هاذي شايله هموم الدنيا على راسها ..
مناف: ليش حبيبتي ؟ عسى ما شر ؟
فاطمه مبتسمه: ما فيني شي حبوبه ..
لطيفه: ما عليج منها .. ترا تخش ..
فاطمه: هههههه .. والله انتي يا لطوف عجيبه ..
مناف تمت اطالع فاطمه وفجأه جى على بالها فارس ..
مناف" فديت قلبك يا فارس" ..
فاطمه: مناف ما بقى شي على نهاية الكورس .. ممكن تعطيني رقمج اخزنه عندي ..
مناف: ان شاءالله ولا يهمج حبيبتي .. سجلي عندج ****** ..
فاطمه: مشكوره حبيبتي .. برسل لج مسج عشان تعرفين رقمي ..
مناف: ان شاءالله ..
لطيفه: مناف ..
مناف: نعم
لطيفه: كم ماده باقي لج ؟
مناف: خلصت هالاسبوع 3 مواد .. باقي لي مادتين وحده بقدمها هالاسبوع .. و آخر ماده بقدمها الاسبوع الجاي
لطيفه: الله يوفقج ..
مناف: مشكوره .. وانتي كم ماده باقي لج ؟
لطيفه: بكره بقدم آخر ماده ..
مناف: الله ياحظج .. وانتي فاطمه ؟
فاطمه: الله يسلمج .. في ماده بيعيدها لنا الدكتور .. وباقي لي 3 مواد .. كلهم باخلصهم الاسبوع الجاي ..
مناف: الله يعينا يا بنات ..
لطيفه: اي والله ..
رن جوال لطيفه وردت .. كان زوجها متصلها .. استأذنت من البنات وطلعت .. تمت فاطمه مع مناف ..
مناف: مريم شخبارها ؟ ما تبين
فاطمه: مريوم من صادت الريل ما تبين .. اذا احنا ما نشوفها فالبيت ..
مناف: ههههههه .. الله يوفقها ..
فاطمه: وياج حبيبتي ..
تموا البنات مع بعص فالكفتريا .. فاطمه رجعت البيت على الساعه 4 العصر .. اما مناف الفقيره تمت تنتظر الباص .. فاطمه اول ما دخلت لقت يدها عندهم .. سلمت عليه وقعدت معاه شوي ..
الجد: يعطيج العافيه يا بنتي ..
فاطمه: الله يعافيك يدي ..
الجد: حشى شو هالدراسه اللي لين العصر ؟
فاطمه: الجامعه يا يدي ..
الجد: وعساج شاده حيلج .. ؟
فاطمه: الحمدلله ..
الجد: عاد نبي الشهاده اللي ترفع الراس ..
فاطمه: باذن الله بارفع راسكم بالشهاده ..
الجد: بارك الله فيج ..
بوفارس: مو بس الشهاده اللي ترفع الراس .. حتى الاخلاق ..
فاطمه طالعت ابوها بدهشه .. بوفارس ابتسم لها .. استأذنت وراحت غرفتها .. دخلت الغرفه وتمت تصيح بحزن
خل نرجع للجد اللي قاعد تحت فالصاله ..
الجد: وين ولدي ؟
بوفارس: هذاني عندك ..
الجد: لوع الله جبدج .. انا اقصد بوسعود ..
بوفارس: بل ..