{ نهاية حبك إعدامي } رووووووووووعه

[رامون]

يوسف: سر بيني وبينها ..
فارس: ها من الحين ..
يوسف: هاي اسرار زوجيه ..
الكل: هههههه
فارس: فطيم شو قلتي ..
يوسف: لا تقولين له شي ..
فارس: افا يا فطيم .. يغيرج علينا الريل ..
يوسف: احم احم ..
عبدالعزيز: ما عليك يا فارس .. الحين بتقولي ..
يوسف: صدقني ما راح تقولك ..
عبدالعزيز: بتقولي وبتشوف ..
يوسف: لو قالت لك .. لك اللي تبيه ..
عبدالعزيز: فارس خلك شاهد ..
يوسف: بنشوف ..
عبدالعزيز: فطيم فديتج .. شو قلتي ليوسف الحين ؟
فاطمه نزلت راسها وهي مبتسمه ..
عبدالعزيز: انا توأمج .. عفيه قولي لي ..
فاطمه: لا ..
يوسف: يا روحي ..
عبدالعزيز: تدلعين جدام الريل .. معليه خل يطلع بس ..
يوسف: لا تهدد من الحين .. ترا باخذها معاي ..
فارس: شو تاخذها معاك ..
يوسف: انا ريلها ..
فارس: بس للحين هي اختنا ..
عبدالعزيز: بس يا جماعه لا تتهاوشون علي ..
فارس ويوسف: من زينك ..
الكل: ههههههههه ..
فارس: الله يبارك لكم ويوفق بينكم ان شاءالله ..
يوسف: الله يسلمك ..
عبدا لعزيز: مبروكين يا عصافير .. الله يوفق لكم ..
يوسف: تسلم الغالي ..
طلعوا عبدالعزيز وفارس وخلوهم بروحهم .. تم يوسف يسولف مع فاطمه وفاطمه كانت فرحانه وهي تسمع له .. الساعه 12 ونص بالليل .. يوسف شاف الساعه ..
يوسف: ماشاءالله الساعه 12 ونص ..
فاطمه: ولا حسينا بالوقت ..
يوسف: وانتي اللي يقعد معاج ينسى الدنيا باللي فيها ..
فاطمه نزلت راسها بخجل ..
يوسف: اموت في خجلج والله ..
مشى صوب الباب وفاطمه كانت تمشي جنبه .. فتح الباب و وقف مجابلها ..
يوسف: ممكن تعطيني رقمج ؟
فاطمه: ان شاءالله .. سجل ****** ..
يوسف: فديت قلبج والله .. انتظري مني مسج حياتي ..
فاطمه: ان شاءالله ..
طلع يوسف و سلم عليها ..
فاطمه: تحمل بنفسك فالدرب ..
يوسف مبتسم: ان شاءالله .. يلا فديتج دخلي وسكري الباب ..
فاطمه: الله وياك ..
دخلت وسكرت الباب .. يوسف ركب السياره وكان فرحان .. طلع من بيت بوفارس وهو يسوق بهدوء .. فاطمه راحت غرفتها وهي فرحانه ..
مريم وايمان كانوا يضحكون على فاطمه وهم طالعين من غرفتها .. اما فاطمه بدلت ملابسها وانسدحت على السرير بتنام .. الا يوصلها مسج من يوسف .. كان المسج كالتالي ..
(( ودي بحضنك في الهوى دون تفريق .. واشفي شفاتي بشف معسول فمك .. واحيا بقربك دون كل المخاليق .. وابعد وكلي شوق وارجع اضمك .. وابحر بحبك واغرق القلب تغريق .. حتى تذوب اشواق قلبي بدمك )) ..
ابتسمت وهي تقرى المسج .. ردت عليه ..
(( دايم على الخاطر تجي مثل الامطار .. كنك تعرف اني من الشوق ظامي .. انا فرشت القلب لك ورد وازهار .. وانت بغلاتك فقت كل اعترافي .. انا رفيقك ان قسى الوقت او جار .. وانا على عهد الوفى دوم باقي )) ..
يوسف قرى ردها واستانس .. غمض عيونه ونام براحه وهدوء .. وفاطمه بعد ما ردت على مسج يوسف نامت بهدوء ..
هالليله الهاديه كانت مميزه لفاطمه ويوسف .. بس فارس ومناف كانوا متأزمين شوي .. فارس كان يكلم مناف اللي ما سكتت من الصياح ..
فارس: حياتي انتي خلاص .. والله اني آسف ..
مناف كانت تصيح ..
فارس: حبيبة قلبه انتي .. الله يرضى عليج .. مسحي هالدموع .. لا تكدرين خاطرج حياتي ..
مناف ما سكتت من الصياح .. فارس لام نفسه وهو يحاول يسكتها ..
طبعا انتوا متحرقصين تبون تعرفون ليش مناف تصيح .. بس ما راح اقولكم خخخخخخخ .. بعدين بتعرفون ..
فديتني شريره حدي .. هههههههه ..
يوم جديد وفاطمه تفتح عيونها بفرح .. حست ان ليلة امس كانت حلم .. شيكت على جوالها وشافت مسج يوسف تأكدت انها عايشه بالواقع .. والاحداث اللي مرت عليها ما كانت خيال .. قعدت بنشاط ونزلت عند امها وابوها .. كانت الساعه 8 ونص الصبح ..
فاطمه مبتسمه: صباح الخير ..
ام فارس وبوفارس: صباح الورد ..
بوفارس: شحال عروستنا ؟
فاطمه منحرجه: طيبه .. وباست ابوها ..
راحت صوب امها وباستها .. حضنتها وقعدت جنبها ..
ام فارس: فديت بناتي .. كبروا وصاروا حريم .. كل وحده بتفتح بيت وبنشوف عيالكم يلعبون هني فالبيت ..
بوفارس: عاد كثروا من البنات ..
ام فارس: وليش البنات ؟
بوفارس: فديت البنات والله .. مخلوقات جميله وتريح الخاطر .. كفايه شوفتهم حولك ترتاح نفسك ..
ام فارس: اللي يجي من الله حياه الله ..
بوفارس: الحمدلله على كل حال ..
ام فارس: خلاص الحين مافي جامعه ولا امتحانات .. ارتاحوا من هالكتب شوي ..
فاطمه: اي والله .. زين بابا متى بنسافر ؟
بوفارس: على طول بعد عرس اختج .. خلاص ما بقى على العرس شي .. كلها كم يوم ..
فاطمه: يعني بنسافر بدون مرايم ؟
ام فارس: اي والله .. فديتها مرايم ..
دخلت عليهم مريم مبتسمه .. صبحت عليهم ..
بوفارس: فديتها عروستنا ..
مريم: شو كنتوا تقولون عني ؟
ام فارس: بنفقدج هالسنه ..
مريم بحزن: اي والله ..
فاطمه: انتي هالسنه وانا السنه الجايه ..
الكل: ههههههه ..
بوفارس: وين الجسمي ؟

[رامون]

ام فارس: هايت مع ولد اخوك ..
بوفارس: ههههه .. خل يستانسون فالاجازه ..
ام فارس: رايحين يتريقون في مطعم لبناني .. حمص و فول ..
فاطمه: والله هالثنين عليهم طلعات ..
ام فارس: طالع من صباح الله خير ..
بوفارس: هالمطعم 24 ساعه فاتح ..
ام فارس: حتى الدريول ما تريق ..
بوفارس: بيريقونه معاهم ..
فاطمه: اليوم بتروحين تاخذين الفستان ؟
مريم: اي ان شاءالله .. اول امس سويت آخر بروفه .. واليوم باستلمه ..
بوفارس: جعله لبس العافيه يا بنتي ..
مريم مبتسمه: الله يعافيك يبه ..
فاطمه: متى بتروحين ؟
مريم: لا مو رايحه .. عزيز بيجيبه لي .. ليش تبين تروحين مكان انتي ؟
فاطمه: اي .. تجين معاي .. بخلي فارس يودينا .. وغمزت لمريم ..
مريم فهمت قصد فاطمه ..
مريم: زين بروح معاكم .. بس الساعه كم بتطلعون ؟
فاطمه: بنطلع العصر ..
مريم: حلو ..
ام فارس: ساره مرت محمد حامل ..
بوفارس: مبروك .. يستاهل بونايف ..
فاطمه: حليلها ساره تستاهل ..
ام فارس: ام محمد مستانسه وهي تقولي حليلها ..
بوفارس: محمد ماشاءالله عليه يحب العيال ..
فاطمه: حليله والله ..
رن جوال مريم وخالد كان متصل لها .. ردت عليه وراحت تتكلم بعيد عنهم ..
خالد: هلا حبيبتي ..
مريم: هلا وغلا .. شحالك ؟
خالد: الحمدلله .. توني داش المكتب ..
مريم: ليش متأخر .. انا قعدتك الساعه 6 ونص ..
خالد: قمت فديتج بس فالطريق كان في حادث .. وتعطلنا والناس قامت تصعد ارصفه ..
مريم: ووووي .. بسم الله ..
خالد: شكله كان حادث خشن ..
مريم: حبيبي ..
خالد: قولي فديت قلبج ..
مريم: ابي اروح مع فارس وفطيم السوق ..
خالد: روحي فديتج .. شعندج بالسوق ؟ قاصرج شي ؟
مريم: لا فديتك .. بس فطيم تبي تاخذ رايي في اغراض تبي تشتريها ..
خالد: زين فديتج روحي معاها ..
مريم: مشكور فديت قلبك ..
خالد: حاضرين لج الغاليه .. زين انا باكلمج بعدين ابي اخلص الاوراق اللي على مكتبي ..
مريم: الله وياك ..
رجعت مريم الصاله وتمت مع امها وابوها واختها .. تموا يسولفون عن العرس وتجهيزاته ..
الساعه 10 ونص فاطمه راحت غرفة فارس عشان تقعده من النوم تقوله يوديهم العصر .. دخلت عليه الغرفه وكان غرقان فالنوم وباين عليه التعب .. قربت من سريره وقعدت جنبه ..
فاطمه: فارس ..
فارس: هممممم ..
فاطمه: فارس قوم يلا الساعه 10 ..
فارس: شدعوه ..
فاطمه: اي .. مب رايح الشركه اليوم ؟
فارس: اففففف .. لا مب رايح ..
فاطمه: شفيك فارس ؟
فارس: ولا شي .. بس مصدع .. جيبي لي ماي .. عطشان ..
فاطمه: ان شاءالله ..
راحت صوب ثلاجته الصغيره .. طلعت له قرشة ماي .. فتحتها وعطته يشرب .. خذ القرشه وشرب الماي دفعه وحده من العطش .. فاطمه استغربت ..
فاطمه: فارس تعبان ؟
فارس: لا .. امي وابوي وين ؟
فاطمه: تحت فالصاله ..
فارس: بندي المكيف ..
فاطمه: ان شاءالله ..
بندت المكيف ورجعت قعدت على السرير ..
فاطمه: فارس مشغول اليوم ؟
فارس: متى ؟
فاطمه: العصر ..
فارس: مادري ليش ؟
فاطمه: ابي اروح السوق شوي ..
فارس: زين بوديج ..
فاطمه مبتسمه: مشكور فارس ..
فارس: حاضرين ..
فاطمه: زين قوم بسك نوم ..
فارس: والله عيزان ..
فاطمه: متى نمت امس ؟
فارس: ما تأخرت ..
فاطمه ماصدقته: اهااا .. زين يلا قوم .. تبيني اسوي لك شي ؟
فارس: امي سوت شاي ؟
فاطمه: اي في شاي وقهوه ..
فارس: زين بعد 10 دقايق جهزي لي كوب على ماخلص وانزل ..
فاطمه: من عيوني ..
ابتسم لها فارس وغطى ويهه باللحاف .. طلعت فاطمه وهي مستانسه ان فارس وافق يوديهم .. راحت غرفتها عشان تشيك على جوالها .. لقت مسج من يوسف .. وكان المسج كالتالي ..
(( صباح الورد يا فطومتي الحلوه .. شلون كانت نومتج ؟ .. ان شاءالله ارتحتي ))
ابتسمت وهي تقرى المسج .. ردت عليه ..
(( صباحك سكر .. نومتي كانت حلوه الحمدلله .. انت شلون كانت نومتك ؟ ))
يوسف قرى المسج و رد على طول ..
(( فديتج وفديت نومتج والله .. انا نومتي كانت حلوه بحلاج يا فطومتي .. احبج ))
قرت الرد وكانت مستانسه من الخاطر .. ما قدرت ترد على المسج من الخجل .. خذت الجوال معاها ونزلت الصاله .. اول ما دخلت لقت ايمان حاطه راسها في حضن امها .. ومريم كانت تشرب قهوه .. وابوها يقرى الجريده .. دخلت وصبت شاي لفارس .. قربت من مريم وهمست ..
فاطمه: وافق يودينا العصر ..

[رامون]

مريم مبتسمه: والله ..
فاطمه: اي ..
مريم: زين متى بتفاتحينه بالموضوع ؟
فاطمه: خل نخلص من التسوق وبعدين بنتكلم فالسياره على رواقه ..
مريم: حلو .. والله انج خطيره ..
فاطمه: احم احم ..
مريم: خفي علينا ..
مريم وفاطمه: ههههههههه
الكل التفت عليهم مستغرب .. مريم وفاطمه طالعوا بعض وضحكوا مره ثانيه .. دخل عليهم فارس اللي كان متخدر ويبي ينام .. سلم على امه وابوه وقعد عند امه ..
ام فارس: شو فيك يبه ؟
فارس: متسندر ..
ام فارس: وش منه يبه ؟
فارس: مادري ..
ام فارس: اصب لك شاي ؟
فارس: فطيم وين كوبي .؟
فاطمه مدت له كوبه ..
فارس: مشكوره ..
ام فارس: وليش ما رحت الشغل اليوم ؟
فارس: اقولج متسندر يمه ..
ام فارس: سمالله عليك يبه .. زين تعال خل امسدك شوي ..
فارس: والله تسوين خير يمه ..
ام فارس: مريم يمه .. قومي جيبي لي الزيت في المطبخ ..
مريم: ان شاءالله ..
بوفارس: شعنده اللي متسندر ؟
فارس مبتسم: ما عنده شي ..
بوفارس بخبث: اخاف ما عنده شي ..
فارس وابوه: ههههههه
لما فارس وبوفارس يتكلمون بالالغاز ويضحكون .. الكل يصيده فضول .. ودهم يعرفون السر ..
مريم: هاج يمه ..
ام فارس: تعال يبه خل امسد راسك ..
فارس: ان شاءالله ..
حط راسه في حضن امه .. ام فارس حطت في يدها شوية زيت وتمت تمسد ولدها .. فارس حس بالراحه .. تم حاط راسه في حضن امه ومغمض عيونه .. ام فارس كانت تحرك اصابعها بين شعر فارس اللي ارتاح من هالحركه ..
ام فارس: سمالله عليك فديتك ..
فارس: ايه عليج يا يمه .. والله يدج خطيره ..
ام فارس: زين قص شعرك ..
فارس: اول امس رايح الحلاق ..
ام فارس: وين رايح وشعرك شطول ..
فارس: وين طويل .. القصه جي ..
ام فارس: مناكركم مناكر عيال هالايام ..
بوفارس: ههههه .. اشور عليك شور ..
فارس: هات ..
بوفارس: قرع ..
فارس: والله تدري يبيله ..
بوفارس: خل فروة راسك شوي تتنشط ..
فارس: صار ..
بوفارس: ايب المكينه ؟
فارس تذكر اخوان مناف لما قالوا له انها تحلق لهم ..
فارس: يلا يبه ..
ام فارس: من صجك ؟
فارس: اي ..
بوفارس: يه خلي يريح راسه شوي .. ايماني ..
ايمان: نعم ..
بوفارس: روحي جيبي المكينه من غرفتي .. بتلقينها فالحمام .. بندي الكهربه وسحبي الواير ..
ايمان: ان شاءالله ..
مريم: فارس من صجك بتحلق ؟
فارس: اي ..
مريم: بس ما بقى شي على العرس ..
فارس: زين .. شو يعني .. عرسج انتي .. انا فارس مو خالد .. اوعي يا بنت ..
الكل: ههههههه
مريم: لا والله تنكت حضرتك .. ادري انك فارس .. بس شلون بتروح العرس ؟
فارس: يبه بيطلع بسرعه .. وبعدين بكون لابس غتره وعقال .. مو مسوي تسريحه ..
الكل: هههههه
مريم: والله عليك طلعات يا فارس ..
ام فارس: ابوج هو السبب ..
بوفارس: هههههه .. شو فيها يعني .. ريال خل يحلق ..
ام فارس: والله ما عندكم سالفه انتوا الثنين ..
دخلت ايمان وفي يدها المكينه .. عطتها ابوها ..
بوفارس: تبي برا ولا هني ؟
فارس: عادي ..
بوفارس: ايمان يبه .. فرشي جريدتين على الارض .. وجيبي كرسي ..
ايمان: ان شاءالله .. واااااو فله ..
فاطمه: هههههه .. اي والله فله ..
بوفارس: فطيم فديتج جيبي لي فوطه ..
فاطمه: ان شاءالله ..
بوفارس: يلا قوم ارتز على الكرسي ..
فارس: زين ..
قعد فارس على الكرسي .. بوفارس خذ الفوطه ولفها على رقبة فارس .. شغل المكينه وحلق لفارس صفر .. بعد ما خلص تموا البنات يضحكون عليه ..
فارس: يه .. ليش تضحكون ..
بوفارس: يود ايمان خل نقرعها ..
ايمان: لا والله ..
فارس مسكها بالقوه ..
فارس: يلا يبه .. شغل المكينه ..
ايمان تصارخ: لا لا لا لا .. مابي .. ماما لحقيني ..
ام فارس راحت صوب بنتها وكانت تحاول تبطل يد فارس من ايمان ..
ام فارس: اقعد يالمينون ..
بوفارس: يودها عدل خل اسوي لها صفر ..
ايمان كانت تصرخ وقامت تصيح .. عصبت وتركها فارس .. دزته وراحت غرفتها وهي تصيح .. فارس وابوه ماتوا من الضحك عليها ..
ام فارس: زين جي زعلتوا بنتي ..
بوفارس: امسك مريم خل نقرعها ونصدم خالد ..
مريم شردت بسرعه برا الصاله ..
فارس: شردت الخوافه ..
بوفارس: مالنا غير فطيم .. عندك اياها ..
فاطمه: لا لا لا ..
مسكها فارس بسرعه .. شلها وحطها على الكرسي .. قامت فاطمه تصارخ .. وام فارس كانت تضرب فارس وفارس ميت من الضحك ..
بوفارس: ثبتها .. وشغل المكينه ..
فاطمه كانت تحاول اها ادز فارس بس ماقدرت .. وام فارس كانت تصارخ عليهم وهم كانوا يلعوزونهم .. دخل عليهم عبدالعزيز .. وشاف شكلهم وتم يضحك عليهم ..
عبدالعزيز: شو تسون ؟

[رامون]

بوفارس: نقرع خواتك .. فطيم تبرعت انها تكون اول وحده ..
فاطمه: الحقني عزيز .. الله يخليك ..
عبدالعزيز مسك يد فارس وبسرعه بطلها عن فاطمه .. فاطمه شردت وطلعت من الصاله ..
ام فارس: يعلكم العافيه .. جننتوا بناتي .. طلعت ورا بناتها تطمن عليهم ..
فارس: يالخاين ..
عبدالعزيز: ههههه .. شعندك مقرع ؟
فارس: شار علي الوالد .. وقلت يلا ..
بوفارس: ها وانت ..
عبدالعزيز يحك راسه: ليش لأ .. مو غلط ..
فصخ القحفيه وقعد على الكرسي .. بوفارس شغل المكينه واشتغل على راس عبدالعزيز .. سوا له مثل فارس ..
فارس: عاد الحين دوك يبه ..
بوفارس: هههههه .. يلا .. على قولة بوسعود .. مو غلط ..
الكل: ههههههه
قعد بوفارس وفارس حلقه ..
خلصوا وراحوا فوق عند البنات .. كانوا البنات متجمعين في غرفة ايمان اللي كانت تصيح وزعلانه .. دخلوا عليهم وهم كلهم مقرعين .. كان شكلهم يضحك .. البنات وامهم تفاجأوا باللي شافوه ..
ام فارس: انتوا ينيتوا ؟
فارس: هههههه .. شحلاتنا .. بس ناقصنا الجسمي بعد ..
ام فارس: يا ويلكم لو مسكتوه ..
عبدالعزيز: ليش يمه ؟
ام فارس: وراه عرس الولد .. وبعدين انت يا عزوز قصوا عليم هالثنين وحلقت مثلهم ..
مريم: والله انكم تحفه ..
فاطمه: حليلكم ..
بوفارس قرب من ايمان الزعلانه ..
بوفارس: حبيبة ابوها ..
ايمان بدلع: وخر عني ..
بوفارس: ليش عاد ؟
ايمان: ماحبك ..
بوفارس: فديت قلبج والله .. شوفي انا حلقت بعد ..
ايمان: مب حلو شكلك .. تخوف ..
بوفارس: هههههه .. باسها على راسها .. فديت الزعلانه والله ..
تم بوفارس يراضي ايمان .. وايمان تدلع عليه .. فارس راح ياخذ له شور سريع ينظف جسمه من الشعر .. وعبدالعزيز نفس الشي .. بعد ما خلص فارس من الشور لبس ونزل تحت .. رن جواله ومحمد كان متصل له ..
فارس: يا قلبي ..
محمد: حياتي والله
فارس: شحالك يا قلبي ؟
محمد: طيب يا عيوني .. وانت شو مسوي ؟
فارس: لاجديد .. فالدوام عيل ؟
محمد: لا طالع ..
فارس: بدري يا رجل ..
محمد: مالي خلق وطلعت ..
فارس: يعجبني الموظف المستهتر ..
محمد: عيل شلون .. زين انت وين ؟
فارس: فالبيت ..
محمد: قهوتكم بارزه ؟
فارس: حياك ..
محمد: الله يحيك الغالي .. دقايق واكون عندكم ..
سكر فارس من محمد .. راح عند امه فالمطبخ ..
فارس: يمه محمد جاي برزوا القهوه ..
ام فارس: ان شاءالله يبه ..
راح فارس الصاله وتم يقلب في قنوات التلفزيون .. دخل عليه محمد وشاف القرعه ..
محمد: حيالله الاقرع ..
فارس: هههههه .. هلا وغلا بو شعر ..
محمد: ههههه .. ليش مقرع ؟
فارس: الله يسلمك ابي اطلع موضه جديده .. انا وابوي وعزيز قرعنا ..
محمد: والله انتوا عليكم طلعات ..
فارس: ههههه ..
دخلت ام فارس و الخدامه وراها شايله القهوه والشاي .. قام محمد يسلم عليها ..
محمد: هلا والله مرت عمي .. شحالج ؟
ام فارس مبتسمه: طيبه فديتك .. شحالك انت ؟
محمد: الحمدلله .. نسأل عنكم ..
ام فارس: سألت عنك العافيه .. شو اخبار ساره مع الحمل ؟
محمد: والله الحمدلله ..
ام فارس: لا تخلي شي في خاطرها ..
محمد: هههههه .. ان شاءالله ..
ام فارس: الله يهون عليها ..
محمد: الله يسلمج ..
ام فارس: فارس يبه قلط الريال .. انا وراي طباخ ..
فارس: ان شاءالله ..
طلعت عنهم ام فارس واحت تجابل جدورها فالمطبخ .. محمد وفارس تموا فالصاله يسولفون ..
فارس: حمودي ..
محمد: عيون حمودي انت .. آمرني ..
فارس: زعلتها ..
محمد: افااا .. ليش يا فروس .؟ ليش ؟
فارس: ما كان قصدي .. آآه والله اني تعبان .. تخيل امس طول الليل صياح .. اهدي فيها اكلمها وهي ماترد ..
محمد: شلون زعلتها ؟
فارس: الله يسلمك .. وسكت ..
ادري انكم تبون تعرفون شو سر دموع مناف .. بس شاسوي دخلت عليهم فاطمه .. شذنبي ..
فاطمه: السلام عليكم ..
محمد مبتسم: هلا والله .. عليكم السلام .. حيالله عروستنا ..
فاطمه: الله يحيك .. مبروك يا محمد ..
محمد: المفروض انا ابارك لج قبل ..
فاطمه: عادي .. الله يهون على ساره ..
محمد: ان شاءالله .. وعقبالج يا بنت عمي ..
فاطمه انحرجت: ...........
فارس: لو سمحت اخ محمد .. لاتحرج اختي ..
محمد: ههههههه .. عيل وين مرت اخوي ؟
فاطمه: فوق .. اناديها ؟
محمد: لا يبه .. بس كنت اسأل عنها ..
فارس: سألت عنك العافيه ..
قعد محمد في بيت عمه فتره .. وبعدين راح البيت
.....................
ان شاء الله يعجبكم الجزء