{ نهاية حبك إعدامي } رووووووووووعه

[رامون]

ام فارس طالعتها ياحتقار: سمعيني انتي وبنتج .. ولدي ابتعدوا عن دربه .. بنتج لحست عقله بكلمتين عشان فلوسه ..
ام مناف بصدمه: شعنه تتكلمين ؟
ام فارس: انتي وبنتج تعرفون عن شو اتكلم .. بنتج كانت تغازل ولدي على التلفون وتتمسكن له عشان يعطيها فلوس .. ترا احنا ناس متربين وانتي ماربيتي بنتج عدل .. ابتعدوا عن ولدي احسن لكم .. والا احنا مب مستوانا ناس مثلكم ..
ام مناف دارت فيها الدنيا من الكلام اللي سمعته .. حست انها مب قادره تتنفس .. مناف كانت تسمع حشره برا .. طلعت وشافت ام فارس .. التفت عليها ام فارس ..
ام فارس: سمعيني انتي ياللي ما تستحين على ويهج .. ابتعدي عن درب ولدي .. ولا ترا بوريج نجوم الليل في عز القايله .. انتوا ما تستحون على ويهكم ..
مناف تمت واقفه مكانها واطالع ام فارس بخوف .. دموعها سبحت على خدودها الورديه ..
ام فارس: كلامي واضح ومابي اعيده مره ثانيه ..
عطتهم ظهرها وطلعت من البيت ورافعه راسها بكل غرور وتكبر .. ام مناف التفت على مناف اللي كانت تصيح بصمت .. سحبتها من شعرها وتمت تضربها وتصرخ عليها ..
ام مناف: كنتي تعرفينه .. كنتي تكلمينه بالتلفون .. فضحتينا ياللي ما تستحين .. حسبي الله عليج ان شاءالله ..
مناف بألم: آآآآه يمه .. الله يخليج لا تسوين فيني جي ..
ام مناف تتنفس بسرعه: انتي .. انتي مب بنتي .. انتي فضحيتيني ..
تمت ام مناف تصرخ وعبدالله كان واقف يطالعهم ويصيح .. ركض في حضن مناف وكان يحاول يبعد يد امه عنها ..
عبدالله وسط دموعه: لا يمه لا .. حرام تضربين مناف ..
ام مناف: قوم انت الثاني خل أأدب اللي ما تستحي على ويها ..
مناف: حرام عليج يمه .. حراااااااااااااااام ..
ام مناف: انتي مب بنتي .. انا بريه منج ..
فيصل دخل البيت وهو مستغرب من الصراخ .. راح صوب مصدر الصوت .. وتفاجأ بالمنظر اللي شافه .. ركض صوب امه و سحبها عن مناف ..
فيصل: شفيكم .. شصاير ..
ام مناف: اختك فضحتنا .. اللي ما تستحي على ويها ..
مناف: لاااااا يمه .. لااااا ..
عبدالله تم يصرخ ويصيح من الحزن .. ام مناف طلعت من الغرفه ورضخت الباب وراها .. فيصل تم واقف يطالع مناف اللي كانت تصيح وحاضنه عبدالله .. راح صوبها وحضنها بحنان ..
فيصل: خلاص مناف حبيبتي .. لا تصيحين ..
عبدالله: ليش امي تضرب مناف .. مناف حبيبتي لا تصيحين ..
مناف كانت تصيح على لمة اخوانها حولها .. واللي ذبحها موقف امها .. ام مناف دخلت غرفتها وكانت تشوف ايدينها اللي ترجف ..
ام مناف: انا ليش سويت جي في بنتي .. حسبي الله ونعم الوكيل .. قعدت على الارض وتمت تصيح بقهر .. كانت مستغربه موقف ام فارس .. وعرفت ليش ام فارس ما جات تخطب مع الجده وفاطمه ..
ام مناف: يعني بنتي رخيصه .. آآآه يالقهر ..
الوضع في بيت مناف كان حزين .. فيصل كان يهدي مناف وعبدالله .. راح وجاب ماي وسقاهم .. مناف كانت قاعده على الارض وحاضنه عبدالله واطالع الارض .. فيصل طلع من الغرفه وراح الحوش .. اتصل بفارس ..
فارس مبتسم: هلا فيصل ..
فيصل بحزن: فارس ..
فارس بخوف: شو فيك ؟
فيصل: تعال البيت الله يخليك ..
فارس بتوتر: فيكم شي يا فيصل ؟
فيصل: تعال وبتعرف .. ماقدر اتكلم ..
فارس: ان شاءالله ..
سكر فارس وهو خايف .. ركب السياره وراح صوب بيت مناف .. طول الدرب كان يفكر وألف فكره واحتمال جاوا على باله .. اول ما وصل شاف فيصل واقف عند باب الحوش والحزن باين فعيونه .. نزل وراح صوبه بسرعه ..
فارس: شو صاير عندكم فيصل ؟
فيصل: فارس انا دخلت البيت وشفت امي تضرب مناف اختي ..
فارس: ها ؟؟ ليش ؟
فيصل: مادري .. لقيت عبود يصيح في حضن مناف .. ومناف كانت تقول لامي يمه حرام عليج ..
فارس تنفس بخوف: زين اختك الحين ؟
فيصل: في غرفتها مع عبود ..
فارس: وامك ؟
فيصل: امي في غرفتها .. ماعرفت شاسوي .. فارس انا خايف ..
فارس حط يده على كتف فيصل: لا تخاف يا فيصل .. روح بلغ امك وقولها اني موجود ..
فيصل: ان شاءالله .. زين تفضل الصاله ..
فارس: بارك الله فيك .. " شو السالفه ؟ شو سر هالدموع والغضب اللي في بيتهم " ..
فيصل دخل على امه اللي مسحت دموعها اول ما شافته ..
ام مناف: هلا يمه ؟
فيصل: يمه فرس فالصاله ..
ام مناف بحزن: زين قوله الحين جايه ..
فيصل منزل راسه: ان شاءالله ..
طلع من الغرفه وراح سوا شاي لفارس .. قدمه له وقعد معاه .. ام مناف دخلت الصاله وكانت عيونها حمره من الصياح ..
ام مناف: السلام عليكم ..
فيصل وفارس: وعليكم السلام ..
ام مناف: فيصل يبه خلني بروحي مع نسيبك ..
فيصل: ان شاءالله ..
طلع فيصل من الصاله وترك فارس وامه ..
فارس: يمه عسى ماشر .. شو فيكم ؟
ام مناف دخلت فالموضوع من دون مقدمات ..
ام مناف: فارس انت كنت تكلم مناف بنتي على التفون ؟
فارس نزل راسه: اي نعم ..
ام مناف: وقلت لاهلك انك تعرفها ؟
فارس: لا ما قلت لهم .. بس انا يوم قلت لهم اني بتزوج وقلت ابغي بنت فلان عرفوا ..
ام مناف: وانت تشوف اللي سويته صح ؟
فارس: انا صححت غلطتي يوم دخلت من الباب .. وبعدين لو كنتي مفتكره اني اسغليت بنتح قبل لا املج عليها .. اسمحلي اقولج ترا بنتج اخلاقها عاليه .. ولزمتني حدودي معاها .. وانا عندي خوات وادري ان الدنيا دواره ..
ام مناف ماقدرت ترد على كلام فارس ..
فارس: يمه انا حاط مناف بعيوني .. ولا تفتكرين اني مسترخصها .. بالعكس ترا مناف لها معزه في قلبي وانا سويت المستحيل عشان اخذها بالحلال ..
ام مناف: فارس يبه اتمنى قرارك ما أثر على موقف اهلك معاك ..
فارس بحيره: شلون ؟

[رامون]

ام مناف: يعني اتمنى ان اهلك يكونون راضين على زواجك من بنتي .. ترا انا ما ارضى لبنتي ان غيرها يحسسها انها اقل منهم او انها رخيصه .. ترا الف من يتمناها ..
فارس: بنتج على عيني وراسي .. ومحد بيجرحها دام راسي يشم الهوا .. والله يقدرني واسعدها .. واوفر لها الحياه اللي تستحقها ..
ام مناف: ان شاءالله ..
فارس: صاير شي يمه ؟
ام مناف بارتباك: لا ولاشي ..
فارس: ليش يقول فيصل انج مديتي ايدج عليها ؟
ام مناف: لا خلاف بيني وبينها بس ..
فارس: زين ابغي اشوفها لو سمحتي ..
ام مناف: ان شاءالله بروح اشوفها ..

طلعت ام مناف وتركت الافكار تودي وتجيب فارس .. كان محتار ومب قادر يفكر .. ام مناف دخلت على مناف اللي كان شكلها يعور القلب وهي حاضنه عبدالله اللي نام بحزن في حضنها ..


ام مناف: ريلج ينتظرج فالصاله ..
مناف بغضب: مابي اشوفه ..
ام مناف قربت من بنتها: قومي شوفيه .. وحقج علي يا مناف ..
مناف صاحت بحزن: آآآآه يا يمه .. ليش يستوي فيني جي .. آآآه ..
ام مناف: خلاص يا بنتي قومي مسحي دموعج .. انا ما كنت اقصد ام يدي عليج .. سامحيني فديت قلبج ..
مناف تمت تصيح بحزن .. ام مناف شلت عبدالله من حضنها وحطته على السرير ..
ام مناف: قومي غسلي ويهج ريلي ينتظرج ..
مناف قامت من مكانها من غير ما ترد على امها .. دخلت الحمام وغسلت ويها وطلعت .. مسحت ويها وغيرت ملابسها .. ام مناف كانت حزينه لانها تدري ان تصرفها غلط .. مناف خذت نفس عميق وهي تشوف نفسها فالمرايه .. رتبت شعرها وطلعت من غرفتها .. تركت امها فالغرفه واحت عند فارس .. اول ما دخلت الصاله فارس قام من مكانه وكان يطالعها .. مناف ركضت صوبه وحضنته بقوه وتمت تصيح .. فارس حضنها بقوه وتم يهديها ..
فارس: فديت دموعج يالغاليه انتي .. ليش زعلانه .. لا تعورين قلبي بصياحج يا قلبه ..
مناف تمت تشهقمن الصياح وكانت تحاول تتكلم بس مب قادره من الحزن اللي بقلبها .. فارس خذ الماي ومسح على ويها .. خذت نفس عميق وغمضت عيونها .. تمت حاضنه فارس وتحاول ان تهدي نفسها .. فارس كان خايف عليها ..
مناف مسكت يد فارس: فارس ..
فارس بحنان: عيونه انتي ..
مناف: ليش ما قلت لي ان امك مب راضيه على زواجنا ؟
فارس وسعت عيونه " انا كنت حاس .. لا حول ولا قوة الا بالله " ..
فارس: امي جاتكم ؟
مناف: اي ..
فارس: شو صار بالضبط ؟
مناف قالت لفارس موقف امه والكلام اللي قالته .. وكانت تصيح كل تتذكر الموقف ..
مناف: اللي ذبحني يا فارس ان امي مدت يدها علي واستحقرتني لما عرفت اني كنت اعرفك من قبل ..
فارس: انا قلت لامج كل شي .. ومب خايف اقوله للدنيا كلها .. انا دخلت من الباب .. انتي بعيوني يا مناف .. ولا تهتمين لكلام اي شخص .. واللي بيتكلم عليج بقص لسانه .. وبخصوص اللي صار اليوم .. ما عليج ان شاءالله ما بيتكرر ..
مناف: فارس لا تخليني بروحي ..
فارس: ما راح اتركج يا مناف .. انتي بعيوني فديت عيونج ..
مسك ويها بيدينه وابتسم لها .. باسها على جبهتها وحضنها .. مناف دفنت ويها في صدر فارس وحضنته بقوه .. تم فارس مع مناف وهو يغلي من داخله على اللي سوته امه .. أذن المغرب وفارس كان فالصاله مع مناف ..
فارس ماسك يدها: حبيبتي بروح المسيد مع الشباب وبرجع زين ..
مناف: ان شاءالله حبيبي ..
فارس: نادي لي فيصل وعبود ..
مناف: ان شاءالله ..
طلعت مناف من الصاله وفارس يراقبها وقلبه متقطع عليها .. فيصل كان قاعد فالحوش عند الطيور .. راحت صوبه مناف ..
مناف: فيصل حبيبي ..
فيصل: هلا ..

[رامون]

مناف: فارس يبيك فالصاله ..
فيصل: مناف انتي زعلانه من امي ؟
مناف نزلت راسها: يقولك فارس يلا عشان تروحون المسيد ..
فيصل بحزن: ان شاءالله ..
راح فيصل الصاله عند فارس ومناف دخلت وراه ..
فارس مبتسم: وين عبود ؟
مناف: نايم ..
فارس: زين احنا بنروح المسيد وبنرجع .. عاد سوي لنا شاي مضبوط ..
مناف مبتسمه: ان شاءالله ..
فارس وفيصل راحوا المسيد .. مناف راحت سوت لهم شاي ودخلت غرفتها تصلي .. بعد ما خلصت دلخت عليها امها .. مناف تجاهلت وجود امها بالغرفه .. ام مناف حز في خاطرها بس ما لامت بنتها ..
ام مناف: مناف ..
مناف بهدوء: نعم ..
ام مناف: انتي زعلانه مني ؟
مناف وقفت مكانها فتره وهي منزله راسها تحت .. عضت شفتها وغمضت عيونها .. خذت نفس عميق وارتمت في احضان امها ..
مناف: تدرين اني ما ازعل منج يمه .. والله مازعل منج ..
ام مناف ماستحملت دموع بنتها .. حضنتها وتمت تصيح معاها .. كل من مناف وامها صاحوا لين هدت نفوسهم ..
ام مناف: مناف ما وصيج على فارس .. تراه شاريج ..
مناف: ادري يمه .. وانا آسفه لاني غلطت من قبل ..
ام مناف: خلاص يا بنتي اللي فات مان قدر نغير فيه شي .. الولد نيته صافيه ودخل من الباب .. وانتي اللي عليج تسوينه انج تكونين قد دخلته اللي دخلها .. تراها سوا المستحيل عشانج ..
مناف " فديت قلبه والله ": ان شاءالله يمه ..
دخل فيصل على امه ومناف ..
فيصل: مناف فارس يبيج ..
مناف: جايه ..
طلع فيصل من الغرفه يركض .. دخل الصاله وهو فرحان ..
فيصل مبتسم: امي ومناف تصالحوا .. يااااااي ..
فارس بوناسه: والله .. زين الحمدلله ..
فيصل: بروح اقعد عبود ..
فارس: للحين ما قعد من النوم ؟
فارس: لا للحين نايم ..
طلع فيصل من الغرفه وراح صوب غرفة مناف ..
ام مناف: شعندك ؟
فيصل: بقعد عبود ..
مناف: خله نايم فديته ..
فيصل: اوهووو تمللت بروحي ..
فيصل طب على عبدالله وتم يهزه ..
فيصل: عبود .. عبود يلا قوم ..
عبدالله بتعب: هممممم .. لا مابي ..
فيصل: قوم يلا ابي انظف قفص الطيور ..
عبدالله يحك راسه: زين ..
فيصل: يلا قوم انا بروح البس صروال وفانيله ..
عبدالله قام من السرير وراح ورا فيصل .. دخلوا غرفتهم ولبسوا صراويل وفنايل وركضوا صوب قفص الطيور .. ام مناف كانت تشوف عبدالله وفيصل بوناسه .. راحت صوبهم وتمت تراقبهم وهم ينظفون القفص وكانت تساعدهم اما مناف دخلت الصاله عند فارس اللي كان ينتظر شوفتها بشغف .. دخلت عليه وهي مبتسمه .. فارس لما شاف ابتسامته اللي سحرته حس بالراحه ..
فارس مبتسم: فديت هالابتسامه من احلى مناف فالعالم .. هاي اذا في مناف غيرج بالعالم اصلا ..
مناف باحراج: فديت روحك يا فارس ..
فارس قرب منها: تعالي قعدي جنبي ..
مناف: اول خل اصب لك الشاي ..
فارسعض شفته التحتيه: انتي شايي وقهوتي وكل فالتي بعد ..
مناف فتنت بعيونها وهي صاده الصوب الثاني .. كانت منحرجه من غزل فارس .. صبت شاي لها وله .. قعدت جنبه وتمت تسولف معاه بفرح و وناسه .. فارس تم عند بيت مناف لين الساعه 8 ونص .. سلم عليها وراح بيتهم .. كان معصب على الحركه اللي سوتها امه .. دخل البيت ولقى خواته واخوانه كلهم متجمعين .. بوفارس وام فارس كانوا موجودين بعد .. دخل فارس مبتسم .. سلم والكل رحب فيه .. التفت على امه وابتسم ..
فارس مبتسم: ترا الحركه اللي سويتيها مب حلوه في حقج يا ام فارس ..
الكل التفت على فارس بإهتمام ..
.........................
يتبع

[رامون]

فارس: حبيت ابلغج ان مناف بتم زوجتي والعذال ما راح يفرقون بينا بإذن الله ..
بوفارس عقد حواجبه: عن شو تتكلم ؟
فارس: اسأل ام العيال .. التفت على امه وطالعها بخجل .. والله اللي صار عيب ..
نزل راسه وطلع من البيت بكل هدوء ..
فاطمه: شو صاير يمه ؟
ام فارس قامت من مكانها ولا ردت على حد .. بوفارس لحقها الغرفه .. العيال قعدوا فالصاله مستغربين من اللغز اللي قاله فارس ..
بوفارس: شو صاير يا مزنه ؟ ليش فارس دخل وسمعنا كم كلمه وطلع ؟
ام فارس بتوتر: ولا شي ..
بوفارس رفع حاجب: تكلمي يا مزنه ..
ام فارس بعصبيه وتوتر: قلت لك مافي شي ..
بوفارس بحده: تكلمي وقولي شو سويتي ؟
ام فارس انتفضت من صراخ بوفارس .. التفت عليه وهي حاطه يدها على حلجها ..
بوفارس قرب منها والغضب باين بعيونه ..
بوفارس: تكلمي يا مزنه ..
ام فارس: هممممم .. انا .. اااانا .. وسكتت ..
بوفارس: انتي شو هببتي ؟
ام فارس امتلت عيونها بالدموع: انا رحت بيت ام فيصل اليوم ..
بوفارس متكتف: زين ..
ام فارس: قلت لهم كلام ما ينقال ..
بوفارس ينافخ: اففف .. زين ..
ام فارس تمت ساكته وهي تراقب بوفارس ..
بوفارس: شو قلتي ؟
ام فارس: طلبت منهم يبتعدون عن فارس .. وقلت لام فيصل ان بنتها كانت تغازل ولدي .. صرخت في بيتهم وتركتهم يطالعوني بخوف ..
بوفارس غمض عيونه ورفع يده فالهوا .. ضرب الطاوله بيده بقوه ..
بوفارس: عفيه عليج يا مزنه .. بيضتي ويهي جدام الناس ..
سكت بوفارس وخذ نفس عميق .. غلغل اصابعه في شعره وتكلم بخشونه ..
بوفارس: من اليوم وطالع .. انا بنام في غرفه وانتي بغرفه .. وليكون تنطقين معاي بكلمه .. تراني حذرتج .. و ويهج مابي اشوفه ..
طلع من الغرفه ورضخ الباب وراه .. ام فارس قعدت على السرير تصيح .. وحست انها تكره مناف وامها اكثر .. وحقدت عليهم .. بوفارس نزل وهو معصب .. ركب سيارته وراح صوب بيت مناف على طول .. كانت الساعه 10 تقريبا .. وام مناف تنام هالوقت .. لما طق الباب عليهم مناف كانت في غرفتها تدرس .. خافت لما سمعت الباب .. راحت غرفة امها وقعدتها من النوم ..
مناف ترجف: يمه .. يمه قومي ..
ام مناف بطلت عيونها بخوف: شفيج يمه ؟
مناف: يمه في حد يطق الباب ..
ام مناف عقدت حواجبها: ها ؟؟ زين جيبي عبايتي بسرعه ..
لبست ام مناف العبايه وطلعت عند الباب .. مناف كانت تمشي ورا امها بخوف .. ام مناف وقفت على جنب ..
ام مناف: من ؟
بوفارس: انا محمد ..
ام مناف " محمد ؟؟"
مناف " عمي شيسوي هني ؟ وش اللي جايبه هالحزه ؟"
بوفارس: انا بوفارس ..
ام مناف فتحت الباب وطاحت عينها بعيون بوفارس .. بوفارس كان يشوف ام مناف كأنه يشوفها اول ما ملج عليها
بوفارس منزل راسه: السموحه ..
ام مناف: مسموح .. تفضل يا محمد ..
بوفارس: والله انا منقطع ويهي منكم يا ام فيصل ..
ام مناف حطت يدها على الباب: حصل خير ان شاءالله ..
بوفارس: والله ماعرف كيف صار هالشي .. انا ما كنت ادري عن شي ..
ام مناف: فارس ما قصر جى البيت وخذ اللي بخاطر البنيه ..
بوفارس: وين بنتي؟
ام مناف التفت على بنتها: مناف تعالي ..
مناف وقفت جنب امها ومنزله راسها ..
بوفارس: السموحه منج يا بنتي .. لا تاخذين على كلام ام فارس .. وانا اوعدج ان من بعد اليوم ما راح تتعرض لج بكلمه ..
مناف: ما صار شي يا عمي ..
بوفارس: وما عليكم من الكلام اللي قالته .. امسحوها فيني ..
ام مناف: مسموح يا محمد ..
بوفارس: عزيزه وغاليه يا ام فيصل .. وانتي يا مناف لا تشلين همها .. عليج من ريلج وحياتج ..
مناف بخجل: ان شاءالله عمي ..
بوفارس نزل راسه وكان منحرج من اللي صار .. تم فتره ساكت ..
بوفارس بهدوء: انا استأذن منكم .. والسموحه على جيتي في هالوقت المتأخر .. بس من دريت بالموضوع وجيت هني اتعذر منكم ..
ام مناف: جزاك الله خير يا محمد .. طول عمرك اصيل وتعرف السنع ..
بوفارس: بارك الله فيكم .. تصبحون على خير ..
عطاهم ظهره وركب السياره وحرك .. مناف كانت مستغربه من موقف بوفارس .. اما امها فكانت متوقعه هالحركه منه ..
ام مناف: يلا يمه تعالي داخل ..
مناف: ان شاءالله يمه ..