القاعدة العامة( قانون الطلب ) بيقول ... كلما ارتفعت الأسعار .. انخفض الطلب و العكس صحيح



و لكن طبعا لكل قاعدة استثناءات ... السلع العادية بتنطبق عليها هالقاعدة العامة


أما السلع الأساسية و الضرورية كالخبز مثلا ( لا يمكن الاستغناء عنه ) ...

مهما ارتفع السعر ... رح يبقى الطلب عليه متزايد... الناس ما فيها تعيش بدون خبز




كمان بالنسبة لسلع التفاخر ... ما بيتغير الطلب مع زيادة الأسعار ( لأنه ببساطة هي سلع تفاخر ) ...

بمعنى تاني ... هي السلع بتستهدف شريحة معينة من الناس ... يلي ما بيتأثروا كتير بتغيرات الأسعار

( بسبب ارتفاع دخولهم ) ...


بشكل عام استجابة الطلب للتغيرات بالأسعار بيكون موجود بالنسبة للشريحة المتوسطة من الأفراد

( أو ذوي الدخل المحدود ) ...

هدول بيتأثروا كتير بتغيرات الأسعار ( بس أكيد ما بيفكروا يقتنوا سلع تفاخرية متل الألماس مثلا )



ببعض الأحيان زيادة الأسعار فعلا تؤدي لزيادة أكبر في الطلب ... مع أنه السلع عادية ...

بس هاد الشي بيرجع لتوقعات المستهلكين



في بعض المستهلكين بيعتقدوا أنه كلما زاد سعر السلعة كلما زادت جودتها ...

و طبعا هاد الشي ممكن يكون صح ببعض الحالات ...

بس مو دايما زيادة السعر بيكون دليل على ارتفاع الجودة

( و هاد الشي ممكن نلمسه بحياتنا كتير ... يعني بيقولوا الغالي حقه معه )

و هاد الكلام صح بس مو بكل الحالات .




كمان أحيانا ممكن المستهلكين يزيدوا الطلب على سلعة معينة على الرغم من ارتفاع سعرها ...

بسبب خوفهم من ارتفاع أكبر بالمستقبل ...

و كمان هالشي موجود كتير بحياتنا ...

كتير ناس بيلجأوا لتخزين بعض السلع على الرغم من ارتفاع سعرها الحالي

( بسبب توقعهم الارتفاع الأكبر لأسعارها مستقبلا ) و خاصة بأوقات الأزمات و الحروب .



و طبعا ما رح ننسى أنه الإشاعات بتلعب دور كبير بالتأثير على توقعات المستهلك ...

يعني أحيانا المنتج بيتعمد ينشر إشاعة عن ارتفاع متزايد و مستمر للسلعة بالمستقبل ...

لذلك بيلجأ الأفراد لشراءها بالوقت الحالي مهما كان سعرها ... تفاديا للارتفاع المستقبلي المتوقع للأسعار


بشكل عام دايما لكل قاعدة في استثناءات ... و ما بعتقد بالسوق في ثوابت ...

يعني ما فينا نعتمد على قانون الطلب كثابت لا يمكن أن يتغير ...


تحياتي