{ نهاية حبك إعدامي } رووووووووووعه

[رامون]

كل الشباب التفتوا على سلمان مستغربين من تكون ريما .. سلمان حضن ريما بكل حب وشوق .. الشباب شافوا ريما باستغراب ..
فارس " الله عليك يا سلمان .. الحين عرفنا سر حياتك ريما " ..
يوسف " ريما! من تكون ريما .. وليش خالي حاضنها وشوي ويصيح؟! " ..

سلمان حضن ريما بعد ما انحرم منها كل هالسنين .. ريما كانت تصيح في حضنه .. مسح دموعها وباسها على جبهتها ..
سلمان: فديت دموعج حياتي ..
ريما: بابا وحشتني ..
سلمان: وانتي اكثر يا بابا ..
ريما: لا تتركني مره ثانيه ..
سلمان: اوعدج ما اتركج ..
سلمان شل ريما ومشى عند وحده كانت اطالعه وتمسح دموعها ..
سلمان: ماعرف كيف اشكرج يا ساره ..
ساره: ولو يا سلمان .. ريما مثل بنتي .. وان شاءالله نشوفكم قريب ..
سلمان مبتسم: ان شاءالله ..
ساره تكون اخت مها زوجة سلمان .. مها مواطنه عربيه تزوجها سلمان في امريكا .. كانت حامل بريما لما سلمان سمع بموت خليفه زوج اخته لولوه .. لما رجع البلاد قال لاخته عنها .. بس طلب منها انها ما تقول لاحد عن شي .. المرحومه اخته وعدته ماتقول لاحد .. وكان سلمان مخطط يجيب مها البلاد بعد ما تربي .. بس صار واعتقلوه .. ومها ما كانت تقدر تسوي شي .. مها توفت وهي تربي .. شافت ريما وحضنتها وتوفت على طول .. ساره اعتنت بريما وما كانت تقدر توصل سلمان كلش .. لما سلمان وسميث وعبدالهادي كانوا يطلعون من السجن اول شي سواه سلمان انه دور على مها زوجته .. لما راح عند ساره اختها .. انصدم لما عرف عن موت مها زوجته .. ولما شاف ريما تعلق فيها وايد .. وريما وايد تشبه سلمان .. خذت شكل سلمان و صفات امها مها .. ريما عمرها 7 سنوات .. ما شافت امها .. وتعلقت بسلمان وايد .. فكانت يوميا تكلمه بعد ما رجع البلاد .. وكل يوم خالتها ساره ترسل لسلمان صور ريما على النت .. وغير توصيات سلمان لسميث .. سميث قام بالواجب .. ماخلى قاصر على ريما ..
سلمان سلم على ساره و ودعها .. وريما ودعت خالتها واللي كانت ام بالنسبه لها .. راح سلمان عند الشباب اللي كانوا مذهولين باللي يصير ..
سلمان: يا شباب هاذي ريما ..
يوسف طالعها مبتسم: لو شعرها مو طويل ولابسه تنوره كان قلت انها سلمان مصغر ..
الكل: هههههه
ريما انحرجت وحضنت ابوها ..
سلمان: ريما يوسف يصير عمج ..
ريما ابتسمت ومدت يدها ليوسف .. يوسف قرب منها وباسها على خدها .. تعرفت على باقي الشله ..
سلمان: يلا نادوا على طيارتنا ..
الشباب: يلا ..
ركبوا الطياره و سلمان كان عايش عالم ثاني بوجود بنته بين احضانه .. كان حنون عليها ويداريها .. ريما كانت فرحانه بوجود ابوها معاها .. يوسف قعد عند خاله وعرف منه قصة ريما وامها مها .. ريما نامت في حضن سلمان من طول الرحله ..
يوسف: صبرت ونلت يا خالي ..
سلمان: الحمدلله على كل حال .. والله اني ماعرفت طعم النوم .. افكر في زوجتي المرحومه .. ماكنت اعرف انها ربت او لا .. مادري عن علومها .. والله تلتهت ..
يوسف: الله عوضك بريما الجميله .. ماشاءالله عليها ملاك ..
سلمان ابتسم ومسح على راس ريما اللي كانت نايمه في حضنه ..
سلمان: الله يحفظها .. و سميث ماقصر الله يهديه ..
يوسف: والله هالانسان رايته بيضه ..
سلمان: اي والله .. اعتنى فيها وصرف عليها وماخلى عليها قاصر ..
يوسف: عشان جي انت ما فكرت فالزواج ؟
سلمان: والله يا يوسف شاقولك .. فكرت فالزواج قلت ابي ام حنونه تحب ريما .. وابي زوجه تحن علي انا بعد .. بس قلت اول اجيب ريما عندي واتطمن عليها .. وبعدين اشوف ..
يوسف: الله يكتب لك بنت الحلال ..
سلمان: آمين ..
يوسف رجع بكرسيه على ورا ونام .. سلمان كان يتأمل ملامح بنته ويتفكر فيها ..
سلمان " الله على قلبك يا يوسف .. كنت اتخيل فاطمه الحنونه اللي بتعطي ريما الحنان .. وبتعطيني ولو جزء منه بس الله كتبها من نصيبك والحمدلله .. الله يرزقك بالذريه الصالحه يا يوسف" .. بكل هدوء سلمان غمض عيونه ونام وهو حاضن بنته ..
محمد وفارس طلبوا من المضيفه تجيب لهم شاي احمر .. تموا يسولفون بهدوء ..
محمد: هالسلمان وايد غامض ..
فارس: وايد .. لما كنا فالمكسيك رن جواله والرقم اللي طلع لي فالشاشه كان ( حياتي ريما ) .. انا لما شفت الرقم افتكرت انها حبيبته .. بس انصدمت فالمطار ..
محمد: وليش تتوقع سلمان خش هالسر عن الكل ؟
فارس: مثل ما قلت انت انه غامض .. انت شو تتوقع السبب ؟
محمد: والله يمكن لانه تزوج من غير علم حد .. وتعرف شلون تبهدل هناك .. فماعتقد كان في مجال انه يجيبها معاه اول ما رجع البلاد ..
فارس: ماعتقد .. سميث جى البلاد ذيك الايام .. كان بإمكانه يجيبها معاه ..
محمد: اي عدل كلامك ..
فارس: عمري مابفهم هالانسان ..
محمد: بس بنته نسخه طبق الاصل منه ..
فارس مبتسم: ماشاءالله عليها .. وايد تشبهه ..
محمد: على قولة يوسف .. لو شعرها مو طويل ومالابسه تنوره كان قلت سلمان مصغر ..
فارس ومحمد: هههههه ..
المضيفه قدمت لهم الشاي .. شربوا الشاي وكملوا سوالفهم لين وصلوا البلاد .. باقي الشباب ناموا من التعب وطول الرحله .. ريما فتحت عيونها وشافت سلمان اللي نام من التعب وماحس باللي حوله .. قعدت في حضنته وتمت تتأمل ملامحه .. حطت يدها على خده وقعدته ..
ريما: بابا .. بابا ..
سلمان سمع صوت ريما اللي تغلغل في مسامعه بنعومه .. فتح عيونه مبتسم لها ..
سلمان: عيون بابا انتي ..
ريما: بابا يلا wake-up .. يلا قوم ..
سلمان: زين .. بس احنا مانتكلم انجليزي .. احنا عرب صح ..
ريما ابتسمت بخجل: ان شاءالله بابا ..
سلمان: متى قعدتي من النوم ؟
ريمان: من شوي ..
سلمان: تبين تاكلين شي ؟
ريما: لا بس عطشانه ..
سلمان: زين ما تبين تروحين الحمام ؟
ريما: بلا .. يلا تعال معاي ..
سلمان: ان شاءالله بابا ..
سلمان تمدد وريما وقفت تأمل ملامح يوسف النايم .. مسكها سلمان من يدها و وداها الحمام .. خلصت ودخل هو بعدها .. رجعوا اماكنهم وطلب لها عصير .. بقى على وصولهم البلاد تقريبا 20 دقيقه .. الشباب قعدوا من النوم وصحصحوا .. حطت الطياره على ارض البلاد بسلام .. الشباب خذوا اغراضهم ونزلوا كل واحد يسحب الثاني معاه من التعب .. سلمان كان طاير من الفرحه بوجود ريما معاه .. خلصوا اجرأت المطار واستلموا شنطهم وراحوا عند بوابة الخروج .. بوفارس وبومحمد وابراهيم كانوا في انتظارهم .. علامات التعجب ارتسمت على ويوهم لما شافوا سلمان شايل ريما ..
بوفارس " من هالبنت اللي شايلها سلمان؟" ..
بومحمد" معقوله تكون هالبنت بنت سلمان؟ " ..
ابراهيم" سلمان من متى عنده بنت!" ..
الشباب سلموا على بعض بحب وشوق .. بوفارس استانس لما شاف عياله .. حضن عبدالعزيز وفارس بقوه .. بومحمد كان مشتاق لعياله وكان شوي ويصيح من شوقه لهم .. ابراهيم سلم عليهم وفي باله ملاين الاسئله عن البنت اللي شايلها سلمان .. سلمان سلم على بوفارس وبومحمد ..
سلمان: مستغربين منها ادري ..
بوفارس: من هاذي ؟
بومحمد: بنتك؟
سلمان: مبتسم: اي .. هاذي ريما ..
ريما ارتبكت من نظرات ابراهيم وبوفارس وبومحمد لها .. تعلقت في رقبة سلمان ودفنت ويها في صدره ..
سلمان: للحين ما خذت عليكم .. الشباب بيقولون لكم .. قصة ريما ..
بومحمد مسح على راس ريما وابتسم لها .. تفرقوا الشباب وكلن توجه لبيته ..
يوسف اتصل بفاطمه يطمنها ..
يوسف بهمس: هلا وغلا ..
فاطمه: حياتي والله .. الحمدلله على السلامه ..
يوسف: الله يسلمج يا قلبي ..
فاطمه: نورت البلاد حبيبي ..
يوسف مبتسم: بوجودج حياتي ..
فاطمه: شو اخبار رحلتكم ؟
يوسف: والله تعب .. الحين بروح وباخذ لي شور وبطب في فراشي على طول ..
فاطمه: يعطيك العافيه حبيبي " يعني ما راح اشوفه اليوم .. فديت قلبه" ..
يوسف: الله يعافيج ..
تم يوسف يسولف مع فاطمه لين وصلوا البيت ..
المفاجأه الغير متوقعه اللي ما كانت على بال الجوهره وهنادي اللي كانوا ينتظرون اخوهم وخالهم ومشتاقين لهم ابراهيم دخل الحوش وسوا هرن .. هنادي والجوهره طلعوا يركضون يستقبلون الشباب .. هنادي طبت على يوسف وحضنته .. راحت تسلم على خالها و وقفت مكانها مبطله عيونها لما شافت ريما ..
هنادي: من هاذي ؟ خالي تشبهك ..
سلمان مبتسم: هاذي ريما ..
الجوهره بصدمه: بنتك ؟!
سلمان: اي ..
الجوهره: حليلها .. تعالي فديت قلبج ..
سلمان شاف حنان الجوهره على بنته وصدمة هنادي بريما ..
يوسف: يلا يا جماعه نروح داخل ..
الكل: يلا ..
ريما حبت الجوهره .. دخلوا الصاله وقعدوا كلهم مع بعض .. ريما راحت عند سلمان وقعدت بينه وبين يوسف ..
سلمان: حياتي ريما ..
ريما مبتسمه: نعم بابا ..
سلمان: هاي عميمه هنوده . وأشر عليها .. وهاي عميمة جوجو .. وأشر عليها ..
ريما ابتسمت لهم ونزلت راسها ..
الجوهره: فديت قلبها تجنن يا خالي ..
هنادي مبتسمه: بس خالي نسخه منك ..
سلمان حضن ريما: الكل يقول ..
ابراهيم: زين انا استأذن يا جماعه .. اخليكم تاخذون راحتكم ..
سلمان: اقعد يا ريال ..
ابراهيم: بخلص لي كم شغله .. وبمر فالليل على الجوهره ..
سلمان: ما تشوف شر ..
الجوهره: بوصلك عند الباب ..
ابراهيم: بارك الله فيج ..
طلعوا ابراهيم والجوهره .. وهنادي فصخت عبايتها وقربت من خالها واخوها ..
هنادي: ها يالصيع شسويتوا هناك ؟
يوسف: هههههه ..
سلمان: شفت يا بوخليفه طلعنا صيع ..
يوسف: الله يسلمك من الحره اللي فيهم قالوا عنا صيع ..
هنادي: خفوا علينا .. شمنه باحتر ..
سلمان: مممممم ..
ريما: بابا .. am haungry .. جوعانه ..
سلمان: شقلنا احنا ؟
ريما نزلت راسها باحراج ..
ريما: آسفه ..
سلمان مبتسم: شسويتوا لنا اكل يا بنيات ؟
الجوهره وهي داخله عليهم: كل مالذ وطاب ..
سلمان: جزاكم الله خير ..
يوسف: يلا جهزوا فديتكم .. باموت من الجوع ..
هنادي: ما كلتوا فالطياره ؟
يوسف: مو وايد .. تعرفين اكل البيت ما ينعاف ..
هنادي: زين بعد اعترفتوا ..
الكل: ههههههه ..
.............................
يتبع

[رامون]

راحوا البنات يجهزون الاكل وخذوا معاهم ريما اللي حبيتهم وخذت عليهم بسرعه .. كانت مستانسه وهي تجهز الصحون والاكواب .. حبت الجو اللي عاشته في بيت ابوها .. واول يوم لها بينهم مر عليها حلو .. تجمعوا كلهم على العشى .. ريما كانت لازقه في سلمان وتاكل مثل اللي ياكله ..


بوفارس كان فالسياره مع عياله وقالوا له قصة سلمان وبنته ريما ..
بوفارس: الله عليه هالانسان .. والله انه صبر ونال ..
فارس: ماشاءالله عليها تشبهه وايد ..
بوفارس: وايد .. الله يحفظها ..
عبدالعزيز: عقبال ما نشوف انتاجك بونايف ..
فارس ابتسم: ان شاءالله ..
بوفارس بوناسه: خلاص عزمت ..
فارس: اي ..
بوفارس: من تكون سعيدة الحظ ؟
فارس وعبدالعزيز: ههههههه ..
فارس: قريب بتعرفون .. اخبار امي وخواتي ؟
بوفارس: احلى اللي يغير الموضوع ..
الكل: ههههههه
وصلوا البيت وام فارس استقبلت عيالها بالاحضان .. الشباب سلموا على امهم وخواتهم وقعدوا ياخذون اخبار بعض .. في بيت بومحمد كان استقبال ام محمد غير .. حضنت عيالها الاربعه بدموع الشوق والفرح .. ساره كانت في الغرفه تنتظر محمد مشتاقه له .. محمد تم يلاعب عياله بحنان وشوق .. راح فوق عند زوجته .. وهو رايح الغرفه كان متضايق وماله خاطر يروح ..
محمد " مالي خاطر والله .. بس مجبور اجامل " ..
دخل الغرفه واستقبلته ساره بابتسامه حلوه على ويها .. محمد ابتسم مغصوب .. قربت منه ساره وحضنته .. باسها على خدها وطلب منها تجهز له ملابسه عشان ياخذ له شور .. ساره ما كانت تعرف شو في قلب محمد .. ومحمد كان يحاول انه ما يبين لها شي .. خذ له شور ونزل معاها تحت عند الاهل .. تعشوا وتموا يسولفون عن مغامراتهم في المكسيك .. محمد قام عنهم واتصل بفارس .. كان وايد متضايق .. فارس كان غرقان فالحب مع مناف ..
فارس: حيايته وقلبه وعمره وكل شي انتي ..
مناف: فديت قلبك حبيبي .. وحشتني موت .. الحين احس بالامان
فارس: فديت قلبج والله ..
مناف: شكلك تعبان ؟
فارس: اي والله تعبان حدي .. مب قادر اتحرك ..
مناف: فديت روحك والله ..
فارس: تعرفين شو يبيلي الحين ؟
مناف: شنو ؟
فارس: يبيلي مساج من ايدينج الناعمات ..
مناف انحرجت وماردت عليه ..
فارس: يا قلبه ..
مناف: هلا حبيبي ..
فارس: خلاص قريب بدخل من الباب وبخطفج من بيتكم ..
مناف: فديت روحك يا فارس .. الله لا يحرمني منك ..
فارس: تدرين .. قبل السفر شريت لنا شقه صغيرونه على قدنا .. هالشقه بتجمعنا مع بعض ان شاءالله ..
مناف " فديت روحك يا فارس .. احبك احبك احبك " ..
فارس: ولد عمي يقولي ذاك اليوم انه بيأثث لي الشقه كامله .. ذوقه وايد حلو في الاثاث وعنده افكار حلوه .. انا وافقت بشرط ان محد بيختار غرفة النوم غيرج انتي ..
مناف طارت من الفرحه على كلام فارس .. محمد كان متصل على الخط الثاني ..
فارس: حياتي لحظه شوي عندي خط ثاني ..
مناف: زين حبيبي ..
رد على محمد ..
فارس: هلا والله .. بسرعه اشتقت لي ..
محمد: ههههه .. تكلمها ؟
فارس: اي نعم الشيخ .. عندك اي اعتراض ..
محمد: ههههه . هدئ من روعك يا رجل ..
فارس ومحمد: ههههههه ..
محمد: فروس متضايق وابي اتكلم ..
فارس: عسى ماشر حمودي ؟
محمد: فروس فيني هم والله العظيم مب عارف شو اسوي ..
فارس: زين امرك البيت ؟
محمد: انا بمرك وبنطلع ..
فارس: زين انتظرك يبه ..
محمد: سلااام ..
فارس: الله وياك ..
سكر فارس من محمد وهو يحاتيه ويفكر فيه ..
فارس " شو فيه حمود؟ شو اللي مضايقه هالكثر؟ " .. رجع لمناف على الخط الثاني ..
فارس: هلا حياتي ..
مناف: مشغول حبيبي ؟
فارس: لو مشغول افضي عمري لج ..
مناف: فديت قلبك ..
فارس: شو اخبار فيصل وعبود ؟
مناف: الحمدلله بخير .. اشتركوا في النادي الصيفي .. وكل يوم يروحون الصبح ..
فارس: حلو .. يقضون وقتهم ..
مناف: اي والله .. بدل الملل والهياته في الفريج ..
فارس: زين يا قلبه بكره بامرج البيت ..
مناف عقدت حواجبها: البيت!
فارس: اي .. باعطيج اغراض ..
مناف: حبيبي ما كان له داعي ..
فارس: فديت روحج .. انا طول الرحله افكر فيج .. كل ماشوف شي .. اقول يناسبج
مناف: فديت روحك ما تقصر حبيبي ..
فارس: ايه عليج والله .. ودي اخذ لج الدنيا كلها يا قلبه انتي ..
مناف: انت دنيتي كلها يا فارس ..
فارس بصوت عالي: فديت مناف ياناس ..
مناف تمت تضحك على فارس .. تم يسولف معاها شوي وبعدين استأذن منها عشان محمد ولد عمه كان ينتظره فالحوش .. اول ما محمد دخل الحوش شاف سيارة يوسف .. حس ان همه زاد ..
محمد " يا حظك يا يوسف .. ليتني مكانك.."
فاطمه تفاجأت بيوسف .. استقبلته بكل شوق .. دخلوا الميلس وحضنها يوسف بكل شوق وحنان ..
يوسف: وحشتيني يا اغلى انسانه على قلبي ..
فاطمه وهي تصيح: فديت قلبك .. مشتاقه لك يا يوسف ..
يوسف يمسح دموعها: فديت عيونج ودموعج ..
قعدوا مواجهين بعض وكلن يتأمل ملامح الثاني ..

[رامون]

فاطمه ابتسمت و غمضت عيونها تتحسس ويه يوسف ..
يوسف: فديت لمساتج .. وباس يدها ..
فاطمه: ايه عليك يا يوسف .. والله وحشتني موت ..
يوسف: انتي اكثر ..
فاطمه ابتسمت بدلع: بس شو هالمفاجأه الحلوه .. فقدت الامل اني اشوفك اليوم ..
يوسف: وانا اقدر ما شوفج يا حياتي ..
فاطمه: فديت روحك والله .. بس مبين عليك التعب ..
يوسف يستعبط: زين انام عندكم اليوم .. احس اني ماقدر اروح البيت ..
فاطمه: فديت روحك والله ..
يوسف قرب من فاطمه ومسك يدها ..
يوسف: حياتي ..
فاطمه: هلا حبيبي ..
يوسف: شرايج تجهزين نفسج خلال اسبوعين ونسافر بلا عرس وسوالف طويله مالها اول ولا تالي ..
فاطمه: مممممم .. حبيبي امنيتي اني انزف لك بالفستان الابيض ..
يوسف: فديت كل امنياتح والله .. حاضرين لج الشيخه ..
فاطمه بدلع: هالكثر متوله علي ..
يوسف: ابيج اليوم قبل بكره ..
فاطمه: حياتي انته ..
حضنها يوسف بقوه لصدره ..
فاطمه: حبيبي اليوم سويت شاي بالمرميه وايد حلو ..
يوسف: فديت ايدينج الحلوت والله .. يلا ذوقيني شغل يدج حياتي ..
فاطمه مبتسمه: من عيوني الثنتين ..
طلعت من الميلس راحت تجيب الشاي .. وهي رايحه صوب المطبخ شافت فارس طالع ..
فاطمه: وين رايح اخوي ؟
فارس: بروح مع محمد ولد عمي ..
فاطمه باستغراب: وين رايحين .. توكم راجعين من السفر فديتك ..
فارس مبتسم: عندنا شوية شغل الغاليه ..
فاطمه: اهااا ..
فارس: ريلج فالميلس ؟
فاطمه: اي ..
فارس: خل اروح العوزه شوي ..
فاطمه ضحكت على اخوها وهي رايحه المطبخ .. فارس دخل سلم على يوسف ولعوزه شوي .. طلع وراح عند محمد ولد عمه .. ركب السياره وعيونه على محمد الحزين ..
فارس: هلا حمودي ..
محمد: هلا والله فروس ..
فارس: حرك يلا ..
محمد: ان شاءالله ..
فارس: وين تبي نقعد ؟
محمد: شو رايك نروح القهوه ؟
فارس: لا حالتك وايد صعبه .. خل نروح البحر ..
محمد: زين ..
طول الطريق ومحمد كان ساكت .. فارس احترم هدوء محمد وتم ساكت لين وصلوا البحر .. صف السياره ونزلوا يتمشون ..
محمد: فارس ..
فارس: هلا والله ..
محمد: حياتي صارت جحيم ..
فارس: ليش ؟
محمد: احس نفسي مب طايق زوجتي ..
فارس عقد حواجبه: ليش حمودي ؟ شو صار بينكم بعد ؟
محمد: من بعد ما رجعنا من المانيا .. وديتها بيت اهلها خليت اليهال معاها .. كلمني ابوي وقالي عشانك وعشان اليهال .. وهي لازم تشوف منك الزين وبتقدرك .. ومن هالكلام يا فروس ..
فارس: حلو الكلام ..
محمد: رجعتها البيت .. بس يا فروس لما رحت لها البيت حسيت اني مالي خاطر اشوفها .. ولا حتى اتكلم معاها .. بس رحت مجبور .. فروس انا حاس بالذنب .. يوم رحت اراضيها ما قلت لها ولا كلمه حلوه .. كنت جاف معاها .. وهي على نيتها المسيكنه .. كانت تتغزل فيني وتسمعني كلام حلو .. فروس تخيل لما رجعت البيت ورحت لها الغرفه .. كانت متعدله لي ومتكشخه وتنتظرني بشوق .. فروس بالعافيه جابلتها .. ونزلنا تحت عند اهلي .. الحين شردت من البيت .. آآه يا فارس .. ماقدر اعيش جي .. هي معوره قلبي .. بس في نفس الوقت ماقدر اجابلها ..
فارس: محمد اذكر ربك ولاتخلي الشيطان يلعب فيك .. خل عنك المجاملات .. اقعد معاها ناقشها حاول انك تقولها اللي في خاطرك .. وانت خذ مافي خاطرها ..
محمد: ماقدر .. والله للحين ماقدر انسى شكلها لما ركبت معاي السياره وهي فرحانه ان بنرجع البيت .. تدري يا فارس شو سويت ..
فارس: شو ؟
محمد: اول ما رجعنا حطيت اليهال في اسرتهم و رحت الفراش سويت نفسي نايم .. عورت قلبي يوم قربت مني وهي تشيك علي .. لمستني وانا بينت لها اني في نوم عميق .. غطتني ونامت جنبي .. والله ما كنت طايق قربها ..
فارس: تعوذ من ابليس يا محمد .. هالمشاكل لازم تصير بينك وبين زوجتك .. مافي احد مرتاح .. لازم تصبر عليها وهي بعد بتصبر عليك .. هي تحبك واكيد تتغلى عليك يا محمد .. ماعتقد انها بتخسرك وفي ذمتكم اثنين ..
محمد: والله مادري شو اقولك يا فارس ..
فارس: لا تقولي .. انت لازم تغير مافي داخلك .. لاتفكر في غيرها .. هي شريكت حياتك .. كلن يشوف حياته .. انت متزوج ملتزم بزوجه وعيال .. حمود مرتك الحين حامل .. فكر فاللي جاي بالطريق ..
محمد يتنهد: آآه .. والله اني افكر فيهم .. بس قلبي ماعاد لها ..
فارس بحده: غيرها راحوا يا محمد .. لهم حياتهم .. لا تتعلق بوهم .. لاتعشم نفسك عشان افكار انحطت في بالك .. اتركك غيرك يعيشون حياتهم .. ولو تعزهم صج .. لا تفكر فيهم ..
محمد " محد فاهمني الا انت يا فروس " ..
محمد: والله اني اتمنى لهم الخير ..
فارس: شيلهم من بالك يا محمد ..
محمد سكت ولارد على فارس .. تموا يتمشون على السيف .. محمد تم يفكر في كلام فارس .. وفارس تم يفكر في كلام محمد ..
محمد " فاطمه خذت قلبي يا فارس .. شلون تبيني انساها .. بس كلام فارس صح .. ساره عيشتني حب فاطمه "
فارس " ليش يا محمد تسوي بنفسك واهلك جي ؟ .. خل غيرك يعيش حياته .. انت ملتزم بزوجه وعيال .. وهالخلافات لازم بتصير في حياة كل ريال ومرته .. لذة الحياة بالمشاكل .. شلون الواحد يتعلم من من الدنيا .. لا تستلم يا محمد .. الله يهديك " ..
تموا يتمشون على السيف وهم ساكتين ..
محمد: فروس خل نقعد شوي ..
فارس: ان شاءالله ..
محمد: والله تعبان تعبان ..
فارس: ممممممم .. قبل ما نسافر المكسيك .. الوالد اقترح علينا نروح مكه ..
محمد مبتسم: خوش راي ..
فارس: قبل المدارس والدوامات خل نروح ..
محمد: خل نروح نتعبد ونستغفر بنا ..
فارس: نشوف الاهل ونرتب امورنا ..
محمد: بأذن الله ..
فارس: لازم تاخذ زوجتك معاك .. واحجزوا لكم غرفة بروحكم .. لازم تكونون قراب من بعض .. صارحها وخذ مافي خاطرها ..
محمد: ان شاءالله ..
فارس: عيالك خلهم هني عند اهلها ..
محمد: لا ماستغنى عنهم ..
فارس: حمود لا تتعذر .. يعني يوم سافرنا المكسيك مافتكرت فيهم ولا فيها ..
محمد نزل راسه منحرج ..
فارس: خلهم فالبلاد وانت و زوجتك تفاهم وحطوا النقاط على الحروف .. لا تتسرع و وازن الامور عدل ..
محمد: ان شاءالله ..
تموا فتره ساكتين يتأملون ضوء القمر المنعكس على امواج البحر الهاديه .. كانت الساعه 12 ونص لما محمد شاف الوقت في ساعته ..
محمد: جوالك معاك ؟
فارس: لا خليته بالسياره ..
محمد: يلا تأخرنا ..
فارس: زين يلا .. بس ليش سألت عن الجوال ؟
محمد: يمكن المدام تتصلك ..
فارس ومحمد: هههههههه ..
فارس: ما بتتصل ..
محمد: يا واثق .. زين ليش يعني ما راح تتصل ؟
فارس: لاني قلت لها مشغول ..
محمد: اي ي ي ..
فارس: بكره نورح نأثث ؟
محمد: حاضرين لك الغالي ..
فارس: حلو حلو ..
محمد: حلو على قلبي ..
فارس: لا قلبي ..
محمد: ولا تزعل .. بس على قلبي .. وانت اقلب ويهك ..
محمد وفارس: ههههههه ..
رجعوا متجهين لبيت بوفارس .. نزل فارس بيتهم وكانت سيارة يوسف موجوده فالحوش .. محمد كان يشوف السياره بحسره ..
محمد " والله ليتني مكانك يا يوسف .. ليتني مكانك " ..
فارس سلم على محمد ونزل .. طلع محمد اتجه لبيتهم وهو مغصوب .. دخل الحوش وراح غرفته .. شاف ان زوجته نايمه .. حس بالراحه .. بدل ملابسه وراح الصاله .. تم يقلب قنوات التلفزيون لين نام على الكرسي .. ساره وعت من نومها على الساعه 2 ونص .. استغربت انها ما لقت محمد فالفراش .. طلعت من الغرفه وراحت الصاله لقته نايم على الكرسي بعمق .. جابت لحاف وغطته .. باسته على جبهته ومسحت على راسه .. رجعت الغرفه ونامت ..
...............................
يتبع

[رامون]

يوم جديد بنسماته وعبيره يطل عليهم .. مريم فتحت عيونها وابتسامة تفائل علت شفاها النديه .. التفت على خالد اللي كان نايم .. قربت منه وباسته على خده .. غطته وراحت تاخذ شور .. خلصت من الشور اللي عطاها نشاط .. قعدت خالد من النوم ..
مريم: خالد حبيبي ..
خالد: هممممم ..
مريم: قوم فديتك ..
خالد: الساعه كم ؟
مريم: الساعه 7 ونص ..
خالد: تو الناس .. قعديني الساعه 8 ..
مريم مبتسمه: ان شاءالله ..
طلعت من الغرفه ونزلت تحت عند مرت عمها .. لقتها قاعده بروحها .. تشرب حليب وتقرى الجريده ..
مريم: السلام عليكم ..
ام محمد مبتسمه: عليكم السلام .. هلا والله بنتي ..
مريم: شحالج عمتي ؟
ام محمد: الحمدلله ..
مريم: عيل وين الباقي ؟
ام محمد: البنات نايمين .. والشباب اللي فيهم للحين نايم واللي طلع ..
مريم: حليلهم ..
ام محمد: يمه اصب لج شاي ولا حليب ؟
مريم: انا بقوم اصب لي ..
دخلت عليهم ساره وعيالها وراها .. ركضوا عند يدتهم وطبوا في حضنها ..
ساره: السلام عليكم ..
ام محمد ومريم: وعليكم السلام ..
ام محمد: هلا يمه ساره ..
ساره باست راس ام محمد وقعدت جنبها ..
ساره: شحالج عمتي ..
ام محمد: الحمدلله طيبه ..
ساره: مرايم فديتج صبي لي معاج شاي ..
مريم: ان شاءالله ..
ام محمد: يلا تريقوا بناتي ..
مريم: يكفيني الحليب عمتي ..
ساره: انا ترقت مع محمد ..
ام محمد: بالعافيه ..
قعدوا ثلاثتهم مع بعض والتوأم كانوا يلعبون حولهم .. مريم راحت تقعد خالد على الساعه 8 .. دخلت عليه ومالقته في فراشه ..
مريم " فديته قعد بروحه " .. فتحت الكبت وجهزت له ملابسه .. طلعت له ثوبه والغتره والقحفيه .. نزلت تحت تجيب الفحم عشان تبخر خالد .. طلع من الحمام وشاف ملابسه مجهزه على الكرسي .. سمع حس مريم وهي جايه الغرفه .. انخش ورا الباب وترك باب الحمام مفتوح .. دخلت مريم ومالقت خالد ..
مريم: خالد .. خالد .. يه وين راح .. دخلت الحمام وشافته فاضي .. وقف خالد وراها وطوقها بايدينه المبلله ..
خالد: صباح الحب يا حبي ..
مريم مبتسمه: صباحك عسل ..
خالد: فديت رحيتج والله ..
مريم ابتعدت عنه: يلا حبيبي بدل عشان ما تتأخر ..
خالد مبتسم: حاضرين مدام ..
مريم: هههههه .. شو مدام ..
خالد: كيفي ..
مريم وخالد: هههههه ..
خالد لبس وكشخ ومريم حطت البخر تحته عشان تبخيره .. عطرته وباسته على خده ..
مريم: فديت روحك يا خالد .. الله يوفقك ..
خالد مبتسم: فديت روحج يالغاليه ..
مريم سمعت صوت ياهل والتفت صوب الباب .. عقدت حواجبها وصدت ..
خالد: شو فيج ؟
مريم: كأني سمعت صوت ياهل ؟
خالد: يمكن عيال محمد اخوي ..
مريم: يمكن ..
خالد عدل غترته ونزل مع مريم تحت .. سلم على امه ومريم صبت له شاي خذه معاه وهو طالع .. مريم راحت ترتب غرفتها .. فتحت الدريشه تغلغلت اشعة الشمس داخل الغرفه نقت جو الغرفه .. رتبت السرير وسمعت حد يدخل الغرفه .. راحت صوب الباب وما لقت حد .. طلعت عند باب الغرفه التفتت يمين ويسار ومالقت حد .. استغربت ورجعت الغرفه .. وهي مندمجه في ترتيب الغرفه سمعت صوت الماي فالحمام .. راحت الحمام تشيك .. مالقت شي .. شيكت على ولف الماي كان مسكر .. استغربت وحست برعشه في جسمها .. سكرت باب الحمام واتصلت بخالد على طول ..
خالد: هلا حبيبتي ..
مريم: خالد ..
خالد: شو فيج ؟
مريم: خالد في شي غريب فالغرفه ..
خالد عقد حواجبه: شي غريب ؟! مثل شو ؟
مريم: وانا ارتب سمعت صوت الماي بالحمام .. ولما رحت اشيك مالقيت شي ..
خالد: لا حبيبتي يمكن يتهيء لج .. تعوذي من ابليس .. روحي تحت عند امي ..
مريم بخوف: ان شاءالله ..
خالد حس بخوفها: زين باجي البيت اشيك بنفسي ..
مريم بتردد: لا خالد ماله داعي ..
خالد: حياتي انتي ابي اطمنج ..
مريم: لا مو مشكله الحين بنزل تحت ..
خالد: زين لا تروحين الغرفه لين ارجع من الدوام .. مو مطول اليوم ..
مريم: زين حبيبي ..
سكرت من خالد وهي تتلفت حواليها .. تذكرت سالفة خالد مع الجنيه ..
مريم " هاي اللي انا خايفه منه " ..
طلعت من الغرفه وراحت تحت عند عمتها .. خالد تم يفكر في مريم ويحاتيها .. خلص شغله بسرعه وراح البيت .. اول ما دخل الصاله شاف مريم قاعده بروحها .. التفت عليه مبتسمه ..
مريم: هلا والله
خالد مبتسم: شو اخبارج ؟
مريم: الحمدلله ..
خالد مسك يدها وابتسم ..
خالد: يلا نروح فوق ..
مريم: زين ..
طلعوا ثنينهم الغرفه ومريم كانت تتباطئ في مشيتها .. خالد كان حاس فيها .. فتح باب الغرفه وكانت الغرفه عاديه ما فيها شي .. مريم تطمنت بوجود خالد جنبها .. راحت صوب الكبت وطلعت له ملابس البيت وخذت ثوبه وغترته وعلقتهم ..
خالد: شو مسويه لنا غدا اليوم يا مدام ؟
مريم مبتسمه: مممممم .. مسوين لكم دجاج مشوي ..
خالد: افا .. وانا قلت باكل من هالايدين الحلوات ..
مريم بدلع: عاد خالد ..