{ نهاية حبك إعدامي } رووووووووووعه

[رامون]

بوفارس: تقول مب من ثوبنا ..
فارس وقف مكانه: شو يعني مو من ثوبنا ؟!
بوفارس: استهدي بالله ..
فارس: يبه انت كلمت امي ؟
بوفارس: اي وقلت لها رايي فالموضوع ..
فارس بفضول: زين شو رايك انت ؟
بوفارس: انا ماشوف فيها شي .. انت اخترتها وانت تتحمل نتيجة اختيارك ..
فارس: شلون يعني اتحمل نتيجة اختياري ؟
بوفارس: انا موافق على اي بنت انت تختارها .. بس لو صار ما صار بينكم .. لاتجينا ..
فارس: يبه يعني انت بعد مب راضي ؟
بوفارس: والله اني راضي وانا سألت عن البنت واهلها .. ابوها متوفي وماعندها الا امها واخوانها .. واخوانها صغار .. هي تدرس فالجامعه .. واخلاقها عاليه .. الله يوفقك معاها يبه وانا ما راح اوقف في طريقك .. بس الله يعينا على امك ..
فارس: يبه يعني امي مب راضيه ..
بوفارس: هي ما قالت انها مو راضيه .. بس اللي فهمته من كلامها انها ماتبي البنت ..
فارس: بس انا شاري البنت ..
بوفارس: فارس يبه قولي .. انت تعرف البنت ؟
فارس باصرار: لا ماعرفها ..
بوفارس: عيل ليش ما اخترت الا هي ؟
فارس: قلبي اختارها يبه ..
بوفارس: لو بينكم شي قولي وانا ابوك .. ما بعترض على هالشي ..
فارس: مافي شي يا يبه .. بس انا ارتحت لها .. شفتها كم مره ..
بوفارس: وين ؟
فارس: فالمستشفى .. كل ما روح لجاسم ذيك الايام كنت اشوفها ..
بوفارس: اي ي ي ..
فارس: يبه ترا ابي البنت وقلت لك انا شاريها لو من تكون ..
بوفارس" يا فارس شكلك بتعلن الحرب على امك .. والله يستر منك بس " ..
بوفارس: الله يقدم اللي فيه الخير .. انت استخير الله يرضى عليك ..
فارس بحزن: الحمدلله استخرت و مرتاح ..
بوفارس: زين يبه انا بروح الغرفه ارتاح .. انت فكر في كلامي .. ولو كلمتك امك فالموضوع الله يرضى عليك لاتشد معاها ..
فارس لوى بوزه: يصير خير ..
بوفارس هز راسه وهو طالع .. فارس سكر الباب ورا ابوه وكان معصب .. سكر اصابع على بعض وبقبضة يده ضرب الطاوله بقوه .. انكسر الزجاج وانجرح فارس .. ماحس بالالم من القهر اللي فيه .. شاف يده وراح غسلها .. انتبه ان في زجاج دخل في يده .. لف يده بشاش وراح المستشفى عشان ينظفون له الجرح .. اول ما دخل المستشفى حس انه مب قادر يتنفس .. وقف في نفس المكان اللي وقف فيه لما كان شايل نايف اخو مناف .. مر عليه الشريط وتذكر كل تفاصيله .. حس بضيقه في صدره .. غمض عيونه بقوه وتنفس بعمق .. فتح عيونه وكمل دربه عند الاستقبال .. دخل على الدكتور ونظفوا له الجرح خيطوه له ولفوا له يده .. طلع من المستشفى وهو مب حاس باللي يدور حوله .. كان يشوف ويوه الناس ويسمع اصواتهم .. بس ما قدر يميز ويوهم ولا قدر يسمع شو يقولون .. مشى لين وصل سيارته .. شغل السياره وحرك .. ما كان عارف وين يروح .. لقى نفسه عند بيت مناف تم قاعد فالسياره .. حط راسه على السكان بحزن .. تم يفكر ويفكر .. تم فتره على هالحال .. واقف عند بيت مناف ويفكر .. كانت الساعه 1 ونص بالليل .. رن جوال فارس وهو واقف عند بيت مناف .. تم يطالع التلفون بحزن .. خلى التلفون يرن لين سكرت مناف .. تم فتره يطالع التلفون .. رجع اتصل لها .. ردت عليه بشوق ..
مناف: هلا حبيبي ..
فارس ابتسم بحزن: هلا وغلا ..
مناف: وش في صوتك ؟
فارس: مافيني شي ..
مناف: بلا فيك شي فارس ..
فارس: تعبان شوي ..
مناف بخوف: بسم الله عليك .. عسى ماشر ؟
فارس: ممممممم .. مصدع ..
مناف: زين خذت حبه تخفف الالم ؟
فارس: لا بعد شوي باخذ ..
مناف: من متى وانت تحس بهالصداع ..
فارس: من شوي ..
مناف: فديت روحك والله .. زين عشاني قوم خذ لك حبه تخفف الالم و روح ارتاح ..
فارس: مو الحين يا قلبه ..
مناف: واللي يسلمك ..
فارس غمض عيونه: ان شاءالله ..
مناف: انتظر اتصالك ..
فارس: ان شاءالله ..
سكر منها وخنقته العبره على حال المسكينه مناف ..
فارس " فديت اهتمامها فيني .. الله يحفظها .. ليش يا يمه انتي شايفه نفسج على الناس .. ليش يا يمه " ..
قعد شوي يفكر وهو يطالع بيتهم .. اتصل بمناف مره ثانيه ..
مناف بإهتمام: اشوى الحين حبيبي ؟
فارس ابتسم: يا قلبه انتي .. من اسمع صوتج اكون بخير ..
مناف بدلع: فديتك يا فارس .. احبك واموت فيك ..
فارس بفرح: وانا اعشقج يا مناف .. الحين مافيني شي ..
مناف وفارس: هههههههه ..
مناف: بسم الله عليك حبيبي .. زين متى بتنام ؟
فارس: مادري بعد شوي ..
مناف: زين روح ارتاح الحين احسن ..
فارس: لا خلج معاي شوي ..
مناف: همممممم .. بس شوي ..
فارس ابتسم: كل شي منج حلو .. شوي .. وايد .. كل شي حلو منج يا اغلى بنت فالعالم ..
مناف: انا كلي لك .. حياتي وقلبي وعمري ..
فارس: انتي بكل مافيج لي انا .. ما يهمني من انتي ولا من بنته ولا غيره ..
مناف استغربت من كلام فارس ..
فارس" اوه شو خربطت انا " ..
فارس: زين حياتي خليني اروح ارتاح شوي ..
مناف مبتسمه: زين حبيبي .. تحمل بنفسك فديتك ..
فارس: من عيوني الثنتين ..
مناف: فديت عيونك والله ..
فارس: تامرين على شي ..
مناف: لا حبيبي سلامتك .. بس طمني عليك اول ما تقعد من النوم ..
فارس: ان شاءالله يا قلبه ..
مناف: مع السلامه ..
فارس: سلام ..
سكر فارس من مناف وهو مخنوق .. شغل السياره وحرك رايح البيت .. كان يمشي بهدوء فالدرب .. يفكر في مصيره مع مناف .. يفكر في كلام ابوه وتصرف امه .. وغموض محمد .. وصل البيت وكانت الساعه 3 .. فاطمه كانت قاعده فالصاله تكلم يوسف .. شافت فارس واستغربت ..
فاطمه: لحظه يوسف ..
يوسف: ان شاءالله ..
فاطمه: فارس ..
فارس مبتسم: هلا ..
فاطمه: وين كنت ..
فارس: طالع عند الربع ..
فاطمه: تصدق على بالي انك نايم ..
فارس: ههههه .. تعرفيني ما نام من وقت ..
فاطمه: زين بتنام الحين ؟
فارس: لا .. بعد الاذان ..
فاطمه: اهاا ..
فارس بغلاسه: من تكلمين ؟
فاطمه: يعني من بكلم ..
فارس قعد جنبها وسحب السماعه ..
فارس: احم احم ..
يوسف: ههههه .. هلا هلا
فارس: من ؟
يوسف: معاك الطواري ..
فارس: هههههه .. احلى يالطواري .. تعالوا انقذوني قلبي يعورني ..
يوسف: اللي يبينا يجينا ..
فارس: طواري تعبان ..
فارس ويوسف: ههههههه ..
فارس: ليش تكلم اختي هالوقت ؟
يوسف: عن من تتكلم الشيخ ؟
فارس: عن الجميله اللي قاعده جنبي ..
يوسف: قصدك زوجتي ..
فارس: همممممم .. تقدر تقول زوجتك .. بس هي للحين عايشه في بيت ابوها ..
يوسف: ذليتونا ترا ..
فارس ويوسف: ههههههه
فاطمه انتبهت ليد فارس ..
فارس: شو اخبار خالك وريما ؟
يوسف: الحمدلله ..
فارس: سلم على بوخليفه وايد ..
يوسف: يبلغ ..
فارس: يلا حبيبي .. سلام ..
يوسف: الله وياك ..
فارس عطى فاطمه السماعه ..
فارس: كلمي ريلج ..
فاطمه خذت السماعه: فارس شو فيها يدك ؟
فارس: انكسرت الطاوله ودخل الزجاج بيدي .. رحت المستشفى وخيطوا لي الجرح ونظفوه ..
فاطمه: و شلون انكسرت الطاوله ؟
فارس: سالفه طويله بعدين اقولج اياها .. كلمي الولهان بوخليفه ..
فاطمه ابتسمت له وكلمت يوسف .. فارس راح الغرفه .. بدل ملابسه وحذف نفسه على السرير ..
غطت عيونه شوي الا جاسم يقعده للصلاه ..
جاسم: فارس .. فارس .. يلا قوم بنروح المسيد ..
فارس: زين .. جسوم ..
جاسم: نعم ..

[رامون]

فارس: شلني عيزان ..
جاسم: زين اشيلك وين اوديك ؟
فارس: ودني المسيد ..
جاسم: هههههه .. فاكر نفسك خفيف ..
فارس: خف علينا يالريشه ..
جاسم ركب على سرير فارس وقعد على ظهره ..
جاسم: قولي الحين انت تحس فيني وانا على ظهرك ..
فارس: الحقوني ماقدر اتنفس ..
جاسم: ههههههه .. لا تستعبط ..
فارس: خنفتني جسوم .. قووووم ..
جاسم: هههههه ..
بوفارس كان واقف يراقبهم بفرح ..
بوفارس " الله يسعدك يا فارس .. الله يفرح قلبك بمناف .. انا ادري انك تموت فيها .. و الله يكتبكم لبعض " ..
بوفارس: صلاه صلاه ..
جاسم وفارس التفتوا على بوفارس ..
جاسم: ان شاءالله ..
فارس: يبه الحقني .. خنقني جسوم
بوفارس: ههههه .. يلا بيقيم الصلاه خلوا عنكم اللعب ..
فارس: قول حق ولدك الدب يقوم عني .. ماقدر اتحرك ..
جاسم: انا دب ..
فارس: ماقدر اتكلم .. لحقوني ..
بوفارس: ههههههه ..
بوفارس شل جاسم من على ظهر فارس وسحب فارس من يده ..
بوفارس: قوموا يلا ..
فارس: ان شاءالله .. باتوضأ وبلحقكم ..
بوفارس: بارك الله فيك ..
بوفارس كان شايل جاسم .. طلعوا من الغرفه نزلوا تحت .. فارس توضأ ولحقهم وعبدالعزيز سبقهم المسيد .. بعد ما خلصوا رجعوا البيت .. فارس حذف نفسه على السرير ونام .. جاسم انسدح مع ابوه فالصاله وناموا .. عبدالعزيز نام في غرفته ..
بعد هاليوم اللي كان تعيس بالنسبه لمحمد وفارس .. يوم جديد يمر عليهم بالمجهول .. فارس قعد من النوم الساعه 10 على تلفون مناف ..
فارس بتعب: هلا ..
مناف: صح النوم حبيبي ..
فارس مبتسم: يا قلبه انتي ..
مناف: متى نمت فديتك ..؟
فارس: مممممم .. بعد الصلاه ..
مناف: ليش فديتك ؟
فارس: ما قدرت انام من الصداع .. بعد ما صليت الفجر نمت ..
مناف مبتسمه: نوم العوافي حبيبي ..
فارس: الله يعافيج يا قلبه ..
مناف: زين يلا قوم .. بسك نوم ..
فارس: ان شاءالله ..
مناف: بعد ما تصحصح كلمني ..
فارس: من عيوني يا عيوني ..
سكرت مناف من فارس .. فارس قام من السرير يتكاسل .. خلص روتينه ونزل تحت .. من بعد كلام ابوه اول مره يشوف امه لما دخل الصاله ولقاها قاعده اطالع التلفزيون .. ما كان له نفس يسلم عليها من الصدمه .. بس اجبر نفسه وسلم ..
فارس: السلام عليكم .. وباس راسها ..
ام فارس: عليكم السلام .. هلا يبه ..
فارس: شو اخبارج ؟
ام فارس: الحمدلله .. ليش ما رحت الشغل اليوم ؟
فارس: تعبان ..
ام فارس: شو فيك ؟
فارس: جسمي متكسر شوي ..
ام فارس: اهمزك شوي ..
فارس: لا ماله داعي ..
ام فارس: اسوي لك سندويش يبه ؟
فارس: لا مالي خاطر اكل ..
ام فارس: شو فيك يبه ؟
فارس: شو صار على موضوعي ..
ام فارس كشرت: اي موضوع ؟
فارس: الزواج ..
ام فارس: اي زواج ..
فارس بعصبيه: والله ماعرفنا لكم .. سويتوا لنا سالفه عشان نتزوج .. ويوم قلنا بنتزوج قلتوا اي زواج .. شو السالفه .. ؟
ام فارس: اسمع يا فارس .. هالبنت مب من ثوبنا .. وجانك تعرفها ولعبت بعقلك انا اقولك ما تاخذها ..
فارس: شو مب من ثوبنا .. شو اعرفها .. البنت شايفها وابيها ..
ام فارس: لا انت تعرفها ..
فارس: اعتقد كلامي واضح ..
ام فارس بصراخ: اي كلام .. شايفني ياهل جدامك ..
فارس مسك اعصابه: محشومه الغاليه .. بس قلت لكم ماعرفها .. ولو اعرفها بقول اني اعرفها .. بس هالبنت ابيها
ام فارس: شلها من راسك .. شفت لك بنت ناس ما عليها زود ..
فارس: ما بيها .. انا ابي اللي في بالي ..
ام فارس بتحدي: وان قلت لك ما تاخذها ..
فارس: لا باخذها ..
ام فارس: لو خذتها .. انا مالي قعده في هالبيت ..
فارس: يه .. ليش هاي كله .. البنت ما عليها كلام .. بس عشانها فقيره .. كلنا فقاره ..
ام فارس: انت شفت وين عايشين هم .. عرفت من اهلها ..
فارس: ما يهموني .. انا ابها هي .. يا يمه كلامج ما يدخل العقل ..
ام فارس بصراخ: اسمع يا فارس .. يا انا يا هالبنت .. والقرار لك ..
دخل بوفارس على حشرة ام فارس وسمع اخر جمله قالتها لفارس ..
بوفارس: شو صاير .. ليش هالصراخ ؟
ام فارس: تعال شوف ولدك .. يراددني ويعاند ..
بوفارس: علميني شو صاير
ام فارس: الشيخ الا ياخذ هالبنت اللي لعبت بعقله ..
فارس وقف مكان: قلت لكم البنت ماعرفها .. انتوا ما تفهمون ..
بوفارس: استهدي بالله يا فارس ..
فارس: اسمع كلام امي ..
بوفارس: مزنه .. ليش ما تبين البنت ؟
ام فارس: اعتقد كلامي واضح وقلته من قبل .. الينت مب من ثوبنا .. لي متى بعيد لكم هالكلام ..
بوفارس: زين شو فيها .. انا يوم خذتج كنت على قد حالي .. صح
ام فارس تكابر: بس انا طلعت من بيت ابوي وماعلي قصور .. وانت ما قصرت معاي ..
فارس: يمه ليش تقصين على نفسج .. مالج حجه على البنت ..
ام فارس عصبت: انت اسكت ولا كلمه .. اسمع محمد .. لو ولدك خذ هالبنت انا مالي قعده في هالبيت .. خل هالي لعبت بعقل ولدك تربيكم كلكم ..
بوفارس: يا مزنه .. كلامج مو مقنع .. الولد يبيها .. وقال انه ما يعرفها .. ولا يكلمها .. انتي مكبره الموضوع عشانها بنت فقيره وعلى قد حالها ..
ام فارس: اشوفك موافقث ولدك ..
فارس: كلام ابوي صح ..
ام فارس: انا مابي اعور راسي معاك انت ..
بوفارس: اذكروا الله .. خل نحل المشكله بهدوء ..
ام فارس: يا ناس احر ما عندي ابرد ماعنده هالريال ..
بوفارس رفع حاجب: اتقي شر الحليم اذا غضب يا مزنه ..
ام فارس: شوف انا من بكره بروح اخطب له بنت وحده من صديقاتي .. ذيك البنت اللي ما عليها كلام .. بنت شايفه الخير .. متربيه على العز ..
فارس: انا قلت هالكلام من قبل .. لو خطبتي لي .. بقطع ويهج جدام الناس .. يعني بالعربي بفشلج .. مب رايح .. ولا تدرين شو بسوي .. بدخل على اهل البنت وبقولهم امي جبرتني على بنتكم ..
بوفارس: وفارس يسويها ..
ام فارس: لا والله .. شجعه انت ..
بوفارس وصل حده من ام فارس ..
بوفارس بصوت هز البيت: وبعدين .. يعني انا مالي حشيمه ..
ام فارس انتفضت من صرخته .. وقفت ونزلت راسها .. فارس مسك ابوه من كتفه وضغط عليه ..
بوفارس: حتى لو فارس يكلمها ولا يعرفها .. خليه ياخذها .. انتي بتعيشين معاها .. انتي بتصرفين عليها .. عيالها بيتسمون باسمج .. ولا تحرجين نفسج عند العرب .. فارس ولدي واعرفه ..
ام فارس قامت تصيح: وربي اني ما برضى عليك لين خذتها .. روح الله لا يوفقك ويها ..
طلعت من الصاله وهي تصيح .. فارس حس ان ريوله ما تشيله .. دارت الدنيا حوله .. قعد على الكرسي وغطى ويهه بيدينه ..
بوفارس: فارس ادري انك تموت في مناف .. اللي مات اخوها نايف بين ايدينك .. واخوانها فيصل وعبدالله اللي جبتهم المزرعه ذيك الايام .. وادري انك مهتم فيهم ومب مقصر فيهم ..
فارس كان يسمع كلام ابوه وحسه مثل السكاسين اللي طعنت قلبه .. رفع راسه وشاف ابوه بحزن ..
فارس: غير مناف انا مابتزوج ..
مشى عن ابوه وراح غرفته شايل معاه همه .. اتصل بمحمد ولد عمه ..
.......................
ان شاء الله يعجبكم الجزء

[رامون]

فارس بحزن: حمود تعال طلعني من بيتنا .. ان سقت السياره بطلع ومب راجع لكم كلش ..
محمد بخوف: فروس شو صاير ..
فارس: تعالي الحين ..
محمد: زين زين ..
سكر محمد من فارس وطارعلى بيتهم .. اول ما دخل لقى بوفارس قاعد فالصاله والهم والحزن كسوه ..
محمد: السلام عليكم عمي ..
بوفارس: هلا والله يبه .. فارس فوق .. الحق على اخوك يا محمد ..
محمد: بخوف .. شو فيه ؟
بوفارس: تذابح مع امه عشان سالفة الزواج .. روح له يبه وخذ مافي خاطره ..
محمد: ان شاءالله ..
طلع محمد من الصاله وراح غرفة فارس على طول .. شاف حالة فارس .. كان حاذف نفسه على السرير ويطالع فوق .. جواله كان يرن وماكان يرد .. محمد خاف ان فارس فيه شي .. قرب منه يتفحصه .. طالعه فارس ..
فارس: قوم خل نطلع بسرعه ..
محمد: زين ..
طلعوا من الغرفه وكانت ام محمد في ويهم .. فارس ما طالعه ونزل بسرعه وسحب محمد معاه .. ام فارس عصبت على الحركه ..
ام فارس " يا انا يا بنت الفقر اللي تبيها .. اصبرعلي يا فارس " ..
نزلت الصاله وكان بوفارس قاعد بروحه .. قعدت جنبه ..
ام فارس: محمد ..
بوفارس: نعم ..
ام فارس: اسمح لي الغالي .. بس ولدك عصب بي ..
بوفارس: انتي ما عندج سالفه على هالكلام .. رافضه البنت عشانها فقيره ..
ام فارس: مو من حقي اشوف الزين لولدي ..
بوفارس: من حقج ما اختلفنا .. بس ما تجبرين الولد ياخذ من انتي تهوين .. هو بغاها خليه ياخذها ..
ام فارس: والله ما ياخذها ..
بوفارس قام من مكانه متنرفز ..
بوفارس: لا حول ولا قوة الا بالله ..
راح الغرفه صلى ركعتين ونام شوي .. ام فارس تمت فالصاله تفكر باللي صار .. كان ودها تمحي مناف من الوجود عشان فارس ما ياخذها ..
محمد طار بفارس وراحوا شقة فارس اللي ما تهنى فيها .. دخلوا الشقه اللي أثثوها مع بعض وتعنوا عشان يجهزونها لعيون مناف .. دخل فارس غرفة النوم الفاضيه ..
فارس: هالغرفه بتم فاضيه ..
محمد: اذكر بك يا فروس .. بأذن الله هي بتختار الاثاث .. وهي بتملي لك حياتك فرح ..
فارس قعد على الارض في الغرفه الفاضيه .. حضن ريوه لصدره وغمض عيونه بحزن ..
فارس: ما سمعت كلام امي يا حمود .. حلفت اختار بين مناف وبينها ..
محمد انصدم من الكلام: شو .. امك ليس تفكر جي ..؟
فارس: آآآه .. مادري عنها ..
محمد: زين شو بتسوي الحين ؟
فارس: محتار والله .. عشمت البنت .. كل يوم اقولها بعد ما املج بس بنسوي وبنسوي .. بناينا احلام .. واحلام ..
محمد " والله انك ما تستاهل يا فارس " ..
محمد: امك كلمتني بنفس الموضوع امس ..
فارس التفت على محمد عاقد حواجه ..
فارس: شو قالت لك ؟
محمد: سألتني اذان انت تعرف البنت .. وانا اصريت اني مادري عن موضوع الزواج اصلا .. وانك ما تعرفها ولو انك تعرفها بقولها ..
فارس: امي هاذي مادري بأي منطق تفكر ..
محمد: انا انصدمت فيها ..
فارس: تعرف شو قالها ابوي اليوم ؟
محمد: شو ؟
فارس: قالها انا يوم خذت كنت على قد حالي .. شو تتوقع ردت عليه ؟
محمد رفع حاجب: شو ؟
فارس: تقول لابوي انا طلعت من بيت ابوي ما علي قصور وانت ما قصرت علي .. حمود ابوي كان موظف على قد حاله اول ماخذ امي .. وبعد ما جابتني امي ابوي كمل الجامعه وامي كانت تسانده .. تخيل بيني وبين فطيم اختي تقريبا 8 سنين .. بعد ما تخرج ابوي من الجامعه وخذ منصب امي حملت بفطيم .. تدري ليش ؟
محمد: ليش ؟
فارس: لان ابوي كان على قد حاله .. وامي ما كانت تبي عيالها يتربون الا فالعز .. يعني كانت تصرف علي بروحي اللي وراها واللي جدامها .. بس بعد ما خذ ابوي المنصب وصار له شان في شغله جات فطيم وعبدالعزيز ووراهم مريم وايمان .. تذكر البطره اللي عشناها واحنا صغار .. واللي لحين نعيشها ..
محمد: الحمدلله على كل حال.. بس ليش امك خايفه من الفقر ؟
فارس: مادري يا حمود .. ماقدر افكر في شي .. تدري امس فالليل ابوي فاتحني بالموضوع .. من القهر اللي فيني بعد ما طلعت من المستشفى مادري شلون وصلت لين بيتها .. حمود تميت مجابل بيتها وافكر .. اتصلت لي وكلمتها وسولفت ولا قلت لها اني عند بيتهم .. وهي كانت حاسه ان فيني شي .. بس انا تعذرت لها .. حمود ماقدر اتخيل حياتي بدونها ..
محمد: اذكر ربك يا فارس .. وان شاءالله بيتغير الوضع .
فارس: اي وضع .. هاذي ام فارس ..
محمد: زين قوم خل نروح الصاله ..
فارس: لا خلني هني شوي .. خلني بروحي حمود ..
محمد: ان شاءالله يبه .. بس لو بغيت شي انا قاعد فالصاله ..
فارس: زين ..
طلع محمد من الغرفه الفاضيه وترك فارس بروحه فيها .. سكر الباب عليه وهو يحاتيه ويفكر فيه .. فارس انسدح على الارض فرد ايدينه بمستوى كتفه .. ومد ريوله يده .. كان شكله شكل المصلوب .. تم مغمض عيونه ويفكر في مناف وفي امه .. احتار بينهم .. يموت في مناف .. ويموت في امه ..
فارس " الحين انا معصب لازم احكم عقلي واوزن الامر عدل .. مناف ما تدري عن شي .. وامي راكبه راسها .. مناف المسكينه عشمتها وامي حالفه انها ما تدخل البيت .. مناف تنتظرني اليوم قبل بكره وامي كارهتها .. لو كلمت يدتي ممكن تقنع امي .. ولا عميمه هيا ممكن تقنع امي .. بس اخاف توافق عشان تسكتهم وتحول حياتي جحيم بعدين .. مناف اللي فيها كافيها مابي ازيد همها .. مممممم .. ابوي شعرفه عن مناف واخوانها واني اموت فيها .. بس ليش ابوي موقفه ضعيف جدام امي .. صج امي شخصيتها قويه .. بس ابوي كلمته المسموعه .. والله انك غريب يا بوفارس .. مالي غير اكلم يدتي .. هي لها تأثير على الكل .. ولازم ماشد مع امي .. بابتعد هاليومين لين تهدى اعصابها وارجع افتح الموضوع معاها .. ولو ما نفع بكلم يدتي اكيد " ..
تم فارس يقلب الكلام في مخه ويحاول يهدي نفسه عشان ما يتهور ولا يتصرف تصرف ما يعجب حد ..
محمد كان فالصاله يكلم ساره ..
ساره: هلا والله ..
محمد: هلا ساره ..
ساره: انت وين فديتك ؟
محمد: مع فارس برا ..
ساره: اي ي ي .. زين جاي على الغدا ؟
محمد يطالع ساعته: الحين الساعه 12 ونص .. خليني اشوف ولد عمي .. لو بنطول لا تنطروني على الغدا .. ولو خلصنا من وقت باتصل لج ..
ساره: زين فديتك ..
محمد: يلا مع السلامه ..
ساره: الله يحفظك ..
فارس كان واقف عند باب الصاله وسمع الحوار اللي دار بين محمد وساره ..

فارس: وايد جاف معاها ..
محمد التفت عليه: بسم الله انت من وين طلعت ؟
فارس ابتسم وقعد جنب محمد: من زمان ..
محمد: اخبارك الحين ؟
فارس: الحمدلله احسن ..
محمد: زين شو قررت ؟
فارس: بتم هني كم يوم .. ببتعد عن امي شوي عشان تهدى اعصابها وتهدى اعصابي .. وبعدين برجع بكلمها فالموضوع مره ثانيه ..
محمد: الله يهديها امك ..
فارس: زين ما قلت لي لي متى انت بتم جي مع زوجتك ؟
محمد: شلون ؟
فارس: حمود .. انت فاهم ان شو اقصد ..
محمد: فارس .. لو سمحت لا تناقشني في هالموضوع .. خلاص النفس طابت ..
فارس: الله يهديك يا حمود ..
محمد: زين قوم نروح بيتكم نجيب لك ملابس .. ونروح نجيب غدا ..
فارس: مو متغدي فالبيت .؟
محمد: نو .. مالي خاطر اروح البيت اصلا .. قام من مكانه .. يلا حبيبي ..

[رامون]

فارس: توكلنا ..
طلعوا ثنينهم ورجعوا بيت فارس .. فارس شاف فاطمه فالصاله .. سلم وراح الغرفه على طول .. محمد تم يطالع فاطمه بفرح ..
محمد: شحالج بنت العم ؟
فاطمه مبتسمه: الحمدلله .. انت شو اخبارك ؟
محمد: عايشين ..
فاطمه: اخبار ساره واليهال ؟
محمد: تمام ..
فاطمه: زين قولي يا محمد ..
محمد يطالع عيونها: آمريني ..
فاطمه انحرجت: احم .. شو سالفة امي وفارس ..
محمد تنهد: آآه .. يا فاطمه فارس مسكين والله ..
فاطمه: خوفتني على اخوي .. شو فيه ؟
محمد: فارس يبي ينزوج صح ..
فاطمه: صح ..
محمد: وامج رفضت البنت ..
فاطمه بصدمه: هاااا .. ليش!!!
محمد: امج ردت ردت صدمتني انا فيه ..
فاطمه: شو ؟ .. وكانت متوقعه رد محمد ..
محمد: تقول ان البنت مو من ثوبكم ..
فاطمه: لااا .. حرام ليش جي ..
محمد: اليوم الصبح فارس شد معاه شوي .. وراحت امج تصيح .. وخيرت فارس بين البنت وبينها ..
فاطمه: لا حول ولا قوة الا بالله ..
محمد: الله يصبر فارس ..
فاطمه: محمد .. فارس يعرفها ؟
محمد: لا مايعرفها .. ولو يعرفها كان قال .. تعرفين فارس ما يهتم لاي شي دام هو مقتنع فيه ..
فاطمه: فديته والله ..
دخل عليهم فارس ..
فارس: يلا مشينا ..
محمد: يلا ..
فاطمه: فارس ..
فارس كان واقف وفاطمه وراه ..
فارس: نعم ..
فاطمه: وين بتروح ؟
فارس منزل راسه: قريب ..
فاطمه: فارس ..
فارس مشى وطلع من الصاله .. فاطمه تمت واقفه مكانها وتصيح .. محمد طالعها بحزن ..
محمد: اعذريه على هالتصرف ..
فاطمه: قوله لا يسبتعد عنا .. احنا هله ..
محمد: ان شاءالله .. وانتي لاتكدرين خاطرج الله يخليج ..
فاطمه مسحت دموعها: ان شاءالله .. بس الله يخليك طمني عليه ..
محمد: من عيوني الثنتين .. وانتي ديري بالج على نفسج ..
طلع محمد وفاطمه تمت واقفه عند باب الصاله تراقبهم .. فارس كان صاد مايبي يشوف الحزن بعيون اخته .. حرك وطلع من البيت وهو حزين على الحاله اللي ترك فيها فاطمه ..
فاطمه المسكينه اتصلت في عبدالعزيز ومريم وتجمعوا عشان يناقشون موضوع فارس ..
الريم كانت في وضع لا تحسد عليه .. حست نفسها ضايعه .. دوم قافله عليها الغرفه وماتاكل ولا تنام عدل .. بومحمد خاف عليها .. خاف ان علي مسوي فيها شي ..
بومحمد: علي ..
علي طلع من غرفته وراح عند ابوه بسرعه ..
علي: نعم يبه ..
بومحمد بحده: الريم شو فيها ؟
علي ارتبك: م م م مافيها شي ..
بومحمد: حالها مو عاجبني هاليومين .. ليكون رديت مسوي فيها شي ..
علي حس بالحزن .. نزل راسه باحراج وغمض عيونه ..
علي: لا يبه ..
بومحمد تحسف انه قال لوده هالكلمه ..
بومحمد: زين روح نادها لي ..
علي: ان شاءالله ..
راح علي صوب غرفتها .. طق عليها الباب ..
علي: اريام .. الريم ..
الريم: نعم ..
علي: تعالي ابوي يبيج تحت ..
الريم " اوه شو يبي ابوي " ..
الريم: زين الحين بنزل ..
نزل علي عند ابوه وكانوا ينتظرون الريم .. دخلت عليهم الريم اللي ويها صار اصفر من الهم والحزن .. بان السواد تحت عيونها . بومحمد وعلي استغربوا من حالها ..
بومحمد: الريم ..
الريم منزله راسها: نعم يبه ..
بومحمد: شو فيج ؟
الريم: مافيني شي يبه ..
علي: ليش ويهج اصفر .. تعبانه .. شي يعورج ؟
الريم: لا مو تعبانه ..
علي قرب من الريم ورقع راسها .. وكانت عيونها حمره من الصياح ..
علي: ليش تصيحين ؟ حد قايل لج شي ؟
الريم: لا محد قايلي شي ..
بومحمد: عيل ليش ويهج جي ؟
الريم: مافيني شي .. بس عشان نومي معتفس بان علي شوية تعب ..
بومحمد: انتي كنتي تصيحين قبل ما تجيبن ؟
الريم: لا بس عيوني تحكني .. والظاهر ماغسلت يدي قبل ما احكها .. وصارت عيوني حمره ..
بومحمد: لا انتي فيج بلا ..
الريم: مافيني شي ..
علي: حد قايل لج شي ..
الريم: لا .. اقولكم مافيني شي ..
بومحمد: متهاوشه مع حد ؟
الريم: شو فيكم .. اقولكم مافيني شي .. زين بروح انام تعبانه ..
بومحمد: مممممم .. زين روحي نامي .. بس حالج مب عاجبني يا بنت ..
علي: بروح معاج الغرفه ..
الريم: يلا ..
طلعوا من مكتب ابوهم وراحوا غرفة الريم .. تم علي يتفحص الغرفه بعيونه ..
الريم: علي شو فيكم ؟ مافيني شي .. بس رقادي معتفس ..
علي: زين .. مو مشكله ..
انسدحت الريم على فراشها وعلي غطاها عدل وطلع عنها .. اول ما طلع علي رجعت تصيح بحزن .. تمت الريم على هالحال فتره ..
محمد وفارس راحوا خذوا لهم غدا وراحوا الشقه .. حطوا الغدا وطبعا ولا واحد منهم كانت له نفس انه ياكل شي .. تم الاكل مكانه .. فارس انسدح على كرسي ومحمد على الكرسي الثاني .. تموا ساكتين وكل منهم يطالع السقف ويفكر في همه ..
......................
يتبع