{ نهاية حبك إعدامي } رووووووووووعه

[رامون]

" يا ذا النجوم اللي شراتي سهارى .. قولي لنجم الياه يطلع مع سهيل .. خل(ن) احبه سر ماهو جهارى .. ودي بشوفه واعسرتني المواصل " ..


فارس كان منسدح على الكرسي ويفكر في مناف ..


فارس " هل استعجلت لما قلت لها اني كلمت اهلي ؟! اكيد هي تنتظر اهلي يمرون عليها .. اخاف تنكسر فرحتها "


غمض عيونه بتعب وتم يفكر ويفكر ..


فارس " بس ابوي شلون عرف اني اموت فيها ؟ واني اكلمها .. وشلون عرف اخوانها ؟ معقوله عرف فيصل فالعزبه .. لان فيصل كان معانا فالمستشفى لما ابوي شافني مع مناف ذيك الليله .. والله انك مب هين يا بوفارس .. بس شلون عرف اني احبها واموت فيها .. هو قالي ادري انك تموت فيها .. معقوله يكون سمعني وانا اسولف مع مناف .. بس انا ما تكلمت جدامهم كلش .. دوم اروح بعيد .. يا ربي افتر مخي من هالكلام اللي يصير حولي .. "


محمد كان يطالع فارس ومبتسم ..


محمد: فروس قوم نطلع ..


فارس: خوش راي .. اول مره في حياتك تقول شي عدل ..


محمد حذف فارس بالمخده: يا اللي ماتستحي على ويهك ..


فارس: ههههههههههه ..


محمد: تضحك .. زين اوريك .. انا مب طالع معاك .. روح تمشى بروحك ..


فارس نط على محمد ..


فارس: زعلت!


محمد طالعه: قم عن ويهي بس ..


فارس: افااا .. زعلت مني الغالي .. براضيك ولا يهمك .. بكره اصكك بسياره اخر موديل .. تلقاها عند باب البيت ..


محمد: لا والله .. تستخف دمك ..


فارس: ما وصل مواصيلك في خفة الدم .. محشوم الغالي ..


محمد دز فارس وتموا يحذفون بعض بالمخدات .. تموا يضحكون على اشكالهم ..


فارس: حتى اليهال ما يسون سواتنا ..


محمد: كلن يتكلم عن نفسه لو سمحت .. انا اكبر منك .. وكلي ادب واخلاق واحترام .. والى اخره من الصفاحت الطيبه المحببه عند الناس ..


فارس: اشكرك يا محمد ولد عمي .. كل هاي فيني .. والله ماقدر اعبر عن فرحتي برايك فيني .. كل هالسنين وانت مخبي هالكلام في خاطرك لي .. لا غلطان يا ابن العم ..


محمد: الله يعطيك عقل ..


فارس: في هاذي صدقت يا محمد بن حمد .. حمد اخو ابوي .. ابوي محمد بوفارس .. فارس انا ولد عمك ..


محمد: طلعت ظريف وانا مادري ..


فارس: جدا جدا ..


محمد: زين قم نطلع ..


فارس: ان شاءالله الشيخ .. بس بضبط نفسي ..


محمد: من زينك ..


فارس: فديتني والله .. الحلا والزين فيني ..


محمد: يلا مع ويهك ..


فارس: زين زين ..


طلعوا بسيارة فارس .. رن جوال محمد .. فارس تذكر انه ما جاب جواله ..


فارس: افا نسيت جوالي ..


محمد: نرجع ..


فارس: لا ماله داعي ..


محمد " والله مب منك يا فارس .. تتهرب ادري .. الله يعينك والله " ..


ساره كانت متصله تطمن على محمد ..


محمد: مرحبا ..


ساره: هلا فديتك .. انت وين ؟


محمد: برا ..


ساره: متى بترجع ؟


محمد: ليش في شي ؟


ساره: تعبانه شوي ..


محمد توتر: زين الحين جاي البيت ..


ساره: حبيبي .. لو مشغول عادي خذ راحتك ..


محمد: لا الحين بجي البيت .. انتي ارتاحي ولا تتحركين ..


ساره: زين ..


سكر محمد من ساره والتفت على فارس اللي كان في عالم ثاني ..


محمد: فروس روح بيتنا ..


فارس عقد حواجبه: بيتكم ؟


محمد: اي زوجتي تعبانه وابي اخذها المستشفى ..


فارس: ان شاءالله ..


فارس حول مساره الى بيت عمه .. وصلوا بيت بومحمد وكانت الريم وامها فالحوش .. سلطان و جاسم واحمد كانوا يلعبون بالسياكل حولهم .. الريم اولم ا شافت سيارة فارس كتمت انفاسها .. تمت تناظر سيارة فارس بحزن .. ماقدرت تحبس دموعها اكثر .. قامت من عند امها وراحت داخل البيت بسرعه .. فارس انتبه لها .. بس ما اهتم .. نزلوا الشباب .. فارس سلم على مرت عمه وقعد معاها شوي ..


فارس: السلام عليكم ..


ام محمد مبتسمه: عليكم السلام ..


فارس: شحالج مرت عمي ؟


ام محمد: يسرك الحال يبه .. اعلومك انت ؟


فارس: الحمدلله ..


ام فارس: فارس يبه شو فيك ؟


فارس باستغراب: مافيني شي ..


ام فارس: من مزعلك ؟


فارس اصطنع الابتسامه: محد مزعلني .. ليش تقولين هالكلام ؟


ام محمد: يبه ويهك مصفر .. وفي عيونك كلام ..


فارس بلع ريقه: تعبان هاليومين من كثر الشغل ..


ام محمد: يعطيك العافيه ..


مريم لما شافت اخوها راحت عنده وسلمت عليه ..


فارس مبتسم: هلا وغلا ..


مريم: شو اخبارك فارس .؟


فارس: الحمدلله .. اعلومج انتي ..


مريم مبتسمه: الحمدلله ..


فارس: اخبار النسيب ؟


مريم: طيب ..


فارس: زين انا استأذن .. تامروني على شي ؟


ام محمد: تو الناس يبه .. ما قعدت ..


فارس: عندي شغل ..


ام محمد: الله يوفقك يبه .. بس لا تقطعنا ..


فارس: الله يسلمج الغاليه .. من عيوني ..


فارس سلم عليهم وراح صوب السياره .. مريم لحقته .. ركبت معاه جدام وتمت تسولف معاه ..


مريم: شو صار على موضوعك ؟


فارس ابتسم بحزن: اي موضوع ؟


مريم: زواجك ؟


فارس: للحين ما صار شي ..


مريم: كلمت امي ؟


فارس: ويا ليتني ما كلمتها ..


مريم بصدمه: ليش ؟


فارس: امج هاذي مادري شلون تفكر ..


مريم عقدت حواجبها: ليش يا فارس .. شو صاير ؟


فارس: امج وايد شايفه نفسها على الناس .. وعلى شو ..


مريم: امي شايفه نفسها ؟!!


فارس: اي شايفها نفسها .. على قولتها البنت مو من ثوبنا ..


مريم: امي تقول هالكلام ؟


فارس: هاي ولاشي .. اليوم تذابحت معاها وطلعت من البيت ..


مريم: شو اقولك يا فارس .. امي كاعندها سالفه ترا ..


فارس: مادري شو اللي تبي توصل له .. يعني لا تتوقع اني اخذ اللي هي تبيها ..


مريم: زين فارس ..


فارس: هلا ..


مريم: باتصل حق خالد وبقوله اني بطلع معاك .. وبتصل في فطيم وبنمر عليها .. حالتك صعبه .. ولازم نتكلم في موضوعك ونحاول نقنع امي ..


فارس تنهد: زين فديتج ..


مريم اتصلت بخالد واستأذنت منه .. راحت تلبس واتصلت بفاطمه عشان يمرون عليها ..


مريم: فطيم شو تسوين ؟


فاطمه: قاعده ارتب ملابسي ..


مريم: اجهزي بنمر عليج انا وفارس ..


فاطمه بخوف: شو فيه فارس ؟


مريم: ابوي ما قالج شي ؟


فاطمه: لا ما قالي .. مريوم خوفتيني شو فيه فارس ؟


مريم: فارس متهاوش مع امي عشان موضوع الزواج ..


فاطمه بصدمه: والله ..


مريم: اي الحين فارس ينتظرني تحت .. يلا جهزي بنمر عليج ..


فاطمه: زين زين ..


سكرت من مريم وبسرعه لبست .. كانت تفكر في فارس .. وهي طالعه من غرفتها شافت عبدالعزيز ..


عبدالعزيز: هلا اختي ..


فاطمه: هلا فديتك ..


عبدالعزيز: على وين ؟


فاطمه: بيمر علي فارس وبنطلع شوي ..


عبدالعزيز: اها ..


فاطمه: انت وين بتروح ؟


عبدالعزيز: ولا مكان .. بيمرني النسيب فالميلس ..


فاطمه: اي قالي ..


عبدالعزيز: طلع مشخاله .. ما يخلي شي ..


فاطمه: لازم يا حبيبي ..


عبدالعزيز: ههههههه .. يصبر علي .. اوريج فيه ..


فاطمه: لو سمحت .. حدك عن ريلي ..


عبدالعزيز: خفي علينا ..


فاطمه وعبدالعزيز: ههههههههه ..


عبدالعزيز راح الميلس والشباب كلهم كانوا متجمعين .. فاطمه كانت تنتظر فارس ومريم ..
في بيت بومحمد .. محمد وساره كانوا فالغرفه وساره كانت تتألم ..


محمد بخوف: سمالله عليج فديتج ..


ساره: محمد مافيني شي حبيبي ..


محمد: وين مافيج شي .. شوفي ويهج صاير اصفر ..


ساره: عادي حبيبي .. الالم يجي ويروح ..


محمد: قومي بوديج المستشفى ..


ساره بألم: لا مو مشكله .. بروح بكره احسن ..


محمد: الله يهديج قومي . التعب باين عليج ..


ساره غمضت عيونها بقوه و حطت يدها على حلجها .. محمد حضنها وعيونه غرقت .. ساره حست بالامان في حضن محمد.. صاحت من الالم ودموعها بللت صدر محمد ..


ساره: محمد يعور ..


محمد يمسح دموعها: سمالله عليج .. قومي لبسي وبروح انادي امي ..


ساره: بسرعه الله يخليك ..


محمد خاف على ساره وبسرعه راح عند امه .. دخل عليها الغرفه والخوف باين فعيونه ..


محمد: يمه لحقي ..


ام محمد بخوف: شو صاير يبه؟


محمد: ساره تعبانه يمه .. بطنها يعورها ..


ام محمد طلعت من الغرفه من سمعت كلام محمد .. دخلت الغرفه على ساره اللي كانت طايحه على الكرسي و تتألم ..


ام محمد: ساره شو فيج يمه ؟


ساره: عمتي بطني يعورني .. ماقدر اتحمل الالم اكثر ..


ام محمد: يلا قومي يمه .. على مهلج ..


ساره تصيح: آآآي ماقدر اتحرك .. محمد الحق علي ..


محمد دخل الغرفه وشل ساره ونزل فيها .. شافهم علي وكان منصدم من شكل ساره ..


علي: شو فيكم ؟


محمد: شغل سيارتك بسرعه ..


علي: ان شاءالله ..


ركض قبلهم وراح عند سيارته .. ام محمد ركبت جدام ومحمد حاط ساره بحظنه ويهديها .. وصلوا المستشفى ودخلوا ساره على الدكتور .. تموا ينتظرونها والتوتر والقلق باين عليهم .. محمد اتصل بابوه وبلغه انهم فالمستشفى .. بومحمد راح لهم المستشفى .. ساره كانت حالته صعبه .. تموا فتره ينتظرون .. طلعت لهم الدكتوره .. وكلهم تجمعوا حولها ..


الدكتوره: من زوجها ؟


محمد: انا ..


الدكتوره: تفضل معاي ..


محمد طالع ابوه: ان شاءالله ..


راح ورا الدكتوره ..
الدكتوره: اخوي زوجتك صادتها مضاعفات .. مما ادى الى اجهاض الجنين ..

محمد: شو ؟ اجهاض الجنين ؟

الدكتوره: اي ..

محمد: شو سبب هالمضاعفات ؟

الدكتوره: لها عدة اسباب .. مثلا ممكن انها طاحت او ضربها شي .. او شلت شي ثقيل .. او الحاله النفسيه ..

محمد " الحاله النفسيه .. يالله .. ليكون ساره كانت حاسه بكل شي " ..

محمد: زين دكتوره شو ممكن سبب اجهاضها من احد الاسباب اللي قلتي عنها ؟

الدكتوره: الاغلب الحاله النفسيه .. لان ما لاحظت عليها اي تعب جسماني او رضوض ..

محمد غمض عيونه ومسح شعره بيده ..

الدكتوره: الله يعوضك ان شاءالله ..

محمد: جزاج الله خير .. زين زوجتي شو اخبارها ؟

الدكتوره: والله تألمت وايد وتعبت المسكينه .. بس الحين احسن الحمدلله ..

محمد: اقدر اشوفها ؟

الدكتوره: هي الحين مخدره .. حتى لو دخلت ما راح تحس فيك ..

محمد: بس ابي اشوفها ..

الدكتوره: زين بس تدخل بروحك ..

محمد: ان شاءالله ..

مشى محمد ورا الدكتوره .. وهو قلق ويفكر في ساره .. دخل عليها الغرفه وشافها نايمه بهدوء ..

محمد "فديتج يا ساره .. والله قسيت عليج .. وانا متأكد ان نفسيتج هي سبب الاجهاض .. يا رب سامحني على اللي سويته .. يا رب سامحني " ..

قرب منها ومسك يدها .. تم يتأمل ملامح ويها اللي بان عليها التعب .. ضغط على يدها وباسها على جبهتها .. تم واقف فتره ويحاور نفسه ..

محمد " اتمنى تسامحيني يا ساره .. انا السبب .. انا السبب .. بعنادي وعنادج قتلنا طفل بريء ماله ذنب .. طفل بريء ما شاف النور .. طفل مات واحنا السبب .. لا مو انتي اللي قلتيه .. انا اللي قتلته .. انا السبب .. يارب سامحني .. يا رب ساره تسامحني .. اوعدج يا ساره اني ما اعاند .. اوعدج اصونج واكون لج انتي " ..

خذ نفس عميق والقى نظره اخيره على ساره .. طلع من الغرفه وراح عند اهله ..

ام محمد: ها محمد يبه بشرنا عن مرتك ؟

محمد بلع ريقه بصعوبه وتم يطالع امه بحزن ..

ام محمد: شو فيك يبه ؟ شو فيها ساره ؟

محمد: فقدت الجنين ..

بومحمد: الحمدلله على سلامتها .. معوض يبه .. اهم شي سلامتها ..

ام محمد: قول الحمدلله يا محمد ..

محمد منزل راسه: الحمدلله على كل حال ..

ام محمد حضنت ولدها وتمت تهديه .. علي كان يطالع اخوه بحزن .. بومحمد مسك علي من كتفه وكلمه ..

بومحمد: يبه اخذ امك وروحوا البيت ..

علي: ان شاءالله يبه ..

راح علي صوب امه ..

علي: يمه يلا نروح البيت ..

ام محمد: انتوا روحوا وانا بتم انتظر ساره لين تقعد من البنج ..

محمد: لا يمه روحوا انتوا .. وانا بتم معاها ..

بومحمد: عدل كلامه يا ام محمد ..

محمد: روحي ارتاحي يمه ..

ام محمد: فديتك يا محمد .. الله يصبرها .. حط بالك عليها ..

محمد: ان شاءالله ..

تم محمد فالمستشفى جنب ساره .. فارس و مريم مروا على فاطمه .. اول ما دخلوا الحوش كانت ام فارس قاعده تسقي الزرع .. التفتت على سيارة فارس .. فارس اول ما شافها حرك وطلع من الحوش .. ام فارس عصبت ودخلت داخل .. مريم التفت على فارس ..

.....................
يتبع

[رامون]

مريم: فارس ليش سويت جي؟

فارس تنهد: اتصلي بفطيم يلا ..

مريم: ان شاءالله ..

فاطمه طلعت الحوش ومالقت السياره .. اتصلت بمريم ..

فاطمه: وينكم ؟

مريم: احنا عند باب الحوش .. تعالي برا ..

فاطمه باستغراب: ليش برا ؟

مريم: تعالي وبعدين بتعرفين ..

فاطمه: زين ..

طلعت فاطمه وركبت السياره .. حرك فارس من فريجهم بسرعه ..

فاطمه: شوي شوي فارس .. شعليه مستعيل ..

فارس طالعها من المرايه مبتسم .. وغمز لها .. فاطمه ابتسمت له بدلع وصدت ..

مريم: وين بنروح ؟

فارس: بنروح كوفي شوب قريب ..

فاطمه: حلو .. فخاطري كابتشينو من كم يوم ..

فارس يطالعها من المرايه: حاضرين ..

فاطمه مبتسمه: شو فيك علي اليوم ؟

فارس ضحك: ههههههه .. مافيني شي ..
فاطمه: مممممم ..
كملوا دربهم للكوفي شوب .. نزلوا وخذوا لهم طاوله .. فارس طلب له عصير ليمون بالنعناع .. فاطمه طلبت لها كابتشينو .. اما مريم طلبت لها كوكتيل ..
مريم: فارس شو صار بينك وبين امي ؟
فارس يشرب عصير: امي تقول البنت مو من ثوبها .
فاطمه: حدد يا فارس ..
فارس: هي تقول البنت مو من ثوبها .. انا اشوف البنت من ثوبي .. امي كيفها .. لها وجهة نظر ومجبور احترمها ..
مريم: فارس الله يخليك قول لنا شو صار بالضبط ؟
فارس قال لخواتها الموقف اللي صار بينه وبين امه ..
فاطمه بصدمه: امي ليش جي ؟ اول مره اعرف ان امي مترفعه على الناس لا وبهالطريقه ..
فارس: انا مصدوم اكثر منج ..
مريم: زين شو فيها لو خذت وحده فقيره ..
فارس: هالكلام قوليه حق امج الفاهمه العاقله .. اللي ربت بنات وطلعتهم حريم .. وربت صبيان طلعتهم ريايل ..
فاطمه: زين فارس .. انت تعرف البنت ؟
فارس: لا ماعرفها ..
مريم: عيل ليش مصر عليها ؟
فارس: البنت عجبتني ومرتاح لها .. بس حركة امي خلتني اتمسك فيها واعاند ..
فاطمه: فارس طالع بعيوني وقولي انت تعرفها ؟
فارس طالع فاطمه: لا ماعرفها ..
فاطمه" كذاب يا فارس": زين ابوي ما كلمها ؟
فارس: ابوي موقفه غريب شوي
مريم: شلون ؟
فارس: حسيته مو مستقر على راي .. يعني احيانا احسه موافق على كلام امي .. واحيانا احسه موافق على كلامي .. غريب ابوي ..
فاطمه: زين ابوي يقدر ينقنع امي ..
مريم: ماعتقد .. ترا امي عندها اسلوب تخلي الواحد يغير رايه في ثواني ..
فارس: عدل كلام مرايم ..
فارس: والله محتار .. بس البنت ابيها ..
فاطمه: فارس اصرارك عليها غريب ..
فارس: قلت لج .. كلام امي هو سبب اصراري ..
فاطمه: بس يا فارس ليش تعاند ؟
مريم: كبر عقلك ..
فارس: انا هالبنت ابيها .. وغيرها ما راح اخذ ..
فاطمه: فارس .. بصراحه تشكك الواحد بهالكلام ..
فارس: ولو اعرف البنت .. شو بيصير فالدنيا ..
مريم: فارس .. بس هاي مو من عاداتنا ..
فاطمه: اي عادات يا مريم .. الحب عمره ما كان حرام .. دامه في حدود ..
فارس مبتسم: عدل كلامج ..
مريم: شلون .. فسري لي كلامج ..
فاطمه: كلامي واضح ومايبيله تفسير ..


مريم: مادري بأي منطق انتي تتكلمين ..


فاطمه: مجتمعنا وعاداتنا وتقاليدنا حرمت علينا نعمه من نعم الرحمن .. الحب عمره ما كان حرام ..


مريم تقاطعها: حبي امج .. ابوج .. اخوج .. اختج .. زوجج .. بس مو تحبين غريب ..


فاطمه: القلب لي نبض بالحب ماتقدرين تقتلين نبضاته .. دام علاقة الحب بدت بنيه صافيه صدقيني فيها خير .. ودام هالعلاقه ضمن حدود الدين صدقيني انها تدوم ..


مريم: مادري من وين تجيبين هالكلام .. وين قاعدين احنا ..


فارس: خواتي حبيباتي .. الحين هاي مو موضوعنا ..


مريم: صح .. السموحه منك اخوي ..


فاطمه: طلعنا عن موضوعنا الاساسي ..


فارس: المهم .. شوفوا انا كلمتي ما راح تنزل الارض .. البنت ما عليها كلام .. وامي تعرف هالشي .. بس عشانها فقيره .. وهالشي مو هامني ..


فاطمه: بس يا فارس .. انت بتخسر الكل عشانها ؟


فارس: انا لو ما خذتها .. انتوا اللي بتخسروني ..


مريم: استهدي بالله يا فارس .. فكر عدل قبل ما تتخذ اي قرار ..


فارس: انا مفكر فالموضوع صح ..


فاطمه: شوف انا بقعد مع امي وباخذ اللي بخاطرها ..


مريم: يبيلها قعده الوالده ..


فارس: انتوا كلموها شوفوها شو بتقول .. وردوا علي ..


فاطمه: حاضرين لك الشيخ ..


فارس: هههههه .. فديتكم والله ..

تموا الخوات مع فارس يسولفون في الموضوع .. طلعوا من الكوفي شوب وفارس حس ان نفسيته احسن عن الصبح .. نزل خواته بيتهم .. مريم بيمر عليها خالد بيت ابوها .. اما فارس المجروح رجع شقته اللي المفروض بتجمعه مع مناف .. اول ما دخل الشقه سمع الجوال يرن .. كانت مناف المتصله .. رد عليها والحزين باين على صوته ..
...................
يتبع

[رامون]

مناف: هلا حبيبي ..

فارس: قلبه انتي ..

مناف: وينك من العصر وانا اتصل لك وماترد ..

فارس: نسيت التلفون فالبيت ..

مناف: ممممم .. فارس شو فيه صوتك ؟

فارس: احم .. مافيه شي ..

مناف: صوتك حزين ..

فارس يغير الموضوع: شو تسوين حياتي ؟

مناف ببرأه: نمت شوي .. مادري شفيني مكسله اليوم ..

فارس: فديت المكسله والله ..

مناف انحرجت وسكتت ..

فارس: يا قلبه ..

مناف: قول حبيبي ..

فارس غمض عيونه: احبج ..

مناف تنهدت: وانا اموت فيك ..

فارس: اليوم انا و ولد عمي رحنا الشقه ..

مناف بوناسه: والله ..

فارس: اي .. كل الشقه اثثناها .. الا غرفتنا ..

مناف: احم ..

فارس: اي احم .. ههههههه .. غرفتنا اللي انتي بتأثثينها ..

مناف " آه فديت قلبك يا فارس .. الله لا يحرمني منك "

فارس: زين حياتي انا بخليج الحين ابي اريح شوي ..

مناف: حبيبي فيك شي ؟

فارس: مافيني شي حبيبتي ..

مناف: والله انا مو مقتنعه .. احسك زعلان .. الا متأكده انك زعلان ..

فارس: لا مب زعلان .. بس مكسل مثلج

مناف وفارس: هههههههه ..

فارس خنقته العبره على مناف وكلامها .. صرفها بسرعه وراح خذ له شور .. مناف كانت تفكر في فارس وحزنت عليه ..

مناف " شفيه حبيبي زعلان .. من مزعله .. ماحب اشوفه زعلان .. فديت روحه وقلبه وكل شي فيه " ..

طلع فارس من الحمام لاف الفوطه على خصره .. صدره مبلل .. مسك الجوال وتم يناظر الشاشه بحزن .. قطرات الماي انسابت من جبهته وتناثرت على الجوال .. رجع براسه على ورا وغمض عيونه .. رن جواله ومحمد كان المتصل .. رد فارس باستغراب ..

فارس: هلا ..

محمد بحزن: فارس زوجتي سقطت ..

فارس: شو!

محمد: مات الياهل .. مات ..

فارس: لا حول ولا قوة الا بالله .. زوجتك شو اخبارها ؟

محمد: وايد تعبت .. الحين هي تحت تأثير البنج ..

فارس: زين شو سبب تعبها ؟

محمد: الدكتوره تقول انها اجهضت بسبب الحاله النفسيه ..

فارس: انا نصحتك يا محمد ..

محمد: والله متحسف .. يا ليتني ما سويت اللي سويته ..

فارس: هالكلام ما منه فايده الحين .. اللي عليك تسويه .. انك تراعيها وتهدي يا محمد .. لا تشد ..

محمد: آآه والله متحسف وكاسره خاطره المسكينه ..

فارس: الله يشفيها ان شاءالله ..

محمد: انت وين ؟

فارس: فالشقه ..

محمد: من متى فالشقه ؟

فارس: من شوي .. كنت مع خواتي ..

محمد: اي ي ي ..

فارس: كلمتني من شوي ..

محمد: والله !

فارس: حمود حاسه بحزني وهمي ..

محمد: ايه عليك يا فروس ..

فارس: والله سكر منها مجبور .. كسرت خاطري وهي تسألني وانا اتهرب ..

محمد: تحمل تبين لها شي ..

فارس: ان شاءالله ..

محمد: زين تقدر تمرني المستشفى ؟

فارس: من عيوني افا عليك ..

محمد: جزاك الله خير ..

فارس: زين اجيب لك شي معاي ؟ تبي عصير ولا تاكل شي ؟

محمد: جيب لي عصير ليمون بارد ..

فارس: ان شاءالله .. يلا سلام ..

محمد: الله وياك ..

سكر فارس من محمد .. لبس بنطلون بيج وتيشيرت برتقالي فاتح .. مشط شعره ورجعه على ورا .. تدهن بدهن العود تحت اذنه وعلى رقبته .. خذ جواله ومفتاح السياره ونزل .. مر خذ حق محمد عصير له .. اتجه للمستشفى وهو يفكر في محمد .. راح له عند استراحة الرجال .. قعدوا مع بعض وشربوا العصير .. فارس شاف الخوف بعيون محمد ..
محمد يشرب العصير: خايف عليها يا فارس ..

فارس: بأذن الله ما عليها شر .. بس انت اعتني فيها واهتم ..

محمد: ان شاءالله .. مشكور على العصير ..

فارس: بالعافيه ..

محمد: شو قالوا لك خواتك ؟

فارس: والله قالوا بيكلمون امي مره ثانيه ..

محمد: ان شاءالله يقنعونها ..

فارس: بس تدري اني منصدم من ابوي !

محمد: اي تعال ما قالك شلون عرف ؟

فارس: لا والله .. كل مابي اكلمه ما تصير فرصه ..

محمد: ابوك يحير يا فارس ..

فارس يمسح جبهته: باتصله وبحاول اقعد معاه واعرف منه كل شي ..

محمد: الله المستعان ..

في هالاثناء مريم وفاطمه كانوا في البيت ويتناقشون في موضوع فارس ..


مريم: تحسين ان فارس يكلمها ؟


فاطمه: مادري والله .. بس ليش مو راضي يعترف ؟

مريم: والله شوفي يا فطيم .. يمكن فارس خايف ان البنت اطيح من عيونا لو قالنا انه يحبها ويكلمها ..

فاطمه: والله يمكن .. بس يعني احنا خواته ..

مريم: بس ماعتقد هو بيرضاها لبنت الناس .. انتي شوفي امي شلون رافضه وتكابر .. يعني لو درت ان فارس يعرفها ولو وافقت على الزواج مب بعيده عنها على اقل غلطه تغلطها البنت تعايرها امي ..

فاطمه: الله يهديها امي .. مادري شلون تفكر ..

مريم: مسكين فارس ..

فاطمه: شفتي الحزن بعيونه ..

مريم: الحين شكله احسن .. اول ما ركبت معاه لما جانا البيت .. كان ويهه مصفر وحزين .. الحين احسن يمكن لانه فضفض لنا باللي في خاطره ..

فاطمه: الله يعينه والله ..

مريم: آمين ..

فاطمه: امشي نروح نكلم امي نشوف شو اللي بخاطرها ..

مريم: يلا ..

راحوا فوق ودخلوا على امهم اللي كانت مندمجه مع التلفزيون .. التفتت عليهم مبتسمه ..

ام فارس: هلا يمه .. تعالوا

فاطمه: شو تسوين ماما ؟

ام فارس: والله مع هالتلفزيون البايخ .. مافيه شي بعد ..

مريم: ههههه ..

ام فارس: مريم يمه اخبارج مع خالد ؟ عساج مرتاحه ؟

مريم مبتسمه: الحمدلله مرتاحه .. خالد حاطني بعيونه ..

ام فارس: الله يوفقج يمه .. وانتي يا فطيم .. اخبارج مع يوسف ؟

فاطمه تضايقت من سؤال امها عنها وعن يوسف .. لانها تذكرت كلام امها عن يوسف ..

فاطمه تجامل: الحمدلله .. مو مخلي علي قاصر ..

ام فارس: الله يوفقكم يا بناتي ..

فاطمه ومريم طالعوا بعض وكل وحده تنتظر الثانيه تفتح الموضوع .. فاطمه تجرأت وتكلمت ..

فاطمه: مممممم .. ماما ..

ام فارس وهي مندمجه مع التلفزيون: ها يمه ..

فاطمه: شو سالفة فارس ؟

ام فارس التفتت عليها: شو سالفته هاذي بعد!

مريم تمت اطالع امها باستغراب .. فاطمه بلعة ريقها بصعوبه وتكلمت ..

فاطمه: انتي ليش رافضه البنت ؟

ام فارس: قلنا البنت مو من ثوبنا .. خلاص وهالعرس ما راح يتم ..

مريم: حرام ماما..

ام فارس بعصبيه: شو اللي حرام .. احنا وين هالبنت اللي قاصه على اخوكم وين ..

فاطمه: فارس ما يعرفها ..

ام فارس: حتى لو ما يعرفها .. بعد ما ياخذها ..

فاطمه: ماما اسمحيلي اقولج ان كلامج مو مقنع !

مريم: يعني هي مسألة عناد ؟

ام فارس عصبت: والله خوش يا بنات محمد .. تعالوا قرروا عني بعد .. ولا روحوا اخطبوها لاخوكم ..

فاطمه: محشومه ماما .. بس كلامج يعني

ام فارس تقاطعها: شو فيه كلامي .. مو عاجبكم .. لايعجبكم كلمتي وحده وماتنزل الارض .. وكانكم جاين تتوسطون حق اللي ما يستحي على ويهه .. ولا هو مطرشكم عشان تقنعوني .. قولوا له امي مب راضيه ولا يحلم انه بياخذها .. وبشوف انا ولا هالتعبانه اللي مادري وين لافي عليها ..

فاطمه: الله يهديج يا ماما .. صلي على النبي ..

ام فارس تنافخ: عليه الصلاة والسلام ..

فاطمه: فارس لا طرشنا ولاشي .. لا تكسرين بخاطره واللي يسلمج ..

ام فارس بعصبيه: انا من شوي شو اقول .. انتوا ما تفهمون ..

مريم: لا حول ولا قوة الا بالله .. الله يهدي الجميع ..

ام فارس: آمين .. يلا انتي وياها عورتوا راسي ..

مريم سحبت اختها وطلعوا من الغرفه .. فاطمه كانت وايد حزينه على حال امها .. تمت تصيح ..

فاطمه تمسح دموعها: مسكينه امي ..

مريم: ليش ؟

فاطمه: ليش ورتنا ويها الثاني ..

مريم: الله يهديها ان شاءالله ..

فاطمه: انتي سمعتي كلامها .. يغث بصراحه ..

مريم: اي والله يغث ..

رن جوال مريم وخالد كان متصل لها ..

خالد: هلا حبيبتي ..

مريم: هلا والله ..

خالد: جاهزه فديتج ؟

مريم: اي .. انت وين ؟

خالد: قريب بيت ابوج ..

مريم: عيل خل اقوم البس .. انتظرك فديتك ..

خالد: ان شاءالله ..

مريم: الله يحفظك حبيبي ..

سكرت من خالد والتفت على فاطمه الحزينه ..

مريم: فطيم هونيها وتهون ..

فاطمه: الشكوى لله .. ممممم بتروحين ؟

مريم: بمر المستشفى على ساره ..

فاطمه: المسكينه .. الله يكون في عونها ..

مريم: ما وصيج يا فطيم .. امي ترا زعلانه لا يغرج انها تكابر ومعصبه علينا .. بس انا خايفه عليها .. الله يخليج مري عليها وقعدي معاها .. حاولي تلطفين الجو .. لا تزيدينها الله يخليج ..

فاطمه: ان شاءالله ..

مريم: ولا تقولين لفارس شي ..

فاطمه: مستحيل .. بتقوم حرب بين ماما وفارس لو سمع هالكلام ..

مريم: الله يستر منهم والله .. انا كلش مو مطمنه حق هالموضوع ..

فاطمه: مادري شلون بينتهي ولا من بينهيه ..؟

مريم: الله كريم ..

..............
يتبع

[رامون]

فاطمه مبتسمه: هلا والله ..
خالد: حيالله فطيم .. وينج ما تبينين يالعروس ..
فاطمه: موجوده ..
مريم: خذ قلبها الريل ..
الكل: هههههه ..
خالد خذ الشنطه من يد مريم وراحوا ثلاثتهم فوق .. وهم صاعدين الدري شافوا بوفارس طالع من غرفة مريم .. التفت عليهم بخوف ..
بوفارس: عسى ماشر ؟
خالد: ماشر عمي .. بس مو مرتاحين هناك ..
بوفارس: لاحول ولا قوة الا بالله ..
مريم: ما علينا شر يبه ..
بوفارس: باذن الله ..
مريم وخالد دخلوا غرفة مريم .. خالد حذف الشنطه على الارض ةقرب من مريم ..
خالد: والله مو بيدي اللي يصير لنا ..
مريم تتصنع الابتسامه: الله يبعد عنا الشر .. قول ان شاءالله ..
خالد: ان شاءالله ..
تموا ساكتين فتره وشابكين اياديهم ببعض ..
خالد: حبيبتي ..
مريم: هلا ..
خالد: شو رايج نطلع بيت بروحنا ولا شقه ؟
مريم بهدوء: مادري فديتك ..
خالد: شو فيج حياتي ؟
مريم كانت منزله راسها .. ضغطت على يد خالد وارتمت باحضانه .. دموعها سبحت على خدودها الناعمات .. خالد غمض عيونه وحضنها بقوه ..
مريم: خالد ..
خالد بحنان: عيونه انتي ..
مريم: خايفه .. والله خايفه ..
خالد: دام انا جنبج لاتخافين .. وبأذن الله بكون جنبج ..
مريم وسط دموعها: لا تتركني يا خالد .. انت كل شي بحياتي ..
خالد: لا تقولين هالكلام يا قلبي انتي .. انا مكافح وصابر عشانج انتي .. وبأذن الله ماعلينا شر ..
مريم: آآه ياخالد ..
خالد بغصه: سلامتج من الآآآآه يا قلبي .. ياعله فيني ولا فيج ..
خالد تم حاضن مريم ويهديها .. مسح على راسها وباسها على جبهتها .. مريم غمضت عيونها ونامت بحضن خالد وهي حاسه بالامان والحنان ..
فاطمه راحت غرفتها .. بوفارس دخل ورا فاطمه غرفتها ..
بوفارس: فطيم يبه ..
فاطمه مبتسمه: هلا يبه ..
بوفارس: اخوج شو اخباره ؟
فاطمه نزلت راسها: حالته ماتسر العدو .. بابا ليش امي جي ؟
بوفارس: الله يهديها ..
فاطمه: بابا انت تقدر تقنعها ..
بوفارس: حاولت معاها .. بس مافي فايده ..
فاطمه: مايصير جي ..
بوفارس: خليها على ربج ..
فاطمه: حرام عليكم .. فارس منهار .. وصدقني لو فارس ماخذها بيتغير على الكل .. وانتوا او بالاحرى ماما اللي بتخسر ولدها .. فارس اكبر عيالها .. فارس حبيب قلبها .. فارس اللي تشد فيه الظهر ..
بوفارس يسمع كلام فاطمه وكان يحسه مثل سكين تطعنه في صدره ..
بوفارس: يا فطيم .. امج راسها يابس وعنيده ..
فاطمه: وفارس بعد راسه يابس وعنيد ..
بوفارس تنهد: آآه .. ادري ..
فاطمه: بابا انت لازم يكون لك موقف ..
بوفارس رفع راسه: يا بنتي حاولت .. امج راكبه راسها .. وحركة اخوج لما طلع من الحوش خلت امج تعاند زود وتحلف انه لو خذها بتطلع من البيت ولا لها رجعه ..
فاطمه بصدمه: هاااا .. ليش ماما جي ..
بوفارس: الله يهديها .. تمت تصيح وتتوعد ..
فاطمه: لا هاي مب امي اللي ربتني .. هاي وحده ثانيه ..
بوفارس: الله يهديها ..
فاطمه: ارجوك كلمها بابا .. فارس بيضيع من ايدينا كلنا .. فارس مايبي الا هالبنت ..
فاطمه قعدت على سريرها وتمت تصيح ..
بوفارس: ادري ..
بوفارس قرب من بنته اللي تمت تصيح بحزن ..
بوفارس: ابوي انتي .. لاتصيحين دموعج غاليه ..
فاطمه: ليش ماما جي .. حرام اللي تسويه في فارس واللي تسويه بنفسها .. ليش تنفر الناس منها .. وخير يعني البنت مو من ثوبنا .. شو فيها لو انها فقيره ..
بوفارس: معليه حبيبتي .. قومي غسلي ويهج ..
فاطمه: بابا موقفك غريب .. ليش ساكت .. سكوتك غريب و وراه شي ..
بوفارس طالع بنته: قومي غسلي ويهج يبه ..
فاطمه: ان شاءالله ..
غسلت ويها ورجعت عند ابوها .. قعدت معاه وحضنته .. تم يواسيها ويهديها .. فاطمه حست بالنعاس .. قامت وانسدحت على السرير .. غطاها بوفارس وباسها على خدها .. طلع عنها ونزل تحت .. مر المطبخ وسوا له شاي خذ الكوب وطلع فالحوش .. تم يفكر في فارس ..
بوفارس " لو مادري ان هالزواج مستحيل كان اصريت على ام فارس .. مزنه راكبه راسها وفارس راكب راسه .. الله يستر من الحرب اللي بتصير بينهم .. فارس ناوي نيه على امه .. وانا متأكد انه ماراح ياخذها .. لانه مايدري من تكون ام مناف .. استغفر الله العظيم " ..
بوفارس نزل راسه بحزن وهو يفكر في ولده .. تم قاعد لين اذن الفجر .. قام يقعد عياله للصلاه .. مر على عبدالعزيز تم يناظر عبدالعزيز اللي كاسر خاطره من سالفته لما ردته صديقة مريم اخته .. قرب منه وقعده من النوم
بوفارس: عزيز .. عزيز يبه قوم صلاه ..
عبدالعزيز بتعب: هممممم ..
بوفارس: قوم صلاه يا ولد ..
عبدالعزيز بطل عيونه بكسل: ان شاءالله ..
قعد على السرير وبوفارس كان يطالعه بحزن ..
بوفارس: يلا يبه قوم ..
عبدالعزيز يتمدد: يلا قمت ..
طلع بوفارس وعبدالعزيز قام يتوضأ .. بوفارس راح غرفة جاسم وقعده .. مر على غرفة مريم وطق الباب ..
بوفارس: صلاه صلاه ..
خالد كان قاعد قبل ما يمر بوفارس ويطق عليهم الباب .. المسكين ماكان قادر ينام من خوفه على مريم .. قام من السرير وفتح الباب ..
خالد: قاعد يا عمي ..
بوفارس: بارك الله فيك .. يلا يبه احنا نازلين ..
خالد: ان شاءالله .. الحين بلحقكم ..
بوفارس نزل ولحقه عبدالعزيز و وراهم الجسمي .. نزل لهم خالد وراحوا جماعه المسيد .. فاطمه قامت عشان تقعد خواتها للصلاه .. رجعوا الشباب من المسيد وكلن راح غرفته يكمل نومه .. الا بوفارس اللي ما جاه النوم من التفكير ..
بوفارس " ياربي شو اللي قاعد يصير لنا .. فارس والله يستر منه .. عبدالعزيز فديته مجروح .. جاسم والله يعلم بمصيره .. تطبع بطبايع امه .. يعني انا ماعرفت اربي .. انا مالي كلمه على حد .. مزنه هي الآمر والناهي فهالبيت وانا شو بالنسبه لهم .. هم يسون لي حساب بس كلمة مزنه هي اللي تمشي .. فارس ماراح ياخذ مناف طبعا .. عبدالعزيز لازم ازوجه بنت تستاهله ويستاهلها .. جاسم وايمان لازم اضبطهم .. وخصوصا ايمان اللي كل يوم اشوفها تصير مثل امها .. يا رب ساعدني اقوي اساس هالبيت .. يارب اكون قدها يارب " .. الساعه 5 ونص بوفارس راح الغرفه وحذف نفسه على الكرسي ونام ..
..............
ان شاء الله يعجبكم الجزء