هنادي وسلمان وريما متجمعين في بيت الجوهره ..
سلمان: ها جوجو شخبارج مع الحمل ؟
الجوهره مبتسمه: الحمدلله ..
هنادي: ينمو الجنين ؟
ريما: باب شنو يعني ينمو ؟
سلمان التفت عليها: ينمو يعني يكبر في بطنها ..
ريما بأستغراب: يعني بيكبر ويمشي في بطن عميمه جوجو ؟
كلهم طالعوا بعض وماتوا من الضحك على كلام ريما ..
ريما ببرأه: ليش تضحكون ؟
سلمان قرب منها: ولا شي بابا .. بس لما نقول ان الياهل ينمو يعني يبتدى يكبر شوي في بطن امه .. وبعدين يطلع من بطن امه بأذن الله ..
ريم: اي .. زين شلون يطلع من بطن امه ؟
هنادي والجوهره طالعوا بعض وحسوا بأحراج .. سلمان نزل راسه وانحرج .. الجوهره مسكت ريما وراحت معاها غرفتها .. قعدت الجوهره جنب ريما وشرحت لها شلون تولد الام ..
الجوهره: حبيبتي ريما .. بكره انتي لما تكبرين بيتغير جسمج .. و بتتزوجين ان شاءالله .. وبتجيبين عيال حلوين مثلج ..
ريما ابتسمت للجوهره وكانت تسمعها بأهتمام ..
الجوهره: الياهل يكون في بطن كل ام .. وحطت يد ريما على بطنها المنتفخ .. اول شي يكون الياهل صغير وايد قد يدج الحلوه .. ولازم الام تتغذى وتاكل عشان يكبر شوي شوي في بطنها .. ولما يستوي بطن الام كبير يبدى الياهل يتحرك عشان يطلع من بطنها ..
ريما كانت مبتسمه وهي تسمع كلام الجوهره ..
ريما: زين متى بيطلع الياهل اللي في بطنج ؟
الجوهره مبتسمه: بعد شهرين ان شاءالله ..
ريما: يعني هو للحين صغير ؟
الجوهره: كبر شوي ..
ريما: زين بتخليني اشله ؟
الجوهره حضنتها: ان شاءالله حياتي ..
مسكت يد ريما ورجعوا الصاله عند سلمان وهنادي .. دخلوا وكانت هنادي مندمجه مع سلمان فالسوالف ..
الجوهره: شتقولون ؟
سلمان: نتكلم عن مدرسة ريما ..
الجوهره: تعال المدارس قربت تفتح والتسجيل خلص ؟
سلمان: اي ادري .. بشوف ادخلها مدرسه خاصه وبحاول معاهم مع اني ادري انهم مشددين ..
الجوهره: على شنو مشددين ؟
سلمان: ان ندخل الطالب بعد وقت التسجيل ..
هنادي: خالي تقدر ادخلها بأستثناء ..
سلمان: والله بشوف .. في مدرسه انجليزيه بس اصحابها من اهل البلد واللي عرفته عن هالمدرسه انها على منهاج اسلامي .. يعني يدرسون الدين كماده اساسيه واللغه العربيه ..
هنادي: زين والله ..
سلمان: واحد شاف اعلانهم فالجريده و قالي عنهم وبتصل لهم استفسر ..
الجوهره: ان شاءالله يستثنونها ..
سلمان: اتمنى والله .. بس المدرسه بعيده عن البيت ..
هنادي: زين السايق موجود يا خالي ..
سلمان: فكرت اخلي باص يمر عليها احسن ..
هنادي: حرام عليك تغثها بالباص من صباح الله خير ..
الجوهره: عدل كلام هنوده ..
سلمان باستغراب: ليش ؟
هنادي: خالي سواق الباق بيغثهم بسواقته ما بيخلي حفره الا بيعدي عليها .. بتوصل المدرسه وهي منتهيه ولايعه جبدها ..
سلمان: هههههه .. عادي زين .. على ايامنا كنا نروح ونجي بالباص ..
الجوهره: ايامكم غير ..
هنادي: زين وصلها وانت طالع الصبح شفيها يعني ..
الجوهره: اي وصلها انت .. ليش تكسل ..
سلمان: حشى منكم .. ما قلت اني مو موصلها .. ول عليكم ..
هنادي والجوهره: هههههههههه ..
ريما: متى بناكل ؟
هنادي: فديت قلبها جوعانه ..
سلمان: الحين بنروح البيت وبنسوي اكل انا وانتي ..
الجوهره: وليش ؟ انا طالبه لكم عشى ..
سلمان: وليش مكلفه على عمرك يبه .؟
هنادي: ولا مكلفه على عمرها ولا شي .. خلها تطلب لنا ..
الجوهره: ههههههه
سلمان: يمه منج انتي .. الواحد ما يتكلم جدامج ..
هنادي: محد قالك تتكلم جدامي .. اذا السالفه فيها اكل يبه انا مافكر عدل ..
الكل: هههههه ..
الجوهره: ريما يلا نروح نجهز ؟
ريما بوناسه: يلا عميمه ..
هنادي: نطروني انا جايه ..
راحوا البنات يجهزون العشى وسلمان تم بروحه فالصاله .. كان يفكر في فاطمه ..
سلمان " يالله .. ليش جي افكر في فاطمه .. استغفر الله العظيم .. وربي مالي حق افكر فيها .. اعوذ بالله من الشيطان الرجيم .. كل مره اقول مابي افكر فيها ماقدر الا افكر فيها زود واتخيلها .. لاحول ولا قوة الا بالله العلي العظيم " ..
ميل راسه على ورا وتكى على الكرسي .. غمض عيونه وتنفس بعمق ..
سلمان " شلون بعيش وياها بنفس البيت؟ لازم اطلع من البيت .. ماعتقد يوسف بيرضى .. لو درى هو اللي بيطلع من البيت .. ياربي وش الحل ؟ احترت والله احترت " ..
تم سلمان يقلب الافكار في باله .. طلع باكيت الزقايره من جيبه .. ولع له وحده وطلع عند الباب يدخن .. وهو مندمج بالزقاره شاف يوسف داخل الحوش .. خذ له نفس وطلع الدخان من صدره ومشى ناحية يوسف .. سلموا على بعض ..
.....................
يتبع
يوسف: هلا خالي ..
سلمان: هلا والله .. حماتك بتحبك ..
يوسف: ههههههه .. اتصلوا لي البنات من العصر .. وماكنت اقدر امركم بس عشان ماكسر بخاطرهم قلت لهم اتصلوا لي لي جهز عشاكم ..
سلمان: اي حق بطنك بتلغي كل مواعيدك ..
يوسف: ههههه ..
سلمان: بطيني الولد ..
يوسف: من قلب ..
سلمان: عليك بالعافيه ..
يوسف: الله يعافيك ..
سلمان: اخبارك مع تحضيرات الزواج ؟ كل شي تمام ؟
يوسف: اي الحمدلله .. مثل ماتشوف البيت وكل شوي يخلصون فيه شي .. اما تجهيزات الحفل الحمدلله شبه خالصه .. انت والشباب ماقصرتوا والله ..
سلمان: حاضرين لك الغالي .. لو محتاج شي لا تتردد
يوسف: ماتقصر والله ..
تموا يسولفون فالحوش عن تحضيرات العرس وتجهيز البيت .. طلعت لهم ريما ..
ريما: يلا عشى ..
يوسف: اوه ريما العبيطه هني ..
ريما طالعت يوسف بنظره ومسكت يد ابوها ..
يوسف: روح يالنظرات .. ماقدر عليها انا ..
ريما ما علقت على كلام يوسف ..
يوسف: مع هالكشه ..
ريما: احلى منك ..
يوسف: هههههه .. انتي احلى مني .. وووووع من زينج
ريما: احلى منك ..
يوسف: شكثر احلى مني ؟
ريما: وايد ..
يوسف: شكثر وايد هاذي .. يعني قد النمله ؟
ريما تخصرت: لا والله .. وايد يعني قد البيت ..
يوسف يلعوزها: بس قد البيت .. لا يبه عيل انا احلى منج قد النجوم ..
ريما رفعت راسها اطالع فوق .. قرب منها يوسف وحط مفتاح السياره على رقبتها .. ريما تخرت وصرخت ..
ريما: آآآه ..
سلمان: هههههه ..
يوسف: ويوووووو .. يالخوافه ..
ريما حضنت ابوها وصاحت: بابا شوف عمي يوسف ..
سلمان حضنها: ليش تصيحين ؟
ريما: كله يلعوزني ..
سلمان: انتي تلعبين معاه وبعدين تصيحين ..
ريما تمسح دموعها: هو اللي يبدى يلعوزني اول ..
سلمان شلها وباسها: حياتي فديت هالدموع .. لا تصيحين على كل شي .. خلج قويه مثل ابوج ..
ريما دفنت راسها في صدر سلمان: مابي مابي ..
يوسف خذها من سلمان وحضنها بقوه ..
يوسف: شدعوه تزعلين مني ريموووو ..
ريما ابتسمت: انا ريما مب ريموو ..
يوسف وسلمان: ههههههههه ..
يوسف: زين ليش تزعلين ؟
ريما: مازعل .. خلاص انا بصير قويه مثل بابا ..
سلمان مسح على راسها: فديتها اللي بتصير قويه مثل ابوها ..
دخلوا الشباب عند البنات .. هنادي شافت ويه ريما وعيونها الحمر ..
الجوهره: اكيد يوسف ملعوزها ؟
يوسف: اي نعم اكيد ..
هنادي: ليش زين ؟
يوسف: اذا ما صيحها احس ان ناقصني شي ..
سلمان: هههههههه .. صج والله .. ان ما توليت عيالك .. اصبر علي ..
يوسف: شنو ؟ تتولى عيالي ؟ في احلامك ..
الجوهره: ليش ؟
يوسف: عيالي اقوياء .. بس يكملون شهرين بخليهم يشلون حديد .. وبعد سنه بالضبط بجيب عيال الفريج بخلي عيالي يصفقونهم ويتدربون عليهم ..
الكل: ههههههه ..
هنادي: يمه منك شرير ..
يوسف: لازم اعلمهم الشده من نعومة اظافرهم ..
سلمان: حلوه هاذي من نعومة اظافرهم .. ان ما خليت ريما تتولاهم ..
يوسف: في احلامك انت وبنتك ..
سلمان: من تطلع من البيت بطرش ريما فوق تلتهم ..
يوسف: افا عيك .. من اطلع من البيت بنزلهم معاي وفي يدهم خيازرين خل يتولون بنتك ..
سلمان: ههههههه .. عليك سوالف ..
هنادي: زين خل نتناقش في هالامور بعدين .. يلا الاكل بيبرد ..
يوسف: زين زين ..
تعشوا كلهم مع بعض وبعدين كلن توجه لبيته .. يوسف اتصل بفاطمه وهو رايح البيت ..
فاطمه: هلا حبيبي ..
يوسف: حبيبتي انتي ..
فاطمه: شو اخبارك ؟
يوسف: الحمدلله .. شتسوين ؟
فاطمه: كنت مع مريم اختي نحش في خلق الله .. والحين اكلمك ..
يوسف: فديت اللي تكلمني والله ..
فاطمه: حياتي والله .. زين قولي انت شو سويت ؟
يوسف: كنت مع بوسعود خلصنا كم شلغه .. وبعدين رحت عند جوجو اختي مسويه عشى وتجمعنا عندها .. تدرين هاليومين مايقدرون يجونا البيت عشان التعديلات والعمال ..
فاطمه: اها .. شو اخبار ريما بنت خالك ؟
يوسف: هذا هي تشقح وتنطح ..
فاطمه: هههههه ..
يوسف: زين حبيبتي ..
فاطمه: قول حبيبي ..
يوسف: تشوفين اسماء بنت عمج بكره لو فاضيه بجيب لهم ريما السنداره ..
فاطمه: ان شاءالله بتصل لهم بكره اول ماقعد من النوم ..
يوسف: تسلمين لي والله ..
فاطمه: فديت قلبك ..
يوسف: زين حياتي ماطول عليج .. بس حبيت اسمع صوتج قبل ما انام ..
فاطمه مبتسمه: فديت روحك حبيبي .. تحمل بنفسك وانت راجع البيت ..
يوسف: ان شاءالله ..
فاطمه: الله وياك حبيبي ..
يوسف: مع السلامه ..
سكر يوسف من فاطمه وهو مبسوط .. وصل البيت ونام من التعب على طول .. اما فاطمه راحت الصاله وتمت مع مريم وخالد وعبدالعزيز .. كانوا فاقدين فارس الحزين ..
.....................
يتبع
مرت الايام ويبقى الحال على ما هو عليه .. بدت دوامات المدارس والجامعه .. فارس منعزل عن اهله وكل حياته مناف وبس .. عبدالعزيز التهى مع الجامعه و تجهيزات العرس مع يوسف وباقي الشباب يوسف .. فاضل قرر انه يكمل دراسته برا .. اعتذر هالكورس ووسحب اوراقه معد ما جاه القبول .. علي بدى دوامه مع دوام المدارس .. سلطان واحمد وجاسم شروا لهم دراجات وكل يوم والثاني راحوا العزبه .. سلمان دخل ريما المدرسه وارتاح لما قبلوها .. تفرغ للمحل اللي فتحه .. ام فارس تمارس حياتها طبيعيه وتكابر جدام الكل .. بس قلبها محترق على ولدها فارس .. فقدته لان لها فتره ما شافته ولا كلمته .. بوفارس ماقدر اقول عنه شي لان الغموض يحيطه من كل صوب .. شلون عرف عن علاقة فارس بمناف واهلها .. وشو السر اللي مخليه يتأكد ان فارس ما راح ياخذ مناف وشو سر سكوته .. مريم وخالد سافروا ماليزيا وقضوا احلى ايام حياتهم هناك .. خالد حب انه ينسي مريم همومها وهمومه .. في خلال فترة سفرهم وكل محمد وعلي انهم يجهزن له الشقه بعد ما اختار الاثاث هو ومريم .. رجعوا من السفر ونفسيتهم كانت غير .. والحين عايشين في شقتهم الصغيره اللي لامتهم .. محمد وساره حياتهم طبيبه ورجعت نفس قبل .. ساره تغيرت للأحسن ومحمد تغير وايد .. اما الريم المسكينه اللي تغيرت وكان باين عليها .. ما كانت تاكل الا القليل .. ما تقعد مع اهلها وايد انعزلت عن الكل من حزنها بخبر زواج فارس اللي ما صارت فيه اي تطورات .. بومحمد كان قلق عليها ويحاتيها .. بس هي كانت اطمنه وما تبين جدامه شي .. الجوهره ولدت وجابت بنتوته صغيرونه وسمتها لولوه .. ابراهيم فرح بالبنت وحبها وايد .. والحين عمرها كم اسبوع بس ..
قرب يوم فاطمه ويوسف .. ما بقى على العرس الا 15 يوم .. كان الكورس على آخره وفاطمه كانت تقدم آخر امتحان .. تلاقت هي ومناف ومريم ولطيفه فالكفتريا ..
فاطمه: واخيرا خلصت ..
مناف مبتسمه: تستاهلين .. بس زين سويتي هالكورس ماخذتي ساعات وايد ..
مريم: ما عليج منها مسويه حسابها ..
لطيفه: حاسبتها صح ..
فاطمه: يمه من عيونكم ..
الكل: ههههههه ..
مناف: والله اريح لج ..
فاطمه: اي والله .. تدرين ما بقى شي على يوم العرس وابي اتهيء نفسيا قبلها بفتره ..
لطيفه: عدل كلامج ..
مناف: الله يوفقج فديتج ..
فاطمه مبتسمه: وياج حبيبتي .. والفال لج ..
لطيفه ومريم: آآمين ..
مناف ابتسمت لهم وكانت تفكر في فارس ..
مناف " فديتك يا فارس .. ليش طالت السالفه ؟ " ..
مناف شافت ساعتها: اوه تأخرت على المحاضره ..
مريم: اي محاضره ؟
مناف: هالمحاضره الدكتور بيلخص لنا فيها الكتاب حق الامتحان ..
مريم: اها ..
لطيفه: خلج من سوالفهم روحي لحقي على محاضرتج ..
مناف مبتسمه: مع السلامه بنات ..
البنات: الله وياج ..
راحت مناف بسرعه متجهه لقاعة المحاضره .. اول مادخلت انصدمت بالدكتور اللي قاعد ينتظر فالقاعه .. هي افتكرت انها غلطت فالقاعه وطلعت .. راحت صوب القاعه الثانيه وشافت دكتور ثاني يمتحن طالبات .. فتحت جدولها تتأكد واستغربت .. سمت بالرحمن ودخلت القاعه .. كان الدكتور حامد يراقبها وهي داخله .. طبعا من بعد ما رفضته مناف ما تواجهت معاه هالكورس الا اليوم .. كانت القاعه شبه خاليه من البنات .. قعدت على الكرسي اللي بالصف الثالث .. فتحت كتابها وحاولت انها تشغل نفسها فيه .. والدكتور حامد ماشل عينه من عليها .. اكتملت القاعه ودخلوا كل البنات .. تكلم الدكتور ..
حامد: السلام عليكم .. طبعا مستغربين وجودي .. بس لان دكتور الماده اعتذر و وكلني بمهمة تلخيص الماده معاكم لإمتحان الاسبوع الجاي .. طبعا ببدى معاكم التلخيص من الدروس الاخيره لين الدروس الاولى ..
مناف " اها .. يعني دكتور الماده ما بغى يعتذر الا على هالمحاضره المهمه .. الله يهديه بس " ..
تم الدكتور يلخص الماده والبنات متابعين معاه .. خلصت المحاضره ومناف كانت اول من ترك القاعه .. كانت حاسه بالتوتر والقلق .. الدكتور حامد طالها وهي طالعه بسرعه ومنزله راسها ..
حامد " الله على الخجل .. ماشاءالله عليها " ..
فاطمه رجعت البيت وكانت مرتاحه ان قدامها 15 يوم قبل اليوم الموعود .. كانت في غرفتها واطالع اغراضها وشنطها .. دخلت عليها عمتها هيا ..
فاطمه: هلا عميمه ..
هيا: فديت عروستنا الحلوه ..
فاطمه: حلاة دنياج عميمه ..
هيا: جهزتي كل شناطج ؟
فاطمه: اي ..
هيا: الاسبوع الجاي انا وامج بنروح نرتبهم لج فالغرفه ..
فاطمه: ماتقصرين عميمه ..
هيا: فديت قلبج انتي .. الفال ان شاءالله حق ايمان والريم فديتهم ..
فاطمه: آمين ..
هيا: الا فارس وينه ؟ صار لي كم يوم اجيكم ولا اشوفه ..
فاطمه توترت: فارس .. الله يخليج يا عميمه .. اذا احنا ماقمنا نشوفه هالايام ..
هيا: ليش شعنده ؟
فاطمه: لاهي مع اشغاله .. ويجهز مع يوسف وعبدالعزيز ..
هيا: فديت قلبه والله .. وحشني ..
فاطمه: ليش هو ما مركم ؟
هيا: بلا يمرنا فديته .. بس استغربت هاليومين من امركم ولا اشوفه ..
فاطمه: ما ينلام فديته مشغول ..
هيا: الله يعطيه الصحه والعافيه ..
فاطمه: آمين " آه لو تدرين بفارس يا عمتي " ..
هيا: اخبار القاعه والتجهيزات ؟
فاطمه: امي وانتي ما قصرتوا .. امس كلمتني مالت الطاولات تقول ان الكاسات اللي طلبتها وصلت ..
هيا: زين الحمدلله ..
فاطمه: لا ماشاءالله عليها هالبنت توقيتها مضبوط ..
هيا: حليلها والله .. في عرس مريم ما قصرت والله .. شفتي شلون رتبت لنا القاعه ونسقتها ..
فاطمه: عشان جي انا اخترتها ..
هيا: ان شاءالله نشوف قاعتج مثل ما تخيلناها وخططنا لها ..
فاطمه مبتسمه: ان شاءالله ..
تمت هيا مع فاطمه يسولفون عن امور العرس والتجهيزات ..
الساعه 4 العصر .. مناف كانت واقفه عند مواقف الباصات تنتظر الوقت يمر عشان ترجع البيت .. كانت تسولف مع فارس ..
مناف: وين بتروح حبيبي ؟
فارس: بروح عند يدتي ..
مناف: اشوفك هالكم يوم دوم عند يدتك ..
فارس: هي تتصلي عشان اقعد معاه ونحش في خلق الله ..
مناف: ههههه .. عليك سوالف
فارس: فديت هالضحكه يعلها دوم ..
مناف نزلت راسها وتكلمت بصوت واطي: حياتي والله ..
..................
يتبع
فارس: فديت همسج يا قلبه ..
مناف: تدري من كم يوم امي تسأل فيصل عنك ..
فارس مبتسم: والله .. شو سألته ؟
مناف: سألته عنك وعن اخبارك ..
فارس: اها .. حليلها عمتي .. اقصد امج ..
مناف انحرجت وسكتت ..
فارس: فديت قلبها الخجوله ..
مناف: زين حبيبي الباص وصل .. خل اروح لان البنات تجمعوا كلهم ..
فارس: تحملي على نفسج يا قلبه ..
مناف: ان شاءالله حبيبي ..
سكرت مناف من فارس وتوجهت للباص .. اما فارس فتوجه لبيت يده .. دخل الحوش وشاف سيارة عبدالعزيز .. نزل ودخل الصاله ولقى عبدالعزيز والجد واقفين جدام المرايه ويعدلون في غترهم ..
فارس: على وين ؟
الجد التفت بخوف: وجع يا فروس خرعتني .. على بالي ابوك ..
عبدالعزيز: صوتك نفس صوت ابوي ..
فارس: لا تغيرون الموضوع .. على وين هالحزه ؟
الجد: مالك خص ..
فارس: بل ..
عبدالعزيز: لقط ويهك ..
الجد: انت اصلا شو جايبك هالحزه ؟
فارس: نتفتني يا يدي ..
الجد: الناس ترتاح وتقيل .. وانت تناقز لي من مكان لي مكان .. ماعندك سالفه ..
دخلت عليهم الجده ..
الجده: دامك تقول هالكلام .. شو اللي مهيتك مع هالياهل عزوز ..
عبدالعزيز: بل ..
فارس بشماته: لقط ويهك ..
الجد: احنا عندنا شغل ريايل ..
الجده: لا صدقت شغل الريايل ..
فارس: اموت فيها والله ..
قرب من يدته وباس راسها ..
الجده: لا ومتدهن ومتدخن بالعود الزين .. شهالشغل ها .. علمني ..
الجد سحب عبدالعزيز: قم نروح عنهم .. اخوك ويه نحس علينا ..
الجده: ويهه نحس .. الا كشف فعايلك ..
الجد طلع و وراه عبدالعزيز وسكر الباب ..
فارس قرب من يدته وباس راسها مره ثانه بس سحب راسها بقوه ..
الجده: الله يلعن اليهود عورت راسي انت بعد ..
فارس: هههههه .. آمين ..
الجده: اقعد خل انادي الخدامه تجيب القهوه ..
فارس: ان شاءالله ..
راحت الجده المطبخ ورجعت مره ثانيه عند فارس فالصاله .. الخدامه حطت القهوه وراحت .. الجده قلطت فارس وصبت له القهوه وقدمت له التمر .. فارس تم يسولف معاها شوي وبعدين هي فتحت معاه موضوع العرس ..
الجده: شو صار على موضوع خطوبتك ؟
فارس: ولا شي ..
الجده: شوله ؟
فارس خذ نفس: آآآه .. والله ماعرف شو اقولج يدتي ..
الجده عقدت حواجبها: شو فيك يبه .. ليش الحزن بصوتك ؟
فارس: يدتي .. امي رافضه البنت ..
الجده تخصرت: ويه .. ليش زين ؟
فارس: امي تقول ان هالبنت مو من ثوبنا ..
الجده: يعل ثوب امك الشق .. شو هالكلام بعد ..
فارس: انا سكت عن الموضوع الحين عشان عرس فطيم .. ولا كلمت حد فالموضوع ..
الجده: بس ابوك قالنا من زمان عن هالموضوع ولا شفنا اي رد ..
فارس: اي الموضوع من زمان صاير .. والرد جاني على طول من امي .. بس انا ما حبيت اناقش امي فالموضوع
الجده: شو بعد اناقش ؟ تكلم عربي ..
فارس: هههههه .. يمه انا اتكلم عربي .. اناقش يعني اتكلم فالموضوع ..
الجده: قصدك تشوف رايي امك بالموضوع ؟
فارس: ايوه عليج نور ..
الجده: زين .. قولي امك سألت عن البنت واهلها ؟
فارس: اي سألت و بلسانها قالت لي ان البنت ما عليها كلام واهلها الكل مدح فيهم .. بس ما رضت فيها عشانهم على قد حالهم ..
الجده: هاي مب عذر .. وامك ذي بسنعها ..
فارس: بس يدتي طلبتج ..
الجده: قول ابوي انته ..
فارس: لا تكلمين حد فهالموضوع الحين ..
الجده: شوله ؟
فارس: مابي اسوي مشاكل .. ومابقى شي على عرس فطيم .. عقب العرس بنقعد ونتكلم ..
الجده: عيوني لك ..
فارس مبتسم: تسلم لي عيونك ..
الجده: الا بسألك ..
فارس: هلا ..
الجده: انت تعرف هالبنت ؟
فارس ويهه صار احمر: ها .. لا ماعرفها يدتي .. بس شفتها كم مره وعجبتني .. مأدبه ومحتشمه و حلوه بعد ..
الجده تلعوز فارس: علينا هالكلام .. شفتها برا .. يبه انت من يرن تلفونك انخطف لونك .. تقولي شايفها برا ..
فارس ضحك باحراج: لا شدعوه ..
الجده: هات من الآخر يالعفريت ..
فارس: هههههه .. صدقيني ماعرفها ..
الجده: ما تقص علي انا ..
فارس يغير الموضوع: تدرين يدتي ..
الجده: قول ابوي ..
فارس: انا مستغرب من ابوي ..
الجده: شو فيه ابوك ؟
فارس: ما كلم امي فالموضوع واحس في قلبه كلام ..
الجده: امس الظهر ابوك عندي ما شفت عليه شي ..
فارس: هو جاني وقالي ان امي مب راضيه .. وبعدين كان بيقولي شي ثاني بس سكت بدخلت امي علينا .. وللحين ماقدرت اكلمه واعرف منه شي .. احسه يتهرب مني ..
الجده: ضيعتني يا صبي .. شو يعني يتهرب منك ؟
فارس: هههههه .. يعني يتصدد ما يبي يكلمني ..
الجده تفكر: همممممم .. ابوك مقدور عليه بصيده لك اليوم ولا بكره لي مر علي .. بس امك بسنعها عقب العرس .. على بالك باسكت عن كلامها اللي ماله معنى .. اي والله مب من ثوبنا ..
فارس: يدتي شو قلت لج من شوي ..
الجده: شو ؟
فارس: لا تفتحين الموضوع مع اي حد الا بعد عرس فطيم الله يخليج ..
الجده: اوهو .. شغلت قلبي وقهرتني وتبيني اسكت ..
فارس: عشان خاطري ..
الجده: ولا يهمك .. عقب عرس اختك بمسك امك وابوك وبعقد معاهم ..
فارس: عفيه يدتي والله ..
الجده: زين اشرب هالفنيال ..
فارس: بسي والله اكتفيت ..
الجده: انت شلون صاير كلامك بعد ؟
فارس باستغراب: اي كلام يدتي ؟
الجده الا اناقش .. ولا اكتفيت .. يبه تكلم عدل ..
فارس: انا اتكلم عدل .. بس انتي مال اول شعرفج ..
الجده: وجع يا فروس .. اركد لا اكسر هالدله على راسك ..
فارس: هههههه .. زين زين ..
رن جوال فارس وكانت الرنه عالي مستواه .. على طول كتم الرنه و حط التلفون على جنب .. الجده تمت اطالع فارس بتحدي ..
الجده: رد .. ليش سكرت ؟
فارس: احم .. لا هم سكروا بسرعه ..
الجده: وليش يسكرون بسرعه ؟
فارس: يلعوزوني ..
الجده: من هذول اللي يلعوزونك ؟
فارس: الربع ..
الجده: فروس هات من الآخر احسن لك ..
فارس يضحك: هههههه .. شو تبين اقولج يدتي ..
الجده: انت على بالك صدقتك يوم تقول انك شايفها .. انا اقطع يدي اذا انت مب عاشقها ..
فارس: شو فيها لو عشقت ؟
الجده: اعشق يبه محد قالك ما تعشق .. دام القلب اختار .. اعشق وحب ..
فارس: الله على كلامج اللي يبرد الخاطر يا يدتي ..
الجده: زين قولي انت تحبها ؟
فارس مبتسم: لا .. بس شاريها ..
الجده " راسه يابس مب راضي يتكلم "
الجده: بعد عرس اختك بتنحل الامور بأذن الله ..
فارس عض شفته " آمسن " ..
فارس: زين الغاليه انا اترخص الحين ..
الجده: بتروح الحين .. كلهم بعد شوي بيجون اقعد زين ..
فارس: عندي شغل ضروري .. وبعد شوي بيأذن بصلي فالمسيد ..
الجده: زين روح صل وتعال ..
فارس: عندي شغل .. بمرج وقت ثاني ان شاءالله ..
الجده: ما يندرى شو هالشغل ..
فارس ابتسم لها .. قرب منها وباسها على راسها وطلع .. الجده كانت تفكر في فارس وتعلقه فالبنت اللي يبغيها ..
...................
يتبع
الذين يشاهدون الموضوع الآن: 8 (0 من الأعضاء و 8 زائر)
مواقع النشر (المفضلة)