سلمان: بإذن الله ..
فاضل: شباب فضوا نفسكم حق الويك اند ..
عبدالعزيز: يا سلام .. جاهزين ..
علي: بوالزوز .. لاتنسى اللي اتفقنا عيه ..
عبدالعزيز ابتسم بخبث: ولا يهمك افا عليك ..
فاضل مبتسم: كل شي جاهز ..
علي: سلامي عليكم ..
يوسف: شسالفه ؟
علي: اشيك اذا رتبوا الشغل هناك ..
يوسف: لا ما بنقصر احنا ان شاءالله ..
علي: انت ما عليك زود .. انت اللي المفروض ما تسوي شي كلش ..
يوسف: لا عيب ما يصير جي .
عبدالعزيز وفاضل طالعوا بعض وابتسموا بخبث ..
علي: لا الحبيب .. انت وراك عرس ولازم تضبط امورك .. خلها علينا ..
يوسف مبتسم: ما تقصرون يا عيال العم ..
عبدالعزيز " والله ماتدري شو اللي ينتظرك يا بوخليفه .. "
تموا الشباب سهرتهم لين وقت متأخر .. محمد وفارس استأذنوا وراح محمد يوصل فارس لشقته .. وهم فالدرب محمد كلم فارس عن حركة الزقاره ..
محمد: فروس ..
فارس يلعب في شنبه: هلا ..
محمد: ليش دخنت ؟
فارس ابتسم: بس ..
محمد: فروس انت مب مجبور ادخن ؟
فارس: و مب مجبور مادخن ..
محمد: زين ليش دخنت ؟ وشو اللذه اللي عطتك اياها الزقاره ؟
فارس: ليش دخنت .. والله جات على بالي ودخنت .. واللذه اللي خذتها من الزقاره .. ولاشي .. مافيها لذه ..
محمد: زين ليش تسوي جي ؟
فارس: حمود انت شايفني كل يوم ادخن ؟
محمد: لأ ..
فارس: عيل فضها سيره الله يلعن اليهود ..
محمد: ان شاءالله ..
سكتوا ثنينهم وكملوا دربهم لشقة فارس .. نزل محمد من سيارة فارس وركب سيارته .. ودع فارس وراح البيت وهو يفكر في كلام فارس ..
محمد " فروس بدى يتمرد .. ليش يسوي بنفسه جي ؟ استسلم ولا شو سالفته ؟ " تم محمد يفكر في فارس ويحاتيه .. اما فارس دخل الشقه واتصل بمناف ..
مناف: هلا ..
فارس: قلبه انتي ..
مناف مبتسمه: كل هاي شوي وبتتصل ؟
فارس: حياته انتي ..
مناف: ليش تأخرت حبيبي ؟
فارس: عمره انتي ..
مناف: عااااااااد فارس رد علي ..
فارس: فارس بشحمه ولحمه تحت امرج يا اميرت البنات وشيختهم كلهم ..
مناف انحرجت وماردت على فارس ..
فارس: اموت في خجلها يا ناس .. احبها وربي احبها ..
مناف عضت شفتها: زين شسويت اليوم ؟
فارس: مع الشباب .. وانتي شو سويتي ؟
مناف: كنت اراجع دروسي .. مابقى لي الا امتحانين وبنخلص هالكورس ..
فارس: الله يوفقج حياتي ..
مناف: وياك حبيبي ..
فارس: فيصل كلم امج عن العزبه ؟
مناف: اي ..
فارس: وامج وافقت ؟
مناف مبتسمه: وهي تقدر ترد فيصل وانت فالسالفه ..
فارس ابتسم: حليلها امج .. احسن الحين ؟
مناف تنهدت: لا والله .. احسها كل يوم تتردى حالتها ..
فارس: انتي ما تقعدين معاها ؟
مناف: بلا اقعد معاها .. اخذ كتبي واقعد معاهم فالحوش ولا الصاله .. بس امي تكون ساكته ..
فارس: حاولي تسوين لها جو فالبيت ..
مناف: احاول يا فارس .. بس هي ما تتكلم .. لما احاول افتح معاها موضوع .. ترد على قد السؤال ..
فارس: الله يصبرها ..
مناف: ان شاءالله ..
تموا ساكتين فتره .. مناف خذت نفس عميق وتكلمت ..
مناف: فارس ..
فارس: عمره انتي ..
مناف: ممكن اطلب منك طلب ؟
فارس مبتسم: كلي لج يا مناف ..
مناف: بعد اسبوعين عرس وحده من صديقاتي ..
فارس: زين ..
مناف: و وانا وعدتها اني بحضر بعد ما استأذنت من امي ..
فارس: زين ..
مناف: ممكن اطرش لي السايق ؟
فارس: فديت قلبج والله .. ما طلبتي شي ..
مناف: ما تقصر فديت قلبك ..
فارس تنهد: آآآه .. ما بغت تطلع منج هالكلمه ..
مناف ابتسمت: عااااد .
فارس: باستخف من دلعها يا ناس ..
مناف: زين ممممممم .. ابي السايق ينتظرني لاني ما راح اطول هناك ..
فارس: ولا يهمج ..
مناف: بس بسلم عليها وبطلع ..
فارس: تحت امرج احنا ..
مناف: مشكور حبيبي ..
فارس: زين امج بتروح معاج ؟
مناف: اي لازم .. مستحيل تخليني بروحي ..
فارس: واخوانج ؟
مناف: هممممم .. بخليهم معاك اذا مافيها احراج ؟
فارس: فديت قلبج .. فعيوني فيصل وعبود .. هذول اخواني الصغار ..
مناف: والله يا فارس ماعرف شاقولك ..
فارس: ما بينا هالكلام يا قلبه ..
مناف: زين فديتك .. الحين بروح اكمل دراستي ..
فارس: زين حياتي .. ركزي في دراستج وشدي حيلج ..
مناف: ان شاءالله .. يلا مع السلامه ..
فارس: الله يحفظج ..
سكر فارس من مناف وتم يفكر فيها ..
فارس " آه يا مناف .. احسج تتسألين عن سبب سكوتي عن الموضوع مره وحده .. الله يستر .. بس احنا لبعض يا قلب مناف " ..
اما مناف فتحت كتبها وتمت تذاكر بتركيز ..
مر هالاسبوع بسلام وكل البنات خلصوا امتحاناتهم .. اليوم هو الخميس .. والشباب كلهم تجمعوا في بيت بوفارس الا فارس .. اتصل له محمد ..
محمد: وينك حبيبي ؟
فارس: موجود ..
محمد: وين موجود ؟ كلنا في بيتكم ..
فارس: زين خلصوا ونتلاقى عند المحطه .. ولا بسبقكم على العزبه ..
محمد: شو هالكلام فروس .. تعال هني زين ..
فارس بكل برود: لأ ..
محمد هز راسه: الله يهديك يا فارس ..
فارس: زين جهزتوا لكل شي ؟
محمد: اي ..
فارس: حلو .. عيل بمر على فيصل وعبود وبسبقكم على هناك ..
محمد: اللي تشوفه ..
فارس: سلام ..
محمد: الله وياك ..
محمد " الله يستر منك يا فارس " ..
فارس اتجه لبيت مناف .. اتصل بفيصل اول ما وصل عند بيتهم ..
فارس: ها فيصل يبه جهزتوا ؟
فيصل مبتسم: اي جاهزين .. بس امي تبي تكلمك .. ممكن تنزل ..
فارس: ان شاءالله ..
سكر فارس من فيصل وفصخ الكبوس اللي كان لابسها .. غلغل اصابعه في شعره وطالع نفسه فالمرايه .. نزل من السياره و وقف على يمين الباب ينتظر ام مناف .. طلع له عبدالله وهو يركض ..
................
يتبع
الجزء الاخير
عبدالله بفرح: ههاااااااااااااي ..
فارس فتح له ذراعينه مبتسم: هلاااااا ..
عبدالله حضن فارس وباسه .. فارس قرص خدود عبدالله ونزله ..
فارس: شو اخبارك عبود ؟
عبدالله: طيب .. يلا متى بنروح ؟
فارس مبتسم: اصبر شوي ..
عبدالله: زين .. بحط شنطتي فالسياره ..
فارس: بارك الله فيك ..
طلع فيصل عند الباب وامه وراه ..
ام مناف: هلا فارس يبه ..
فارس منزل راسه: السلام عليكم ..
ام مناف: عليكم السلام .. شلونك يبه ؟
فارس رفع راسه مبتسم: طيب الله يسلمج .. اعلومج انتي ؟
ام فارس طالعت فارس باستغراب: الحمدلله يبه ..
فارس ابتسم لها والتفت صوب عبدالله اللي كان فالسياره .. اما ام مناف فكانت تتفكر في فارس .. اول مره تحط عيونها بعيونه ..
ام مناف خذت نفس: فارس يبه ما وصيك على عيالي ..
فارس: اخواني فعيوني يا ام فيصل ..
ام مناف بحزن: بارك الله فيك يبه .. الله يخليك لاهلك ..
فارس حس بالحزن في صوت ام مناف ..
فارس: الله يسلمج يمه ..
ام مناف موجهه كلامها لفيصل: فيصل لا تلعوزون الريال ..
فارس: يمه انا اخوهم الكبير .. اعتبريني ولدج ..
ام مناف مبتسمه: ولا يهمك يبه .. يا فيصل يبه لاتلعوزون اخوكم ..
فيصل مبتسم: ان شاءالله ..
فارس وايد استانس على كلام ام فارس .. فيصل سلم على امه وراح السياره .. ام مناف نادت على عبدالله ..
ام مناف: عبود .. تعال سلم علي يبه ..
عبدالله فتح الدريشه وطلع راسه: مووووح .. بس سلمت عليج ..
ام مناف ضحكت على ولدها: فديت قلبك انته .. الله يحفظكم ..
فارس: تآمريني على شي يمه ؟
ام مناف: تحملوا بانفسكم يبه ..
فارس: ان شاءالله ..
ركب فارس السياره وحركوا متجهين الى العزبه ..
الشباب في بيت بوفارس رتبوا امورهم .. سلمان ومحمد ركبوا سياره وحده وطلعوا .. عبدالعزيز وعلي ويوسف وفاضل ركبوا سياره وحده ولحقوهم .. بس قبل ما يطلعون ام فارس نادت على عبدالعزيز ..
ام فارس: تحملوا باعماركم يبه ..
عبدالعزيز: ان شاءالله يمه ..
ام فارس بتردد: ممممم .. وسكتت
عبدالعزيز: شو فيج يمه ؟
ام فارس: مممممم .. اخوك وينه ؟
عبدالعزيز: جرك قبلنا ..
ام فارس: اي .. زين تحملوا بنفسكم يبه ..
عبدالعزيز باس امه على راسها وطلع .. امه عورت قلبه ..
عبدالعزيز " الله يهديكم .. مسكينه ام قلبها على فارس .. ادري ان فارس مشتاق لامي .. بس ثنينهم معاندين ويكابرون .. لاحول ولا قوة الا بالله"
ركب عبدالعزيز السياره مع الشباب .. علي اللي كان يسوق وعبدالعزيز قعد جنبه .. فاضل ويوسف كانوا قاعدين ورا .. علي شغل الراديوا وطول على الصوت حده .. ارتبشوا الشباب وطلعوا من بيت بوفارس متجهين للعزبه ..
كانت الساعه 12 لما وصلوا العزبه .. الصبيان كانوا مجهزين الغدا للشباب .. تغدوا وبعدين كلن اتجه لنشاطه .. فارس ركب الخيل وراح برا العزبه بروحه .. محمد وسلمان كانوا فالاستراحه يطالعون التلفزيون ويشيشون .. اسماء وريما كانوا يسبحون .. فيصل وجاسم وسلطان وفهد كانوا يلعبون بلاي ستيشن داخل .. يوسف كان يتمشى ويسولف مع فاطمه .. علي و عبدالعزيز وفاضل كانت عندهم شنطه سوده وكانوا يتكلمون بهدوء وحذر وكان عبدالله معاهم .. كانوا ناوين ليوسف نيه مو حلوه .. مرت الساعات والشباب على حالهم وكلن بنشاطه .. فارس رجع العزبه .. ورجع الخيل الاسطبل .. محمد اول ما شافه راح له ..
محمد: وين كنت ؟
فارس التفت مبتسم: كنت اتمشى ..
محمد: اهاا ..
فارس: شو سويتوا؟
محمد: البنات متنقعين فالماي من وصلنا .. والشباب داخل ولا تحركوا .. بس تدري شاك في اخوك ..
فارس رفع حاجب: بوسعود ؟
محمد: اي ..
فارس: في شو ؟
محمد: هو وعلوه وفضول وراهم شي ..
فارس ابتسم: ليش لأ .. كل شي جايز ..
محمد: كل شي اتوقعه منهم ..
فارس: تصدق اني جوعان ..
محمد: فروس شو فيك ؟ الساعه 1 متغدي ..
فارس: ضاربني جوع مب طبيعي .. مع اني الحمدلله تغديت عدل ..
محمد: زين تعال كل لك حاجه ..
فارس: بخلي الصبي يسوي لي سندويش ..
راحوا عند الاستراحه وفارس طاحت عينه على فاضل وهو يكلم علي .. اللي اول ما شاف فارس سكت .. فارس ومحمد طالعوا بعض ورفعوا حاجب ..
فاضل بهمس: بعدين بعدين ..
تجمعوا الشباب كلهم فالاستراحه وتموا يسولفون لين أذن المغرب .. صلوا جماعه وراحوا داخل عشان يلعبون بلاي ستيشن .. على الساعه 8 سلمان ومحمد خذوا اسماء وريما ورجعوهم البيت .. في هالاثناء كانوا الشباب يتحدون بعض في العزبه على البلاي ستيشن ..
في بيت بوفارس مريم وايمان والريم ومريم قاعدين مع بعض في غرفة فاطمه ..
ايمان: مريوم المصمم خلص فستانج ؟
مريم: اي من اسبوع استلمته ..
ايمان: من ورانا ؟
مريم: ليش؟
ايمان: امس تقولين ما خلصه لج ..
مريم: مالت عليج يا ايمانو ..
فاطمه: ههههههه
ايمان تخصرت: ليش يا عيوني ..
مريم: انا كنت اتكلم عن العبايه ..
ايمان: ووووووي ..
فاطمه: اريام شو فيج ؟
الريم مبتسمه: مافيني شي ..
ايمان: وايد ضعفانه انتي ..
الريم "ابيه ": لازم حق العرس نخفف شوي ..
فاطمه"صدقتج": من متنج اريامو
الريم مبتسمه: لا ياختي تكتكنا شوي مع الامتحانات ..
مريم: بسج لاتضعفين اكثر ..
ايمان: شوي وبتختفين ..
الريم: هههههه .. التفت على فاطمه .. خلاص عيل ما بقى شي ..
فاطمه بتوتر: اي والله ما بقى شي ..
الريم سرحت " آآه يا قلبي .. تمنيت اتوتر عشانك يا فارس" ..
فاطمه لاحظت شرود الريم ..
فاطمه " مسكينه انتي يا اريام .. لا تكرهين فارس اخوي لو تزوج اللي يبيها " ..
ايمان: زين شو رايكم نأجر فلم ونطلب عشى على حساب مريم ..
مريم التفت على ايمان: نعم نعم .. وليش حددتي ان يكون العشى على حسابي يعني ؟
ايمان: خلاص انتي الحين امرأه متزوجه ..
مريم: وخير يعني .. ماهي فطيم امرأه متزوجه بعد ؟ جات علي انا !!
ايمان: احم .. يا اوخيه لاتفهميني غلط ..
الريم: ههههاااااي .. حلوه هاذي يا اوخيه ..
الريم وفاطمه: ههههههه
مريم: ما يضحك .. واللي ضحكم هالكثر خلوه يأجر لكم الفلم ويعشيكم ..
ايمان: يالله على البخل ..
مريم: انا مو بخيله ..
ايمان: وهالتصرف اللي توج تصرفتيه شو تسمينه ؟
مريم: ايمانو شو فيج اليوم متقلسفه ؟
ايمان: تحسيني وايد متفلسفه صح ؟
الريم: دمج شربات ..
ايمان: احم احم .. الله لا يحرمكم مني قولوا آمين ..
مريم حذفت شيلتها على ايمان: صج انج مب صاحيه ..
الكل: ههههههههه
فاطمه: اول شي خل ننزل المطبخ نسوي لنا سندويشات .. ونطرش الدريول يجيب الفلم وبعدين نستمتع ..
مريم: والله خوش فكره ..
ايمان: الله لا تبلينا بالبخل ..
مريم صرخت: ايمانو يالهبله ..
الكل: هههههههه ..
نزلوا رايحين المطبخ وهم يضحكون .. كانت الريم وراهم ..
الريم: نزلوا بلحقكم ..
فاطمه: زين ..
نزلوا الخوات المطبخ والريم رجعت غرفة فاطمه .. انتظرت شوي وطلعت .. طلت وما شافت حد فالممر .. راحت بسرعه غرفة فارس .. اول ما دخلت الغرفه خذت نفس عميق ..
الريم " فديت ريحة غرفته .. فديت قلبك يا فارس .. احبك "
سكرت الباب وراحت صوب سرير فارس .. قعدت وتمت اطالع غرفته .. قربت من المكتب وتمت تلمس اغراض فارس .. كان في دفتر على المكتب .. فتحته ولقت اسم فارس بين قوسين (فارس) سكرت الدفتر والتفت على علاقة الملابس .. قربت منها وتمت تتلمس ملابس فارس .. شافت كبوس قطن لونه اسود .. خذته واستنشقت ريحة فارس .. نزلت راسها ودمعت عيونها .. مسحت دموعها بالكبوس ..
الريم " آه يا فارس .. احبك والله احبك .. ان شاءالله ما تتزوج .. ابي اكون بقربك .. ابي اكون من تعطيها قلبك .. لا تذبحني يا فارس "
تمت تفكر في فارس بحزن .. انقطع حبل افكارها لما سمعت اصوات برا .. ارتبكت وخافت ان حد يدخل عليها .. قربت من باب الغرفه وسمعت ام فارس وبوفارس يتكملون ..
ام فارس: هالبنت ما ياخذها ..
بوفارس: ليش هالعناد ؟
ام فارس: لانها قاصه على ولدك ..
بوفارس: الولد ما بينه وبينها شي ..
ام فارس: لا صدقتكم .. مبين عليها يعرفها عدل ..
بوفارس وام فارس كملوا دربهم للغرفه وهم يتناقشون بموضوع فارس .. الريم سمعت هالكلام وانصدمت .. حست ان ريولها ماتشلها ..
الريم " فارس يعرف البنت ؟ فارس يحب؟ ومن تكون هالبنت ؟ وليش يحبها .. ليش مب انا .. لاااااااااا " ..
صرخت باعماقها صرخه هزت كيانها .. صرخه زلزلت قلبها المتولع والمشتاق .. لملمت دموعها وطلعت من غرفة فارس منهاره .. دخلت غرفة فاطمه ومسحت دموعها .. شافت كبوس فارس في يدها .. خذته وخبته في شنطتها .. طالعت نفسها فالمرايه وابتسمت .. كابرت على الجرح ونزلت عند البنات .. دخلت المطبخ وساعدتهم ..
ايمان: لو طالبين مب احسن من عبالة السندويشات ؟
فاطمه: ايمانو عن الكسل والتذمر ..
ايمان: يعني فكرتج يا حرم يوسف خليفه .. ما منج فايده ..
الريم: شو فيها السندويشات ؟
مريم: شحلاتها ..
ايمان: يا حالتكم .. اونكم ما تحبون الا اكل البيت ؟
الريم: شحلاته ..
ايمان: انا عن نفسي احب الـjunk food ..
فاطمه: انا بعد احبه .. بس شغل البيت حلو ..
مريم: انا احب الـjunk food .. بس خالد ما يحب الا اكل البيت ..
الريم: الله يعينج على خالد .. ترا كلش ما يحب اكل المطاعم الا العيش واللحم بس ..
مريم: ادري ..
فاطمه: لا جي مو شي ..
ايمان: يعني ما تطلعون مطاعم ؟
مريم: بلا .. بس قبل مانروح يكون مسوي حسابه ..
ايمان: شلون ؟
مريم: يعني يروح مطعم متعود عليه ويعرفه ماكل فيه من قبل ..
الريم: قبل العرس ترا ما كان يروح وايد ولا ياكل من برا ..
مريم التفت على الريم: والله!
الريم: اي .. كان يطلب مني او من امي .. واذا ما كنا موجودين .. يدخل يطبخ له ..
مريم: فديته يطبخ له .. آيه عليه ..
ايمان: الله على الحركات ..
مريم انحرجت وسكتت ..
الريم: زين الحين خلصنا الاكل ..
تكمل ايمان: وباقي الفلم ..
فاطمه: باتصل فالدريول اشوفه ..
مريم: زين يلا نرتب القعده ..
الكل: يلا ..
راحوا البنات الصاله .. ايمان فتحت الستاير .. مريم نزلت المخدات على الارض ورتبتها .. الريم وفاطمه جهزوا الاكل على الطاوله وجابوا المشروبات والبوب كورن .. الخدامه جابت الفلم وشغلوا الفلم .. بندوا الليتات وقعدوا على الارض كلهم والاكل حولهم .. اندمجوا مع الفلم الا الريم .. اللي كانت بجسمها معاهم وعقلها مع كلام ام فارس وبوفارس اللي سمعته من فالممر ..
الحين نروح غرفة ام فارس وبوفارس ونكمل حديثهم عن فارس ..
بوفارس: الولد معجب فيها .. شافها وعجبته ويبيها ..
ام فارس: انا مب مزنه لو خذها ..
بوفارس عيونه صارت حمره: وانا محمد ريل مزنه .. اللي كل عمري عرفتها بطيبتها .. وحنيتها .. وقلبها الكبير من متى مزنه مرت محمد تتعالى على الناس وتتكبر .. من متى مزنه مرت محمد تشوف الناس اقل منها وما ترضى تناسبهم .. ولا تنسى مزنه مرت محمد ان محمد اول ماخذها كان على قد حاله ..
ام فارس مشت خطوتين صوب الدريشه وتكلمت بهدوء ..
ام فارس: بس احنا وين وهالناس وين ..
بوفارس: انا اتكلم فالهوا ..
ام فارس: محشوم يالغالي ..
بوفارس: الله يهديج بس ..
مشى عنها وطلع من الغرفه كاتم غضب بركان في قلبه ..
بوفارس " فارس الله يعينك على امك .. بس شكلي بسوي اللي في بالي "
طلع بوفارس من البيت واتصل بفارس اللي كان مندمج مع الشباب في العزبه .. فارس شاف رقم ابوه فالتلفون واستغرب اتصاله ..
فارس: هلا يبه ..
بوفارس: شلونك يبه ؟
فارس: تمام .. اعلومكم ؟
بوفارس: الحمدلله .. فارس يبه ليش هالقطاعه ؟
فارس يعاتب ابوه: توك تسأل عني ..
بوفارس بخجل: ما تنلام يا يبه .. عاتبني
فارس: وينك يوم قالت امي ان البنت مب من ثوبنا ؟ وينك يوم انكسر خاطري على البنت ؟ وينك يوم بغيت اقولك اللي بخاطري ؟ آه يا يبه وينك ..
بوفارس: سامحني يا فارس ..
فارس انكسر خاطره على ابوه ..
فارس: انا آسف يبه .. ما كان قصدي اعاتبك ولا المومك .. بس لاني شفت ردة فعل سلبيه منك ..
بوفارس: خلها على الله .. ولا تعتذر لي يبه .. بس اوعدك اكون معاك في كل شي ..
فارس: الله كريم ..
بوفارس تم ساكن فتره وفارس كان ينتظر ابوه يتكلم .. بعد صمت ذبح فارس ..
بوفارس: زين يبه تحمل بنفسك .. وحط بالك على اخوانك وهلك ..
انهى المكالمه بكل هدوء .. فارس استغرب من ابوه .. و زادت حيرته في تصرفاته .. فارس طالع تلفونه ورفع حاجب ..
فارس " شو سالفة ابوي .. حيرني حيرني " ..
راح فارس عند الشباب فالصاله .. اما بوفارس فكان حاس بالحزن على ولده .. ركب السياره وطلع من البيت .. ابتعد عن البيت وايد .. وراح منطقه مظلمه فيها بيوت قديمه وشبه مهجوره .. في هالمنطقه بيت مناف .. بوفارس وقف بالسياره على طرف الشارع وتم يراقب بيت مناف ويفكر ..
بوفارس " الله يالدنيا .. والله ما تستاهلين هاي كله .. لعبت بج الدنيا وتوهتج .. صج الدنيا ما فيها خير "
حرك بوفارس من هالمنطقه وراح يتمشى على البحر ..
مر هاليوم بصمت على كل ابطالنا بكل الاحداث اللي صارت فيه .. صدمة الريم بالكلام اللي سمعته .. تخوف فارس من ابوه وامله في الزواج من مناف .. بوفارس وقراره الغامض اللي بيتخذه ..
يوم جديد يطل على الشباب في العزبه .. اول من قعد فيهم يوسف .. كانت الساعه 7 ونص .. قام بكل نشاط وراح المطبخ سوا له ريوق عالماشي .. راح عند المسبح وتريق بكل هدوء .. انظم له محمد ..
محمد: صباح الاكل ..
يوسف مبتسم: ههههه .. صباح الرقاد ..
محمد: شعندك قاعد من الصبح ؟
يوسف: والله شبعت نوم ..
محمد: نوم العوافي ..
يوسف: الله يعافيك ..
محمد: ليش معبل نفسك ومسوي الريوق .. الصبيان موجودين .. و هم مجهزين الريوق من الصبح ..
يوسف: ماشاءالله على صبيانكم .. مو مقصرين .. بس قلت اسوي لي عالماشي ..
محمد: بالعافيه ..
يوسف: الله يعافيك .. الا وين الباقي ؟
محمد: فروس وسلمان جاين .. اما الصيع ربعك رقود ..
يوسف: هههههه ..
سلمان وفارس: السلام عليكم ..
يوسف ومحمد: عليكم السلام ..
فارس مبتسم: ها شو هالخيانه ؟
محمد: انا للحين ما حطيت في حلجي شي .. هاي نسيبك ..
فارس: هاي وانا مزوجك اختي ..
يوسف: هههههه .. ليش المذله .. خالي دافع عني ..
سلمان كان سرحان " فديتها والله " ..
سلمان: ها ؟
محمد: يقولك يوسف شاركنا خل نقطعه ..
يوسف: هههههه .. لا خالي دافع عني ..
سلمان: حدكم عن ولد اختي .. بس باسمح لكم بساعه وحده تقطعونه ..
الكل: ههههههه
فارس: احلى يا ساعه ..
يوسف: افا يا خالي العزيز .. ما جني ولد اختك ..
سلمان: الا ولد اختي .. ولعى عيني وراسي بعد .. بس خل ينتفونك شوي ..
محمد: والله انك عجيب ..
تموا الشباب يضحكون ويسولفون بوناسه .. تريقوا وبعدين راحوا الاستراحه يطالعون التلفزيون ..
فارس: هذول للحين ما قعدوا ؟ الساعه 11 الحين ..
محمد: هذول وراهم شي .. من امس انا شاك فيهم
سلمان: شلون ؟
محمد: مادري .. ينتاقزون ويتكلمون بهمس ..
التفت فارس على يوسف: بو خليفه ليكون انت قاعد من الصبح تمويه ..
يوسف: هههههه .. اي تمويه .. ما نمنا الا بعد ما صلينا الفجر .. اكيد بينامون لين هالحجزه ..
محمد: وليش انت اللي قعدت من النوم دامك سهران معاهم ..
سلمان: شكلكم ناوين نيه ..
يوسف: لا طالعوني انا .. روحوا سألوهم ..
فارس: همممممم ..
يوسف: انا بروح عنكم احسن لي ..
طلع يوسف من الاستراحه .. وراح صوب اسطبلات الخيول .. فجأه حس ان حد سحبه بقوه .. تم يرفس بريوله ويحاول يبطل اليد اللي على راسه وكتفه ..
يوسف: هيييي ..
فاضل: هلا هلا ..
يوسف: مب صاحين انتوا ..
فاضل مسك يوسف وعلي ثبته وعبدالعزيز ربطه .. وقفوا جدامه ويطالعونه بصمت .. يوسف استغرب منهم ..
يوسف: عسى ماشر ..
فاضل ابتسم .. علي هز راسه وغمض عيونه بقوه .. عبدالعزيز تكتف ورفع حاجب ..
يوسف: وش اللي ناوين عليه ؟
علي رجع خطوتين لورا وفتح شنطه سوده .. عبدالعزيز ساعده وشطل الشنطه .. وفاضل طلع مكينة الحلاقه ..
يوسف: ها .. شسالفه ..
فاضل: هاي هديتنا لك ..
يوسف: اي هديه ؟
عبدالعزيز وعلي: هدية العرس ..
يوسف متفاجأ: وخروااااا عني .. هييييييييييييي ..
تم يوسف يصرخ وينادي على فارس وسلمان ..
فاضل: ثبتوه ..
علي: تفضل طالع عمرك ..
يوسف: فارس .. محمد .. خالي .. لحقوني ..
فاضل: سدوا حلجه ليسمعونه .. بوسعود جهز الكيمره ..
يوسف: لااااا .. فيها كيمره بعد .. اكرهكم .. والله بردها لكم ..
فاضل: بسك بسك .. يلا يا جماعه خل نبدى العمليه ..
علي: تفضلوا يا اساتذة الشر والمفاجأت ..
يوسف كان يحرك راسه ..
علي: اركد يا رجل ولا تتحرك ..
يوسف: آآآآآآه .. والله بوريكم ..
عبدالعزيز: حيلة المربوط لسانه ..
الكل: ههههههه ..
فاضل: حلوه منك بن عمي ..
علي: يلا بسم الله ..
فاضل شغل ماكينة الحلاقه ..
فاضل بنذاله: ها يوحسن شو رايك 3 ولا 2 ؟
علي: هممممم .. 1 زين ..
عبدالعزيز: يا جماعه لا تحتارون .. الفضلي حط الماكينه على صفر وتوكل على ربك ..
يوسف: لاااااااااا .. اوريكم اوريكم ..
علي: قالها بوسعود .. حيلة المربوط لسانه ..
الكل: هههاااااااي ..
تموا الشباب يضحكون على يوسف بنذاله ويلعوزونه .. شغل فاضل الماكينه وحطها على صفر .. حلقوا يوسف قرعه .. ويوسف كان يحاول لين آخر شعره فيه انه يوقفهم او يمنعهم .. الكيمره كانت دايره والشباب بنذالتهم بهدلوا يوسف .. بعد ما قرعوا يوسف .. علي رتب ونظف يوسف .. فاضل رجع الاغراض فالشنطه .. اما عبدالعزيز راح بعيد عنهم وهو يصور .. فاضل راح عند عبدالعزيز .. وعلي فك الحبل اللي صوب صدر ويد يوسف .. اما الحبل اللي رابطين فيه ريوله تركوه .. ركض علي ورا عبدالعزيز وفاضل .. يوسف بطل الحبل اللي حول ريوله ولحقهم بقرعته .. كان شكله يضحك وهو يصرخ عليهم .. يهدد ويتوعد .. سلمان وفارس ومحمد طلعوا من الاستراحه على صراخ يوسف و ضحك الشباب ..
فارس: شو فيكم ؟
محمد: مب هاي يوسف ؟
فارس: ههاااااي ..
سلمان: هههههه .. ليش مسوي جي بنفسك ؟
محمد: والله انك تحفه ..
يوسف: اوريكم يالنذول ..
علي وفاضل وعبدالعزيز: ههههههه
فاضل من كثر الضحك طاح على الارض وماسك بطنه ..
علي: روعه شكلك يالمعرس ..
سلمان: ايوووه ..
علي: هاي هديه بسيطه منا حق معرسنا الموقر ..
فارس: الله يغربلكم ليش سويتوا جي ؟
سلمان: خوش هديه والله ..
فاضل: بتجلطون البنت حرام عليكم ..
يوسف: اوريكم .. كلكم بتعرسون .. والله بتولاكم كلكم ..
محمد: الحمدلله اني المتزوج بينكم ..
يوسف: آآه يالقهر ..
علي قرب منه: سمالله عليك من القهر يا بوخليفه .. بس شكلك روعه .. وحط يده على قرعة يوسف ..
يوسف: وخر عني .. ولاحد فيكم يكلمني ..
فارس: زعلتوا معرسنا ..
يوسف فصخ الفانيه وتم بالشورت ..
عبدالعزيز: عيب يا ولد احتشم ..
يوسف: محد له خص فيني زين ..
عبدالعزيز: الكيمره للحين دايره يا ولد ..
يوسف ركض صوب عبدالعزيز وخذ منه الكيمره بقوه ..
يوسف: انا اوريكم ..
بند الكيمره وركض صوب المسبح .. طب وركض وراه فاضل وطب ..
يوسف: تعالوا الماي يجنن ..
عبدالعزيز وعلي ركضوا وهم يفصخون فنايلهم .. طبوا الشباب فالمسبح وتنقعوا فالماي ..
فارس: مسكين يوسف .. خسسوا فيه الشباب ..
سلمان: ذكرى حلوه ..
محمد: اي والله ..
فارس: والله روحه رياضيه تقبل الموضوع ولا كانه بيعرس قريب ..
سلمان: يا ريال عادي ..
فارس: زين يلا نلحقهم ..
سلمان: قدام ..
محمد وسلمان وفارس .. راحوا صوب المسبح طبوا مع الشباب .. الشباب الصغار انظموا لهم ..
الساعه 1 ونص .. طلعوا من المسبح وراحوا الفيلا عشان يتغدون .. تغدوا وعينوا من الله خير وكلن انسدح في مكان وغطت عينه .. الا فارس اللي كان مشتت .. يفكر في مناف ومشتاق لها .. ويفكر في كلام ابوه بحيره .. طلع يتمشى صوب الاستراحه واتصل بمناف ..
مناف: هلا حبيبي ..
فارس: اموت في حسج يا قلبه انتي ..
مناف: شخبارك ؟
فارس: مشتاق لج ..
مناف: فديت روحك ..
فارس: اخبارج انتي ؟
مناف: طيبه والله .. اخبار الشباب ؟
فارس: مستانسين .. وعبود تأقلم مع الصبيان اكثر ..
مناف: والله ..
فارس: اي حليله عبود .. المره اللي فاتت كان دوم معاي ومع علي ولد عمي .. بس هالمره راح مع الشباب الصغار ولعب معاهم واموره حلوه للحين ..
مناف ضحكة: ههههههه .. اهم شي الشباب الصغار ..
فارس مبتسم: فديت هالضحكه .. الله لا يحرمني منها ..
مناف: حياتي انت يا فارس ..
فارس: اخبار النتايج ؟
مناف: المواد الاختياريه والاجباريه كلها تمام .. بس باقي لي مادتين اختياري للحين ما طلعت نتايجهم ..
فارس: زين وهالمواد الاختياريه لو ما نجحتي فيها بتأثر على معدلج ؟
مناف: يعني هي تساعدني عشان اخلص ساعات وايد .. واتخرج بسرعه .. عشان جي احب اخذها .. ودوم الدكاتره يساعدونا في امتحانات المواد الاختياريه ..
فارس: الله يوفقج يا قلبه ..
مناف سكتت وكانت حاسه ان فارس يبي يقول شي بس مب عارف من وين يبدى .. فارس كان يفكر ويفكر شلون يفاتح مناف بالموضوع ..
فارس بعد تفكير: مناف ..
مناف بلعت ريقها: هلا ..
فارس: تذكرين اني كلمتج بموضوع الزواج ؟
ماف بحزن: اي .. اتذكر ..
فارس حس بالحزن في صوتها: انا ادري اني طولت الموضوع .. وادري جات في بالج افكار وايد ..
مناف: ..........
الذين يشاهدون الموضوع الآن: 4 (0 من الأعضاء و 4 زائر)
مواقع النشر (المفضلة)