{ نهاية حبك إعدامي } رووووووووووعه

[رامون]

راح عبدالعزيز ينادي عمته وبومحمد كان متوتر .. خايف من المواجه بين هيا وفارس .. لان فارس ما يدري بموقف عمته .. هيا دخلت عليهم .. طاحت عينها على فارس اللي كان مشغول بجواله .. طلعت وراحت المطبخ تجهز للعشى .. بعد ما خلصت نادتهم .. كلهم دخلوا المطعم وقعدوا على السفره .. فارس كان آخر واحد .. شاف عمته وراح صوبها مبتسم عشان يسلم عليها .. هيا صدت عنه وقطت عليه كلام جرحه ..
فارس مبتسم: هلا عميمه ..
هيا: بنت العز اللي تكلمها بالتلفون بتفرقنا ..
طالعته بنظره حقد .. فارس ابتسامته البريئه تحولت الى دموع تجمعت بعيونه .. وقف مكانه ولا تحرك .. الكل التفت على فارس بعد ما سمعوا كلام هيا .. عبدالعزيز ما عجبته الحركه من عمته .. حس بجرح اخوه .. وقف جنب فارس وحط يده على كتفه وابتسم ..
عبدالعزيز: بقولك بونايف .. ما عندها اخت تزوجني اياها .. فكره حلوه ترا .. اخوان ماخذين خوات ..
موقف عبدالعزيز هدى فارس شوي ..
فارس مسك اخوه من يده وبكل هدوء طلع من المطعم ..
الجده: حسبي الله ونعم الوكيل .. ولحقت فارس واخوه ..
بومحمد: هاي كلام ينقال يا هيا ..
الجد: انتي ما تستحين على ويهج ..
هيا بعصبيه: دافعوا عنه .. محد بينزل راسنا الارض الا هو مع هالتعبانه اللي بياخذها .. فضحنا ..
الجد: قومي روحي دارج ولا عاد اشوف ويهج ..
هيا طلعت من المطعم وهي معصبه .. فارس وعبدالعزيز طلعوا من بيت جدهم وكل واحد فيهم شايل في خاطره من اللي صار .. الجده ما لحقت عليهم .. كل منهم ركب سيارته وطلعوا بسرعه من البيت .. قعدت الجده على الارض وهي تبكي فارس ..
الجده: يا حسرتي على هالولد يا ناس ..
بومحمد بحزن: قومي يمه الله يهديج ..
الجده: هاذي اختك بكسر راسها .. حسبي الله ونعم الوكيل .. نقصت على الولد ..
بومحمد: قومي يمه نروح داخل .. لا تكدرين نفسج ..
الجده وسط دموعها: يبه شلني ماتحمل اوقف على ريولي ..
بومحمد شل امه و راح داخل .. الجد شاف منظرهم وخاف ..
الجد: شو فيها امك ؟
بومحمد: تعبانه شوي ..
الجد: سمالله عليج .. جيب ماي لامك بسرعه ..
الجده: الله ينشف ريقج يا هيا انتي ومرت اخوج .. حسبي الله ونعم الوكيل ..
الجد: ذكري ربج يا ام محمد ..
الجده: عنبو دارهم .. نقصوا على الولد .. لاهو متنهني في بيتهم .. ولا في بيتنا ..
الجد: ان شاءلله تتيسر ..
الجده: ان شاءالله ..
بومحمد جاب الماي وسقى امه .. الوضع توتر زياده من موقف هيا ..
الجده: لا تقولون لمحمد اللي صار ..
بومحمد والجد: ان شاءالله ..
الجده: حمد يبه توكل بيتك ولا تشل هم ..
بومحمد: ان شاءالله ..
الجد: الله وياك ..
الجده: الله يحفظك ..
سلم عليهم وراح بيته .. طبعا بومحمد وايد كان متضايق من اللي صار .. موقف اخته فالبدايه وبعدين الكلام الجارح اللي قالته لفارس المسكين .. اما فارس وعبدالعزيز طلعوا طيران من بيت جدهم .. راحوا بيت فارس .. عبدالعزيز كان مستغرب من الشقه اول ما دخلها ..


عبدالعزيز: شقة من ذي ؟
فارس: شقتي ..
عبدالعزيز: من متى ؟
فارس: يوم قررت اعرس جهزت نفسي ..
عبدالعزيز " الله ينولك اللي في بالك ياخوي " ..
فارس: شو تشرب ؟
عبدالعزيز: مابي شي .. عمتك غثتني ..
فارس: ما عليك من كلامها .. انا اوريك فيهم كلهم ..
عبدالعزيز: شو فيك متهدد انت ؟
فارس: يصبرون علي بس ..
عبدالعزيز الله يهديك بس ..
فارس: تعال المطبخ خل نسوي لنا شي ..
عبدالعزيز ضحك على اخوه: جوعان ؟
فارس: لا بس خل نشرب شي ..
عبدالعزيز: يلا ..
راحوا المطبخ وضبطوا لهم قهوه .. قعدوا يتقهون ويسولفون فالمطبخ ..
عبدالعزيز: فروس اول مره ادري ان ذوقك جي حلو .. الشقه حلوه وايد ..
فارس: ههههههه .. الله يسلمو محمد ولد عمي ..
عبدالعزيز يحط الفنيال على الطاوله: ليش ؟
فارس: هو اللي منسق ومختار لي كل شي ..
عبدالعزيز: زيدني قهوه فديتك .. بس ماشاءالله عليه ذوقه حلو ..
فارس يصب القهوه لاخوه: والله اول ما خذت الشقه ما فكرت أأثث الا بحضوره ..
عبدالعزيز: بس حلوه الشقه .. ملمومه وعلى قدك ..
فارس: غرفتين نوم و3 حمامات وصاله ومطبخ .. والله خوش ترتيب ..
عبدالعزيز: ان شاءالله نشوف عيالك يتراكضون فيها ..
فارس: ان شاءالله ..
عبدالعزيز: اخوي بقولك ..
فارس: قول فديتك ..
عبدالعزيز: لا تخلي كلام عميمه ولا امي يأثر فيك .. وانا اقولك اني واقف معاك لين آخر المشوار .. ودام انت تبي البنت ما عليك من حد خذها يا فروس دام راحتك معاها هي .. لا تجامل حد ولا تجبر نفسك على شي ..
فارس مبتسم لاخوه: والله طيبت خاطري بكلامك .. وانا ما راح استسلم ..
عبدالعزيز: تمسك فيها بكل ما فيك ..
فارس: والله كلك على بعضك خطير يا بوسعود ..
عبدالعزيز ضحك: ههههه .. عليك سوالف ..
فارس: بس تعرف شو اللي خابف منه ؟
عبدالعزيز باهتمام: شو ؟
فارس: اخاف انها تعافني ..
عبدالعزيز عقد حواجيه: ليش ؟
فارس: لان امك المحترمه ردت عليها ذاك اليوم وهزئتها ..
عبدالعزيز: لا حول ولا قوة الا بالله ..
فارس: وهي ماخذه موقف من ذاك اليوم .. قالت لي وانا اقول ليش طال الموضوع ..
عبدالعزيز؟ الله يهديها الولده بس ..
فارس: خلها على الله ..
عبدالعزيز: اخوي واعرفك .. قدها ..
فارس: ما قصرت ياخوي والله .. لو انت ما كنت معاي هناك كنت تهورت والله .. محد مصبرني على هالهم الا محمد ولد عمي .. بس انت فيك الخير يابوسعود ..
عبدالعزيز: انت ق***ي يا فارس ..
فارس رفع حاجب: هااا .. ليكون غرقان فالحب انت بعد ؟
عبدالعزيز: ههههه .. لا مو غرقان ..
تموا الاخوان يسولفون وفارس كان وايد مبسوط من اخوه ومرتاح حوله .. استأذن عبدالعزيز ورجع البيت .. فارس اتصل بمحمد ..
فارس: يالحب ..
محمد: ايه عليك ..
فارس: شو اخبارك ؟
محمد: تمام .. اعلومك انت ؟
فارس: طيب .. انت وين ؟
محمد: فالبيت ..
فارس: تعال نام عندي الليله ..
محمد: حاضرين يالغلا ..
فارس: احم احم .. والله اني محظوظ ..
محمد: حلاة الواحد ما يمدح جداكم ..
فارس اونه يتدلع: عاااد
محمد بصراخ: ووووع لوعت جبدي .. لاتدلع ..
فارس: ههههههه ..

[رامون]

محمد: سكر لا انجلط الحين ..
فارس: اوريك يا اسود الويه ..
فارس ومحمد: هههههه ..
فارس: انتظرك الغالي ..
محمد: مسافة السكه يا فندم ..
فارس: هههههه .. زين يلا سلام ..
سكر فارس من محمد وهو يضحك عليه .. راح خذ له شور وبعدين اتصل بمناف يسولف معاها .. في هالاثناء خالد ومريم كانوا في شقتهم الصغيره قاعدين يتابعون فلم ومندمجين معاه .. مريم التفت على خالد وهي مبتسمه .. طالعها خالد وابتسم لها ..
مريم: خالد ..
خالد: حياتي ..
مريم: خالد بقولك شي ..
خالد جابل مريم و وطى على صوت التلفزيون .. مسك يدها وباسها ..
خالد: آمريني ..
مريم مبتسمه: ما يآمر عليك العدو .. بقولك شي ..
خالد مبتسم: قولي حبيبتي ..
مريم: خالد مبروك بتستوي ابو قريب ..
خالد بطل عيونه و ابتسم لدرجة ان اسنانه بانت ..
خالد: باستوي ابو ..
مريم هوت راسها: اي حبيبي ..
خالد قام من مكانه وسجد سجود شكر .. تم يحمد ربه .. قام من وضعية السجود وحضن مريم بقوه ..
خالد: الف مبروك حبيبتي ..
مريم: فديت قلبك يا خالد ..
خالد: متى دريتي ؟
مريم: امس ..
خالد: يالظالمه وما قلتي لي الا اليوم ..
مريم: هههههه ..
خالد: تضحكين يالدلوعه ..
مريم: ههههه .. خلاص عاد قلت لك الحين ..
خالد باسها على جبهتها: فديت قلبج يا مريم .. الله يهون عليج ..
مريم: آمين .. بسألك حبيبي ..
خالد مبتسم: سألي فديتج ..
مريم: شو في خاطرك بنت ولا ولد ؟
خالد: انا احب الجنسين .. بس افضل بكري بنت ..
مريم: هممممم .. وليش يعني ؟
خالد: لان البنت حلو ادلعها .. و تعرفين فرحة اول طفل غير ..
مريم: عدل كلامك حبيبي ..
خالد: زين انتي شو خاطرج ؟
مريم: مثلك .. حلاته اول بيبي بنوته ..
خالد: ان شاءالله تؤام ..
مريم: انا لو مثل فطيم عزيز اخوي ..
خالد: ان شاءالله ..
مريم: زين شو بتسمي البنت ؟
خالد: الاسم اللي يعجبج حبيبتي .. انا ماتفرق عندي ..
مريم: هممممم .. زين فكر معاي في اسم حلو ..
خالد: همممم .. شو رايج باسم مشاعل ؟
مريم: مممممم .. لا مب عاجبني ..
خالد: زين شو رايج باسم هاجر ..
مريم مبتسمه: حلو اسم هاجر ..
خالد: والله انتي اللي احلى ..
مريم ضحكت: ههههه .. زين لو جانا ولد شو بنسميه ؟
خالد: زين ليش بس انا اختار ؟ انتي مافي بالج اسم معين ؟
مريم: حاليا لأ .. انت قول يمكن يعجبني اسم ..
خالد مبتسم: ان شاءالله .. زين شو رايج باسم ناصر ؟
مريم: حلو ناصر وغيره ..
خالد: همممم .. تصدقين ان اسم فارس عاجبني ..
مريم: وانا بعد بس فطيم اختي بتسمي فارس ..
خالد: زين واحنا ممنوع نسمي ..
مريم: ههههه .. انا ماحب اكرر الاسامي ..
خالد: اها .. زين شو رايج باسم راكان ؟
مريم: روعه هالاسم ..
خالد: خلاص اول ولد نسميه راكان ..
مريم: حلو .. راكان بن خالد ..
خالد حضن مريم بوناسه .. فرحة خالد ما تنوصف بخبر حمل مريم .. طبعا الخبر انتشر بين الكل .. بومحمد وام محمد كانوا فرحانين بهالخبر الحلو .. ام فارس وبوفارس بعد فرحوا بهالخبر الحلو .. مرت الايام ويبقى الحال على ما هو عليه .. فارس من بعد الموقف اللي صار له في بيت جده ما مر عليهم كلش .. محمد درى باللي صار وانصدم بوفارس امه قالت له .. طبعا بوفارس ما عجبه تصرف هيا اخته .. زعل منها بس ما بين لها شي .. ام فارس ما زالت مصره على موقفها .. الريم في عالم ثاني .. تتعذب عشان فارس .. واللي ذبحها زود لما عرفت ان فارس على علاقة باللي يبي يتزوجها .. الشباب ( علي / فاضل / عبدالعزيز ويوسف ) ما زالوا عايشين حياتهم بالطول والعرض ما بين ساحات الاستعراض .. العزب .. والبحر .. سلمان ما زال مصر على كلامه وحدد مصيره ومصير بنته ريما .. قراره بالهجره عن البلاد فاجأ بنات اخته .. الجوهره عايشه احلى حياة مع ابراهيم وبنتهم لولو .. هنادي حامل وعايشه حياة سعيده مع نواف .. بس هي واختها منصدمين بقرار سلمان .. ريما حبت فاطمه وأسماء بنت بومحمد وايد وقرار ابوها بالهجره وايد مزعجها .. لانها لقت الامان والاستقرار فالبلاد .. ساره زوجة محمد بعد طلاقها من محمد قاعده في بيت اهلها والحزن غلب عليها .. عيالها عندها بس محمد يشوفهم فالاسبوع مرتين ومحمد حالته مو احسن منها .. بس لانه وصل لمرحله ماقدر يصبر فيها على ساره وكلامها الجارح .. جاسم وسلطان واحمد وفهد ما زالوا عايشين حياة العبط والاستعباط .. مناف وامها واخوانها تيار حياتهم ما زال هادئ .. فاطمه ويوسف عايشين احلى ايام حياتهم بفرح وحب و وناسه ..
بعد مرور اسبوع على الاحداث اللي صارت ..
فارس ومناف عصافير الحب عايشين حب مافي مثله رغم كل المصاعب اللي واجهتم واللي يدرون انها بتواجهم فالمستقبل .. فارس ومحمد كانوا قاعدين فالقهوه يشيشون ويشربون شاي ..
فارس: الحمدي ..

[رامون]

محمد: عيونه يا ابوالفوارس ..
فارس: انا قررت اكلم امي وللمره الاخيره .. مثل ما وصتني يدتي ..
محمد مبتسم: متى بتروح تكلم امك ؟
فارس: بكره العصر ..
محمد: مرني بجي معاك ..
فارس بوناسه: والله حمودي .؟
محمد مبتسم: اي بجي معاك وبكلمها .. انت تعرف شكثر امك تغليني ..
فارس: عدل كلامك .. ماتقصر حمودي والله ..
محمد: افا عليك يا ابو الفوارس .. اذا انا ما وقفت معاك .. بوقف مع من .. تستاهل يالغالي ..
فارس بوناسه: ايه عليك يا حمودي .. والله انك رجل والرجال قليل ..
محمد: زين بكم ؟
فارس: ههههه .. احلف انت بس ..
محمد: ههههه .. حبيبي مافي شي فري هالايام ..
فارس ومحمد: ههههههه ..
فارس: زين قوم خل نحرك ..
محمد: تو الناس يا ريال ..
فارس: متصله لي ومارديت عليها ..
محمد بخبث: قول جي ..
فارس: ههههه ..
طلعوا من القهوه وسلموا على بعض .. كل منهم ركب سيارته واتجه في طريقه .. فارس اتصل بمناف وتم يسولف معاها ..
فارس: يا قلبه ..
مناف وهي تلعب بشعرها: هلا حبيبي ..
فارس: خاطري اشوفج ..
مناف: ممممم ..
فارس: عشان خاطري يلا ..
مناف مبتسمه: زين حبيبي .. بس مو الحين ..
فارس: متى عيل ؟
مناف: تو الناس الساعه 8 ونص .. للحين قاعدين ما ناموا ..
فارس: يعني امرج الساعه 11 ؟
مناف: زين ..
فارس: حلو ..
مناف بدلع: فارس ..
فارس: يا قلبه انتي ..
مناف: تجيب لي معاك الكوكتيل اللي جبته لي ذيك المره .؟
فارس: عيوني لج .. انتي تآمرين امر ..
مناف: حياتي والله ..
تم فارس يسولف مع مناف وبعدين راح الحلاق ورجع البيت خذ له شور .. وعلى الساعه 11 طلع من البيت رايح صوب بيت مناف .. اتصل لها اول ما وصل فريجهم .. ردت مناف بوناسه ..
مناف: هلا حبيبي ..
فارس: عمره انتي ..
مناف: وينك ؟
فارس: توني داش فريجكم ..
مناف: اها ..
فارس: يلا طلعي ..
مناف: ان شاءالله ..
طلعت مناف عند الباب .. طلت من الباب وشافت فارس وهو ينزل من السياره ومنزل الكيس معاه .. اول ما قرب صوب باب البيت طلعت له .. لما شافها فارس واقفه عند الباب مشى بخطوات متقاربه وسريعه ناحيتها ..
فارس: وحشتيني يا قلبه ..
مناف منزله راسها: فديتك ..
فارس طلع الكوكتيل من الكيس ومد يدها لها ..
فارس: تفضلي يا اميرة الاميرات ..
مناف مبتسمه: مشكور حياتي ..
فارس: بالعافيه .. شو اخبارج حبيبة قلبي ؟
مناف: الحمدلله ..
فارس: فديت ويهج .. شحلاتج صايره يوم تاكلين وتحافظين على عمرج .. ورده فديت ويهج ..
مناف كانت منزله راسها وما ردت عليه .. فارس قرب منها ومناف بدت تتوتر .. مد يده وحطها على الطوفه وتم يطالع مناف .. مناف تخاف من حركات فارس هاذي ..
فارس بهمس: وحشتي قلبي ..
مناف كانت تتنفس بسرعه ومنزله راسها ..
فارس: ردي علي يا قلبه .. ما وحشتج ؟
مناف هزت راسها بالموافقه بدون ما تتكلم ..
فارس: خلاص ما بقى شي وبنكون حلال لبعض .. تعرفين اول ما املج عليج شو بسوي فيج ؟
مناف بصوت واطي: شبتسوي ؟
فارس: باعض خشمج ..
مناف رفعت راسها وضحكت برقه: هههههه ..
فارس مبتسم: فديت هالضحكه .. بس انتي على بالج اني اتمسخر .. ترا اتكلم جد ..
مناف: ابيه ليش ؟
فارس: كيفي .. زوجتي و خاطري اعض خشمها ..
ماف بدلع: عااااد .
فارس رص على اسنانه بقوه: اموت في دلع ..
مناف عضت شفتها وفارس انتبه للحركه .. تم يطالع شفايفها وقرب منها اكثر .. كان شوي ويحتك جسمه بجسمها مناف رفعت يدها وكأنها بتحط يدها عند صدره .. بس فارس ما قرب اكثر .. لما شاف يدها قرب منا اكثر ويدها لامست صدر فارس .. مناف نزلت يدها بسرعه وحاولت انها ترجع ورا بس مافي مفر .. الطوفه وراها وفارس مجابلها ..
مناف: فارس الله يخليك ابتعد شوي ..
فارس قرب ويهه من ويها: ليش ؟
مناف صدت على يمينها: بس ..

[رامون]

فارس قرب ويهها صوبها وهي صاده: قولي لي ليش ؟
مناف صدت يسار: عاد فارس ..
فارس رجع خطوه: زين خلاص ابتعدت ..
مناف: زين خلاص لازم اروح حبيبي ..
فارس: بدري يا قلبه ..
مناف: بكره بداوم ..
فارس: هممممم .. عذر يعني ..
مناف بدلع: عاااد فارس ..
فارس: يذبحني الدلع .. شكلي باخطفج من الحين ..
مناف مدت بوزها: لا لا لا ..
فارس يقلدها: ليش لا لا لا ؟؟
مناف: لاتعيب علي ..
فارس: ما عيب يا قلبه انتي ..
مناف: لاتعيب ولا بزعل منك ..
فارس: لا يبه كل شي ولا زعلج يالغاليه ..
مناف بخجل: فديت قلبك ..
فارس: زين حياتي .. يلا روحي داخل ..
مناف: ان شاءالله ..
فارس: باتصلج انا اول ما اركب السياره ..
مناف: زين ..
رجع فارس خطوتين ورا وفتح لها الباب .. دخلت وهي مبتسمه .. وقفت عند الباب تبي تسكره ..
فارس: روحي داخل انا بسكر الباب ..
مناف مبتسمه: ان شاءالله ..
مناف عطت فارس ظهرها وراحت داخل .. فارس تم يراقبها لين دخلت داخل .. سكر باب بيتهم وركب السياره .. اتصل بمناف ..
مناف: هلا ..
فارس: حبيبتي شربتي العصير .؟
مناف: لا للحين ..
فارس: ليش حياتي .. شربيه قبل ما يبرد ..
مناف مبتسمه: ان شاءالله ..
تم يسولف معاه لين وصل بيته .. استأذن منها وتركها ترتاح عشان الدوام .. دخل الشقه وهو يفكر في مناف وحياته معاها .. خذ له شور ينعنشه وينشطه.. بعد الشور المنعش .. صلى ركعتين وتم يدعي ربه فيهم .. انسدح على الكرسي وتم يطالع التلفزيون لحد ما غفت عينه ونام ..
يوم جديد يطل على ابطالنا .. نساهم هموم الامس استعداداً لهموم يوم جديد ..
طبعا اليوم هو يوم مهم بالنسبه الفارس .. كانت الساعه 11 ونص .. فارس اتصل بمحمد اللي كان توه طالع من المكتب .. شاف التلفون ورد على فارس وهو مبتسم ..
محمد مبتسم: هلا والله ..
فارس تنهد: آآآه .. هلا حمودي ..
محمد: سمالله عليك من الآه ..
فارس: متوتر والله ..
محمد: ههههه .. بسيطه ان شاءالله ..
فارس مبتسم: ان شاءالله .. زين انت وين الحين؟
محمد: فالبيت ..
فارس: زين متى نمر الوالده؟
محمد: هي موجوده الحين فالبيت ؟
فارس: اي ..
محمد: زين باخذ لي شور سريع وبمرك ..
فارس: لا انا بمرك .. عطني الو اول ما تجهز ..
محمد مبتسم: من عيوني يا عيوني انته ..
فارس: هههههه .. فديت عيونك يا حمودي ..
محمد: سلام حبيب قلبي ..
فارس: سلام الغالي ..
سكر فارس وهو مستانس بس متوتر بنفس الوقت .. اما محمد فكان فرحان لفارس .. دخل خذ له شور .. لبس وتجهز على ماوصل فارس بيتهم .. اتصل فارس بمحمد ومحمد نزل له .. ركب الرنج والتفت على فارس مبتسم ..
محمد: يه يه يه فروسي شهالزين ..
فارس بعبط: احرجتني يا رجل ..
محمد: حلاه عليك والله نت كوووول .. وينها تشوفك جي ..
فارس: اصلا هالكشخه مالت امس ..
محمد: هاااا .. وانا اقول ..
فارس: هههههه .. زين يلا نروح البيت ..
محمد: يلا حرك ..
حركوا من بيت بومحمد متجهين لبيت بوفارس .. دقات قلب فارس تسارعت لما قربوا صوب بيتهم ومحمد لاحظ التوتراللي بان على فارس .. دخلو الحوش وفارس وقف فتره وحس انه من زمان مادخل هالحوش .. محمد ترك فارس على راحته .. تم ساكت وينتظره يبند السياره وينزل .. فارس كان يهيئ نفسه ويفكر .. خذ نفس عميق والتفت على محمد وعلى ويهه ابتسامه خوف .. محمد حس بالتوتر وفارس عور قلبه .. اول مره في حياته يشوف فارس مكسور جي .. واول مره يشوف هالابتسامه على ويهه ..
فارس: يلا حمودي ..
محمد بخوف: توكلنا ..
فتح محمد باب السياره وفارس كان يراقبه .. فارس كان شابك ايدينه ببعض .. حاول انه يبطل ايدينه عن بعض بس ماقدر حس بثقل يدينه .. غمض عيونه بقوه وحط يده على مقبض الباب .. فتح باب السياره ونزل بهدوء .. التفت عليه محمد ..
محمد: ليش ما بندت السياره ؟
فارس سكر باب السياره ومارد عليه .. محمد استغرب من فارس وزاد توتره .. مشوا ثنين متجهين لباب الصاله .. فتح فارس باب الصاله و وقف عند الباب وحس ان بيتهم تغير .. دخل فارس و وراه محمد .. قعد فارس على الكرسي يطالع الصاله وحط يده على صدره .. محمد كان يراقب فارس وخايف عليه ..
فارس: يلا نروح نشوف امي ..
محمد: زين ..
طلعوا من الصاله متجهين فوق صوب غرفة ام فارس .. فارس كان حاس نفسه غريب وسط بيتهم اللي تربي فيه .. كل ماقربوا من غرفة امه بطئ خطواته .. ومحمد كان مخليه على راحته .. قربوا عند غرفة ام فارس .. فارس حط يده على مقبض الباب ولاتحرك .. توه بينزل المقبض .. الا ام فارس تفتح الباب .. تفاجأت باللي واقف جدامها يطالعها بكل برأه .. ام فارس اختلطت مشاعرها لما شافت فارس .. مشاعر الغضب على مشاعر الشوق .. قرب منها فارس بيبوس راسها .. بس ام فارس كابرت وابتعدت عنه .. فارس ما استغرب هالحركه وقف مكانه يطالعها اما محمد تعجب من ام فارس .. واستغرب قسوتها ..
فارس: شحالج يمه ..
ام فارس صاده: الحمدلله ..
محمد: شحالج مرت عمي .؟