{ نهاية حبك إعدامي } رووووووووووعه

[رامون]

فاطمه مندمجه مع الكمبيوتر: هلا حبيبي ..
يوسف يلعب بشعرها: تذكرين البحث ..
فاطمه التفت عليه مبتسمه: كان احلى بحث ..
يوسف حضنها بشوق: فديت قلبج يا فطيم .. انتي احلى صدفه في حياتي ..
فاطمه ويها صار احمر: حياتي يا يوسف ..
يوسف: تبين اساعدج في البحث حبيبتي ؟
فاطمه: تسلم حبيبي .. خلاص ما بقى لي شي وبخلصه .. اسوي لك قهوه حبيبي ؟
يوسف: ابي شاي .. القهوه بتسهرني ..
فاطمه حطت الكمبيوتر على الطاوله: ان شاءالله ..
راحت صوب مطبخهم الصغير وسوت ليوسف شاي .. يوسف راح صوبها .. سحب الكرسي وقعد يسولف معاها ..
يوسف: حليله فارس اخوج .. نفسيته متغيره من بعد الملجه ..
فاطمه مبتسمه: اي واتيد تغيرت نفسيته فديته ..
يوسف: يستاهل بونايف .. عقبال عزوز وباقي الشباب ..
فاطمه: ان شاءالله ..
يوسف: ما بقى على سفر فاضل شي .. والله بشتاق له
فاطمه: غريب فاضل ..
يوسف: ليش؟
فاطمه: كان مستانس فالجامعه هني .. ليش غير رايه وقرر يكمل برا ؟
يوسف: الولد فكر صح ..
فاطمه: شلون ؟
يوسف: يعني هو راح يكمل برا لانه مخطط على كم شركة فالبلاد لهم مستقبل كبير ..
فاطمه: والله مب هين الفضلي ..
يوسف: تربية بومحمد والله ..
فاطمه: فديته عمي والله ..
يوسف وفاطمه تموا يسولفون وبعين فاطمه راحت تكمل البحث ويوسف تم يتابع فلم على التلفزيون ..
مريم وخالد كانوا نايمين بسلام في شقتهم الصغيره .. مريم حست ان حد يناديها .. فتحت عيونها بتعب ..
مريم: من ؟
الجنيه بهمس: مريم .. تعالي ..
مريم فركت عيونها: من ؟
قامت من السرير رايحه صوب مصدر الصوت .. طلعت من الغرفه وشافت بنت صغيره واقفه اطالعها .. تمت مريم اطالعها باستغراب .. كان حجم البنت وايد صغير .. شعرها كيرلي اسود .. وعيونها بنيه فاتحه .. لون بشرتها ابيض مايل للسمار شوي .. كانت لابسه فستان ابيض .. وقفت البنت اطالع مريم مبتسمه .. مريم كانت تحاول انها تكلمها بس حست بالخوف .. لان البنت فجأه صار لونها ابيض و بدت عدسة عيونها توسع بشكل مخيف .. ولون عدست عيونها تغير من البني الفاتح للاسود .. ويه البنت صار طويل وبانت عليه بعض الخطوط السوده.. مريم تنفست بخوف ورجعت خطوتين ورا .. البنت ويها رجع مثل هو .. عيونها رجعت عاديه وعدست عيونها رجعت للون البني رفعت حاجب وابتسمت .. مدت يدها لمريم ..
مريم: من انتي ؟
الجنيه: ماما انا خايفه ..
مريم حطت يدها على حلجها: ها ..
الجنيه: ماما انا خايفه لميني ..
مريم خافت اكثر .. كان صوت البنت صوت وحده كبيره بجسم طفله صغيره .. قربت من مريم وحضنتها .. مريم باعدت البنت عنها من الخوف .. البنت طالعت فستانها ورفعت راسها طالعت مريم اللي كانت تراقب بخوف .. مريم شافت بقع دم على فستان البنت الابيض .. البنت مدت ايدينها لمريم توريها الدم اللي بيدها .. مريم خافت وصرخت
مريم: آآآآه ..
خالد قعد من النوم على صراخ مريم ..
خالد: شو فيج مريم ..
مريم صاحت: دم يا خالد .. دم ..
خالد شغل الليت: اي دم حبيبتي ؟
مريم وسط دموعها: دم دم ..
خالد رفع اللحاف عن مريم .. وشاف الفراش كله دم .. خاف عليها ..
خالد: مريم شي يعورج ؟
مريم: جسمي كله يعورني .. الحق علي يا خالد ..
مريم تمت تصيح وكانت ترجف من الخوف .. وتحس بألم فضيع في جسمها ..
خالد لبس ثوبه وحط على مريم عبايتها ..
خالد: قومي اخذج المستشفى ..
مريم بألم: ابي امي ..
خالد: ان شاءالله باتصل لها .. قومي حبيبتي ..
طلع خالد من البيت شايل مريم اللي غرقت بدمها .. ركب السياره واتجه للمستشفى .. اتصل في امه وبلغها انه رايح للمستشفى .. طبعا ام محمد على طول اتصلت بيت بوفارس وراحوا المستشفى .. فارس ومحمد وفاطمه راحوا المستشفى اول ما سمعوا بالخبر ..

خالد وصل المستشفى ومريم فقدت الوعي فالسياره .. خذوها الممرضات لغرفة الكشف .. خالد كان متوتر وخايف على مريم .. وصلت امه وشافت حالته .. خالد اول ما شاف امه راح صوبها والخوف بعيونه ..


ام محمد: شو صاير يبه ؟

[رامون]

خالد: مادري .. قعدت من النوم على صراخ مريم .. وبعدين شفت الدم على ملابسها وفالسرير ..


بومحمد: سمالله عليها .. شمنه هالدم ؟


خالد: مادري .. وصلت المستشفى وهي مغمى عليها .. خايف عليها يمه ..


ام محمد والخوف بعيونها: لا يبه ما عليها شر ان شاءالله ..


ام فارس وريلها وصلوا المستشفى .. اول ما شافوا خالد راحوا صوبه ..


ام فارس تمسح دموعها: شو فيها مريم ؟


ام محمد: ما عليها شر ان شاءالله ..


بوفارس بتوتر: وينها ؟


بومحمد: داخل ..


ام محمد خذت ام فارس على صوب وقعدت تهس ..


ام محمد: بنتج شكلها طرحت اللي في بطنها ..


ام فارس حطت يدها على حلجها وصاحت بصمت ..


ام فارس: لا حول ولا قوة الا بالله .. بس شلون ؟


ام محمد: مادري .. بس يقول خالد قامت من النوم تتألم وتصرخ وملابسها كلها دم ..


ام فارس: لا شكلها طرحت .. بس الله يستر ما تصير لها مضاعفات ..


ام محمد: بأذن الله ما عليها شر ..


ام فارس: ان شاءالله ..


فارس وفاطمه ومحمد وصلوا .. فاطمه راحت صوب امها ومرت عمها ..


فاطمه: شو فيها مريم ؟


ام محمد: ما عليها شر .. بس ننتظر الدكتور يطلع ..


فارس: خالد شو فيها مريم ؟


خالد تنهد بحزن: والله مادري يا فارس .. بس كانت وايد تعبانه ..


فارس: الله يشفيها ..


محمد: شفتوا الدكتور ؟


بوفارس: لا للحين ..


تموا ينتظرون فتره طويله وما لقوا من يسألونه عن مريم .. من دخلوها الغرفه ولا شافوا الدكتور .. كانت الساعه 1 بالليل .. كل ما راحوا يسألون يطلبون منهم ان ينتظرون الدكتور .. على الساعه 3 ونص .. طلع الدكتور من غرفة الكشف .. والكل راح صوبه ..


خالد: طمنا دكتور .. شو اخبارها زوجتي ؟


الدكتور: انت زوجها ؟

[رامون]

خالد: اي نعم ..


الدكتور: تفضلوا يا جماعه ارتاحوا ..


بوفارس: طمنا يا دكتور ..


الدكتور: طبعا البنت فقدت الجنين ..


خالد غمض عيونه بقوه .. حط يده على راسه ورجع براسه على ورا ..


بومحمد: شو اللي خلاها تفقده ؟


الدكتور: طبعا هي مهتمه بصحتها بشكل جيد .. بس نفسياً لأ .. اما خوف او توتر اللي خلوها تفقده ..


خالد: حسبي الله ونعم الوكيل ..


الدكتور: جسمها وايد تعبان حاليا .. ونفسيتها بتتعب اكثر لما تعرف انها فقدت الجنين .. اللي ابغيه منكم انكم ما تتركونها بروحها .. ولازم تهتم بصحتها .. واتمنى انها ما تحاول انها تحمل في هالفتره .. يعني على الاقل بعد 4 او 6 شهور ..


خالد: ان شاءالله ..


الدكتور: الحين بياخذونها غرفة خاصه .. وتقدرون تشوفونها بكره الصبح .. لانها ما راح تحس فيكم لو دخلتوا عليها الحين ..


بومحمد: جزاك الله خير يا دكتور ..


الدكتور: سلامات وماتشوفون شر ..


خالد وبوفارس: الله يسلمك ..


راح الدكتور والحريم راحوا صوب الريايل ..


ام فارس: خالد يبه ابغي اشوف بنتي ..


خالد: ان شاءالله عمتي ..


فاطمه: وانا بعد ابي اشوف اختي ..


خالد: يلا يبه ..


الحريم راحوا مع خالد صوب غرفة مريم .. تطمنوا عليها ورجعوا عند الشباب ..


ام فارس: انا بقعد عند بنتي .. انت توكل يا محمد ..


خالد: لا عمتي .. انا بتم هني .. انتواما قصرتوا .. روحوا ارتاحوا ..


بوفارس: عدل كلامه يا مزنه ..


ام فارس: اللي تشوفه ..


فارس: فطيم يلا ..


ام فارس اول ما سمعت صوت فارس التفت عليه وكان الشوق باين عليها .. فارس ما نتبه لنظرات امه ..


فاطمه: زين فارس يلا نروح ..


بومحمد: يلا يا منيره ..


فارس: خالد بوصل فطيم وبرجع لكم ..


خالد: ان شاءالله .. التفت خالد على فاطمه .. فطيم بكره ابيج تروحين الشقه وتاخذين اغراض حق مريم ..


فاطمه: ان شاءالله ..


خالد مد يده بالمفتاح: هاي مفتاح البيت ..


فاطمه: ولا يهمك ..


خالد: جزاج الله خير ..


كانت الساعه 4 لما بوفارس وام فارس وام محمد وبومحمد وفارس وفاطمه غادروا المستشفى .. خالد ومحمد تموا فالمستشفى .. فارس وصل فاطمه البيت ورجع لهم المستشفى .. فارس مر وخذ للشباب كرك ..


فارس: ها شو اخباركم ؟


خالد: الحمدلله .. والله زين سويت يا فارس ..


محمد: خل الواحد يبل ريقه شوي ..


خالد: جزاك الله خير ..


فارس: بالعافيه ..

[رامون]

بيت بومحمد وهيا طلعوا على الساعه 6 ونص بعد ما تطمنوا على مريم .. تمت فاطمه وايمان وام فارس فالغرفه مع مريم .. مريم كانت مبسوطه بلمة الاهل حولها .. على الساعه 7 انفتح باب الغرفه .. دخل فارس مبتسم .. طاحت عينه على امه .. دخلت مناف وراه وهي تنزل الغشوه عن ويها .. فاطمه ومريم كانوا متوترين بالمواجه اللي بتصير بين مناف وامهم .. ام فارس صدت الصوب الثاني وبدت تتنرفز ..
فارس: السلام عليكم ..
الكل: عليكم السلام ..
مناف كانت منحرجه اول ما شافت ام فارس .. سلمت بهدوء وهي داخله .. فاطمه وايمان استقبلوها بالاحضان وبفرح .. ام فارس كانت متعجبه من استقبال بناتها لزوجة فارس اللي للحين ما تعرفت عليها ..
فاطمه: هلا وغلا ..؟
مناف: هلا حبيبتي
فاطمه: شلونج حبيبتي ..
مناف: طيبه .. اخبارج ؟
فاطمه: طيبه ..
ايمان: شلونج يا قمر ؟
مناف: الحمدلله فديت قلبج ..
ايمان: تعالي سلمي على امي ..
فارس تم يطالع ايمان وكان خايف على مناف .. فاطمه ومريم توتروا وكانوا يترقبون اللقاء بخوف .. مناف راحت صوب ام فارس وهي منزله راسها ومتوتره .. ايمان كانت مبتسمه وتقدم مناف لامها ..
ايمان: يمه هاذي مناف مرت فارس اخوي ..
ام فارس اول ما تلاقت عيونها بعيون مناف حست ان كل الغضب اللي فيها راح .. خذت نفس عميق و قامت من مكانها ..
مناف: شلونج عمتي ؟
ام فارس: هلا بنتي .. شحالج انتي ؟
مناف: طيبه الحمدلله .. تستاهلين سلامة مريم ؟
ام فارس مبتسمه: الله يسلمج يمه .. الشر ما يجيج ..
الكل استغرب من ردة فعل ام فارس .. واولهم فارس .. مناف طبعا ما كانت خايفه من ام فارس لانها ما كانت تدري باللي صار قبل ما تتزوج فارس .. كانت مستحيه من ام فارس لانها اول مره تشوفها من بعد الملجه .. مناف اتجهت صوب مريم وسلمت عليها ..
مناف: الحمدلله على السلامه يا مريم .. معوضه حبيبتي ..
مريم والدموع ملت عيونها: الله يسلمج حبيبتي .. والشر ما يجيج ان شاءالله ..
مناف: والله خفت عليج لما قالي فارس انج تألمتي وايد ..
مريم تنهدت: آآه .. والله تألمت وايد يا مناف .. لدرجة اني فقدت الوعي وانا فالسياره ..
مناف برقه: الف الحمدلله على سلامتج حبيبتي ..
مريم: تسلمين يا حبيبتي ..
ام فارس: ايمان قومي صبي شاي لمرت اخوج ..
ايمان مبتسمه: ان شاءالله ..
فارس وفاطمه كانوا يطالعون بعض ومستغربين ..
ام فارس: مناف يمه امج ما جات ؟
مناف التفت على ام فارس وهي مبتسمه: امي قاعده مع اخواني .. ماقدرت تجي ..
ام فارس: ما تشوف شر .. قولي لها انا ابي امرها هالاسبوع ..
مناف: حياج الله اي وقت .. ببلغها ان شاءالله ..
ام فارس: الله يحيج ..
فارس رن جواله وكان محمد ولد عمه اللي متصله .. شاف التلفون ورد وهو طالع من الغرفه .. الحريم فالغرفه كانوا ياخذون اخبار بعض .. وام فارس كانت مبسوطه على مناف .. فارس كلم محمد وقاله اللي صار ..
محمد: من صجك فروس ؟
فارس: ليكون انا حلمان .. حمود مو صدق اللي صار .. تدري لما شفت ايمان تقدم مناف لامي خفت عليها . وكنت بسحب ايمان من شعرها وبصفقها .. بس اللي وقفني ردة فعل امي لما سلمت عليها مناف .. كانت مبسوطه وسلمت عليها ..