يلي بدو يتعلم فن اصول الطبخ مالكم غير ريماس وابو عمر مع شهادة تخرج بشطارة !!

[ريماس]

اليوم طبقنا الحلو هو بلحات
طبعا انتو بتعرفو شكل البلح هي عبارة رطب نصو مستوي ونصو لاء يعني بيكون لونين
نحنا رح نعمل حلو على شكل بلح طريقتا سهلة وطيبة ..

حلى البلحات

المقادير :
باكيت ونصف بسكويت شاي اولكر او اي نوع بسكويت سادة
نصف اصبعة زبدة
3 شكولاتة مارس اذا مافي تقدري تجيب بدالها اي شكولاتة تشبه شكولاتة مارس
حليب نستلة المكثف المحلى
1 ملعقة كاكو بودرة

الطريقة :
1- يطحن البسكويت ناعما..
2-تسيح الزبدة والمارس في حمام مائي
(وطريقة الحمام مائي شلون ؟؟ بقلكن شلون يلي مابيعرف ..
بتجيبي قدر عليها شوية ماء
وبعدين تحطي فوق القدر صينية او صحن يكون فاضي
بس تغلي المي رح تلائي البخار عم يجي تحت الصحن
انتي بتكوني حاطة فوق الصحن او صينية زبدة ومارس
ضلي حركيها ماتحسي إلا ودابت وساحت بسبب البخار )
3- يعجن البسكويت بالزبدة والمارس ويضاف الحليب المركز المكثف المحلى لحتى يصير عجين متماسك ..
4- تؤخذ ربع الكمية من العجين وتعجن بالكاكو ..
5-تشكل على نفس شكل البلح نصف ابيض ونصف تاني كاكو
6- تقدري تاخدي ترس رطب وتحطيها عالحلو مشان يلي يشوفها يفكرها رطب ههههه
7-توضع في ورق التقديم

واي استفسار انا جاهزة

[ريماس]

الحلا الدبلوماسي

المقادير :
4 باكيت دريم ويب
كاس حليب سائل بارد
كاس حليب بودرة
ملعقة نسكافيه
2ملعقة كاكاو وبودرة
كيكة بالشكولاتة (بيتي كويكر او غيرها) او تعملي انتي كاتو شغل ايدك مافي مشكلة


الطريقة :
1- يعمل الكيك كما هو موضح في الكرتون ..
2- بعد ان يبرد يفتت لكيك
3-يخلط الدريم ويب والحليب والنسكافيه والكاكو في المضرب الكهربائي الى ان يصبح مثل الكريمة .
4-تحضر كاسات او صينية بايركس وتوضع طبقة من الكيك مقدار 2 سم ثم طبقة من الكريمة وهكذا الى ان تنتهي الكمية
طبعا لازم تكون اخر طبقة هي الكريمة
5-تزين بشكولاتة جالكسي او اي نوع شكولاتة سادة المبشورة على حسب الرغبة

وصحة وهنا

تقريبا هيك بيكون شكلا

[ريماس]

عدنا بعد غياب طويل بعتزر عن التاخير
اليوم وصفتنا هي كيكة الخشب طبعا هي الكيكة من الز انواع الكاتو وحطتلكن الوصفات والطريقة بالصور من اعمالنا
سويناه وقت حفلتي في الخطوبة وعرضتا عليكن هون اتفضلو الخطوات بالصور

كيكة الخشب


المقادير :



-مقادير الكاتو:

-3 بيضات

-كاسة كبيرة زيت

-كاسة كبيرة حليب سائل

-كاسة كبيرة سكر

-فانيلا

-كاسة كبيرة دقيق + ملعقة كبيرة باكنج باودر

-مربى المشمش




مقادير خلطة الوش :

-3 ملاعق كبيرة سكر
-كاسة حليب سائل
-ظرف كريم كراميل




طريقة الكاتو :

- نضع في الخلاط البيض والسكر والحليب والزيت والفانيلا ونخلطها جميعا في الخلاط جيدا كما في الصورة ..




- يوضع على الدقيق ملعقة باكينج باودر ويقلب جيدا ..
- يوضع الدقيق بالتدريج في الخلاط ويخلط (طبعا شغلي الخلاط وفتحي الغطا وحطي معلقة معلقة لبين تخلص كمية الطحين )
-الصواني بتجيكي 3 احجام كبيرة ووسط وصغيرة هالمقادير بتنفع للصينية الصغيرة .. وبنصحك تعمليا بالصينية الصغيرة كتجربة وبداية الك ..



- خلطة الكاتو بتقسميها على 3 كاسات متساوية او اي غرض المهم تتساوى الطبقات كما في الصورة التالية :



- ندهن الصينية من القاع فقط .. الجوانب لاتدهنيها نحنا بدنا الكاتو يلزق بالجوانب ورح اقلك السبب تحت ..
-نضع اول كاسة من الخلطة بالصينية ورح تكون هي الطبقة الاولى ..



ثم نضعها في الفرن على نار عالية حتى تستوي وعادي لو فتحتي الفرن كل شوي لانو هي طبقة رقيقة مارح تتأثر .. وخليكي جنب الفرن لانو خلال 10 دقايق بيستوي مابدو كتير ..

- بس شفتي الجواني احمرت طفي النار من تحت وشعليه من فوق بحيث يصير لونا اشقر ..

- طالعي الصينية من الفرن وتركيها خمس دقايق تهدا شوي بعدو دهني على وشا مربى المشمش طبقة خفيفة بتعطيا طعم رائع كتير ...

- فوق المربى بتحطي الكاسة التانية من خليط الكاتو وبترجعي بتحطيا بالفرن .. بس هالمرة مابتشعلي الفرن من تحت ..بتشعليه من فوق بس وعلى نار كتير واطية ضروري تنتبهي تكون النار على اوطى الشي مشان مايحترق الوش ولسا ماأستوى الكاتو
-بياكل شي نص ساعة واكتر لبين يستوي.. عملي عنقود العنب لبين يستوي هههه

- بس شفتي الوش صار اشقر كمان ..طبعا بقصد اشقر غامق مو فاتح بيكون استوى معناتو بتطالعيه من الفرن وبتتركيه يهدا كمان شوي بعدو بتدهني الوش بالمربى ..

- بتحطي الكاسة التالتة من خليط الكاتو فوق الطبقة التانية وبتحطيه بالفرن كمان ماتشعلي من تحت بس من فوق .. وكمان بتستني عليه شغلة نص ساعة وهي صورة بعد ماخلصت ال 3 طبقات وهيك لازم يكون لونو في كل الطبقات..



- هالمرة بس يشقر من فوق مارح تدهنيه مربى رح نحطلو خلطة الكريم كراميل وطريقتها كالتالي :



طريقة عمل خلطة الكريم كراميل :

- نضع في طواية 3 ملاعق السكر ونذوبها حتى يصير لونها بني .



- نضع فوقها كاسة حليب سائل ورح تشوفي انو السكر جمد وصار حجر .. عادي رح يدوب كلو بالاخر بس تغلي الخلطة وخليكي عم تحركيا ..
- نضع ظرف واحد كريم كراميل فوق الحليب بعد ذوبان السكر ونحركها جيدا ونتركها تغلي لمدة خمس دقائق ..



- منحط الخلطة هي فوق الكاتو بس مو دفعة وحدة .. بالمغرفة (الشنشاية يعني ) لانو ازا دفعة وحدة رح يتشقق الكاتو وينزل الخليط لتحت ..
- ملاحظة: نحنا قلنا بدنا جوانب الكاتو تلزق بالصينية مشان خليط الكريم كراميل ماينزل من الجوانب ..

-بعد ماتحطي خلطة الكريم فورا حطيا بالفريزا لانو فورا رح تجمد الخلطة مع مراعاة الصينية تكون في سطح املس
مشان مايطلع طرف الو كريم كراميل وطرف لاء









وهيك شكلا بعد التقطيع








- هون بقا هي الاكلة لو عملتيا قبل بيومين من الحفلة وجهزتيا مابيصرلا شي بس تحطيا بالفريزا شرط وتتركيا لوقت التقديم .. خلال خمس دقايق بتحل

طيبتا انو تتاكل باردة عالاخر انا علطول بعملا وبحطا بالفريزا وبس حدا طب علينا فجأة بتكون هي جاهزة بطالعا من الفريزا لبين اعمل القهوة بتكون حلت عالاخر وبتضل بيردة

وريتو الف صحة وهنا وان شا الله تكون وضحت الخطوات واي سؤال انا جاهزة ..

[ريماس]

كمان هي وقت حفلتي عملناه صورناه ورح احطلكن ياها هون مشان تعرفو الخطوات

حلى عنقود العنب


المقادير :




- 4 كيس شوكولاتة مالتيزرز.
- 1 ونص بسكويت شاي كبير ويطحن ..
- نص علبة قشطة .
- نص علبة حليب مكثف محلى .
- كاكاو بودرة لبين يصير لون العجين بني غامق .
- شوكولاتة سائلة هيرشي ..







الطريقة :

- توضع جميع المقادير ماعدا شوكولاتة مالتيزرز وتعجن جيدا باليد حتى تصبح عجينة متماسكة يسهل تشكيلها..



وازا لاحظتي العجينة عم تلزق كتير زيدي بسوكيت مطحون .. وازا لاحظتيا سميكة كتير صعب تشكيلا ضيفي شوي من حليب مكثف محلى .. يعني انتي حسب ماتشوفي العجينة بتحطي الاضافات ..

يخرب عقلي كانو نسيت اصور العجينة

- تاخدي حبة من شوكولاتة مالتيزرز وتغلفيها بالعجينة السابق ذكرها وعمليها متل الكرات ..
-صفيها على شكل مثلث بصحن التقديم وتحطي فوقا طبقة تانية ..
- جيبي قطعة ورق عنب غسليا منيح ونشفيا وحطيا منظر فوق الكرات ..
بتقدري تعمليا قبل بيومين وتغلفيا اهم الشي بكيس نايلون .. وقبل التقديم بترشي عوشا شوكولاتة سائلة هيرشي للزينة وازا ماعندك بتحسني تستغني عنها ..

وهيك رح يصير شكلو بالاخر









وريتو صحة وهنا وان شا الله تنبسطو احلى بسطة

تحيتي الك وللجميع