الحين برجع معاكم شوي لورا .. لما بو فارس كان رايح يجيب جاسم من صوب الحريم .. كان فارس يتكلم في الجوال ومندمج ولا يدري باللي حوله .. كان يكلم مناف ومندمج معاها بالسوالف ..
كان قاعد بين الشباب فالميلس ورن جواله .. وكان حاط لمناف نغمه خاصه في الجوال .. وكانت النغمه ( عالي مستواه ) .. ابتسم لما سمع الرنه لانها مخصصه لمناف .. يعني يرد من غير ما يشوف الرقم
فارس: مراحب ..
مناف: السلام عليكم ..
فارس: عليكم السلام .. هلا والله
مناف: شخبارك فارس؟
فارس" ما احلا اسمي لي نطقته": الحمدلله .. وطلع برا يكمل مكالمته ..
مناف: مشغول ؟
فارس: افضى لج ..
مناف باحراج: ها ؟
فارس: احم .. اخوي طالع من المستشفى .. ومسوين له عشى ..
مناف سرحت " اخوه طالع من المستشفى ومسوين له عشى .. وانا اخوي مات "
فارس: مناف .. وين رحتي ؟
مناف: معاك .. معاك ..
فارس: زين اخبارج امج واخوانج ؟
مناف: والله على حطت يدك ..
فارس: ان شاء الله مو ناقصكم شي ..
مناف: الحمدلله وما قصرت يا فارس ..
فارس: ولا يهمج .. ان شاء الله على اخر الاسبوع اوديج مع فيصل الجمعيه تاخذون اللي تبونه ..
مناف: لا والله ماله داعي يا فارس .. باذن الله بتتدبر ..
فارس: شو قلت لج انا ..
مناف: اوه آسفه ..
فارس: زين قولي لي .. متى بداومين فالجامعه ؟
مناف: مادري يمكن الاسبوع الجاي ..
فارس: شدي حيلج
مناف: والله احاول ..
فارس: لا انتي قدها .. وباين عليج شطوره
مناف: منو يقول ؟
فارس: انا اقول
مناف بعفويه: شلون عرفت؟
فارس" يذبحني دلعها": قلبي يقولي انج شطوره ..
مناف باحراج: قلبك ؟!!
فارس: اي يا مناف ..
مناف" قلبك .. فارس اخاف من اللي في قلبك واللي يقوله قلبك": .............
فارس: وين رحتي ..
مناف سكتت فتره: معاك ..
فارس: استغربتي من كلامي ..
مناف ما عرفت ترد: ها ؟!!
فارس يغير الموضوع: الساعه 9 ونص بجيب لكم من عشانا ..
مناف: لا يا فارس ماله داعي ..
فارس بحده: مناف ...
مناف بخوف: نعم ..
فارس: بتاكلين من عشانا .. 9 ونص انا بكون عند الباب ..
مناف: ان شاء الله
فارس يراضي مناف: بنت ..
مناف: نعم ..
فارس: يعني كل مره يتزعلين على كلامي ..
مناف: اي كلام ..
فارس: انتي تعرفين اي كلام .. وقلت لج انسي كلام جاراتكم .. لاني انا مو مثلهم ..
مناف" انت غير ": ولا تزعل نفسك يا فارس .. سو اللي تبيه .. ولا راح ازعل او اناقشك ..
فارس: تعجبيني والله ..
مناف تلطف الجو: زين انا انتظر .. تراني جوعانه ..
فارس: هههههههههه .. خلاص الحين انا فالطريق ..
مناف: لا لا لا لا ... خذ راحتك .. 9 ونص انتظرك
فارس" دلوووووووووعه": ولا يهمج انا على الوعد ..
مناف: يسلم راسك ..
فارس: زين قولي يا زعوله ..
مناف: لا والله .. انا زعوله ..
فارس بوناسه: اي انتي زعوله .. ودلوعه بعد
مناف ضحكت بدلع: هههههههه ..
فارس: اي ضحكي شو فيها الدنيا .. زين قولي لي شو تحبين تشربين ؟
مناف: ها ؟؟ شلون ؟
فارس" بريئه": تحبين كوكتيل .. او برتقال او فراوله ..
مناف بحيره: مممممممممم .. مادري !!
فارس: ولا يهمج انا بجيب لج على ذوقي .. شو رايج
مناف: انت كريم وانا استاهل ..
فارس: وربي انتي تستاهلين .. تستاهلين كل خير كل خير .. سكت وحس انه بالغ في كلامه .. انحرج وبسرعه انهى المكالمه ..
فارس: المهم انا لازم اروح عندهم .. وبكلمج وانا طالع ..
مناف: ولا يهمج .. مع السلامه
فارس انهى المكالمه ودخل عند الريايل .. شاف يوسف وفاضل ..
فاضل: بومحمد .. العشا جاهز .. متى انادي الريايل ..
فارس: بدري .. خلها علي ..
فاضل: صار ..
راح فارس عند محمد اللي كان مبين عليه الحزن رغم انه كان يحاول يخفيه ..
فارس: بو نايف .. عسى ماشر ؟
محمد: والله مادري شو اقولك يا فارس .. بس مو وقته الحين
فارس: الله يعينك .. زين وين الوالد ..
محمد: هناك مع سلمان وابوي .. شوفهم تقول يحلون لغز مثلث برمودا ..
فارس: ههههههههههه .. الله يرجك يا ريال ..
محمد: فروس ياخي شوفهم مندمجين وكل واحد منهم يأشر بيده تحسهم وايد متفاعلين بالسالفه
فارس: حمودي .. وانت ما تخلي عنك هاطبع .. تقطيع خلق الله ..
محمد: بس عمي .. وايد مستانس على سلمان ..
فارس: ابوي ؟
محمد: اي من اول ما وصل وعمي يعابله وكل ما جى عمد سلمان سحبه ابوك وراحوا عند ابوي وطقوها سالفه ..
فارس: هههههههه وحليلهم والله .. وسلمان ينحب ماشاء الله عليه ريال .. والزمن علمه الحياه صح
محمد يطالع سلمان بفخر: اي والله انه ريال ..
فارس: زين بقولك حمودي .. انا بروح اودي اكل لمناف .. تجي معاي ؟
محمد: مناف ؟؟
فارس: اي ..
محمد: متى عاد .؟
فارس: باشوف فطيم بعد شوي بخليها ترفع لها شوي قبل ما نتعشى .. وبروح اوديه لها وبرجع اتعشى .. ها شو قلت ..
محمد يطالع فارس بخبث: فرووووووس ..
فارس ببرأه: هلا والله
محمد: اسميك تولعت بالبنت؟
فارس بأحراج: ها ؟؟ لا شو تولعت .. بس انت ادرى بظروفها ..
محمد: ممممممم بحاول اصدقك .. زين يعني مو متعشي مع الريايل ..
فارس: لا اول اودي لها لقمه وبعدين يصير خير ..
محمد" شكله تولع الود .. شو سالفتهم الشباب .. كلن قلب مشغول .. احمد بن راشد وخطب صديقت اختهم .. خلود اخوي هيمان بمرايم .. فروس وبدي يهيم بهالبنت .. وانا علقوني بفاطمه بنت عمي"
فارس: هييييييييييي .. حمودي .. وين رحت ؟
محمد: هااا .. خلاص قدام انا رايح معاك
فارس: حلو .. عيل خل اكلم فطيم عشان تجهزي الاكل .. مشى شوي بعيد عن ولد عمه عشان يكلم اخته ..
فارس: هلا والله بنجمة الحفل فطامي .. الكل يتغزل بجمالج يا فطيم ..
فاطمه باحراج: هلا والله فارس .. وبدلع ياخذ القلب .. عااااااااااد لا تحرجني فارس
فارس: يا ويل حالي على الدلع انا .. فطووم ما قدر استحمل هالدلع ..
فاطمه: فارس .. هات من الاخر .. ترا احرجتني ..
فارس: ايه عليج بس .. زين سمعي اختي .. ابيج ترفعين لي من العشا قبل ما تفتتحون البوفيه الله يرضى عليج ..
فاطمه باستغراب:ليش فارس؟ انت مو متعشي مع الريايل؟
فارس: ان شاء الله بتعشى .. بس ابي اودي هاللقمه حق واحد من الربع .. ويعز علي
فاطمه: زين ليش ما جى ؟!
فارس" فطوم اسئلتها ما تخلص": الريال تعبان وماقدر يجي .. بس عشان ما يزعلني قالي ارفع له من عشانا شوي ..
فاطمه او انه مشت عليها: اهااا .. ولا يهمك اخوي .. الحين اروح اشيك على البوفيه وارفع لك من كل صنف ..
فارس: بارك الله فيج فديتج .. اتصلي لي اول ما تجهزينه
فاطمه: من عيوني ..
فارس: فديت هالعيون الناعسه يا فطيم ..
فاطمه: فرووس يلا مع السلامه
فارس وهو يضحك عليها: ههههههههههههه .. سلااااااااااام
رجع فارس عند محمد .. وكان محمد سرحان لانه سمع فارس وهو يتغزل في اخته ..
محمد" صادني فضول ابي اشوف هالدلع والجمال اللي ذبح الكل واولهم فارس"
في هالاثناء .. فاطمه سحبت الخدامه وراها وراحت عند البوفيه عشان فارس اخوها .. كانت حاذفه الشال على كتوفها .. وهي تحط الاكل وتكلم الخدامه .. الا بذاك اللي يناظرها من زاويه .. وكان يوسف .. كان منبهر باللي شافه .. من جمالها وقف مكانه وماقدر يتحرك .. فاطمه اول ما انتبهت عليه من الربكه ركضت مو عارفه وين تروح .. لان حوشهم كبير والبوفيه كبير وهي ركضت صوب الملحق .. والخدامه ماتدري شو السالفه .. رجعت المطبخ .. وتمت فاطمه واقفه ورا عند الملحق ..
فاطمه" يا ويلي .. شافني جي .. لا عبايه ولا شيله .. التنوره قصيره وظهري باين .. الشال وايد خفيف .. ابيه .. يا ويلي .. بس هو ليش للحين واقف ؟!" هي ما انتبهت انه يوسف .. ويوسف كلمها
يوسف: السموحه منج والله .. تقدرين تمرين انا رايح الميلس ..
فاطمه بصدمه" هاي هوووو .. الي رد على التلفون .. هاي يوسف .. يا قلبي "
ومشى يوسف بسرعه ودخل الميلس .. بس وقف عند الدريشه يراقبها وهي رايحه داخل .. كانت تركض وباين عليها الخوف ..
يوسف مبتسم " يا ويل حال هالغزال اللي يتراكض هناك .. ياليتني هالشال اللي غطى كتوفج يا بنت الناس .. جمال ما شفت مثله .. جمالها رباني .. اشك انها ملاك نازل من السماء .. هاذي مو من الانس .. هالبنت ملاااك ملاااك " تنهد بصوت مسموع .. والتفت عليه عبدالعزيز ..
عبدالعزيز: بوسعود .. عسى ماشر ؟؟ بيعنا فالسوق..
يوسف: اشتريك الغالي .. والله اشتريك ..
عبدالعزيز مستغرب من يوسف: مصخن بوخليفه؟
يوسف ابتسم: لا .. الا في كامل صحتي والحمدلله ..
سكت عبدالعزيز عن يوسف اللي كان سرحان ..
اما فاطمه المسكينه .. فكانت مثل الطير الخايف .. ترجف وتتنفس بصعوبه .. تمت تذكر ربها وتهدي نفسها .. لما حست بشوية راحه .. اتصلت على فارس عشان يروح ياخذ الاكل من المطبخ
فاطمه: فارس .. تعال الاكل جاهز
فارس: وين انتي؟
فاطمه: فالمطبخ ..
فارس: زين .. لبسي عباتج .. لان محمد ولد عمي بيجي يشل معاي الاكل ..
فاطمه: ان شاء الله .. راحت لبست عبايتها .. وانتظرتهم ..
اول ما دخل محمد وشاف ويه فاطمه تم يطاعها بانبهار .. وقف مكانه وماتحرك .. لاحظ فارس ان محمد كان يطالع اخته ..
فارس: خلاص فطيم فديتج .. روحي انتي داخل انا ومحمد بناخذ الاغراض ..
فاطمه وهي طالعه: زين .. يلا مع السلامه .. مرت من جنب محمد وهو يطالعها بذهول واعجاب ركب السياره مع فارس .. وراحوا بيت مناف .. اتصل فارس في مناف قبل ما يوصل عند البيت
فارس: مناف ..
مناف: وعليكم السلام
فارس باحراج: سوري ..
مناف: مو مشكله ..
فارس: انا قريب البيت .. قولي لفيصل يطلع لي ..
مناف: فيصل محد .. راح مع امي بيت الجيران ..
فارس: زين انتي طلعي عيل ..
مناف بتوتر: ها .. انا !! ممممم ان شاء الله
وصل فارس وقف عند الباب ينتظرها .. طلعت مناف وهي لابسه عبايه وشيله ..
فارس ماقدر يمنع نفسه من شوفة ويها السمح الطفولي البريء ..
فارس مد يده: تفضلي .. وما شال عينه من عليها ..
مناف كانت ميته من الخوف وترجف: خذت من ايده الاكل ..
فارس وهو سرحان في جمالها: رجعي ياخذي الباقي ..
مناف ومنزله راسها: بعد في باقي ..
فارس: انتي تمونين ..
مناف خذت الاكل ورجعت تاخذ الباقي .. وفارس ينظر شوفتها بوله .. عطاها الباقي .. وطلب منها ترجع عشان يكلمها ..
ودت كل الاكل داخل .. ورجعت له عند الباب .. ولاول مره تطيح عينها بعين فارس .. اول ماتلاقت عيونهم .. صدت عنه بحيى واحمر ويها من الخجل ..
فارس مد يده لمناف وكان ماسك كيس صغير .. مناف شافت الكيس واستغربت ..
مناف: شنو هاي ؟؟
فارس: هاي هديه بسيطه مني .. لاني زعلتج ذاك اليوم ..
مناف منصدمه: ها !! .. لا ماله داعي يا فارس ..
فارس: عشان خاطري لاترديني ..
مناف: ما بينا شي عشان اقبلها .. شتقول انت !
فارس: وربي بزعل لو ماخذتيها ..
مناف: لا اسمح لي ..
فارس" عنيده": ارجوك اخذيها ارجوج ..
مناف: الله يسامحك والله ..
فارس بخوف: هااا ؟؟ ليش شو سويت الحين ؟
مناف: ماله داعي هالمجاملات ..
فارس مسك اعصابه: على العموم بالعافيه .. لو بغيتي شي اتصلي ..
ركب السياره .. ومناف تمت عند الباب منزله راسها .. فتح فارس الدريشه يكلمها
فارس: دخلي وسكري عليج الباب .. يلا اشوف ..
مناف بخوف .. دخلت وسكرت الباب .. وتمت واقفه ورا الباب وتذم نفسها على اللي سوته في فارس .. اما فارس المسكين .. ركب السياره من غير ما يتكلم .. ومحمد سكت عنه .. حرك فارس وتم محمد يتكلم يحاول يلطف الجو .. وصلوا البيت .. وبوفارس كان في استقبالهم ..
بوفارس: وين كنتوا ..
فارس مشى عن ابوه لانه كان معصب .. اما محمد رد عليه باللي اتفق عليه مع فارس ..
محمد: عمي .. رحنا حق واحد من الشباب توه مسوي حادث واتصل علينا عشان نوصله البيت ..
بوفارس: هاذي فروس .. انا اعرف اطلع اللي في راسه .. ومشى عن محمد .. محمد استغرب من كلام عمه .. وراح قال لفارس كلام عمه .. التفت فارس على محمد ..
فارس: شو تقول ؟
محمد: الكلام اللي سمعته ..
فارس: شو سالفة الوالد بعد .. انا اللي فيني مكفيني ..
سكت محمد عن فارس ..
اما مناف .. دخلت غرفتها وهي حاسه بالذنب عشان انها ردت فارس وهو يترجاها .. تمت اطالع التلفون ..
مناف" والله قلبك كبير يا فارس .. وانا اللي ما استاهل كل اللي تسويه عشاني " صاحت من الهم اللي فيها .. دخلت عليها امها .. وقامت بسرعه تسمح دموعها ..
مناف: هلا يمه
ام مناف: يمه من وين هالاكل اللي بالمطبخ ؟
مناف: يمه .. هاي رفيج فيصل جابه من شوي ..
فيصل وهو داخل: فارس جايب هالاكل ؟
مناف: اي ..
ام مناف: جزاه الله خير هالولد .. الله يوفقه وين مايروح .. مناف يمه .. وين عبود
مناف: يمه عبود نايم ..
ام مناف: زين قعديه عشان ياكل معانا ..
مناف: ان شاء الله يمه .. راحت تقعد اخوها .. وفارس ماخذ كل تفكيرها .. تجمعوا على السفره .. وكانوا ياكلون وهم فرحانين ويدعون لفارس .. الا مناف اللي بالعافيه شربت العصير اللي جابه لها على ذوقه مثل ما وعدها .. تمت ام مناف تترجاها تاكل .. ومناف كانت رافضه ..
ام مناف: يا يمه شفيج ما تاكلين؟
مناف: مالي خاطري اكل يا يمه ..
ام مناف: يا بنتي اذكري ربج .. ومدي يدج عشان خاطر ولد الحلال ..
مناف: يمه ..
تقاطها امها: مناف .. مدي يدج اشوف ..
مناف" فارس وزعلته .. بعد ازعل امي ": ان شاء الله يمه ..
وقربت من السفره وكلت شوي عشان امها .. وكانت تاكل وهي مغصوبه .. يدوب كلت لها شوي وقامت على طول وراحت غرفتها .. شافت التلفون .. توقعت تلقى مكالمه او مسج من فارس ..
مناف " بل .. صج زعلته .. ليش انا جي .. اخاف اتصل له .. ويحرجني او ما يرد علي " .. وتمت مناف في صراع .. هل تتصل لفارس او ماتتصل .. لكن خوفها انه يحرجها منعها انها تتصل .. وقررت انها تتصل فيه اليوم الثاني ..
" اسكن عيوني وشوف .. وش كبرها دنياك .. ماحس انا بأي خوف ان صرت انا وياك "
الجوهوه كانت قاعده مع يوسف وسلمان .. يوسف كان يمدح لها ابراهيم ..
يوسف: شوفي يا جوجو .. انا سألت عن الريال .. وما سمعت عنه الا كل خير .. ولد ناس وقايم بأهله .. وتوه مخلص بيته .. وماسك منصب وما عليه زود في اخلاقه .. بس اعتقد انه ينتظر الرد منج ..
سلمان: ها جوجو حبيبتي .. اعتقد مثل ابراهيم ما ينرد .. ولد ناس .. ومتربي عدل .. وماشاءالله عليه ذرب ومحترم .. ومثل ما قال يوسف .. اللي مثله ماينرد .. ماعتقد عندج عذر ترفضيه ..
الجوهره مستحيه: .....................
سلمان: جوجو .. طالعيني ..
الجوهره رفعت راسها .. وتم سلمان يطالعها .. وتذكر اخته .. لانه شاف في ويه الجوهره اخته لولوه .. لما كانت تترجى سلمان يرجع امريكا يكمل دراسته .. كانت ابتسامتها نفس ابتسامة الجوهره وهو يشوفها في هاللحظه ..
سلمان: الله يرحمج يا لولوه ..
الجوهره باستغراب: خالي ..
سلمان نزل راسه: آه .. الجوهره .. الحين وانا اشوفج .. اشوف المرحومه .. نفس ابتسامتها الله يرحمها ..
يوسف والجوهره: آمين .. ويرحم جميع موتى المسلمين ..
مسك سلمان يد الجوهره وضغط عليها: ابي اعرف ردك يا جوجو ..
الجوهره: انا موافقه يا خالي ..
يوسف قام وباس راس الجوهره: مبروك يا الجوهره .. الله يوفق لج يا رب ..
سلمان باها على خدها وبارك لها .. ودخلت هنادي حاشرتهم ..
هنادي: هاااااااااا .. من وراي ..
يوسف: فارقي انتي .. دوم تخربين اللحظات الرومنسيه ..
سلمان والجووهره: هههههههههههههههههههههه
هنادي: يا جماعه undo وش فاتني ..
سلمان: باركي لاختج .. خلاص وافقت ..
هنادي نطت على اختها وحظنتها: وااااااي .. مبروك جوجو مبروك .. وتمت تبوس اختها وصاحت من الفرحه .. الجوهره ماقدرت تحبس دموعها وصاحت مع اختها .. سلمان تم يطالعهم بفرح .. اما يوسف تأثر بموقف خواته .. وطلع الحوش يتمشى لان خنقته العبره ..
سلمان: ها جوجو .. خلاص اتصل ابلغ الولد بموافقتج
هنادي: اي ي ي خالي اتصل ..
سلمان: ههههههههه هنود .. شدخلج انتي ..
الجوهره: هههههههههههه .. خلاص خالي اتصل بلغه
سلمان: بارك الله فيج .. ان شاء الله باتصل فيه اليوم العصر ..
دخل عليهم يوسف: حيالله عروستنا ..
الجوهره منزله راسها: عاد يوسف ..
يوسف: ههههههههه .. عقبال الخبال اللي قاعده جنبج ..
هنادي تخصرت: نعم نعم ..
سلمان مسكها: قولي آمين مب نعم نعم ..
الكل: هههههههههههههههههه
هنادي: خالي شوفه دوم يحطمني ..
سلمان او انه معصب على يوسف: لا تحطمها .. بعدين شلون نرجع نركبها ..
يوسف: ههااااااااااي .. حلوه منك يا خالي ..
هنادي التفت على خالها: خالي .. بغيتك عون صرت فرعون ..
سلمان: ههههههههه .. انا معاج طول الدرب ..
هنادي: خالي انت متناقض .. تهاوش يوسف وبعدين تستلمني ..
سلمان: احب العوزج مادري ليش ..
الجوهره: عاد حدكم عن اختي الصغيره ..
يوسف: تكلمت اللي او انها بدافع عن اختها
الجوهره: اي بدافع ..
سلمان: احنا متعادلين .. بنتين و ولدين ..
هنادي: لا مو متعادلين ..
الكل: ليش ؟
هنادي: بكره بتتزوج الجوهره وبتصيرون 3 ريايل .. وانا واختي ثنتين ..
سلمان ويوسف: ههههههههههه حلوووووووووووووووووووه ...
هنادي: شلون عيل .. فكروا عدل يا جماعه ..
الكل: ههههههههههههههههههههههههههه
الجوهره: زين خلوا عنكم السوالف .. وهنوده يلا نجهز الغدا ..
سلمان: اي والله انا جوعان ..
هنادي: يلا جوجو ..
راحوا البنات يجهزون الغدا .. وتم سلمان مع ولده اخته ..
سلمان: يوسف .. بسألك ؟
يوسف وكان مشغول بالجوال: هلا .. اسأل ..
سلمان: امس كان ويهك متغير قبل العشا في بيت بوفارس .. ليش ؟
يوسف ارتبك: ها .. ويهي متغير .. لا لا عادي مافيني شي ..
سلمان: يوسف .. علي انا .. قولي شسويت ..
يوسف باحراج: هههههه .. شتقول خالي ..
سلمان: شفتها امس ..
يوسف" صادوه ": من هي ؟
سلمان: يا عمي .. ماتمشيها علي انا .. هات من الآخر ..
يوسف ضحك: لا بس اخوها وهو يكلمها .. وكان يتغزل بجمالها وكشختها ..
سلمان" والله انك داهيه يا يوسف": اي ي ي .. بس كلش ما شفتها ..
يوسف" وش اللي يبي يوصل له خالي ": لا لا ما شفتها ..
سلمان: اهااا .. " مب هين بعد " زين قوم نتغدى ..
يوسف" يكون احسن ": يلا ..
ومشوا لين غرفة الطعام .. وتموا يسولفون مع البنات .. وبعد الغدا كلن توجه لغرفته ..
طبعا الجوهره لقت مس كول من ابراهيم .. بس هي تعمدت ماترد ما تبي تحرق عليه المفاجأه ..
انبطحت على السرير وغمضت عينها براحه .. لاول مره تحس فيها .. لانها كانت شايله هم اخوها واختها .. بس لما رجع خالها خف الضغط عليها .. وخطوة ابراهيم خلتها ترتاح وايد .. لانها بتعيش معاه العمر كله .. وهو اللي تمنته يكون جنبها طول حياتها .. غفت عينها على احلامها البريئه ..
بعد الليله اللي كل استانس فيها .. دخل بوفارس غرفته مع ام فارس .. قعد على السرير وتم يطالع ام فارس بحنان ويبتسم لها ..
بوفارس: ياه .. ولله اشتقت لهالبسمه منج يا ام فارس ..
ام فارس مبتسمه: يعطيك العافيه يا بوفارس .. ما قصرت مع ولدك .. ومكانك مبين فالبيت
بوفارس: تعالي عندي خل اشم ريحتج يالغاليه ..
قربت ام فارس من زوجها .. قعدت جنبه ومسك يدها وباسها ..
بوفارس: فديت ريحتج يالغاليه ..
ام فارس: الله لا يخليني منك ..
حط راسه في حضنها وتم يسولف معاها .. ام فارس تمت تمسح على راسه وكتوفه وتسمعه .. سكت بوفارس .. وعرفت انه نام في حضنها .. رفعت راسه بهدوء وحطت المخده تحت راسه وغطته .. باسته على جبهته وابتسمت .. راحت تطمن على عيالها .. لقتهم كلهم قاعدين في الصاله فوق .. ومندمجين مع التلفزيون وجاسم معاهم .. وقفت فتره اطالعم .. التفت عليها عبدالعزيز مبتسم
عبدالعزيز: امي .. ليش واقفه تعالي قعدي معانا ..
ام فارس وهي ماشيه: فديت لمتكم والله ..
فارس: وين الوالد؟
ام فارس: فديت عمره نام من التعب ..
ايمان: هاااا .. فديت عمره ..
فارس: ههههههههه .. اشتغلت الحين
مريم: اي والله اشتغلت ..
ايمان: ها ام فارس ..
ام فارس منحرجه: تعرفين تلمين لسانج ..
فارس: ههااااااااااااااااي ..
ايمان وحطت راسها في حضن امها: ماما ..
ام فارس: عيونها انتي ..
ايمان: ليش تسوين فيني جي ..
ام فارس: لان يبيلج ضرب على هاللسان ..
فاطمه: ههههههههههه
ام فارس: زين خليتيهم يضحكون عليج ..
جاسم: حدكم عن ايمان عاااد ..
ايمان نقزت عند اخوها: فديت الجسمي انا .. عاش اخوي عاااش
ام فارس: فديت عمركم الله يخليكم لبعض
الكل: آآآآآمين ..
ام فارس: فارس شو فيك يبه ؟
فارس: انا ؟
ام فارس: اي يبه .. اشوفك شارد هالايام .. حالك مو عاجبني ..
فارس تغير ويهه: ما فيني شي الغاليه ..
ام فارس: زين يبه .. متى باشوف عيالك ؟
فارس: امي .. انتي فاكره ان هالموضوع اللي شاغل بالي ..
ام فارس: والله يا يبه .. يمكن .. وبعدين انا ابي اشوف عيالكم كلكم قبل ماغمض عيوني ..
الكل: سمالله عليج
قامت ايمان عند امها وحضنتها ..
مريم: ماما .. سمالله عليج .. انتي حاسه بشي .؟؟
ام فارس مبتسمه: وووي .. شو فيكم يا عيالي .. انا قصدي ابي اشوف عيالك دام فيني حيل وشايلتكم وابي اشيل عيالكم ..
فاطمه " سمالله على ماما فديتها"
فارس" يغير الموضوع": تصدقين الغاليه .. خاطري في سمك مشوي مادري ليش؟
ام فارس: من عيوني المركبه .. انت تامر امر
جاسم بدلع: وانا ..
الكل: ههههههههههه
ام فارس: فديت طولك انته .. تدلل .. اللي في خاطرك يجهز ولا يهمك ..
جاسم: ممممممم امزح والله ..
فاطمه تبوس جاسم: فديت اللي يمزحون والله ..
ام فارس: يلا يا عيالي .. كلن يروح ينام .. تاخر الوقت واليوم تعبتوا وايد .. يعطيكم العافيه
الكل: الله يعافيج
جاسم: يمه .. انا بسهر مع البنات في غرفة فطامي ..
ام فارس: حبيبي انت عاد لازم تريح ..
عبدالعزيز: امي .. انا بعد بسهر معاهم .. وجويسم بسرعه بينام وباخذه الغرفه لما ينام ..
جاسم: لا والله .. بتشوف اني بقعد وانت اللي بتنام
الكل: هههههههههههههههههه
توجهوا البنات مع اخوانهم لغرفة فاطمه .. اما فارس راح غرفته وكل اللي شاغله مناف .. دخل الغرفه وشاف التلفون ..
فارس" مثل ما توقعت .. ولا بتفتكر .. ليش اعور راسي معاها .. آه يا قلبي .. احس اني ماقدر اصبر عنها .. شكلي تولعت فيها من قلب .." غمض عيونه وحاول انه يشلها من باله بس ماقدر .. قام من السرير ولبس بنطلون برمودا بيج و تي شيرت كحلي .. وخذ له شنطه حط فيها فوطه وشورت سباحه .. فتح الثلاجه وخذ قرشة ماي وطلع .. وهو نازل شافته فاطمه .. نادته ..
فاطمه: فارس ..
فارس: هلا والله
فاطمه: وين رايح الحين ؟؟!!
فارس: رايح اتمشى شوي .. تبين شي؟
فاطمه: وين رايح هالحزه .. والشنطه؟
فارس: فطيم .. مستعجل .. يلا سلااااااام ..
طلع وترك اخته واسأله وايد ما جاوب لها عليها .. فاطمه وقفت بحيره وكانت تتسأل بينها وبين نفسها عن اللي شاغل بال اخوها ؟؟
ركب السياره .. وتوجه للبحر .. وقف قريب السيف .. لبس شورت السباحه ونزل البحر من غير ما يفكر في الظلام او الخوف .. كان حاس بهم كابت على صدره .. فتح ذراعينه وغاص فالبحر .. تم يسح ويسبح تحت الماي من غير ما يحس بنفسه .. او بالعمق اللي نزل له .. كان يطلع الهوا من صدره لين حس انه مو قادر يطلع زياده .. ارتفع لسطح الماي .. بس شاف ان ان السطح بعيد عنه وبدى يسبح بسرعه ناحية السطح .. ويحس ان السطح يبتعد عنه .. فجأه رفع يده وحس انه قريب من السطح .. حس برجوع الحياة له .. وصل السطح وتنفس بعمق ..
فارس: آآآآآآآآآآآآآآآآآه .. الحمدلله هم وانزاح .. الحمدلله .. حس بالانتاعاش وان همه راح عنه ..
الذين يشاهدون الموضوع الآن: 12 (0 من الأعضاء و 12 زائر)
مواقع النشر (المفضلة)