&&&&&&&&
ريم كانت حاسه ان في العنود شي عشان كذا اتصلت عليها..وبعد ما سمعت جملتها صدقت احساسها واخذت عبايتها وعلى طول راحت لها..
بعد دقايق وصلت بيتهم وضربت الجرس...
ودخلت سيده على غرفة العنود..وفتحت الباب بقوه...
ريم: العنود......وش فيك؟؟
العنود بسرعه قياسيه قامت على طول لحضن ريم تفرغ كل همومها على صدرها...
ريم خافت عليها ما تدري وش فيها: عنوده تكلمي يا قلبي..خوفتيني عليك..تكلمي...
العنود: خلاص يا ريم انا انتهيت...العنود انتهت ياريم..
ريم بكت: وش تقولين يا العنود....وش فيه طلال..
العنود عرفت ان ريم من جد هي الوحيده اللي ممكن تعرف وش فيها...
العنود: طلال يا ريم طلال..
ريم: العنود اهدي وتكلمي مثل الناس..
العنود صرخت: طلال يحبنبي يا ريم وانا ابعدته"وقامت تدور بالغرفه منهاره" ابعدته بنفسي...قالي احبك..قلت له ما أكن لك إلا الأخوه..عرفتي ش فيني الحين...قالي احبك قلت له اختي عبير تحبك..عرفتي الحين وش فيني "وزاد بكيها" قالي انتي تحبيني قلت بس اختي تحبك...ليش ياريم كذا ليش يصير معاي كذا..
ريم دموعها سيل.. وبصوت اعلى منها وبتأنيب قالت: غبيه يا العنود..غبيه الولد يحبك تروحينه من ايدك ليش؟؟؟
العنود: واختي الي قلبها يتقطع هناك.
ريم بحزم: وقلبك اللي ينزف الحين..
العنود: بس انا ما ابي اخسر اختي.
ريم بقسوه: وهي عندها تخسرك عادي..
العنود بسرعه: لا ياريم..لو ان عبير في مكاني سوت مثلي واعظم..
************************************************** ******************************************
حبيته حب صعب وعسير ..
سلمت له قلبي من غير تفكير ...
قلت يمكن يقدر عله يفيد التقدير ...
ماشفته الا يوم وخانني فيه التعبير ...
بدل ما أقول له تعال قلت له سير ...
زعل علي ورحل وتركني بين همي أسير ...
بعدها سال على خدي دمع غزير ...
بكيت وبكيت وتكون من دمعي غدير ...
خطاي زلة لسان وغلط صغير ...
************************************************** ******************************************
في هذا الوقت كان الحديث اللي يدور مسموع من شخص مفروض ما يسمعه..شخص مفروض ما يعرف عنه أي شي...عبير عرفت السالفه سمعت العنود...سمعت كل شي..سمعت ردة فعل ريم..انصدمت تفاجأت ما توقعت ان العنود ممكن تسوي كذا...تدري ان العنود مضحيه وبشكل جنوني بس موالى هذا الحد...معقوله تضحي بحبها عشاني.."وقف كل شعر جسمها..واتهز كل جسمها.."وراحت بسرعه لغرفتها وهي تحس انها وحده انانيه ونرجسيه..وما تفكر الا بنفسها..كيف زعلت اختها من قبل عشان طلال وهذي اختها مزعله نفسها وموته قلبها وطاعنته بأيدها عشانها...كذا يكون جزاها...هذا جزاها يا عبير..تقابلك العنود بالتضحيه وتقابلك بالمعروف..
وجلست في غرفتها مع جلسه في تأنيب الضمير...
&&&&&&&&&&&&&&&&&&&&&&&&&&&&&&&&&&&&&&&&&&&&&&& &&& &&&&&&&&
بيـــــــت ابو فواز...
كان الكل جالس على الغدا ينتظرون طلال ينزل عليهم..
ابو فواز: فجر قومي شوفي اخوك تأخر..
فجر: ا نشا الله يبه..
طلعت فوق..فتحت باب الغرفه ما حصلت احد..ونزلت تحت..
فجر: يبه ما حصلته..
ابو فواز:كيف ما حصلتيه..ام فواز انتي شايفته جاي من الجامعه..؟
ام فواز: ايه شايفته...يمه وليدي وين راح..
نوف: ابتصل على موبايله واشوف"واتصلت"
وبعد ثواني....نوف: موبايله مقفل..
ام فواز قامت: يمه وليدي لا يكون صار عليه شي..
فجر قربت من عند امها: يمه اهدي ما فيه الا العافيه ان شا الله..
بدور: خالتي يمكن طلع واحنا ما شفناه..
ام فواز: يعني وين بيروح هالوقت مو من عوايده..
فواز: يمكن عنده شغله وطلع يخلصها...
لحظة سكون مرت على الكل بعدها سمعوا رنة التليفون..
فجر بسرعه راحت: انا بروح أرد...........الووو..
المتصل: السلام عليكم..
فجر نغزها قلبها: وعليكم السلام..
المتصل:هذا بيت ناصر بن عبدالله ال(...........)
فجر: ايوه هذا بيته.."وبلعت ريقها" مين معاي..
المتصل: معاك مستشفى(.......)..ولدكم طلال ناصر عندنا في المستشفى...
فجر صرخت فيه: ايش انت وش قاعد تقول...مستحيل...
سكر المتصل الخط في وجهها لانه متعود على مثل هالحالات..
فجر طاحت منها السماعه ..والعائله تستنى منها ايجابه تريح قلوبهم بس وجهها ما يبشر بخير...
ام فواز قربت لها: فجر انطقي من المتصل....
فجر لفت عليهم وعيونها تسبح فيها الدموع: يمه.....طلال........طلال في المستشفى..يمه يقولون طلال في المستشفى "وصرخت" يمـــــــــــــه طلال..
ام فواز انهارت عليهم...نوف ما تحملت الموقف واغمى عليها....فجر وبدور يحاولون يهدون انفسهم عشان يهدونهم..
ابو فواز وفواز انطلقوا للمستشفى اللي قالت لهم فجر اسمه..
بعد ربع ساعه انتشر الخبر عند العائله..الرجال كلهم في المستشفى عند طلال..والحريم جمعوهم في بيت ام فواز....
دخلت العوائل وحده ورى الثانيه واخر عائله كانت عائلة ابو ماجد..
اول ما دخلوا كانت عبير تصارخ بجنون: طلال وينه طلال...
راحت لها فجر: عبير اهدي وش فيك..
عبير: وين طلال يا فجر وينه ابيه.. ابي اشوفه...ابي اكلمه...ابي اقول له اشياء كثيره في قلبي..جيبيه يا فجر جيبيه"وحضنت فجر"
الكل انصدم من كلامها...وش ممكن يكون بينها وبين طلال...
دخلت العنود بعدها بعكس عبير تماما..العنود في هذي الواقف الجبل اللي ما يهزه ريح..الكل يستند ويعتمد عليه..لكن من داخل ما فيه الا اشلاء.بقايا شتات..ما فيه الا دمار والاحساس بتأنيب الضمير..صارت تطالع كل مكان بالبيت كل شي يذكرها بشي..هنا كان طلال يضحك..وهنا كان طلال يمزح معاها..وهناك طلال لما كانوا صغار يلعب معها..ما قدرت تتحمل اكثر من كذا بس الحين اللي حولها محتاج قوه ولازم تصير مصدرها..
دخلت بعدها ريم اللي اقل صلابه من العند ودمعتها على هدبها..
رغد فزت لاختها..وضمتها وهي تبكي..وريم وكأنها صنم ما تحس ما تتكلم ولا أي شعور مثل العنود كانوا يشابهون بعض ويعادون بعض في المشاعر..
رغد لفت على العنود:العنود وش فيك؟؟
العنود: روحي لاختك ما فيني شي..
عبير سمعت صوت العنود وراحت لها: العنود سامحيني الله يخليك..
العنود تطالع بأختها بحنيه: اهدي يا قلبي ما راح يصير فيه شي...
عبير تهمس في اذن العنود: احبه يا العنود احبه..
العنود دخلت هالكلمه مثل السكين في صدرها وطعنت فيه وطلعت..
"ليه تقولينها لي...ليه....انتي ما تحسين....ما تحسيييييييييييييييييين"
عبير: العنود لا تخلينه يروح مني..انا احتاجه..
العنود بدت تحس ان الجبل الظاهر لهم راح ينهار..وماودها انه ينهار: ما راح يروح يا قلبي...ما راح يروح راح يرجع لك..راح يرجع لعبير...
عبير تدري انها انانيه بكل الكلام اللي تقوله...بس هي ما عندها القدره انها تكون مثل العنود..ولا تقدر تتحمل مثلها: الله يخليك لي ياالعنود....و.....و...وسامحيني يا العنود..
العنود ما تدري ليش عبير تكرر هالكلمه كل شوي معقوله حست بشي...بس مستحيل..اجل على ايش اسامحها..
قطع عليهم صراخ ام فواز: اتصلوا عليهم خلي احد يطمنا عليه...
فجر: اوكيه راح اتصل...
كان فيه منهم اللي يبكي ومنهم المنهار واللي ثابت..
فجر اتصلت على فواز بس ما فيه شبكه..
رجعت ضغطت الازرار مره ثانيه وبعصيبه وقلة صبر..ومسك معاها.
ردعليها فواز...
فجر: فواز طمنا..
فواز: لسه في غرفة العمليات..
فجر بس تخيلت اخوها بين الاجهزه والالات الجراحه دخلت في عالم من الدموع: اوكي.."وسكرت السماعه ولفت علهم وهي تحاول ترفع صوتها" يقول لسه.....لسه في غرفة العمليات..
ام فواز رجعت تبكي مثل اول...والحريم يهدونها ..
بعد تقريبا ساعتين ونص...رن موبايل فجر......
الجــــــــــزء الســــابــع والثـــــلاثـــون...
""...الفصــــــــــل الثـــــــــانـــــــي...""
بعد تقربيا ساعتين ونص دق موبايل فجر..
فجر ردت بسرعه:فواز بشر..
فواز: الحمد لله الحين طلع من الغرفه..طمني اللي عندك..
فجر بصوت عالي ودها الكل يسمع: الله يبشرك بالخير..يله باي..
الكل سمعها..بس ام فواز حبت تتأكد: وش قال؟؟
فجر: قال انه الحين طلع من غرفة العمليات..
&&&&&&&&&&&&&&&&&&&&&&&&&&&&&&&&&&&&&&&&&&&&&&& &&& &&&&&&&&
في المستشفى الكل على اعصابه وحاط ايده على قلبه...
بعد ساعتين ونص طلع لهم الدكتور...
ابو فواز: بشر يا دكتور...
الدكتور: انت والده..
ابو فواز بقلة صبر: ايوه..
الدكتور: والهو الولد احسن بس ما زالت حالته خطره..
ابو فواز:الحين ولدي وش فيه..
الدكتور: والله طلال عنده جروح طفيفه..و جرح عميق بمنطقة البطن وسوينا له عمليه وبأذن الله راح يتحسن..وعنده كسور في مناطق كثيره بجسمه..واحنا كنا خايفين على الراس والعمود الفقري بس الحمد لله طلعت سليمه..بس مازالت حالته مو مستقره ..
ابو مشاري: طيب ممكن نشوفه..؟
الدكتور: الحين هو مازال في تأثير البنج..وماراح تستفيدون شي فاتعالوا بكره ا نشا الله يكون صاحي...
ابو فواز: بس لازم اتطمن عليه..
الدكتور: بأمكانك انك تشوفه..بس رجاء لا تطولون عنده ولا تدخلون جماعه اوكي..
الكل: اوكي..
دخل ابو فواز واخوه فواز عنده..كان شكله يكسر الخاطر...شاب توه يفتح على الدنيا يكون بين اجهزه مثل هذي..منظر فضيع يوقف شعر جسم الواحد اذا شافه..طلال غالي عند الكل والجميع...وكان منظره مره مؤثر على ابو فواز ما تحمله وطلع.. فواز قرب من عند اخوه وحب راسه بعدين طلع..
دخلوا البقيه اثنين اثنين..تركي وسليمان دخلوا بعد اصرار عليهم ما يتحملون مواقف مثل كذا...
دخل تركي عنده ودمعته واقفه والعبره حاشرته في حلقه..ووقف جنبه..
تركي هاله منظر طلال وصار يكلمه من غير وعي: طلال تسمعني..طلال ابشرك جبت نسبه ترفع الراس..وكسرت راسك "وصار يهزه" طلال رد علي...
سليمان مسكه بتعب ودمعته واقفه على هدب عيونه: تركي اذكر الله..وش فيك..
تركي لف على سليمان: ليش ما رد علي..
سليمان بصعوبه يتكلم: تركي امش معاي..امش...
سليمان طلع تركي معاه..
تركي: سليمان خلني ابشره بالنسبه ..ما قلت له..
سليمان طالعه بأسى ..وبعدها اجتمعوا العيال حول تركي وسليمان..وصاروا يهدون تركي لان الموقف اكبر من انه يتحمله..
************************************************** ******************************************
والله ما يسوى أعيش الدنيا دونك
لا ولا تسوى حياتي بهالوجود
دامك أنت ألي رحلت
وكيف بصبر عالبعاد
وكيف
بنثر هالورود عالبعاد وكيف بنثر هالورود.
ما وعدت إنك تقاسمني المحبة
وتبقالي حب
ولدروبي دليل
بس البعد كان أقرب وأرحم حسب الله وحده نعمة الوكيـل.
روح أنـا راضـي بغيابك يا حياتـي
هاذي قسمة لي
وهذا لي نصيب
كل شمعة تضوي وتشرق حياتـي
انطفيت ورحت في وقت المغيب...انطفيت ورحت في وقت المغيب..
والله ما يسوى أعيش الدنيا دونك
لا ولا تسوى حياتي بهالوجود
دامك أنت ألي رحلت
وكيف بصبر عالبعاد
وكيف
بنثر هالورود عالبعاد وكيف بنثر هالورود
&&&&&&&&&&&&&&&&&&&&&&&&&&&&&&&&&&&&&&&&&&&&&&& &&& &&&&
بعد ما رجعوا الرجال وبقوا العيال بالمستشفى عند طلال..
كان الوضع قد هدى عند الحريم والبنات وخصوصا بعد ما طمنوهم وأوعدوهم ان بكره ومن الصباح راح يكنون عنده ..والرجال خلقوا لهم عذر بأن الساعه 8 والزياره ممنوعه..هذي حجه عشان الحريم يفقدون الأمل في زيارته اليوم اللي ماراح يستفدون منها..
&&&&&&&&&&&&&&&&&&&&&&&&&&&&&&&&&&&&&&&&&&&&&&& &&& &&&&&&&&
بالليل راحوا الحريم ورجالهم لبيوتهم وبقى البنات مجتمعين...
جالسين في غرفة فجر..اللي في حضنها صورت طلال كانت تطالعها بعدين حطتها على جنب..
فجر: عبير ....ابيك في موضوع..
عبير عارفه الموضوع ومتوقعه هالشي: تكلمي عادي...
فجرتتأكد: اتكلم عادي؟؟؟
عبير: خذي راحتك"وطالعت العنود"
العنود كانت منسدحه على رجل ريم..وريم تلعب في شعرها وتهديها بصمت وبكلام وبلغه ما يفهمها الا هم....لغة العيون...
فجر: عبير اقصد انا على الكلام اللي قلتيه اليوم..يعني انتي صادقه فيه..
عبير بثقه: ايوه كنت صادقه فيه..
فجر: يعني انتي تحبين طلال..
الكل طالع عبير ينتظر الاجابه اللي ابدا ما توقعوا ان عبير ممكن تحب طلال..وليش ما بين من قبل...بس عبير كانت تطالع العنود وكأنها تسألها اجاوب ولا لأ..
العنود فاهمه عبير..فا ارفعت كتوفها بمعنى انتي حره...
عبير وتحس ان بهذي الاشاره ارضت ضميرها: ايوه يا فجر احبه..
نوف مستغربه: عبير انتي تحبين طلال!!!!!طيب ليش ساكته..
عبير: توني اكتشف هالشي اليوم..
اكيد انتوا حاسين بشعور العنود الحين كيف تتألم وتعاني..اختها تحكي بكل ثقه عن حبيبها..وهي اللي لو بغت بأشاره منها حطمت كل هالثقه اللي تتكلم بها..
العنود تطالع البنات كيف تحمسوا مع عبير ويسألونها ..كيف حبيتيه..وش المشاعر اللي تحسينها...وتحس ان كل شي فيها..ضاق عليها البيت..ضاقت فيها جدران الغرفه..والوقت يحاصرها..طالعت بعيون ريم تبي عون ومساعده..
ريم بعصبيه: طيب خلاص سكروها سيره..عبير تحب وبعدين..
عبير ما انصدمت من كلام ريم لانها تدري وش موقفها: ليش ياريم ما انتي فرحانه لي..ماودك تشاركيني مشاعري...
ريم بأستحقار: على ايش افرح لك..على خيبتك..ولا على غبائك...
رغد: ريم وش هالكلام اللي تقولينه...
عبير: ما عليه يا رغد انا مسامحتها..وادري انها متضايقه عشان موضوع طلال..وهي على حق مفروض هذي السالفه مو وقتها..
ريم بتحدي: ولا راح يجي وقتها..
عبير ودها تقول لريم خلاص ارحميني ترى كفايه اللي فيني..طالعت العنود ولا كأن صاير فيها شي..حسدت العنود على اللي هي فيه كيف لحد الان ساكته..ما بكت..وما تحركت ولا كأنها متأثره بالمره..صح عيونها تحكي حزن العالم..لكن من الخارج..جسد بلا روح ..بلا احساس..بلا مشاعر..
رغد: بنات خلونا ننام عشان من بدري نروح لطلال..
الكل وافقها الراي وراحوا في نومه عميقه الا العنود وعبير وين يجيهم النوم..وعبير تدري بالعنود..والعنود تفكر بأحلامها الي طيرتها الرياح مثل الرماد..عبير هي الناراللي حرقت احلامها وهي نفسها الرياح اللي طيرتها بنفسها...
&&&&&&&&&&&&&&&&&&&&&&&&&&&&&&&&&&&&&&&&&&&&&&& &&&
&&&&&&&&
صبــــــــــــاح الاحــــــــد,...
رجعوا العيال وراحوا الحريم والرجال بدالهم...
راح ابو فواز واستفسر عن حالة طلال اكثر..
دخلوا الحريم مع البنات لعند طلال اللي مازال نايم من تأثير البنج...
ام فواز تطالع ولدها وتبكي بصمت..قطعت قلوب اللي حولها..البنات كلهم ما تحملوا منظر طلال..والتعب باين عليه والسواد تحت عيونه..والاجهزه حوله...
العنود تتطالعه وتحس ضميرها ياكل قلبها اكل..واحساسها انها هي السبب بالللي صار لطلال ..لانها قست عليه..بس مضطره تقسى عليه عشان ينساها..
وبينما الحريم جالسين والبنات يسولفون سوالف عاديه...
صحى طلال: يمه.....يمه...
ام فواز فزت من مكانها بسرعه وراحت لعنده: سم يا بعد قلبي الحمد لله على سلامتك يا بعد اهلي كلهم..
طلال وعاقد حواجبه من الالم: وش صار..وش فيني..
ام فواز: الحمد لله على سلامتك يمه..
وجاوا الحريم وتحمدوا له بالسلامه وبعدهم البنات..
رغد: الحمد لله على سلامتك طلول..
ريم: ما تشوف شر يا رمز الشقا "وتضحك"
طلال ابتسم: تسلمين..
الهنوف ومها: الحمد السلامه معافى ان شالله..
طلال: الله يسلمكم..
فجر راحت باسته من خده: الحمد لله على سلامتك..خوفتني عليك..
طلال وبصعوبه يتكلم: خليني اشوف غلاي...
نوف راحت لعنده ومسكت ايده وباستها: حسبتك بتروح وتخليني..
طلال:وانا أقدر..
عبير قربت منه: طلال..الحمد لله على سلامتك..وما تشوف شر....
طلال: الشر ما يجيك "ويستنى اللي بعدها لانها اكيد راح تكون العنود"
العنود قربت وعينها بالارض ما تقدر تطالعه: ما تشوف شر يا ولد عمتي..
طلال يطالعها: الشر ما يجيك يا بنت خالي...
وقعدوا يسولفون عليه وهو ساكت لان امه مانعته من الكلام بس يسمعه..دخل الدكتور بعد ما طلع الكل من الغرفه وكشف عليه..
وقال انه تحسن عن اول..
وقعدوا عنده لما العصر...رجعوا الحريم لبيوتهم الا ام فواز والبنات جالسين معاه الا الهنوف ومها راحوا على بيوتهم... ولا طلعوا من عنده الا عالساعه ثمانيه بالليل..وبعد الويل...بعد ما جات الممرضه وطردتهم طرد..بس قبل ما يطلعون كلهم..
طلال: العنود...
العنود وقفت وماودها تقعد مع طلال لحالهم: سم..
طلال: تعالي ابيك بشي..
العنود طالعت ريم وبعدها عبير اللي سوت حالها مو مهتمه..بعدين قربت من عنده: سم..
طلال: سم الله عدوك... بس حبيت اقول لك..سامحيني على الكلام اللي قلته لك وانسيه ولا كأن صار شي اوكي..
العنود رفعت عينها عليه مصدومه..اللحين هو قاعد يعتذر عن خطائه..وخطائه انه حبها..
قالت بسرعه: انا اللي سامحني لاني قسيت عليك..
وطلعت بسرعه قبلا لا تطلع روحها من كلام طلال اللي مثل الملح على الجرح..يألم بالحيل..اكبر من ان يتحمله أي شخص..خصوصا من شخص حبته.يتأسف ويعتذر من انه اعترف للحبيب عن حبه ويطلب منه ان ينساها..
&&&&&&&&&&&&&&&&&&&&&&&&&&&&&&&&&&&&&&&&&&&&&&& &&& &&&&&&&&
جلس طلال في المستشفى اسبوع كامل..صار طلال يتحاشى العنود والعنود نفس الشي..لحد ما انقطعت العنود عن الزياره لانها تعبت..ما تتحمل تشوف طلال يصدها بالقصد...
&&&&&&&&&&&&&&&&&&&&&&&&&&&&&&&&&&&&&&&&&&&&&&& &&& &&&&&&&&
شجون جالسه تكلم فهد...
شجون: فهود وش رايك تجي عندي في البيت..
فهد: صدق!!!
شجون: ترى عندنا عيال يهبلون مثلك..
فهد: اوكي..اجيكم اليوم؟؟؟
شجون: ايوه ليش لأ..
فهد: خلاص ثواني وانا عندك..
شجون: يلا باي..
فهد: باي...
شجون: بأتصل على ريم ولا رغد تدبرني..."واتصلت"
شجون: الوو.
رغد: هلا والله وغلا..
شجون: اهلين..رغوده قلبي انا عزمت فهد لبيتكم .عشان مشعل وصديقه محمد..هم موجودين؟؟
رغد: ايوه موجودين..
شجون: اوكيه دقايق وجايتكم..
رغد: حياك الله يا قلبي..
شجون: تسلمين...باي.
رغد: باي..
راحت شجون لبيت خالتها ام مشاري..وبعد نص ساعه وصل فهد..
شجون فتحت الباب: فهوووووووود..
فهد ابتسم: شجوووونه..
شجون باسته من خده: تفضل يا قلبو..
فهد: هههههه تحسسيني اني بزر..
شجون: لا وش دعوه انت سيد الرجال..
رغد نادت مشعل..
مشعل:مين هذا...؟؟
رغد: هذا فهد اخو صديقة شجون..
مشعل: اهااا... اوكيه رايح له..
دخل مشعل وحصل فهد يسولوف مع شجون..
مشعل: السلام عليكم..
الكل: وعليكم السلام...
مشعل سلم على فهد: هلا والله..انا مشعل..
فهد: وانا فهد..
مشعل: هلا والله حياك الله..كيفك فهد..
فهد: والله تمام..
مشعل: تجي تجلس معانا مع العيال بدال جلسة البنات..
فهد: اوكي...
وراحوا....
شجون: رغد قلبي..تتوقعين بيتغير..
رغد: ا نشا الله..خليه كل يوم يجي...
شجون: ا نشا الله..بس هو تغير كثير..ما عاد صار يكلم البنات وهذا اهم شي ...والعيال اللي اكبر منه احس ان علاقته فيهم خفت كثير..ما عاد صار يتكلم عنهم مثل اول.,...
رغد: الله يتمم عليه ا نشا الله..
شجون: الا وين ريم..
رغد: في بيت عمي عند العنود..
شجون: سلامت وش فيها العنود..لها كم يوم ما جات المستشفى..
رغد: والله تدلع شوي..
شجون: بس اخر مره كان شكلها مره تعبان..
رغد تصرفها: لالا ما فيها شي مثل ما قلت لك تدلع..
&&&&&&&&&&&&&&&&&&&&&&&&&&&&&&&&&&&&&&&&&&&&&&& &&&
__________________
&&&&&&&&
ريم: انتي قررتي يا العنود..تحملي نتيجة قرارك..
العنود: ريم لا تحطين اللوم علي..
ريم: محد قال لك تقولين شي وانتي ما فكرتي فيه مية مره...مفروض يوم اعترف لك توقفين هنا وتراجعين حساباتك مليون مره مو ميه...
العنود: طيب الحين طاح الفاس بالراس وش اسوي..
ريم بقسوه عشان تقوي العنود: انسيه...الزمن كفيل انه ينسيك طلال وابوه بعد..
العنود: توقعين بأقدر....!!
ريم: قوي نفسك يا العنود..لا تصرين ضعيفه..خليك القويه..اللي ما يهزها شي بالدنيا كلها..ولا تتعثرين في اول مطب بحياتك....بالعكس هذا يدفعك قدام..كملي حياتك وشوفي مستقبلك ..وربك بعوضك ويعطيك على قد نياتك..
العنود ردت روحها شوي: ابيك تساعديني..
ريم: ابشري يا بنت عمي..ان شا الله مثل ما خليته يحبك راح اخليك تنسينه..اصلا شوفيه كيف الحين يتصدد عنك..
العنود: تدرين يا ريم وش اكثر شي تحسفت عليه..تحسفت اني ما تركته من البدايه..توقعت بقدر افكر بنفسي قبل اختي..توقعت اني هالمره بشوف مصلحة نفسي قبل الكل..بس اكتشفت اني ظلمت نفسي وظلمت الولد معاي.. هو اصلا ما كان منتبه لي.وانا من غبائي قربته بناحيتي...اصلا انا مالي ومال الحب..اصلا انا مفروض اجيب قفل واقفل قلبي...
ريم: صدقيني يا العنود اريح لك..
العنود: خلاص من اليوم ورايح..راح ترجع العنود الاولى..الاولى اللي قبل الحب والضعف..
ريم: بعض الحب ضعف..وبعضه يزيدك قوه..لكن حبك ما زادك الا ضعف والم..
العنود بأصرار: خلاص لا عاد تجيبين سريته..انا قررت انساه او اتناساه..واعيش حياتي..
ريم: بدون تضحيات جنونيه..
العنود تأكد وهي مبتسمه: وبدون تضحيات جنونيه..
ريم قامت وحضنت العنود: هذي العنود حبيبة قلبي..
العنود: والله من دونك ما ادري وش كان بيصير فيني..
ريم: انا وياك كل وحده تكمل الثانيه..
العنود: الله يخلينا لبعض..
ريم: هههه امين..
&&&&&&&&&&&&&&&&&&&&&&&&&&&&&&&&&&&&&&&&&&&&&&& &&& &&&&&&&&
نسيت ابشركم بشي..تركي جاب نسبة 95%..
وسليمان جاب 98% ما شا الله عليه...
&&&&&&&&&&&&&&&&&&&&&&&&&&&&&&&&&&&&&&&&&&&&&&& &&& &&&&&&&&
بعد اسبوع من الاحداث طلع طلال من المستشفى واعتذر من الجامعه السمستر هذا عشانه مكسر كله...والعيال طول الوقت حوله ما يتركونه الا وقت النوم..
فهد صار صديق مشعل ومحمد وما يفارقهم ابد..
شجون حققت اللي في بالها وارتاحت..ومره فرحانه بفهد وما تناديه الا بأخوي..ومتهمته بكل شي بحياته وكأنها امه..
العنود تناست طلال وتحاول قد ما تقدر ما تفكر فيه وتقنع نفسها ان اللي بينهم انتهى وعدّى..
والبقيه على ما هم عليه...
&&&&&&&&&&&&&&&&&&&&&&&&&&&&&&&&&&&&&&&&&&&&&&& &&& &&&&&&&&
فجر ما سكه موبايلها:شجون بأمرك الحين عشان تشوفين فستان زواجي..
شجون: صدق خلص..
فجر: ايوه ..الحين بروح اسوي بروفه وابيك معاي..
شجون: اوكيه استناك..
فجر: اوكيه باي..
شجون: باي..
وصلت فجر بيت ابو فيصل...شافت عند باب بيتهم بنت واقفه تكلم فيصل وتدلع عنده وتتميع ولازقه فيه..وفيصل يسولوف معاها..
فجر تحس ان عقلها طار من راسها..كيف فيصل النذل يقعد يحاكي وحده مثل هذي..
نادين بدلع ماسخ: فيصل انا احبك ..تروح تتزوج وحده غيري...
فيصل يحاول يضبط اعصابه قد ما يقدر: نادين بليز روحي لبيتكم واستري على نفسك ويكفي فضايح..
نادين: انت خنتني وغدرت فيني..
فيصل: تراك ماخذه في نفسك مقلب..
نادين: بس انامتأكده انك تحبني..
فيصل متعجب: انا احبك؟؟؟؟؟
فجر من ورى فيصل وما لحقت الا على اخر كلمه: اذا انت تحبها ليش تزوجتني..
فيصل اخر شخص توقع يسمع صوته الحين..صوت فجر.والتفت عليها مصدوم..
نادين تطالع فجر من فوق لتحت: وان شا الله هذي زوجتك؟؟
فيصل صرخ فيها: ناديـــــــــــــــن... اقول لك روحي بيتكم..
نادين بكت وراحت لبيتهم..
فجر تطنز: حرام كسرت بخاطرها المسكينه..
فيصل برجى: فجر انتي فاهمه الموضوع غلط..
فجر موصله معها: فاهمته غلط؟؟؟؟ وانا سامعتك تقول لها انا احبك..
فيصل: مو لانها قالت.... ..
فجر بعصبيه: لا تقعد تبرر لي..بس ابيك تجاوبني...ليش تزوجتني ما ادمك تحبها...عشان تذلني..عشان تكسر بخاطري..تكلم..
فيصل بحب: فجر انا تزوجتك لاني حبيتك..
فجر: وهذي وش تصير..ابي تفسير..
فيصل: هذي وش عليك منها..
قطع عليهم طلعت شجون من بيتهم وهي مستغربه: وش فيكم؟؟
فجر طالعت شجون بعدين فتحت باب سيارتهم: خلي اخوك يقولك"وسكرت الباب بقوه وراحت"
فيصل يطالع سيارة فجر لما راحت وضرب ايده بكف ايده الثانيه..
شجون مثل الابله..ضايعه بالطوشه: فيصل وش فيكم؟؟
فيصل طالع شجون بعدين دخل داخل البيت..ولحقته شجون.
فيصل راح وجلس على اول كنبه شا فها وسند راسه عليها وحط ايده على عيونه.."كيف فجرتروح مني بالبساطه هذي..ما صدقت على الله تحس فيني ..ترجع تتركني مثل ما كنت..."
شجون جلست حنب اخوها ومسكت ايده: فيصل قول لي وش فيها فجر..فهمني السالفه..
فيصل وخر ايده عن عيونه وتكلم بطفش: شافتني انا والمفعوصه هذي بنت جيرانا..
شجون منصدمه: نادين؟؟؟
فيصل وهو كارهها : ايوه جعل ربي ياخذها وافتك منها...استغفر الله..
شجون: واكيد فجر فكرت انك تحبها..
فيصل: ايوه وهذا اللي صار..
شجون: خلاص فصول انت اهدى وانا راح اتفاهم مع فجر..
فيصل بترجي ومسك ايدين شجون: الله يخليك فهميها السالفه..
شجون ابتسمت بثقه: ولا يهمك..وبعدين فجر قلبها طيب وتراح ترضى بسرعه..
فيصل: ما اظن بترضى بسرعه..
شجون: لا تخاف..فجر ما راح تروح منك..مع انها المسكينه جايه تاخذني اشوف فستانها..
فيصل ضاقت فيه الدنيا وكره الساعه اللي عرف فيها نادين: صدق!!!!..يا الله كله من هذي اللي ما تتسمى وجه النحس..
شجون: مو قلت لك خلاص خلي الموضوع علي..
فيصل قام بيروح غرفته: تراني اعتمد عليك..
شجون: اعقلها وتوكل..
&&&&&&&&&&&&&&&&&&&&&&&&&&&&&&&&&&&&&&&&&&&&&&& &&& &&&&&&&&
فجر رجعت بيتهم والدخان بيطلع من راسها..قابلت نوف..
نوف: فجر وش صار على فستانك..وليش ما اخذتيني معاك يا النذله..
فجر والشياطين تنقز قدامه: لان ما راح يصير فيه زواج..
نوف انصدمت: كيـــــــــف؟؟؟ وش قاعده تخربطين..
فجر: مثل ما سمعتي..
وتركتها وراحت..
نوف: وش فيها هذي انهبلت وقعدت..خلني الحق عليها...
&&&&&&&&&&&&&&&&&&&&&&&&&&&&&&&&&&&&&&&&&&&&&&& &&&
الذين يشاهدون الموضوع الآن: 7 (0 من الأعضاء و 7 زائر)
مواقع النشر (المفضلة)