{ نهاية حبك إعدامي } رووووووووووعه

[رامون]

محمد: شو هالمسج .. ويسوي نفسه انه يبي يشوف الرساله .. وفارس يبتعد عنه ..
فارس: وخر مناك ..
محمد: زين ابي اعرف ردك على الرساله ؟
فارس: حمادوووووو
محمد مسك فارس من اذنه: من حمادوووو
فارس: آآآي ي ي .. محد .. هد اذني ..
محمد: بتعيدها ؟
فارس: آخر مره
محمد: قول توبه
فارس: آي آي .. توبه توبه ..
محمد ترك فارس: اسود الويه ..
دخلت فاطمه وشافتهم بهالمنظر .. غصبن عنها ضحكت ..
فاطمه باست فارس: شحالك اخوي ..
محمد كان يطالعها باعجاب .. التفت عليه فاطمه وتلاقت عيونها بعيون محمد .. نزلت راسها بخجل ..
فارس: طيب فديتج اختي ..
محمد: شحالج فطيم ؟
فاطمه وهي تقعد جنب اخوها: الحمدلله .. انت اخبارك واخبار اليهال ؟
محمد: طيبين يسرج الحال .. تنفس براحه .. ابتسم وطلع جواله تم يتعبث فيه ..
فارس: شحالج الغاليه ؟
فاطمه: تمام فديتك .. انت شو اخبارك؟ ما شفناك اليوم ؟ اشتقنا لك
فارس: ايه عليج اختي ..
فاطمه: اليوم بابا استغرب انك طالع من الصبح ..
محمد" يا ويل حالي على الدلع انا .. بابا .. حلوه طالعه من حلجها" ..
فارس: كان عندي شغل متراكم مال كم اسبوع ..
فاطمه: زين خالد مو مقصر ..
فارس: اعرفه خالد شغول .. بس في اشياء لازم اشيك عليها بنفسي .. وفي اشياء خالد يشيك عليها ..
فاطمه: اهاا .. يعطيكم العافيه ..
فارس: الله يعافيج .. التفت على محمد .. بن عمي .. شو هالهدوء ؟
محمد رفع راسه وتلاقت عيونه بفاطمه اللي كانت سرحانه فيه: لا .. بس كنت اشيك على جوالي ..
فارس: شو تشيك رسايل الحب والغرام .. رن جوال فارس والرنه ( عالي مستواه ) ..
محمد: لا مكالمات الحب والغرام .. رد بس ..
فارس ويهه صار احمر .. كتم الرنه وابتسم .. فاطمه تمت اطلع فارس بشك ..
محمد يحرج فارس: رد ليش كتمت الرنه ..
فارس فاتن عليه: لا سكروا ..
محمد: علينا عاد .. ما شوفك تكتم الرنه ..
دخلت مريم بالعصير: تفضلوا احلى عصير من ايديني الحلوات ..
فاطمه: بس ثنين .. وانا ؟
محمد لا شعوريا: ولا يهمج .. تفضلي عصيري .. مد يده لها بالعصير ..
فاطمه انحرجت .. لانها ما كانت تقصد ..
فاطمه: لا عادي محمد .. كنت امزح .. بروح اسوي لي ..
محمد باصرار: لا والله تشربين عصيري ..
فاطمه: لا شدعوه محمد .. عيب والله عيب .. انت الضيف ..
محمد: من قالج بعطيج العصير جي .. لا يبه شربيه بالعافيه .. بس بتسوين لي عصير من ايدينج الحلوات .. نقزت مريم: لا يبه انا اللي ايديني حلوات ..
محمد: ولا يهمج .. ايدينج حلوات .. وفطيم ايدينها بعد حلوات ..
فاطمه كانت بتموت من الحيا ..
فارس: فطيم شربي العصير .. ولا عليج منه لاتسوين له عصير ولا شي ..
محمد: افااا ..
فاطمه: لا بسوي حق ولد عمي .. طالعت محمد بحنان .. ولا يهمك يا محمد اسوي لك احلى عصير ..
محمد" فديتها": تسلمين بنت العم .. فيج الخير .. مو مثل هالدب فروس ..
مريم: احلى الدب فروس ..
فاطمه: حدكم عن اخوي .. الا فارس ..
فارس: فديت اختي اللي تفزع لي ..
محمد: حلاتين عليك يا فارس ..
فارس: ليش ؟
محمد: من يدافع عنك ؟
فارس: فطيم اختي ..
محمد: احسدك .. ورفع حاجب وطالع فاطمه ..

[رامون]

فارس ومريم: ههههههههههه ..
طبعا محد فهم مغزى كلام محمد الا فاطمه .. قامت من مكانها وراحت تسوي عصير حق محمد .. وهي فالمطبخ تمت تفكر في كلام محمد ..
فاطمه " شو فيه محمد ولد عمي .. وايد تغير .. نظراته تغيرت .. كلامه غير عن قبل .. بديت اخاف منه " كانت مندمجه وهي يتغسل الكاس .. وانكسر الكاس وادخل شوية زجاج في يدها وانجرحت .. صرخت ..
فاطمه: آآآي .. فارس ..
فارس سمع صوت اخته وركض لها المطبخ ..
فارس بخوف: شو فيج فطيم ؟
فاطمه اطالعه وتتألم: فارس .. يدي ..
قرب منها وشاف الدم اللي بيدها .. خاف على طول سحبها من ايدها وراح الصاله ..
فارس: مرايم روحي جيبي عباية اختج ..
مريم بخوف: شو فيج فطيم ؟
فاطمه: انكسر الكاس بيدي ودش الزجاج .. آآي .. حطت راسها على صدر فارس وصاحت ..
فارس: بسرعه مرايم فديتج .. حضن اخته .. حياتي فطيم الحين بوديج المستشفى ما عليج شر حبيبتي ..
محمد كان يطالع فاطمه بخوف: سمالله عليج فطيم .. انا السبب ..
فارس: ليش انت ؟
محمد: انا اللي طلبت منها تسوي لي عصير ..
فارس: لا يا ريال لاتقول جي .. زين محمد فديتك شغل السياره على ما نجيك ..
محمد وهو طالع: من عيوني .. " كل شي لعيون فطيم يهون " .. فارس كان حاضن فطيم ويسكتها ..
فارس: فطيم فديتج .. الا كاس وانكسر لاتكبرين الموضوع ..
فاطمه وسط دموعها: يدي تعورني فارس .. والله تعورني ..
فارس: فديت يدج يا فطيم ..
دخلت عليهم مريم وعطت فاطمه العبايه لبست عبايتها وهي تصيح ..
مريم: اجي معاكم .؟
فارس: لا فديتج ماله داعي .. بس بلغي الكل ..
مريم: ان شاء الله .. ايه عليج فطوم ..
طلع فارس مع فاطمه وركبوا السياره مع محمد .. اتصل عبدالعزيز لفارس .. اللي حس بتوأمه ..
فارس: هلا عزيز
عبدالعزيز: اخبار فطيم؟
فارس: ما عليها شر ان شاء الله .. احنا قريب المستشفى
عبدالعزيز: اجيكم ..
فارس: لا يبه ماله داعي .. كلها الا جرح صغير بس اختك دلوعه حبتين ..
فاطمه بعفويه: فاااااارس ..
فارس: اووه انتي هني ..
فاطمه صاحت: والله يعورني ..
محمد: ما تشوفين شر بنت عمي .. ما عليج من فروس بس يبي يلعوزج ..
فاطمه سمعت كلام محمد وحست براحه ..
فارس: زين عزيز وصلنا المستشفى .. باكلمك اول ما نطلع ..
عبدالعزيز: الله يحفظكم ..
وصلوا المستشفى .. نظفوا لفطيم الجرح وخيطوه لها .. كانت ماده يدها وتتألم ..
الدكتور: خليها ترتاح على السرير شويه ..
فارس: ان شاء الله ..
الدكتور: ما تشوفين شر اختي ..
فاطمه: مشكور دكتور ..
الدكتور: العفو ..
فارس: ما بتكتب لها ادويه او شي ؟
الدكتور: ما تحتاج .. بس بكتب لها بندول تقدر تجيبه لها من الصيدليه ..
فارس: خلاص صار ..
راح فارس ورا الدكتور عشان ياخذ الورقه منه .. اما محمد تم مع فاطمه .. رجع الدكتور يتطمن على فاطمه بعد ما عطى فارس الورقه ويصرفها فالصيدليه ..
الدكتور موجه كلامه لمحمد: زوجتك قويه ما شاء الله عليها ..
محمد وفاطمه انصدموا بكلام الدكتور ..
الدكتور: ما شاء الله كانت هاديه واحنا انظف لها الجرح .. ان شاء الله ما عليج شر اختي ..
محمد: يعطيك العافيه دكتور وماقصرت ..
الدكتور: الله يعافيك .. وسلامات ماتشوفون شر ..
طلع الدكتور من الغرفه اللي كانت فيها فاطمه .. محمد كان واقف عند الباب وفاطمه شبه منسدحه على السرير .. كل واحد منهم يفكر في كلام الدكتور ..
( زوجتك قويه ماشاء الله عليها ) .. هالجمله تترد على مسامع محمد وفاطمه .. دخل فارس وشاف حالهم استغرب ..
فارس: ها فطيم الحين احسن ..
فاطمه سرحانه: .............
فارس: فطومه .. مسك كتفها بهدوء .. فطيم وين رحتي ؟
فاطمه: هلا فارس ..
فارس: احسن الحين حبيبتي ؟
فاطمه اي ..
فارس: نروح البيت ؟
فاطمه: اي .. يلا ..
محمد طبعا ما كان احسن من فاطمه .. سرحان وهو واقف عند الباب ..
فارس: محمد ..
محمد: ............
فارس: شو فيكم اليوم .. حمود ..
محمد: هلا ..
فارس: يلا بنحرك ..
محمد: ان شاء الله ..
فارس: مسك اخته ومشى معاها لين وصلوا السياره .. ركبت السياره وهي ومحمد في بالهم شي واحد
( زوجتك ) هالكلمه حركت مشاعر محمد اللي اتجهت ناحية فاطمه .. اما بالنسبه لفاطمه هالكلمه خلتها تفهم غموض محمد في الفتره الاخيره .. وفهمت سر نظراته وتغير اسلوبه معاها .. اما فارس كان مستغرب هدوء محمد المفاجئ .. وصلوا البيت نزل فارس ونزلت فاطمه .. ومحمد رجع البيت وقلبه متعلق بكلام الدكتور ..
اما فاطمه فكان استقبال بوفارس لها قطع عليها حبل افكارها ..
بوفارس: فديت ام الزين انا .. سمالله عليج حبيبي ..
فاطمه خنقتها العبره وحضنت ابوها وصاحت: بابا ..
بوفارس تنهد: عيون بابا انتي .. ما تشوفين شر يا قلبي ..
فاطمه تمسح دموعها: يعور
بوفارس: اجر ان شاء الله يا قلبي ..
فاطمه: الحمدلله على كل حال ..
بومحمد: بعدي عليج يالغلا .. الحمدلله على كل حال .. تعالي داخل حبيبتي ..
ايمان: سمالله عليج فطيم ؟ ما تشوفين شر ..
فاطمه: الله يسلمج حبيبتي ..
فارس: الا يدها تعورها .. فطوم دلوعه ترا ..
ايمان: عاد تقولي عن فطوم .. الدلع لاعت جبده منها ..
فاطمه وهي تتألم: والله انتوا ما تحسون .. وراحت غرفتها تصيح ..
بوفارس التفت على عياله: زين جي زعلتوا غلاي ..
فارس يقلد ابوه: زين جي زعلتوا غلاي .. يا حرام ..
بوفارس سحبه من شعره: يا اسود الويه ..
فارس: آي آي آي .. شو فيكم علي اليوم ..
بوفارس: من ؟
فارس: انت تسحب شعري .. وحمود اذني .. انا اللي بروح المستشفى الحين ..
ايمان وبوفارس: هههههههه ..
طلعت ام فارس من غرفتها متجهه لغرفة فاطمه تطمن عليها .. طقت الباب .. وفاطمه فتحت لها ..
ام فارس: فديت بنتي انا .. ما تشوفين شر يالغاليه ..
فاطمه تمسح دموعها: ماما .. يعيبون علي ..
ام فارس تحضنها بحنان: ما عليج منهم محترين منج ..
دخل جاسم: اي ما عليج منهم .. ماتشوفين شر اختي ..
التفت ام فارس على جاسم: ويه .. انت مو نايم ؟ شو اللي قعدك ؟
جاسم: قعدت مع الحشره ..
ام فارس: فديتك انا .. تطمنت على اختك ..
جاسم: سلامات فطومه ..
ام فارس: الله يخليك لاهلك .. روح نام يا قلبي ..
جاسم: ان شاء الله .. طلع جاسم .. وتمت ام فارس تواسي بنتها واطبطب عليها .. وفاطمه كانت تتألم من الخياطه .. تمت مع بنتها لين غطت عينها .. غطتها وطلعت عنها ..
ام فارس شافت الكل متجمع في الصاله اللي فوق ..
ام فارس: جويسم روح نام ..
جاسم: هههههه .. بكره اجازه عادي ..
بوفارس يمسح على شعر ولده: معليه خليه يقعد معانا شوي ..
ام فارس: جاسم روح نام يبه ..
جاسم بحزن: زين .. راح غرفته .. واللي تموا فالصاله ايمان وفارس وبوفارس ..
ام فارس: الحين البنت في حاله وانتوا قاعدين تتمسخرون عليها .
فارس يهمس لابوه: الله يعنك الليله ..
بوفارس ابتسم: كله من فروس .. هو اللي يقول عنها دلوعه ..
ام فارس: ما يصير جي .. وطالعت فارس بنظره .. وانت سمعتك ..
فارس يضحك: هههههه .. فطيم دلوعه ..
ام فارس: خل عنك السوالف .. ولا تقعدون تسون جي في بنتي ..
ايمان: صج هي وايد دلوعه ؟
دخلت عليهم مريم: من الدلوعه ؟
ايمان: فطوم الياهل ..
ام فارس: ايمانو لمي لسانج احسن لج ..
ايمان: ما قلنا شي ..
مريم: شو اخبار فطيم ؟
فارس: ما فيها شي .. بس نظفوا الجرح من الزجاج وخيطوه لها ..
مريم: وين هي الحين ؟
ايمان: في غرفتها تدلع ..
ام فارس بعصبيه: يعني كلامي ما ينسمع ..
ايمان: ولين .. زين زين ..
راحت مريم غرفة اختها .. لقتها نايمه .. غطتها عدل .. وطلعت عنها ..
مريم: نايمه فديتها ..
بوفارس: زين مرايم .. شو قرارج المبدئي ؟
مريم انحرجت ونزلت راسها ..
ايمان: السكوت علامة الرضا .. كللللووووش
ام فارس: وجع يا ايمان ..
ايمان قامت من مكانها: اوووووه .. الواحد ما يفرح بعد .. طلعت عنهم وراحت غرفتها ..
ام فارس: احسن بعد .. ها مرايم يمه ما رديتي على ابوج ؟
مريم مبتسمه: فكرة الزواج انا مو مستنكرتها ومتقبلتها الحمدلله .. بس احتاج وقت عشان ارد عليكم ..
بوفارس: هاي اللي كنت ابي اعرفه .. دام الفكره انتي متقبلتها اخذي راحتج بالتفكير ..
فارس: تستاهلين كل خير يا مرايم .. والفال حق فطيم وايمان ان شاء الله ..
الكل: ان شاء الله ..
قام فارس وراح عند ايمان .. اما بوفارس ومريم وام فارس تموا مع مريم يسولفون معها عن الزواج واهميته ..
طق الباب على ايمان ودخل على طول ..
فارس: ايماني ..
ايمان كانت تصيح في فراشها .. قرب منها فارس ورفع اللحاف عنها ..
فارس: ايماني .. ليش زعلانه ؟
ايمان تمسح دموعها: ماما شو فيها صايره عصبيه معاي ؟
فارس: يعني اول مره امي تكون جي ؟ تعرفينها هي الكل بالكل فهالبيت .. اذا ابوي ما يقدر يكسر كلامها صح
ايمان: ادري ..
فارس: انتي ترا مثل امي .. شخصيتج قويه ..
ايمان رفعت راسها: انا ؟!
فارس: اي .. فديت امي الله يحفظها ما تسكت عن حقها ..
ايمان: شو اسوي لو انا طالعه على امي ..
فارس: فديتج لاتزعلين منها .. بس هي لانها قفلت علي انا وابوي يوم قطعنا فطيم وصيحناها ..
ايمان: فطوم دلوعه ..
فارس: كلكم جي مو بس فطوم ؟
ايمان: اي فطوم دلوعتك ما ترضى عليها ..
فارس ضحك: ههههههههه .. مو هاي قصدي ؟
ايمان: عيل ؟
فارس: بس كلكم يا خواتي فيكم هالدلع .. فطيم يمكن بزياده ..
ايمان: يعني انت قلت بنفسك ..
فارس: اي هي وايد حساسه .. و كانت تتألم واحنا نضحك ونتمسخر .. يعني ما كان وقته ..
ايمان: لا هي دلوعه وايد ..
فارس: زين زين .. هي دلوعه وايد ولا يهمج .. قومي غسلي ويهج ولا تزعلين من امي ..
ايمان: ان شاء الله ..
فارس: انا بروح ارتاح وانتي نامي فديتج ..
ايمان: ان شاء الله ..
طلع فارس من عند ايمان .. وهو مار على الصاله شاف مريم مع امه وابوه .. ابتسم لهم ودخل غرفته ..
خذ له شور دافي .. بعده حس بانتعاش .. خذ التلفون واتصل بمناف ..

[رامون]

مناف: هلا والله
فارس: فديت قلبها انا ..
مناف منحرجه: شخبارك؟
فارس: الحمدلله .. انتي شو اخبارج؟
مناف: طيبه والحمدلله ..
فارس: اخبار فيصل وعبدالله ؟
مناف: الحمدلله ..
فارس: الحمدلله .. مناف ..
مناف: آمرني ..
فارس: واااااي .. ما يامر عليج العدو .. فديت الذرابه انا
مناف انحرجت: فارس لاتحرجني بكلامك ..
فارس: فديت قلبج يا مناف ..
مناف: قولي وش كنت تبي من شوي ؟
فارس: كنت ابي اقولج اني مشتـــــاق ..
مناف" فديتك": ........
فارس: حياتي مناف ؟
مناف لا شعوريا: فديتك يا فارس ..
فارس: اموت في كلامج يا مناف ..
مناف: فارس ..
فارس: يا قلبه انتي ..
مناف: في خاطري كلام ودي اقوله لك ..
فارس: قولي فديت قلبج ..
مناف: فارس .. انا .. انا .. انا وايد تعلقت فيك .. بس طلبتك
فارس: عيونه ..
مناف: فديت عيونه .. مالي حد فهالدنيا .. لا تتخلى عني او تلعب بقلبي .. وصاحت ..
فارس"يعني تحبني": يا مناف انتي مو جزء مني .. انتي صرتي كلي .. والله العظيم اني بحطج بعيوني وما راح اخلي شي يمسج .. وبحافظ عليج .. وهالكلام انا قلته لج من قبل .. بس بأكد لج عليه الحين .. و اللي رفع سابع سما يا مناف بحطج بعيوني .. واذا في خاطرج شي قوليه الحين .. وانا حاضر لج .. مسحي هاللولو يا قبله انتي
مابيج تصيحين .. دموعج غاليه يالغاليه ..
مناف: انا محتاجه حنان .. من بعد الوالد الله يرحمه ضعنا .. قبل كنا على الاقل عايشين ..
يقاطعها فارس: انا تحت امرج يا مناف .. وحاضر باللي في خاطرج .. طلباتج اوامر ..
مناف: انا مابي منك شي يا فارس غير انك تحطني بعيونك ..
فارس: انتي مو بس فعيوني .. انتي ملكتيني كلي ..
مناف بخجل: الله يخليك لي يا فارس ..
فارس: آمين يا قلبي انتي .. تنهد فارس براحه .. زين يا قلبي انتي .. روحي نامي تأخر الوقت .. وقعديني للصلاه
مناف: ان شاء الله ..
سكروا وكل واحد وده يطير من وناسته بما في قلب الثاني له ..
فارس ارتاح لما مناف ابدت له اهتمامها فيه وقالت له انها تعلقت فيه ..
مناف ارتاحت لما قالت لفارس هالكلام .. لانها حبته من قلبها .. غزا قلبها بحبه وحنانه ..
كل من مناف وفارس نام براحه وعمق ..

محمد كان متشتت .. يفكر في كلام زوجته وتصرفاتها الغريبه .. ويفكر في كلام الدكتور ( زوجتك )
محمد " لو فطيم كانت زوجتي .. هل بستانس معاها ؟.. هل بتشك فيني ؟ .. كيف بتكون حياتي معاها ؟
آه يا ساره ليش تسوين فيني جي .. شو اللي خلاج تشكين .. ومن تكون هاذي اللي لعبت بمخج وقصت عليج هدمتي اللي بنيناه سنين .. ضيعتي عيالنا .. حياتي معاج انتهت يا ساره انتهت .. " تم يفكرويفكر .. ماقدر ينام .. طلع من غرفة النوم وراح صالتهم .. شغل التفزيون وتم يقلب قنوات التلفزيون بملل .. تم فتره على هالحال .. مسك جواله وتم يتعبث فيه .. راح المكالمات المستلمه وشاف رقم فاطمه بنت عمه .. تم يطالع الرقم ولاشعوريا اتصل .. رن التلفون فتره وبعدين ردت فاطمه بتعب ..
فاطمه: نعم .. وبان على صوتها التعب ..
محمد بارتباك: مممممم .. مرحبا فطيم ..
فاطمه ما كانت مستوعبه الصوت: من ؟
محمد: انا محمد ..
فاطمه بطلت عيونها: محمد !
محمد: آسف متصل هالوقت المتأخر .. بس حبيت اتطمن عليج ؟
فاطمه قلبها كان يدق بسرعه: ها .. مممممممم
محمد: شلون يدج الحين ؟
فاطمه: الحمدلله .. بس تعورني الخياطه ..
محمد: ما تشوفين شر .. ان شاء الله بتتحسن .. خذتي الحبوب ؟
فاطمه: لا اول ما رجعت نمت ..
محمد: اخذيه عشان يخفف الالم .. وماشاء الله الدكتور يقول انتي قويه .. وتحملتي الالم
فاطمه تذكرت ( زوجتك ): باخذ الحبه بعدين ..
محمد: ماتشوفين شر يا فطيم بس لازم تاخذينها ..
فاطمه: الشر مايجيك .. ومشكور ما قصرت يا محمد ..
محمد: على شو تشكريني ؟
فاطمه: عنيتك معانا المستشفى .. وكفايه وقفتك ما قصرت يا بونايف ..
محمد: ولو احنا حاضرين لج يا فطيم .. انا اللي اسف .. انا السبب .. لو ما طلبت منج ما كان هاي كله صار ..
فاطمه: لا يا محمد لاتقول هالكلام .. اللي صار الله كاتبه ..
محمد: والنعم بالله .. بس انا تقيردت عليج وقلت لج تسوين لي ..
فاطمه: الحمدلله على كل حال .. ولا يهمك اي وقت تبي نسوي لك .. افا عليك ولد العم ..
محمد: ما تقصرين يا فطيم ..
فاطمه: الله يسلمك .. زين انا الحين بروح اخذ الحبه وارجع انام ..
محمد" حلوه التصريفه يا بنت العم": ما تشوفين شر الغاليه ..
فاطمه" الغاليه": الله يجيرك من الشر .. مع السلامه ..
محمد: الله يحفظج .. سلااام ..
سكر منها وهو مو مستوعب اللي استوى !!
محمد" انا صاحي ولا حلمان ؟ .. شلون سويت جي ؟ الوقت متأخر .. شو هالجرأه اللي جاتني ؟ شو بتقول عني فطيم ؟ يالله انا ليش سويت جي ليش ؟" تم يلوم نفسه وهو مو مستوعب كيف سوا هالحركه ..
اما فاطمه المسكينه كانت منصدمه اكثر منه ..
فاطمه " محمد متصلي هالحزه .. يسأل عني ؟ غريب هالانسان .. شو فيه .. بس صوته كان حزين .. احسه محتاج يتكلم مع حد .." تمت تحاتي ولد عمها .. راحت تاخذ الحبه مثل ما وصاها محمد .. بعدين نامت ..
مريم كانت تفكر في خالد .. خلصت من صلاة الاستخاره وهي مرتاحه .. وهاي مو اول مره .. من اول ما قالوا لها ان خالد تقدم لها وهي تصلي الاستخاره .. وكل مره تصلي تكون مرتاحه ..
مريم" الحمدلله ان ارتاح في كل مره .. احمدك واشكرك يا رب .. يا رب توفقني مع خالد .. يا رب ترزقنا بالذريه الصالحه .. يا رب اكون عند حسن الظن " تمت تدعي في هالليله انها تتوفق مع خالد ..
اما ايمان المسكينه وايد تأثرت بالكلام امها .. نامت وهي زعلانه وماخذه على خاطرها ..
جاسم نام بهدوء وعمق .. بوفارس عاتب ام فارس على تعاملها مع عيالها .. مرت هالليله على خير على الكل تقريبا .. الا شخص واحد ..
ساره .. اللي وايد تأثرت بكلام محمد .. كلامه صحاها من غفله عاشتها فتره من الوقت ..
ساره " كلام محمد صح .. يعني اللي يبي مصلحتي ما راح يهدم حياتي .. انا شو سويت في حياتي .. شلون انجرفت ورا اكاذيب عليه .. هل كنت في كامل قواي العقليه .. شلون خليتها تهدم حياتي .. محمد اللي ماحب غيري شلون اشك فيه .. وفاطمه اللي في حالها هالطيبه .. شلون قلت عنها الكلام اللي قلته .. ما تستاهل طول عمرها تحب الناس .. وتحبني وايد .. العاقله انا قلت عنها جي .. هالانسانه الشفافه الرقيقه .. حسبي الله ونعم الوكيل شو كنت بستفيد من كل اللي سويته ؟ شو الغرض منه؟ .. يا رب تسامحني .. انا لازم الحق على محمد قبل ما يتخذ القرار اللي قالي عنه امس .." قامت ساره من مكانها .. واتصلت لمحمد على طول .. تم التلفون يرن فتره .. محمد شاف التلفون وهو متعجب ..
محمد عاقد حواجبه " ساره متصله ؟ شو عندها .. ليكون فيها شي " .. رد على طول ..
ساره تصيح: محمد ..
محمد: قلبه انتي .. شو فيج ساره حبيبتي ..
في هاللحظه اللي محمد سمع فيها صوت ساره .. نسى الدنيا كلها ..
ساره: محمد انا اسفه .. سامحني .. كنت غبيه ومغفله .. وتمت تصيح بصوت عالي ..
محمد: اهدي شوي يا حياتي .. شو فيج يا قلب محمد انتي ..
ساره: ابيك يا محمد .. ابــيــك ..
محمد وقف مكانه: الحين جايج يا حياتي انتي .. سكر منها وطلع من البيت بسرعه .. ماعرف كيف وصل بيت اهل ساره .. ساره كانت تنتظره فالحوش وهي ترجف بخوف وتصيح .. فتحت له الباب .. و شافته واقف جدامها وارتمت في احضانه وحضنته بكل قوتها ..
ساره وسط دموعها: لا تتركني يا محمد لا تتركني ..
محمد شلها ودخل الميلس معاها .. سكر باب الميلس .. وقعدها على الكرسي وقعد مجابلها على الارض .. مسك يدها وتمت يفركها بيده بقوه .. ساره تصيح ودموعها تساقطت على يد محمد .. مسك ويها وقرب منها ..
محمد بحنان: فديت زوجتي ساره .. هاي ساره اللي اعرفها .. وباسها على جبهتها ..
ساره حضنته: محمد سامحني .. سامحني .. قصوا علي عشان يهدمون حياتي .. شافوني سعيده معاك وغاروا منا .. محمد لاتتركني .. انت كل شي في حياتي يا محمد .. غلطه وتعلمت منها ..
محمد حط يده على شافيفها: بس يا قلب محمد انتي .. لاتقولين شي .. حضنها وتم مغمض عيونه ..
اما ساره تأنيب الضمير ذبحها على اللي سوته في محمد .. تمت بين احضان محمد مغمضه عيونها تسمع دقات قلبه .. حست قلبه مليان كلام .. دقات قلبه تقولها انه يموت فيها ..
تموا في احضان بعض فتره .. محمد مسك ساره من كتفها ورفع راسها من على صدره وحط ايدينه على ويها ..
محمد: حبيبتي ساره .. مابي هالشي يتكرر .. انتي حياتي وانا لايمكن اخونج ..

[رامون]

ساره ودموعها على خدودها: سامحني يا محمد .. انا كنت مغفله وغبيه يوم سمعت كلامها .. حسبي الله عليها .. اوعدك ما يتكرر هالشي .. باقطعها ولا راح اكلمها .. والله بياخذ حقي منها ..
محمد وقف: حياتي يا ساره .. لا تفكرين اني بكرهج في يوم .. انا كل يوم اتعذب وانتي بعيده عني .. حالتي حاله
ساره: والله يا محمد كنت اكابر جدامك بس .. اما من داخلي كنت كل يوم احترق وقلبي يتقطع على قربك يالغالي
مسكها من يدها وسحبها بقوه تجاهه .. اتحدت اجسامهم وصارت كأنها جسم واحد .. تلاقت عيونها وتشابكت اياديهم .. كل من يستنشق نفس الثاني .. محمد لف يده ورا ظهر ساره .. وساره طوقت رقبه محمد بايدينها .. قرب شفته من ويه ساره وهمس بصوت خفيف ..
محمد: احبج يا اغلى انسانه ..
ساره: فديت انفاسك يا محمد .. والله انك غالي يالغالي ..
محمد: شفت شلون انا وانتي جسد واحد ..
ساره: اي ..
محمد: ابي نتم جي طول العمر .. مانفترق .. ما يفرق بينا الا الموت ..
ساره: الله يخليك لي يا محمد .. يا عزوتي ..
محمد: انا كلي لج .. ابتعد عنها شوي .. يلا حياتي قومي نرجع عشنا ..
ساره بابتسامه خذت فيها قلب محمد: من عيوني يا غلاي ..
محمد: الله لا يحرمني هالبسمه يا قلب محمد انتي ..
طلعت ساره من الميلس .. ومحمد تم واقف مكانه .. وده يطير من الوناسه .. اخيرا بترجع له ساره وبيرجع الفرح له ..
محمد" فديت قلبج يا ساره " .. دخلت عليه ساره بعبايتها وشنطه صغيره ..
ساره مبتسمه: حياتي يلا ..
محمد قرب منها وشل الشنطه عنها: يا قلب محمد انتي .. طلعوا من بيت ساره .. وركبوا السياره ..
محمد كان يسوق بهدوء وماسك ايد ساره وكل شوي يبوسها ويشمها ..
محمد: فديت ريحة الغاليه ..
ساره مستانسه: الله يخليك لي يا بعد كلي ..
محمد: والله يا ساره الحين طاب خاطري .. احس اني انولدت من جديد .. فرحتي ما تنوصف .. واخيرا بنرجع انا وانتي ونايف وناصر في عشنا الصغير ..
ساره: آآه يا محمد .. لو بيدي ارجع الزمن ورا .. كنت باغير اللي صار كله يا حبيبي ..
محمد: حبيبتي اللي صار غلطه تعلمتي منها .. بس طلبتج قولي تم ..
ساره: عيوني لك .. ما قدر ارفض لك طلب ..
محمد: فديت عيونج يا قلب محمد انتي .. شوفي .. قطعي هالبنت الدنيئه .. وكل ربعج .. مابي تكون لج علاقه باي حد سمعتي .. خلي علاقتج فيهم مناسبات بس .. حتى تلفون قطعيهم .. الربع ما جاج من وراهم الا المشاكل لو في خاطرج شي قولي لي انا وبس .. حتى اختي وبنات عمي خلج معاهم مثل قبل .. بس ماتفتحين لهم مجال يتدخلون في حياتنا او انتي تسولفين معاهم عن اي شي يصير بينا .. حتى ابسط حدث يصير في حياتنا لو كان تافه بس يعتبر سر بنا انا وانتي بس ..
ساره: اوعدك يا محمد ان كل الكلام اللي قلته يتنفذ ..
وصلوا البيت وساره حست برهبة دخول البيت .. كأنها اول مره تدخل البيت .. اول ما دخلوا الصاله حست براحه مشت جنب محمد واياديهم متشابكه ببعض .. ركبوا الدري وهم فرحانين .. دخلوا الغرفه اللي كانت مضلمه ونورت بوجودهم مع بعض وقلوبهم صافيه .. محمد سكر الباب وراه بسرعه وسحب ساره لين غرفة النوم .. دزها على السرير وانسدج جنبها .. كانت ساره تشوفه بوناسه .. تكى على ايده وتم يطالعها وهو مبتسم .. مرر اصابعه على ويها وهو يقولها ..
محمد: انتي طالق طالق طالق ..
ساره قامت من النوم مفزوعه وتصرح: لااااااااااا .. محمد لاتطلقني .. لا لا لا ..
حمدت ربها انها كانت تحلم .. تمت تفكر بينها وبين نفسها وتتذكر احداث الحلم .. عاشت الحلم بكل تفاصيله ..
ساره " معقوله انا اكون غبيه جي .. ليش سويت جي ؟ شو غرضي من هاي كله .. محمد مو مقصر علي بشي يحبني وانا اشك فيه .. " قامت وصلت ركعتين وتمت تدعي ربها وهي تصيح .. ندمانه على كل شي سوته .. خلصت صلاه وتمت تصيح مو قادره تحبس دموعها .. تذكرت عيون محمد لما نزلها بيت اهلها .. تذكرت شوقه لما جاها امس .. تذكرت لمسة يده فالحلم ..
ساره " مشتاقه لك يا محمد .. اخاف تسوي اللي في بالك يا محمد .. عطني فرصه ارجوك .." ما قدرت تنام من القلق .. قررت تنتظر اول ماتطلع الشمس عشان تكلم محمد ..
( يا ترى شو بيكون قرار محمد بعد اتصال ساره ؟ )
اذن الفجر .. بومحمد قام و قعد عياله عشان الصلاه .. رجعوا من المسيد وكلن رجع ينام .. على الساعه 6 رن جوال محمد .. فتح عيونه بتعب يطالع الجوال .. استغرب من الرقم .. فتح عيونه عدل وقعد على السرير وهو يشوف الرقم .. غطى اخوه عدل وطلع من الغرفه .. ( محمد من تركته ساره وهو عايف غرفته دوم ينام عند علي اخوه) .. نزل تحت ورد على التلفون ..
محمد: مرحبا ..
ساره بخجل: محمد ..
محمد غمض عيونه بقوه: نعم ..
ساره: انا اسفه .. وصاحت ..
محمد قلبه عوره عليها: ساره شو فيج ؟
ساره: محمد انا غلطانه .. كنت غبيه .. قصوا علي .. كلامك كله صح .. انا اسفه سامحني ارجوك
محمد بجفا: زين والمطلوب مني الحين ؟
ساره بصدمه: محمد ! ..
محمد: نعم
ساره: لا يا محمد لاتقسى .. انا اعترف اني غلطت .. ارجوك سامحني .. لاتقسى ..
محمد غصبن عنه حن قلبه: آآآآه يا ساره .. انتي قلبتي كياني .. ليش سويتي فيني جي ..
ساره وسط دموعها: كنت غبيه والله كنت غبيه .. سمعت كلام اللي يغارون مني وما بغوا مصلحتي ..
محمد: الحين تأكدتي من كلامي ..
ساره تقاطعه: ارجوك يا محمد لاتقسى ..
محمد سكت فتره: زين بامرج اليوم الساعه 11 بنتفاهم ..
ساره بندم: آسفه ..
محمد قلبه دق بسرعه .. حسها طالعه من قلب ساره ..
محمد: ولا يهمج .. اليوم ابي اتغدى من ايدينج الحلوات سمعتي ..
ساره مسحت دموعها وابتسمت: والله .. عيوني لك يا محمد .. اسوي لك كل اللي تبيه فديت قلبك ..
محمد مبتسم: فديتج يا ساره ..
ساره بفرح: انتظرك محمد ..
محمد: خير ان شاء الله ..
سكر محمد وهو فرحان بقرار زوجته .. سجد نص الصاله وتم يحمد ربه ان زوجته رجعت في قرارها ..
اما ساره كانت طايره من الوناسه .. والتوتر اللي عاشته قبل ما تتصل خف وحست نفسها انولدت من جديد .. وعدت نفسها انها ما تسمع كلام اي شحص ولا تقول لاي حد عن حياتها مع زوجها .. تنفست براحه وراحت تتجهز وتجهز غرفتها عشان زوجها الغالي عليها ..
روتين كل يوم في بيت بومحمد وبوفارس والجوهره يعيشونه كلهم .. يتوجهون لاشغالهم ومدارسهم ..
في الجامعه مريم وفاطمه رايحين مع بعض وكل وحده حضرت اول محاضره وتلاقوا مع لطيفه صديقتهم في الكفتيريا .. مريم طلعت متأخر وشافتهم قاعدين مع بعض وأشرت لهم من بعيد ..
فاطمه أشرت لاختها ..
لطيفه: فطيم .. مريم اختج هاذي باكلها .. تجنن
فاطمه التفتت عليها: وانا مو عاجبتج يالدبه ..
لطيفه: خخخخخ .. مريم غير ..
مريم: هلا وغلا ..
لطيفه: وااي فديتج مرايم .. لو عندي اخو زوجتج اياه ..
مريم نزلت راسها من الخجل ..
فاطمه تغير الموضوع: زين لطوف .. متى بتجهزين للعرس ؟
لطيفه: خلاص قريب بيخلص الفستان ..
مريم: واااو .. تستاهلين .. متى بنشوفج لابسته
فاطمه: قريب .. خلاص مابقى شي .. كلها الا كم اسبوع ..
لطيف: واااي والله كل ما تذكر ان يوم العرس قرب اتوتر ..
فاطمه: انا موجوده ولا يهمج ..
لطيفه تقرض خدود فاطمه: فديت قلبج يا فطيم .. بدونج انا ماسوى والله
فاطمه انحرجت: لطوف احنا خوات فديت قلبج ..
مريم: هيي انتوا لاتسون لنا فلم هندي .. خلاص فطوم ولطوف انتوا مثل الخوات ليش مسوينها سالفه
فاطمه ولطيفه: ههههههههههههههه مريوم ..
لطيفه: زين فطوم ابيج تكونين معاي يوم العرس ..
فاطمه: ولا يهمج .. باجهز من وقت ..
تقاطعها لطيفه: لا فطوم .. ابيج من الصبح معاي .. تعالي لبسي عندي وسوي شعرج معاي وتمكيجي معاي ..
فاطمه: ولا يهمج لطوف .. لو تبين بارقد عندج بعد العرس ولا يهمج ..
لطيفه: لا اختي دورج ينتهي بعد ما يوصل ريلي ..
البنات: ههههههههههههه
فاطمه ميته من الضحك: الله يغربلج لطوووف
مريم: بس حلوه منج ههههههه
لطيفه ميته من الضحك: هههههههه .. خلاص الله يغربلكم ..
فاطمه: والله .. انتي اللي سكتي ذبحتينا ..
تموا البنات يضحكون بهستيريا على كلام لطيفه .. من بعد هالضحك مريم راحت محاضرتها .. اما لطيفه وفاطمه تموا مع بعض لان عندهم محاضره الساعه 10 ونص ..
لطيفه: فطيم ..
فاطمه: هلا حبيبتي ..
لطيفه: مافي حد مني مناك ؟
فاطمه: ها ؟ شلون يعني ؟
لطيفه: ما تقدم لج حد من عيال عمج ؟ يعني انتي عندج عيال عم اكبر منج خالد وعلي
فاطمه تغير ويها: لا والله يا لطوف ..
لطيف: ليش ؟
فاطمه: بيني وبينج لطوف ..
لطيفه: ولو احنا خوات
فاطمه: خالد ولد عمي تقدم حق مريم اختي ..
لطيفه ابتسمت اول شي .. بعدين تغير ويها ..
لطيف: ليش مريم ؟
فاطمه: النفس وما تشتهي والقلب وما يهوى ..
لطيف: فطوم سؤال وجاوبيني بصراحه ..
فاطمه عيوني لج ..
لطيفه: ما حز في خاطرج لما طلب مرايم وانتي لأ ؟
فاطمه: بالعكس الا فرحت لها والله من كل قلبي ..
لطيفه مبتسمه " والله قلبج كبير يا فطيم .. الله يكبر حظج ويرزق بولد الحلال "
فاطمه: زين قومي نروح المحاضره الساعه 10 القاعه بعيده ..
لطيفهه مبتسمه: اوكي ..
راحوا البنات محاضرتهم .. في هالاثناء كانت ساره تتجهز عشان لقائها مع محمد .. طبخت له من ايدينها الاكله اللي يحبها .. ولبست وتكشخت له حدها .. رتبت غرفتها وعطرتها .. وقفت جدام المرايه تشوف انعكاس صورتها
ساره مبتسمه: فديتك يا محمد .. والله بعوضك عن كل اللي فات .. تمت اطالع نفسها باعجاب قطع عليها حبل افكارها الجوال .. شافت الرقم وكانت المتصله صديقتها المزيفه عليه .. رفعت الجوال اطالع الرقم ردت وبكل بساطه قالت ..
ساره: شفتي هالرقم اللي دقيتي عليه .. مسحيه من لستت ارقامج زين ..
عليه منصدمه: شتقولين سارونه ؟
ساره: كلامي واضح يا صديقتي العزيزه .. لو اتصلتي مره ثانيه بيجيج شي ما شفتيه في حياتج .. وسكرت التلفون بكل هدوء .. رفعت راسها وشافت نفسها فالمرايه وابتسمت بانتصار .. طالعت الساعه اللي بيدها وكانت الساعه 10 ونص وحست بتوتر بقرب الموعد ..
محمد كان فالحلاق يرتب نفسه خفف اللحيه بعدين غير رايه وقال للحلاق يسوي له قفل .. خلص ورجع البيت خذ له شور دافي .. لبس تكشخ حده وطلع من البيت وهو مبسوط .. رن جواله وكان المتصل فارس ..
فارس: حيالله المعرس ..
محمد مبتسم: هلا والله
فارس: قالوا لي قافل شعندك ؟
محمد: منو قالك ؟
فارس: قالوا لي ..
محمد: باتفرغ لك بعدين فروس ..
فارس: شغل عدل الولد .. موفق حبيب قلبي .. سلااااااام
محمد: تسلم حبيب قلبي .. الله يرعاك ..
وصل محمد عند بيت اهل زوجته .. تمت قاعد فالسياره فتره .. طلع له دهن عود ودهن فيه شنبه وشوي ورا اذنه عدل الغتره بند السياره تنفس بعمق ونزل .. وقف يطالع باب بيتهم .. اتصل تلفون لزوجته ..
ساره: هلا وغلا ..
محمد مبتسم: انا عند الباب ..
ساره: الحين نازله ..
محمد: اوكي ..
ساره سكرت من محمد ونزلت بسرعه استقبلته عند الباب .. اول ما شافها محمد حس وده يركض ويحضنها ..
ساره واقفه ومنزله راسها: حياك محمد ..
محمد تقدم خطوه ومد يده لساره .. ساره شافت يده ومدت له يدها .. تشابكت الايادي بقوه .. مشوا لين غرفة ساره .. دخلوا وساره سكرت الباب وقفلته وراها .. محمد قعد على الكرسي وكان يطالع ساره وهي تمشي ناحيته قربت منه و وقف مكانه وحضنها بحنان .. تساقطت دموع ساره على كتف محمد وتمت تشهق من الصياح ..
محمد يمسح دموعها: حياتي انتي .. ليش هالدموع ؟
ساره: فديتك يا محمد .. انا آسفه سامحني سامحني ..
محمد حط يده على فمها: خلاص يا حياتي .. انا فاهم كل شي .. اهدي الحين اهدي يا قلب محمد انتي ..
ساره دفنت راسها في صدر محمد وغمضت عيونها .. محمد كان يمسح على شعرها ويهديها .. تموا على هالحال فتره وبعد ما هدت ساره شوي راحت تغسل ويها ورجعت لمحمد اللي كان قاعد على السرير ينتظرها .. قعدت جنبه ومسكت ايده وباستها ..
محمد طالعها وابتسم: ساره رفعي راسج ..
رفعت راسها اطالعه .. اما محمد طوق ويها بايدينه وقرب منها ..
محمد: اللي صار يا ساره درس لنا احنا الثنين .. مو بس انتي او انا .. لازم نتعلم منه .. واتمنى ما يتكرر هالشي
ساره: اوعدك يا محمد ان اللي صار ما راح يتكرر .. وباعوضك اللي فات صدقني ..
محمد: اتمنى يا ساره .. لان اللي صار مو شي هين .. انا شردت من البيت مابغيت حد يعرف بشي .. قلت لهم اني مسافر معاج .. فالاخير انصدت .. والكل يسأل عنج .. بس تعرفين طبع الاهل فالبيت ما يتدخلون ..
ساره منزله راسها: آآه يا محمد حطيتك بموقف مو حلو كلش .. من غبائي ..
محمد: تحصل .. وشلون الانسان يتعلم لو ما غلط ..
ساره: الحمدلله على كل حال ..
محمد يلعب بشعر ساره: بسألج يا قلب محمد انتي ..