الأخت (دمعة فرح) ضيفة ... افتح قلبك مع ( ريماس )لهذا الإسبوع

[دمعة فرح]

مساء الخير اميرة الفرح كيفك طمنيني عنك نشالة تمام

مساء النور اهلا وسهلا أخي راتب نورت ^_^

بس حبيت اطمن عنك

كلك ذوق أخي انا منيحة تمام

عن جد الله يكون بعونك على اعدت هل كرسي

انا وجعني راسي او نشف ريئي انا او عم بأرى الاسئلة

بئى شلون انتي شو صار فيكي ياترة

خليها لربك اصابعي ماعم حس فين ههههههههههه

بدي ماتئل عليكي كم سؤال عل ماشي اذا مافي ااحراج

انا حاضرة ^_^

الوالد شو طبيعت عملو

بحفر الآبار

نشالة انترنت سريع عندك او ما بيسلي العافية متل عنة

لا كتير سريع لاتزكني بالنت تبع سوريا ههههههههههه بنجلط عالبعد

اريت انو بتحبي عمل الديكور انا عملي شرقيات وديكور
عامل موقع على الانترنت لشغلنة زوري وعطيني رأيك
في عنوان الموقع


انا بصراحة لهلأ مادرست بس ناوية ان شاءالله عن قريب

رأيك بهمني بركي نشالة وئت ترجعي على شام
بتشوفي شغل على الطبيعة أو اذا بتحبي بأملك
شغل عنة نبسطي شو بدك احسن من هيك
هي اتئمنلك شغل بشام او انتي بل هند

شفت الشغل كتير كتير حلو ماشاءالله تاريخ قديم
الله يزيدك كمان وكمان .. ومشكور كتير يعطيك الف عافية
لسى مادرست وحصلت على وظيفة .. بس بدي راتب كويس ها ههههههه
توظفت وانا بالهند هلأ بنصاب بعين ماهر هههههههههه

بعدين لا تنسي وئت ترجعي نشالة تجيبيلنة
معك تمر هندي منشان رمضان

اي تكرم عينك تمر وبهارات

على سيرة رمضان شلون كان صيامكن هنيك

والله صعب الصيام لأنو الرطوبة عالية وقاتلة هون

بتئامني بالحب من اول نظرة

طبعا بآمن بالحب من أول نظرة مافينا ننكرو
وأحلى حب بيكون *_^

وسلام لي اميرة الفرح

الله يسلمك يارب

تصبحي على خير أختي الغالية

وانت من أهل الخير أخي ... نورت


اخوكي راتب

[دمعة فرح]

دمعة شلونج


الحمدلله بخير لوني احمر ههههههههه


سؤال على الماشي

يلا عالماشي

1:بتحبي ام مك اكتر ولا ام بيك


أم أمي لأنو أم ابي متوفيه وقت كان بابا عمرو 15 سنة !

2:جدك ولا جدك


جدي هههههههههه


3:بتذكري اسم جدك الرابع


أي اسمو " طه "


4:شو رأيك بلتاريخ العربي او شو رأيك بلبلاد العربية قبل وبلوقت هاد


تاريخنا رائع بكل طياته ووقائعه
رأيي بالبلاد العربية أنو عم تمشي عكس الريح !

5:شو رأيك بتحرير المرأة

المرأة حرة من أول ما نزلت الرسالة النبوية بس تحرير عن تحرير بيختلف
مثلا التحرير اللي بيحكو عنو الغرب بحطو بجيبتي لأنو المرأة عندن بأدنى المستويات
وتعتبر كماليات بس وما إلها أي تأثير على المجتمع أو على الأسرة والرجل
تحرير المرأة بمفهومي هو الإسلام وعاطيها حرية تكفيها وزيادة
واعتقد وصلتك فكرتي ماهر *_^


6:شو رأيك بلمجتمع الشرقي

مقارنة بباقي المجتمعات هو الأحسن تربوياً وهاد أهم عمود
بالمجتمع الشرقي .. والحمدلله عنا ثقافة ووعي لكن ناقصنا دين !
مشان ماتتدخل المجتمعات الأخرى بمجتمعنا وتحاول تغير من مبادئه
بسبب ضعف الدين والتفكير الصحيح


7:دمعة لو كنتي عم تشتغلي على شي ومهمتي فيه كتير وانجزتيه بوقت محدد وطلع شغل رائع
بس اجا شخص تاني تثقي فيه او كان زميلك بلعمل بس مااشترك باي خطوة بلعمل
الا انه اجا وقدمه لمديرك وهو اخد المكافاة والتقدير


وانتي تعبتي وبلاخر مااخدتي الا الهم والحكي الفاضي

شو ممكن تسوي
بلشخص وبلمدير وبلعمل


أكيد بدي شرشحن ههههههههههههه واسترجع حقي
واترك العمل



8:بتذكري قبل شي 5 او 6 سنين كنا برمضان نودي للجيران اكل وتتنوع السفرة ونستنا الادان على السطح يعني طقوس رائعة

وهلق كله تغير

شو قولتك السبب وهل الان افضل من قبل اتطورنا قال يعني


لا طبعا الآن مو افضل من قبل وهاد مابيعتبر تطور
السبب هو انشغالنا بالمسلسلات الرمضانية وننسى نفتح قرآن بصوت المنشاوي قبل
بساعة من الفطور .. والسبب كمان انو نقضي نهار رمضان بالنوم مثلا
ونفيق عالأدان ونظل سهرانين لبعد السحور ونسحبا نومة للظهر والعصر

هدول كلن بينسونا الجيران واللمة والسطوح والأجر والثواب وفضيلة رمضان


9:تمساح مشلعات سنانه لمن تقدميه من اعضاء المنتدى



امممممممم لعاشق الوطنية


10:شو رأيك بطرق الغش بلامتحانات

وسبق وغشيتي شي مرة احكينا لو بتحسني مابحيك لحدا


من غشنا فليس منا وانا عندي قاعدة الكل بيعرفوني فيها
بس صار وقت الامتحان وتوزعت الأوراق " انا مابغش ولا بغشش " نقطة انتهى
والحمدلله


11:شو بتحبي من الموالح وشو رايك بلفستق الحلبي


بحب كل الموالح وطبعا الفسق الحلبي بحبو خاصة وهو حار



12:تحبي الاجواء الومناتمنسية يعين الرومنسية نار ودخنة وغنى واشعار وليل وبرد ومطر ورعد ولا تخافي


أكيد بحب هيك لأنو بحب الشتى


13:لو خيروكي تغيري اسم المنتدى شو رح تعملي الاسم الجديد

منتدى أحباب سوريا


14: اسم دموع ليش ماتحبيه مع انه جمع دمعة ولو دل على الحزن حلو


اي هو حلو بس يعني مو حلو لأنو حزين


15:ممكن توصفي بغداد بشي 24 سطر او كم كلمة

فقد وطن أخضر اللون يدعى وادي الرافدين .. عاصمته بغداد دار السلام ومدينة هارون الرشيد والمنصور
.. يرتدي مليون نخلة ! وأهوار بحجم معاناته !! يناهز عمره عشرة الآف سنة
يتجول في أزقتهِ الموت ! والخوف ! والفزع !
كان منبراً للنور والعلم .. واصبح مرتعاً للظلم ومنزلاً للصليب !
وتعطر شوارعه مسك الشهداء ...
على من يعثر عليه .. تسليمه إلى جامع
" محمد رسول الله " وسط بغداد لإداء صلاة الجنازة عليه .... !




16:لو كنتي متعودة على احد من اصدقائك وفقدتيه فجاة شو بتسوي


بنقهر طبعا وبتأثر وببكي .. الله لايعرضني لهيك موقف


17:بتحبي قلم الرصاص اكتر ولا قلم الحبر


قلم الرصاص

18:شو رأيك بلاقوال الي تقول

أ:ثمار الارض تجنى كل موسم لكن الصداقة تجنى كل لحظة


مزبوطة


ب:الصداقة كالمظلة كلما إشتد المطر كلما أزدادت الحاجة لها

لأ .. مو شرط لأنو نحنا دائما بحاجة للصداقة مو بس وقت الشدة

د:تألم حتى تتعلم


صح

ج:في عز الدموع ابستم


ممكن انا عن نفسي مو على طول بقدر ابتسم وسط الدموع ^_^

:ومن يتهيب صعود الجبال يعيش ابد الدهر بين الحفر


أكييييد

:من لم يكن له اتصال بالسماء لم يكن له قبول في الارض


طبيعي !! لازم نكون على تواصل دائم بالسماء

الدنيا وحقارتها اضحكت محبيها قليلا وابكتهم كثيرا

على حسب المحبين والمتعلقين فيها !


19:لمن تروحي المدرسة تتوتري شي من تشوفي المدير


لأ


20:لمن تنامي خلاص تنامي فورا ولا تتاخري شوي وتفكري


ازا نعسانة وتعبانة كتير بكبسة زر بنام .. اما ازا نعسانة بس لأ بظل بفكر وبعدين شوي شوي بطفى ههههههه


21:بتحبي تحمل المسؤلية


بخاف منها


22: دمعة لو مرتي ببير عميق كتير وصرخ احد الاشخاص يبي مساعدة منك

وولمن تقدمتي لتقديم المساعدة طلع شخص طعنك وغدر بيكي من قبل وفينك تساعديه ممكن تساعديه


أي بساعدو وبس يطلع بسلامة اتركو وامشي *_^

23:متى تحسي ان الدنيا لا تساوي شي بنظرك

مابعرف بصراحة !!


24:حبيتي شي كتير وفقدتيه


لأ


لنا عودة كم باقي لنهاية الاسبوع

اهلا وسهلا بكل وقت

[ماهرالفيزو]

شو لسا ماجيتي

طيب في سؤال صغيرون

بين ماتجي





دمعة لو كنتي مع زوجك وحصل هي المواقف معكم شو ردك عليه

لو كنتي مجروحة وعم تبكي وصار يضحك بصوت عالي


كل ماحاولتي تتقربي منه صار يبعد عنك

لو صار قدامك يتغزل ببنات المسلسلات

[دمعة فرح]

شو لسا ماجيتي


امبلا اجيت ههههههه


طيب في سؤال صغيرون


شقد قدو يعني؟

بين ماتجي

اي



دمعة لو كنتي مع زوجك وحصل هي المواقف معكم شو ردك عليه

لو كنتي مجروحة وعم تبكي وصار يضحك بصوت عالي


اضربو بالمخدة وقوم واقفل الباب عحالي


كل ماحاولتي تتقربي منه صار يبعد عنك

بقوم فورا وبحرد ومابحاكيه

لو صار قدامك يتغزل ببنات المسلسلات

بتغزل بشباب المسلسلات عادي كتير ههههههه