جاسم: لا اللي وراك ..
التفت الهندي وراه .. والشباب ماتوا من الضحك ..
الهندي طالعهم بنظره وراح عنهم ..
بوفارس: شو هالضحك حشرتونا .. انا قايل مو جايبكم ..
جاسم: شفيك يبه .. نسولف عادي ..
بوفارس: اخاف تسولفون بس ..
تموا فتره وبوفارس يطالعهم .. كانوا مو قادرين يقعدون .. يبون يسون اي شي ..
بوفارس" مو قادرين يقعدون .. كل واحد يتلفت حواليه .. انا شو اللي خلاني اطيع جسوم واخذهم معاي .. الله يستر منهم بس "
جاسم: يبه ..
بوفارس: يا لبيه ..
جاسم: ابي اخذ عصير من الثلاجه اللي هناك ..
بوفارس: زين .. خذ الفلوس ..
سلطان: يلا شباب ..
بوفارس رفع راسه يطالعه: قعدوا قعدوا .. انا بجيب لكم اللي تبونه ..
سلطان: عمي عاد خلنا احنا نروح ..
بوفارس: اعرفكم يالميانين .. بتسون حفله لي رحتوا هناك ..
جاسم: ما راح نسوي شي صدقنا .. وابتسم
بوفارس: لا يبه اقعد .. هالضحكه وراها شي .. انا بروح يلا اشوف قعدوا ..
احمد: خساره ..
سلطان: اي والله خساره ..
جاسم: ملل ..
رجع بوفارس ومعاه العصاير لهم ..
بوفارس: هاكم .. كل واحد يشرب بسرعه عشان بعد شوي بندخل على الدكتور ..
الكل بحزن: زين ..
الممرضه نادت على اسم جاسم .. وبوفارس قام والشباب قاموا وراه .. بوفارس التفت عليهم ..
بوفارس: عن الينون ..
الشباب: زين زين ..
دخلوا عند الدكتور ..
الدكتور مبتسم: اخبارك يا جاسم ؟
جاسم: الحمدلله ..
الدكتور: رجلك احسن من قبل يا حبيبي ..
سلطان: وحليلك جسوم يقولك يا حبيبي ..
التفت الدكتور على سلطان مبتسم: ولا تزعل حقولك يا حبيبي انته كمان ..
احمد: ههههههه .. وحليلكم يا حبايبي ..
بوفارس: استغفر الله ..
الدكتور: شوف يا جاسم انا حشيل اللف و ححرك رجلك شويه .. قولي متى بتوجعك ..
جاسم: زين ..
الدكتور شل اللف من على ريل جاسم .. حرك ريله شوي وشيك على الخياطه ..
الدكتور: هنا بيوجعك ؟
جاسم: لا ..
الدكتور: طيب لما احرك كده .. بتوجعك ؟
جاسم: آي آي آي .. اي تعورني جي ..
الدكتور: ولا يهمك حبيبي .. شيك على الخياطه .. والتفت على بوفارس مبتسم ..
بوفارس: ها بشر دكتور ؟
الدكتور: لأ الحمدلله .. الجرح التأم .. بس عاوز شوية وقت كمان ..
جاسم: اوهووو .. بعد ..
الدكتور: عشان يلتأم كامل يا جاسم لازم تشرب الحليب كتير ..
احمد: سمعت يا حبيبي .. اشرب حليب ..
سلطان واحمد: هههههههه ..
سلطان: حلوه منك حمادوه .. كثر منها ..
بوفارس طالعهم: يا ربي على هالبلوه ..
الدكتور راح صوب مكتبه واتصل بالممرضه عشان يحطون اللف مره ثانيه على ريل جاسم ..
سلطان: يا حالتك يا جسوم مع هاللف واللزقات ..
جاسم: اففف .. ملل
بوفارس: معليه يبه .. اصبر ..
دخلت الممرضه وكانت حاطه مكياج خطير .. حاطه الوان وايد على عيونها .. سلطان التفت على جاسم واحمد وضحكوا ..
الشباب: هههههههه ..
بوفارس: ليش هالضحك ؟
جاسم يكلم الممرضه: الالوان اللي فوق عيونج روعه ..
الممرضه تمت اطالع جاسم وابتسمت مغصوبه ..
بوفارس: جسوم عيب ..
جاسم: هههههه .. صج حلوه الالوان .. كأنها لوحة فنان ..
بوفارس منحرج: جسوم سكر حلجك ..
سلطان واحمد ميتين من الضحك ..
الممرضه: يلا يا حبيبي .. افرد رجلك شويه ..
جاسم يطل في ويها: من عيوني والله ..
بوفارس غطى ويهه بيده من الفشيله: حسبي الله ونعم الوكيل ..
خلصت الممرضه من جاسم .. وقبل ما تطلع ابتسمت له وقرصت خدوده ..
المرضه: انته عسل يا حبيبي ..
جاسم يبعد يدها: زين شوي شوي لا تاكلين خدودي ..
سلطان: ههااااااي ..
بوفارس: قوموا يا عيال فضحتوني جدام الناس ..
الممرضه: دول دمهم خفيف أوي ..
بوفارس يبتسم وهو منحرج: السموحه يعني .. ثقلنا عليكم شوي ..
الممرضه: ولو .. دول الاطفال احباب الله ..
احمد: روووح يالاطفال .. على اخر المشوار طلعنا اطفال ..
سلطان: يا حسرتي على شبابي .. آآآه
جاسم: يلا يا احباب الله ..
بوفارس قام يدزهم وهو طالع من غرفة الدكتور ..
بوفارس: يلا برا فضحتوني ياللي ما تستحون على ويهكم .. جدامي اشوف ..
جاسم: يبه ..
بوفارس: خير ..
جاسم: يبه انت بعد من احباب الله ولا بس احنا ..؟
الشباب ضحكوا بصوت عالي حشروا المستشفى: ههااااااااااي ..
بوفارس: وجع .. جدامي اشوف ..
احمد: يعني شوف يا جاسم .. انت نقدر نقول عنك من احباب الله .. انا مو مشكله انبلع .. بس سلطون بصراحه انا اشوف ان ما يركب عليه ..
جاسم: تخب عليه هالكلمه ..
سلطان متخصر: لا والله .. انا اصلا احسن واحلى واحد فيكم ..
بوفارس: هي يلا عن الهذره الزايده ركبوا السياره ..
بوفارس: هي يلا عن الهذره الزايده ركبوا السياره ..
سلطان: اننا قادمون يا عمي .. هلموا نركب السياره يا اصدقائي ..
جاسم: نحن ورائك يا اخى العرب ..
سلطان: ما بالك يا احمد ساكت .. أأكل القط لسانك ؟
احمد: كلا .. ولكني اتحقق من بعض الرسائل التي وصلتني على هاتفي النقال ..
ركبوا السياره وهم يتكلمون بالعربيه الفصحى .. وبوفارس يسمعهم وكان وده يشوتهم برا السياره على غلاستهم
جاسم: ممن هذه الرسائل ؟
احمد: انا اسف ايها المحترم .. لا استطيع اخبارك بذلك ..
سلطان: ويحك يا حماده .. اتخبئ عنا اسرارك ..؟
جاسم: لقد اهنتني بردك يا حماده .. منذ متى ونحن نخش على بعض شيء ..
سلطان: حلوه ذي نخش ..
جاسم: لم اجد المفرد المناسب يا اخ العرب ..
احمد: ما بالكم اكلتوني بقشوري .. انتظروا سأخبركم من ارسل لي هذه الرسائل ..
سلطان: انت تعرف كم نحبك يا احمد .. فعيب عليك ان تخش عنا شيء ..
احمد: لا تهتم يا اخ العرب .. انا فالشوفه ..
جاسم: ههههه .. لقد عجبني هذا المفرد ( فالشوفه ) ..
احمد: انا اعجبك ايها المحترم .. استطيع ان اتكلم اكثر من لغه ..
سلطان: ماشاءالله عليك .. لقد اثرت اهتمامي بك يا حماده ..
احمد: اجل اجل .. فلقد سافرت لبلدان عديده في ريعان شبابي ..
جاسم: هل لي ان اسألك سؤال يا حماده؟
احمد: تفضل ايها المحترم ..
جاسم: كم تبلغ من العمر ؟
احمد: ما بالك وهذا السؤال ايها المحترم ؟
سلطان: لما الغضب يا رجل .. اهدء اهدء ..
احمد: انا لا احب ان يسألني احد عن عمري ..
جاسم: ولما ؟
احمد: لاني اخاف من الحسد ..
سلطان: انا لا اخاف من الحسد ..
جاسم: انك فعلا شجاع يا اخ العرب ..
احمد: ياللهول .. ولما لاتخاف من الحسد يا اخ العرب ؟
سلطان: بكل بساطه .. لاني ضد الحسد ..
جاسم: ما اروعك ..
احمد: ليت عندي نصف شجاعتك يا اخ العرب ..
جاسم: وانا اتمنى نفس الشيء ..
بوفارس: خلصتوا هذرتكم البايخه ..
الشباب: هههههههه .. اي
بوفارس: وصلنا البيت يلا فكوني خل اروح ..
جاسم: الى اللقاء يا ابتاه ..
سلطان: نراك عن قريب يا عمي ..
احمد: الى لقاء قادم ..
الشباب بصوت عالي: ههاااااااااي ..
بوفارس: الحمدلله والشكر .. زين تبون شي ؟
جاسم: لأ يبه ..
بوفارس: يلا يبه .. انا بروح لو بغيتوا شي اتصلوا ..
جاسم: زين ..
دخلوا البيت وهم ميتين من الضحك ..
جاسم: اما احنا بالفصخى والله شغل عدل ..
احمد: من قلب ..
سلطان: على قولة عمي .. بسكم من الهذره الزايده .. شو رايكم نطلب اكل ..
جاسم: اي والله انا جوعان ..
احمد: يلا قدام .. بس شو رايكم نروح الكفتريا اللي عند الجمعيه ؟
جاسم: ماعندي مشكله .. خل اشوف الدريول موجود ولا لأ ..
الشباب: اوكي ..
مريم وفاطمه وايمان كانوا قاعدين فالصاله ويسولفون ..
مريم وهي تصب شاي: عيل بدى العد التنازلي حق لطيفه وحليلها ..
فاطمه: اي فديتها .. الحمدلله الله عوضها ..
ايمان: ليش ؟
فاطمه: لان ولد خالتها كان يقول عاد مادري .. يقول انه يحبها وقالها انه بيتزوجها .. بس من بعد الحادث غير رايه ..
ايمان: ليش ؟
فاطمه: لان عدسة عينها تحركت شوي ..
ايمان: مالت عليه .. ماشوف اي تغير في شكلها .. يمكن اللي بيركز ..
فاطمه: عاد هو صدمها .. وخطب وحده ثانيه من اهلها .. بس الحمدلله احمد بن راشد كان من نصيبها ..
مريم: الله يوفقهم ان شاءالله ..
ايمان بخبث: وانتي بعد مريم .. بدى العد التنازلي لج .. ههاااااي
فاطمه: ههههه ..
مريم: ايمانو بتصفقين زين ..
فاطمه: ما قالت شي غلط يا عروسه ..
مريم: عااااد
ايمان و فاطمه: ههههههه
مريم صدت عنهم وتمت تقلب قنوات التلفزيون .. ايمان قربت من فاطمه ..
ايمان: يقولج .. ذاك اليوم كنت اطل من الدريشه وشفت عزيز طالع ومعاه صديقه ..
فاطمه باهتمام: شو ؟
ايمان: رفيج عزوز المزيون .. شفته من قريب .. ماشاءالله عليه يجنن ..
فاطمه حست بالغيره: زين ليش تتكلمين عنه بهالطريقه ؟
ايمان: شو قلت ؟
فاطمه: شو بعد تقولين يجنن ..
مريم التفتت عليهم: بصراحه اللي يشوفه غصبن عنه يقول انه يجنن ..
ايمان: فديت مرايم .. مشاركتني .. انتي ما قط شفتيه فطوم ؟
فاطمه: لا ولامره ..
مريم: بصراحه .. مزيون .. ياحظها اللي يتاخذه .. بتم طول اليوم بس تتفكر بجماله ..
ايمان: اذا هو جي مزيون .. لو عنده خوات هل بيكونون بجماله ؟
مريم: اكيد .. بس في بعض الحالات الشباب يكونون احلى من البنات ..
ايمان: اها .. بس هو ماشاءالله عليه .. جسم وطول و ويه حلو .. بصراحه انا اشوفه احلى من خالد ولد عمي ..
مريم: نعم نعم .. لا يبه مافي احلى من خالد ..
ايمان: ههاااااي .. طلع الحجي .. كل هاي حق خالد .. مايدري عنج ولد العم ..
مريم باحرج: لو نطقتي جدام حد يا ويلج ايمانو ..
فاطمه كانت هاديه .. وهم يتكلمون .. التفت ايمان على فاطمه ..
ايمان: فطوم .. وين رحتي ؟
فاطمه قامت من مكانها: ما رحت مكان .. و طلعت عنهم ..
ايمان: شو فيها فطيم ..؟
مريم: مادري .. احنا قلنا شي يزعل ؟
ايمان: لأ .. كنا نتكلم عادي .. عن رفيج عزوز وعن خالد .. شو الغلط في هالكلام ..؟
مريم: مادري .. خل اروح اشوفها ..
مسكتها ايمان: لأ .. لا تروحين الحين .. خلها تهدى شوي .. الحين هي شكلها معصبه مادري زعلانه .. لو رحتي لها يمكن تسمعج كلام ما يعجبج .. لو ايش ما كان السبب ..
مريم: صح كلامج ايمان .. ماشاءالله عليج .. حسبتيها صح ..
ايمان: حبيبتي انا ايمان ..
مريم: وما قالت ..
ايمان تحذف المخده على مريم: مالت عليج ..
مريم: يا ام كشه عورتيني ..
ايمان: الله عليج يالناعمه .. الا مخده ..
مريم: ضربتيني على خشمي ..
ايمان: مادريت ان خشمج ناعم مثلج ..
مريم: يالكريهه ..
ايمان: جرحتي احساسي تصدقين ..
مريم: اف منج تحرين ..
ايمان: عادي ما يأثر في نفسيتي .. ههااااااااي ..
دخلت ام فارس: يالله على العقل .. شو هالينون انتوا الثنتين ؟
مريم: ماما .. هاي ايمانوا متسببه
ايمان: ماما .. لاتصدقينها هاذي الدلوعه ..
ام فارس: يا علكم العافيه ..
ايمان ومريم: آمين ..
ام فارس: ههههههه ..
ايمان: شفتي خفة دم .. مثل خفة دمي ..
مريم: بنتج هاذي مب صاحيه ..
ايمان: فديتني انا .. العقل كله .. صح ماما ..
ام فارس: ثنتينكم خبال ..
ايمان: انا معاج يا ماما ان مريوم خبله .. لكن بالنسبه عن نفسي اقولج غلطانه ..
ام فارس: احمدك واشكرك يا رب على نعمة العقل .. وين اختكم ؟
مريم: فوق ..
ام فارس: وليش ماتنزل معاكم ؟
ايمان: توها من شوي راحت فوق ..
ام فارس: اي ي ي .. زين ايمانو قولي لي شو مسويه اليوم فالمدرسه ؟
ايمان" بل صادوه ": ما سويت شي ..
مريم تهمس في اذن ايمان: عساج ..
ام فارس: قولي لي شو مسويه ؟
ايمان: ما سويت شي يه ..
ام فارس: المديره اليوم متصله ..
ايمان: شو عندها ؟
ام فارس: تقول انج اليوم رافعه صوتج على المدرسه ..
ايمان " باعترف وامري لله ": شوفي ماما .. خليني اقول كل شي وبعدين اتخذي قرارج ..
ام فارس تنهدت: زين .. سمعينا يلا ..
ايمان: شوفي ماما .. دخلنا الكلاس متأخرين شوي .. وهزأتنا المدرسه .. بس ماما هي قالت كلمه خلتني غصبن عني ارد ..
ام فارس: شو قالت ؟
ايمان: هي زفتنا عشان التأخير .. ما اختلفنا احنا غلطنا .. بس مره وحده قالت انتوا اهلكم ما ربوكم عدل .. لو انكم متربيات كان ما جيتوا متأخرات .. شدعوه ماما ما يسوى علينا تأخرنا .. احنا ما ذبحنا لها حد ولا سبيناها عشان تقول هالكلام .. انا عصبت وقلت لها يا ابله تربية اهلنا مالهم خص في تأخيرنا .. عصبت وقالت لي لا انتي اللي اهلج ما ربوج عدل يا قليلة الادب .. انا ماسكت لها ماما .. قلت لها والله انا متربيه .. لو اني مو متربيه كان سكت على كلامج .. تسبين اهلنا وتقولين عنهم هالكلام .. عاد هي عصبت وقالت طردتني من الكلاس ..
مريم: صج انها ماتستحي ..
ام فارس رافعه حاجب: منو هالمدرسه ؟
ايمان: مدرسة اللغه العربيه ..
ام فارس: ماعندها سالفه تقول هالكلام ..
ايمان: ماما يوم طردتني من الكلاس .. قالت لي ماتدخلين هالكلاس لو جبتي الوزير بكره يا للي ما تربيتي .. والله العظيم هاي كلامها بالضبط .. كانت تستفزني بكلامها .. بس انا سكت عنها ..
ام فارس: مو مشكله انا بوريها الادب .. سمعي بكره روحي المدرسه عادي .. ولا تقولين لاي وحده من البنات شي ..
ايمان: اصلا صديقاتي طلعوا معاي .. لانهم ما رضوا على انفسهم بعد .. وكل وحده امها بتجي بكره ..
ام فارس: انتي بكره داومي عادي ..
ايمان: بس هي بتعطينا كلاس الساعه 7 ونص بكره ..
ام فارس: دخلي الصف ولو طردتج طلعي وانتي ساكته ..
ايمان: ان شاءالله ماما ..
مريم: على ايامنا ما كانوا المدرسات يتجرأون على اهلنا ..
ام فارس: الظاهر انها هي اللي ماتربت .. انا بقول لابوج السالفه ..
ايمان بخوف: لأ ماما اخاف يزفني ..
ام فارس: انتي ما غلطتي .. ويوم انج رديتي عليها دافعتي عن اهلج ..
ايمان بتوتر: زين .. بس لاتقولين له اول ما يرجع .. بعد ما نام قولي له ..
ام فارس مبتسمه: زين يا ماما ..
فاطمه المسكينه اول ما دخلت غرفتها .. حذفت نفسها على السرير وتمت تصيح بحزن .. كانت دموعها تنزل بغزاره .. وقفت عند المرايه تشوف انعكاس صورتها .. استغربت حزنها والدموع .. حطت يدها على خدها ..
فاطمه " ليش هالدموع .. كل هاي غيره على يوسف .. معقوله اكون حبيت يوسف هالكثر .. بس انا شو اللي يأكد لي حبه لي؟ رسايله مو كفايه .. خايفه من اللي جاي .. ليش هالحزن والخوف اللي فيني .. ليش احس اني وحيده ؟ " .. حطت يدها على قلبها وتمت تصيح .. لاول مره في حياتها تحس انها وحيده في هالعالم .. حست نفسها محتاجه حنان .. محتاجه شخص يضمها ويسمع لها .. غمضت عيونها بتعب .. ونامت بهدوء ..
عبدالعزيز اتصل البيت لانه حس بحزن اخته ..
ايمان: السلام عليكم ..
عبدالعزيز: هلا اختي .. عليكم السلام ..
ايمان: شو فيك عزيز ؟
عبدالعزيز: وين فطيم؟
ايمان: فطوم فوق في غرفتها .. اناديها لك
عبدالعزيز: لا خلاص باتصل لها على الجوال ..
ايمان: اوكي ..
سكر وهو حاس بخوف وحزن .. يوسف كان مع عبدالعزيز فالسياره واستغرب من كلام عبدالعزيز .. تم يحاتي فاطمه وخاف عليها .. اما عبدالعزيز اتصل بتوأمه ..
عبدالعزيز بخوف: فطيم حبيبتي شو فيج ؟
فاطمه غصبن عنها صاحت وماقدرت ترد ..
عبدالعزيز: فطوم شو فيج ؟ منو مزعلج .. ردي علي الله يخليج ..
فاطمه وسط دموعها: عزيز .. تعال ابيك ارجوك تعال ..
عبدالعزيز بخوف: الحين جاي ..
يوسف بخوف: بوسعود انزل انا بسوق ..
عبدالعزيز نزل على طول ويوسف خذ مكان السايق وراح بيت بوفارس .. عبدالعزيز كان متوتر وخايف .. حس انه مو قادر يتنفس .. فتح الدريشه وغمض عيونه .. استنشق الهوا بهدوء .. وصلوا البيت .. وعبدالعزيز على طول نزل البيت ..
عبدالعزيز: بوخليفه .. الله لا يهينك .. انتظرني فالميلس ..
يوسف: لا بروح .. ولي فضيت دق لي بمرك ..
عبدالعزيز: يا ريال انتظرني ..
يوسف: اللي تشوفه .. راح عبدالعزيز داخل .. ويوسف دخل الميلس .. عبدالعزيز دخل من باب المطبخ وبسرعه ركض غرفة فاطمه ..
عبدالعزيز طق الباب: فطيم فتحي الباب ..
فاطمه فتحت الباب واول ما شافت عبدالعزيز ارتمت في احضانه وصاحت بحزن ..
عبدالعزيز حضن اخته ودخل الغرفه: فديتج فطيم .. ليش هالدموع ؟ منو زعلج ؟
فاطمه ما كانت تقدر تتكلم من الصياح .. عبدالعزيز وجاب لها ماي وسقاها ..
عبدالعزيز: شربي الماي فديتج .. طالعيني فطيم ..
فاطمه رفعت راسها: عزيز .. وحضنته بقوه ..
عبدالعزيز: فديتج كلميني يا فطيم ..
فاطمه تمسح دموعها بيدها: عزيز قلبي يعورني ..
عبدالعزيز: سمالله عليج .. اوديج المستشفى ..
فاطمه: لأ .. مادري شو فيني .. حسيت بحزن .. حزن ماله سبب .. حسيت اني وحيده .. عزيز لاتخلوني .. انا احبكم .. انتوا هلي ..
عبدالعزيز خاف على اخته .. واستغرب من الكلام اللي تقوله ..
عبدالعزيز: فطيم انتي حاسه بشي فديتج .. انادي لج امي ولا ابوي ..
فاطمه: ابي بابا .. وصاحت بصوت عالي ..
عبدالعزيز: زين فديتج باتصل فيه الحين ..
فاطمه ماسكه يد اخوها: بس لاتقول لاي حد فالبيت ..
عبدالعزيز: ان شاءالله .. اتصل في ابوه اللي كان مع عمه ..
بوفارس: هلا يبه ..
عبدالعزيز: يبه انت وين ؟
بوفارس: مع عمك ..
عبدالعزيز: يبه تعال البيت ضروري ..
بوفارس عقد حواجبه: ليش شو صاير ؟
عبدالعزيز: مافي شي .. بس تعال ولا تقول لاحد شي لما تجي البيت ..
بوفارس بخوف: شو صاير عندكم يبه ؟
عبدالعزيز: يبه فطيم ..
بوفارس قام من مكانه: شو فيها ؟
عبدالعزيز: يبه تعال .. ماقدر اتكلم تعال الله يخليك ..
بوفارس: خلاص الحين جاي ..
بومحمد: عسى ماشر محمد ؟
بوفارس: لا ولاشي .. بس يبوني فالبيت شوي .. خل اشوف شو فيهم وبكلمك ..
بومحمد: زين .. طمني ..
بوفارس وهو طالع: ان شاءالله ..
طلع بوفارس وهو يفكر في فاطمه .. ماعرف كيف وصل البيت .. اول ما دخل الحوش نزل من السياره وبسرعه راح فوق .. دخل عليهم وشاف منظر فاطمه في احضان اخوها .. قلبه عوره عليها .. لان فاطمه المفضله عنده بوفارس قرب من عبدالعزيز وفاطمه اللي ما سكتت من الصياح ..
بوفارس: شو فيها قلب ابوها ؟
فاطمه ارتمت في احضان ابوها .. ودفنت راسها في صدره الحنون .. وتمت تشهق من الصياح ..
بوفارس: فديت هالصوت انا .. ليش هالدموع يبه .. أشر لعبدالعزيز بعيونه .. عبدالعزيز طلع وهو يشوف اخته بحزن .. بوفارس مسك يد فاطمه وباسها ..
بوفارس: دلوعة ابوها .. ردي عليه .. ليش هالدموع والضيقه يبه .. حد مزعلج .. حد قايل لج شي ..؟
فاطمه: بابا ..
بوفارس: يالبيه ابوي انتي ..
فاطمه: انا .. انا .. انا احبك .. لا تخليني ..
بوفارس زادت دقات قلبه من كلام بنته: انا هني موجود ما خليج فديت قلبج ..
فاطمه: انا احبكم كلكم ..
بوفارس مسك فاطمه من كتوفها: ليش هالكلام يبه ؟ شو فيج حبيبتي ؟
فاطمه والدموع تسبح على خدودها: بابا .. احس اني وحيده .. قلبي يعورني ابيكم كلكم .. لاتخلوني .. اخاف تخلوني بروحي .. لاتخلوني الله يخليكم ..
بوفارس: ليش هالكلام ؟
فاطمه تمسح دموعها: مادري .. فجأه حسيت بالخوف .. وحسيت اني بروحي فهالعالم .. خايفه بابا خايفه ..
بوفارس تنفس بعمق .. حضنها بقوه ومسح على شعرها ..
بوفارس: احنا حولج يبه .. لاتخافين .. وانتي مو بروحج .. انا موجود .. وامج واخوانج وخواتج .. كلنا هني ..
فاطمه: لا تخليني بروحي .. خايفه ..
بوفارس رافع حاجب: يبه فطيم .. انتي شايفه شي وخايفه منه ؟
فاطمه: لأ بابا ..
بوفارس: عيل ليش كل هالحزن في صوتج ودموعج بابا ..
فاطمه: مادري بابا ..
بوفارس قعد مع بنته وتم حاضنها .. يهديها ويكلمها ويطمنها .. غفت عيون فاطمه في احضان ابوها .. حست بشوية طمأنينه .. بس ما عرفت ليش حست بهالحزن والوحده .. اما بوفارس تضايف من كلام بنته وخاف عليها
بوفارس" سمالله على فطيم .. شو اللي في بالها .. ليش هالخوف اللي شفته فعيونها .. ليش الحزن ؟ " ..
يوسف فالميلس كان وده يطلع من الميلس ويروح عند فاطمه من كثر خوفه عليها ..
يوسف " شفيها حبيبة قلبي ؟ فديتها والله .. آخ بس لو اقدر اشوفها ولا اعرف شي .. ايه عليها " ..
دخل عبدالعزيز الميلس والحزن باين على ويهه ..
يوسف: عسى ماشر بوسعود ؟ ان شاءالله الاهل كلهم بخير ..
عبدالعزيز قعد على الكرسي بتعب: ان شاءالله ما عليهم شر ..
يوسف: اقدر اساعد بشي ..؟
عبدالعزيز رفع راسه مبتسم: ماتقصر .. زين قوم نطلع شو رايك ؟
يوسف تم يطالع عبدالعزيز كأنه يشوف فاطمه ..
يوسف " ايه عليج يا فطيم ": ولايهمك .. قوم ولاتضايق نفسك ..
عبدالعزيز: عندي لك شور ..
يوسف: تفضل الغالي ..
عبدالعزيز: شو رايك نتصل بفضول وعلوه .. ونروح ساحة الاستعراض ..
يوسف: وين نروح الحين .. الشمس غابت .. خلها بعد ما نخلص من شغل خالي ..
عبدالعزيز: حلو .. ولا شو رايك نستعرض هناك ..
يوسف: لا يبه المنطقه جديده وما نعرفها عدل .. ومافيها حد اصلا .. نسيبي يقول انها مسكونه ..
عبدالعزيز: ليش لأ .. مغامره ..
الذين يشاهدون الموضوع الآن: 4 (0 من الأعضاء و 4 زائر)
مواقع النشر (المفضلة)