دخلت ساره مرت محمد ومعاها ام محمد .. دخلوا الصاله وسلموا على ام فارس .. دخلت عليهم فاطمه وكان هاي اول لقاء بينها وبين ساره من بعد ذيك السالفه .. ساره كانت تشوف فاطمه وتتفكر في جمالها ..
ساره " مشاءالله على فاطمه تجنن .. بس ان شاءالله ما يشوفها محمد " ..
فاطمه: شحالج مرت عمي ..
ام محمد: الله واكبر على هالجمال .. انتي شحالج يمه ..
فاطمه: الحمدلله بخير ..
سلمت على ساره ..
ساره: شو هالزين يا فطيم ..
فاطمه: عيونج الحلوه .. وانتي ما عليج زود .. تهبلين الله يحفظج .. وين عيالج ؟
ساره: عند ابوهم ..
فاطمه: نبي نشوفهم فديتهم ..
ساره مبتسمه: الحين بيلعوزونه وبيجيبهم اعرفه ..
فاطمه ابتسمت لساره: زين عن اذنكم ..
راحت المطبخ وخذت الخدامه معاها .. راحت صوب البوفيه ورفعت لفارس من الاكل .. رجعت المطبخ واتصلت بفارس ..
فارس: هلا والله ..
فاطمه: الاكل فالمطبخ فديتك ..
فارس: خلاص بجي اخذه الحين ..
فاطمه: زين ..
فارس: يعطيج العافيه .. ما قصرتي ..
فاطمه: الله يسلمك فديتك ..
سكرت من فارس .. ورجعت الصاله .. لقت يدتها وعمتها وسلمت عليهم .. وبعدين دخلوا حريم من ربع ام فارس نزلت ايمان و وراها الريم وكانوا يجننون .. والحريم استخفوا عليهم .. بس فاطمه كانت ملفته اكثر ..
فارس راح المطبخ مع محمد وخذوا الاكل و ودوه حق مناف ..
فارس: هلا وغلا ..
مناف: هلا حبيبي ..
فارس: شو اخبارها حبيبة قلبي ..
مناف: طيبه فديتك .. انت شخبارك ؟
فارس: الحمدلله .. وين فيصل ؟
مناف: موجود ..
فارس: زين انا قريب يا حياتي .. خل اتصل بفيصل عشان يطلع ياخذ الاكل ..
مناف: ان شاءالله ..
سكر منها واتصل بفيصل ..
فيصل: هلا ..
فارس: شحالك فيصل ؟
فيصل: طيب ..
فارس: زين انا قريب فديتك .. تعال خذ الاكل ..
فيصل: ان شاءالله .. الحين باطلع ..
فارس: زين ..
سكر من فيصل والتفت على محمد ..
فارس: شوف فيصل لما يجي .. شوف تحليقته وقولي رايك فيها زين ..
محمد باستغراب: ليش يعني ؟
فارس: انت شوفه وقولي ..
محمد: اوكي ..
وصلوا عند بيت مناف .. وطلع لهم فيصل .. محمد تم يطالع فيصل .. سلم فيصل على فارس ومحمد .. خذ الصحون من عند فارس ومحمد ووداهم داخل ورجع لهم ..
فيصل: مشكور يا فارس وما قصرت ..
فارس: حاضرين لك ..
فيصل: الله يسلمك ..
فارس: زين انا لازم اروح الحين .. لان عندي شغل .. اشوفك الاسبوع الجاي ان شاءالله ..
فيصل: الله وياكم ..
ركبوا السياره وفارس ما حرك الا لما تأكد ان فيصل دخل وسكر الباب وراه ..
محمد: ما فيها شي التحليقه .. باين عليه توه محلق ..
فارس: بس شفت الترتيب ..
محمد: اي مرتبه التحليقه ..
فارس: من تتوقع محلق له ؟
محمد عقد حواجبه: من يعني ؟
فارس: هي ..
محمد بطل عيونه: والله ؟
فارس: اي ماشاءالله عليها ..
محمد: اي والله ماشاءالله عليها شاطره .. انا يوم شفته قلت رايح الحلاق ومافيها شي جديد تحليقته .. بس صدمتني ..
فارس: انا نفسي انصدمت .. بالصدفه دريت ..
محمد: شلون ؟
فارس: هي ما قالت لي .. هم اللي قالوا لي ..
محمد: ماشاءالله عليها ..
فارس: تخيل شو يقولي فيصل .. يقول انه في حياته ما دخل حلاق ..
محمد: ههههههه ..
فارس: ههههههه ..
وصلوا اليبت وكان الميلس متروس ريايل .. دخلوا وسلموا على الكل .. اما صوب الحريم كانوا البنات ما كلين الجو بالرقص والسوالف والضحكات الحلوه .. مريم كانت فوق متوتره وعلى اعصابها .. كل شوي تتصل بعمتها هيا ..
الساعه 8 ونص .. ام فارس طلبت من هيا تنزل مريم ..
ام فارس: يلا فديتج نزلي مرايم ..
هيا: ان شاءالله ..
راحت هيا فوق .. ودخلت على مريم اللي كانت على اعصابها ..
هيا: فديت هالويه الحلو انا ..
مريم: ها عميمه شلون الجو عندكم تحت ؟
هيا: والله وناسه البنات يرقصون .. والحريم يسولفون .. يلا ماما الساعه 8 ونص لازم ننزل .. اعتقد الريايل بيتعشون الحين .. واول ما يخلصون نزفج على خالد ..
مريم بقلق: زين ..
هيا حضنتها: حياتي لا تتوترين .. اليوم يومج .. انتي نجمة الحفل ..
مريم: واي عميه خايفه ..
هيا: قولي بسم الله ويلا ننزل ..
مريم: بسم الله ..
مشت وهي ماسكه يد عمتها بقوه .. طلعوا من غرفتها ونزلوا .. اول ما دخلت الحريم قاموا يلولشون ويهللون ويصفقون بفرح و وناسه .. مريم كانت تمشي وهي منزله راسها .. كانت مستحيه .. سلمت على مرت عمها .. وقعدت جنبها ..
ام محمد: مبروك يا بنتي ..
مريم: الله يبارك فيج مرت عمي ..
ام محمد: لا مرت عمي قبل .. الحين قولي لي عمتي ..
مريم ابتسمت بخجل: ان شاءالله عمتي ..
ام محمد: الله يوفقكم ويجمع بينكم بالفرح والسرور يا بنتي ..
مريم " آمين " ..
طبعا ام فارس سلمت على بنتها .. وبعدين الحريم من اهلهم وربع ام فارس راحوا يسلمون على مريم .. اما البنات فكانوا مشغولين بالرقص ..
فاطمه: ياللي ما تستحون ما سلمنا على العروس ..
الريم: هههههه .. صج ما نستحي ..
ايمان: الرقص شي عجيب ..
البنات: ههههههههه ..
راحوا وسلموا على مريم .. وبعدين رقصوا جدامها من فرحتهم .. مريم كانت تشوفهم وهي مبتسمه .. وفي قلبها تقول ..
مريم " الله يغربلكم يا بنات .. ابي ارقص .. تشهون على الرقص " ..
في ميلس الريايل .. الكل سلم على خالد وبارك له .. راحوا الريايل يتعشون وبعد ما خلصوا العشى اتصل بوفارس لام فارس ..
ام فارس: هلا يبه ..
بوفارس: خالد بيدخل الميلس الداخلي .. اجهزوا باتصل لكم اول ما يروح هناك ..
ام فارس ان شاءالله ..
بوفارس التفت على اخوه: وين معرسنا ..؟
بومحمد: مع الشباب جننوه والله ..
بوفارس: ههههههه .. جايهم الدور ولا يهمك .. صدقني بيلعب بهم ..
بومحمد: ههههه .. شوف ابوي مع عبدالعزيز ..
بوفارس: هذول الثنين مادري متى بيعقلون ؟
بومحمد: هههههه .. ابوي استخف على كبر .. وخرب ولدك
بوفارس وبومحمد: هههههههههه ..
بومحمد: يا خالد ..
خالد: نعم يبه ..
بومحمد: يلا يبه بنروح داخل ..
خالد: ان شاءالله ..
فاضل بوناسه: علوه يلا بنروح داخل ..
علي فرحان: قدام يا ريال ..
خالد: قعدوا شلقفكم ؟
علي: خلود هاذي باربطه فالميلس وبدخل ترا ..
محمد: عشم ابليس فالجنه ..
الشباب: هههههههههه ..
سلمان: وانتوا كل همكم المغازل ..
الجد: منو اللي يغازل ؟
عبدالعزيز يتبلى على يوسف: يدي يوسف اللي يغازل .. وطالعه بخبث ..
الجد: من يوسف .. ليكون هالغرشوب .. يا ويدي عليه هالولد .. ما يغازل هاذي اقطع يدي لو ما يتراكضون وراه البنات في كا مكان ..
سلمان " آآه يا يوسف ": صدقت في هاذي ..
فارس التفت على محمد: ما قلت لك ..
محمد: ههههههه .. صج هالولد ما يعيبه شي ..
الجد: اقول بوسعود ..
عبدالعزيز: آمرني طال عمرك ؟
الجد: في ناس مو داشين معانا داخل .. هههههههه
عبدالعزيز: شوفهم مقهورين ..
بوفارس: ومن يقول انك بدش بعد ..
عبدالعزيز: بل ..
الكل: ههههههههه
بوفارس مبتسم: بس بنوصله لين الميلس وبنطلع ..
محمد: لقطوا ويوهكم كلكم ..
الشباب: هههههههههه ..
بوفارس طلع مع خالد من الميلس .. دخله الميلس الداخلي .. وطلع عنه .. اتصل بام فارس ..
بوفارس: الولد فالميلس .. دخلوا ..
ام فارس: انشاءالله ..
راحت ام فارس عند مريم: يلا يمه ..
مريم" يا ويلي احس ريولي ما تتحرك ": ان شاءالله ماما ..
ام محمد مسكت مريم من ايدها اليمين .. وام فارس مسكتها من ايدها اليسار .. ومشوا رايحين الميلس .. والحريم والبنات وراهم يلولشون .. مريم كانت تمشي ببطئ .. انفتح باب الميلس وخالد انحرج من الفوج اللي دخلوا مع مريم .. بس عينه كانت على مريم وبس .. دخلت مريم ومشت صوب خالد .. اول ما قربت منه مريم .. مسك يدها وضغط على اصابعها بحنان .. مريم حست برعشه في جسمها .. ابتسمت وهي منزله راسها .. طبعا الريم وام محمد وهيا وام فارس سلموا على خالد وباركوا له .. خالد قعد ومريم جنبه وهو ماسك ايدها .. رجعوا باقي الحريم الصاله .. محد تم فالميلس الا هيا مع مريم وخالد ..
هيا: مبروك يا عرايسنا الحلوين ..
خالد: الله يبارك فيج عميه ..
هيا: مرايم ..
مريم بصوت واطي: نعم ..
هيا: هههههه ..
خالد: الظاهر الفار كل لسانها ..
مريم ضغطت على يد خالد ..
هيا: زين فديتكم لو بغيتوا شي نادوا اي حد ..
خالد: ان شاءالله ..
طلعت هيا وفضى الجو لخالد .. التفت على مريم اللي ذبحها الخجل ..
خالد: مرايم ..
مريم: هلا ..
خالد: فديت هالصوت انا ..
مريم: ...........
خالد: مبروك يا مريم ..
مريم: الله يبارك فيك ..
خالد: الله يقدرني واسعدج يا بنت عمي ..
مريم: ما تقصر يا خالد ..
خالد: انتي عندي بالدنيا وما فيها .. فديت قلبج يا مريم ..
مريم" كلامه يجنن": .............
خالد: عاد لا تستحين مني فديتج ..
مريم: ان شاءالله ..
خالد رفع يد مريم وباسها .. مريم انحرجت وسحبت يدها ..
خالد ابتسم: فديت الخجل والله .. يدج وقدرتي تسحبينها .. بس شلون بتسحبين ( وطبع بوسه على خدها ) خدودج ..
مريم ماتت من الحيا ..
خالد: فديت ريحتج يالغاليه ..
مريم كانت مستحيه .. وما تكلمت وايد .. اما خالد فكان يتغزل فيها ويدري انها منحرجه ماتقدر تقول شي ..
الريايل فالميلس كلن يسولف مع الثاني .. سلمان كان يسولف مع فارس ومحمد عن المحل اللي بيفتحه ..
فارس: خلاص كلمت صاحبك الامريكي عن البضاعه ؟
سلمان: البضاعه لا تحاتونها .. هو ما راح يقصر معاي وانتوا تعرفون هالشي .. بس شصار على المحل ؟
فارس: خالد قالي عن محل موقعه حلو .. شفته بس فيه عيب صغير ؟
سلمان: وش يعيب المحل ؟
فارس: مشكلته ان اللي يبي يأجره يقول لازم تأجره بالمخزن اللي فوق .. وانت قلت انك ما تحتاج مخزن ..
سلمان: صج هاي مشكله ..
محمد: زين شوف غيره .. حرام تدفع على المخزن وانت ما راح تستخدمه ..
فارس: لو تبي تغير قولي انا بدور لك محل بموقع ..
سلمان: خلاص نغير ..
فارس: ولا يهمك .. بشوفك لك محل ..
محمد: خلود ما منه فايده .. ذبحه العرس .. مو متفرغ لكم ..
فارس وسلمان: ههههههههههه ..
فارس: الله يغربلك حمود ..
تموا الشباب يسولفون .. اما يوسف سوا نفسه بيطلع يتكلم فالتلفون .. استأذن وطلع .. تم يمشي صوب باب الميلس .. طلع قلمه من جيبه وتم يلعب فيه وهو يتمشى .. طيح القلم على الارض ونزل ياخذه .. شاف الورقه وسحبها بسرعه وحطها في جيبه ..
يوسف " فديت قلبها اللي دلها على مكان الرساله " .. دخل وكانت على ويهه ابتسامة رضا وفرح .. سلمان كان يراقبه ويفكر في سر ابتسامة الرضا اللي على شفاه يوسف .. قرب عبدالعزيز من يوسف ..
عبدالعزيز: بوخليفه ..
يوسف مبتسم: هلا ..
عبدالعزيز: شو فيك ؟
يوسف: مافيني شي ..
عبدالعزيز: مممممم ..
يوسف قام من مكانه: زين استأذن .. بروح اجيب لي غرض من السياره ..
عبدالعزيز عقد حواجبه: شعندك ؟
يوسف وهو طالع: راجع .. ما راح اتأخر .. طلع يوسف وهو مبتسم وماسك جيبه .. راح السياره وطلع الرساله وتم يقراها بفرح .. تنفس بعمق وبراحه .. غمض عيونه ورجع براسه على ورا ..
يوسف " والله اني احبج يا فاطمه .. ومستحيل تكونين لغيري .. انتي لي وانا لج " .. طوى الورقه وحطها في جيبه .. نزل من السياره ودخل داخل .. الا شاف الحريم فالحوش حول البوفيه .. رجع خطوه ورا .. راح عند سيارته .. وقف يشوف انعكاس صورته في جامة السياره ..
يوسف " آه بس لو اقدر اشوف القمر من بين هالحريم اللي فالحوش " .. ابتسم وخذ جواله واتصل بعبدالعزيز ..
عبدالعزيز: هلا والله ..
يوسف: الحقني ..
عبدالعزيز بخوف: عسى ماشر ؟
يوسف: الحريم فالحوش وانا برا .. !!!
عبدالعزيز بخبث: ههاااااااي .. عساك ..
يوسف: يالرزيل ابي ادخل ..
عبدالعزيز: انت قلت ان الحريم في الحوش صح ..
يوسف: اي ..
عبدالعزيز: يعني يتعشون ..
يوسف: اكيد ..
عبدالعزيز: الحريم فيهم رقه ولازم ياخذون راحتهم في الاكل ..
يوسف: لا تكفى ابي ادخل ..
عبدالعزيز: ممممممم ..
يوسف: عن الحركات القرعه يا ريال ..
عبدالعزيز: زين كسرت خاطري .. في طريقه اجيبك فيها داخل ..
يوسف بوناسه: شلون ؟
عبدالعزيز: اشقح طوفة بيتنا من الصوب الثاني .. ههااااااااي ..
يوسف: وجع ..
عبدالعزيز: زين زين .. الحين بجيك .. بدخلك من المخبأ السري ..
يوسف: وش هالمخبأ بعد .؟
عبدالعزيز: الحين جايك وبتعرف ..
يوسف: زين انتظرك .. لا تتأخر ..
عبدالعزيز: لو بطلع من الميلس عبر المخبأ السري لين الباب يمكن يبيلي يوم ..
يوسف: حشى ما صار مخبأ ..
عبدالعزيز: هههههههه .. خلاص ثواني اكون عندك حبيبي ..
يوسف مبتسم: اوكي ..
سكر وهو على اعصابه ينتظر عبدالعزيز .. طلع له عبدالعزيز ..
عبدالعزيز: شو اللي طلعك من الميلس ؟
يوسف مبتسم: قلبي ..
عبدالعزيز رفع حاجب: ها ؟ قلبك !! ..
يوسف: زين وين مخبأك السري ؟
عبدالعزيز: تعال معاي ..
مشوا في ممر كله اشجار ..
يوسف: وين رايحين ؟
عبدالعزيز: الميلس .. بس بدخلك من البيت ..
يوسف منحرج: السموحه بوسعود ..
عبدالعزيز: يا ريال عادي ..
دخلوا من الباب الخلفي للمطبخ الداخلي .. مروا على صالة الحريم والميلس الداخلي اللي قاعدين فيه عصافير الحب مريم وخالد .. طلعوا من باب الصاله اللي يتجمع فيها بوفارس مع عياله .. وقفوا في الممر وتموا يرتبون انفسهم ويطالعون انفسهم في المرايه ..
يوسف يعدل غترته: بيتكم حلو من داخل ماشاءالله ..
عبدالعزيز: عيونك الحلوه ..
يوسف: اي والله عيوني حلوه ..
عبدالعزيز: هههههه .. عليك سوالف ..
يوسف: انا اسعد انسان فالكون ..
عبدالعزيز التفت عليه: يا علها دوم هالوناسه .. شو اللي مونسك هالكثر ؟
يوسف: قلبي ..
عبدالعزيز: بعدين معاك انت وقلبك .. شو سالفتكم .. ليكون تحب يا بوخليفه ؟
يوسف: انت تتوقع ؟
عبدالعزيز: اقولك شي وتسمع كلامي ..
يوسف: ان شاءالله ..
عبدالعزيز: لو تحب .. لا تجرح .. لا تعذب .. ولا تعلق .. حب وقاتل عشان حبك ..
يوسف انبهر بكلام عبدالعزيز .. تم يطالعه وهو مبتسم ..
عبدالعزيز: انا حبيت بس من طرف واحد .. لكن انت لو تبادل الحب .. انا اقولك قاتل عشان هالحب .. لا تعذب ولاتتعذب ..
يوسف: آيه عليك يا بوسعود .. ما توقعت يطلع من هالكلام .. صج انها ماعرفت قيمتك ..
عبدالعزيز نزل راسه: زين يلا نروح الميلس لا يطبون علينا الحريم ..
يوسف مبتسم: سرينا ..
بعد ما طلعوا انفتح باب المطعم اللي مقابل الميلس الداخلي .. وقفت وحده وكانت تشوف نفسها بالمرايه ومبتسمه
فاطمه " عزيز مب هين والله ويعطي دروس فالحب .. ويوسف يا ويل حالي على يوسف .. هالانسان كل يوم حبه يكبر بقلبي .. صج انه غرشوب " .. شافت نفسها فالمرايه مره ثانيه ورتبت شعرها وطلعت عند الحريم في الحوش ..
سلموا المعازيم على اهل العروس والمعرس .. فضى بيت بوفارس من الناس .. تموا الاهل فالصاله يسولفون وهم فرحانين ..
الجد: فارس ..
فارس: نعم ..
الجد: الله ينعم عليك .. اخوك وين ؟
فارس: برا مع ربعه ..
الجد: مع ذاك المزيون ..
فارس مبتسم: اي ..
الجد: قم ناده لي ..
فارس وهو قايم: ان شاءالله .. طلع فارس وراح ميلس الريايل وما لقى اخوه .. طلع ولقاه عند الباب يسولف مع يوسف ..
فارس: ما تشبعون سوالف انتوا ..
يوسف وعبدالعزيز: هههههههههه ..
فارس: يدي يبيك ..
يوسف: روح له شوف شيبي ؟
عبدالعزيز: ترا ما نسيت الحركه وبردها لك ..
فارس: اي حركه ؟
يوسف: اقوله عزيز ؟؟
عبدالعزيز: لو نطقت حسابك عسير يا ولد خليفه ..
يوسف: هههههه .. فارس لو صدتني بروحي يمكن اقولك .
فارس مبتسم: ولا يهمك .. انت اطلع وباصيدك الحين ..
يوسف وفارس: ههههههه ..
عبدالعزيز: ريلي على ريلك .. وانت روح بيتكم يلا ..
يوسف: تطردني .. آه جرحتني يا خاين العشره ..
الكل: هههههه ..
يوسف: عن اذنكم يا شباب .. تصبحون على خير ومبروكين .. والفال لكم ان شاءالله ..
فارس: الله يبارك فيك .. وان شاءالله نفرح فيك انت وعبدالعزيز في ليله وحده ..
عبدالعزيز بعبط: احسن بعد عشان نوفر ..
الكل: ههههههه ..
يوسف حرك سيارته شوي: فمان الله ..
فارس وعبدالعزيز: الله يحفظك ..
حرك يوسف .. و فارس واخوه دخلوا البيت .. اول ما دخلوا الصاله فارس طاحت عينه على الريم بنت عمه .. كانت تناظره باعجاب وابتسامه على شفاها .. فارس صد وهو مستغرب ..
الجد: ها بوسعود ..
عبدالعزيز قعد جنب يده: هلا هلا هلا ..
الجد: شو صار على التلفون الجديد .. جبته لي ولا ؟
عبدالعزيز: اتصلت الوكاله وقالوا لي ما وصل للحين ..
الجد ضرب عبدالعزيز بالخيزران: ما منك فايده ..
بوفارس: شوي شوي عليه يبه ..
الجد: محد يتدخل ..
عبدالعزيز:آآه يا قلبي آآه ..
الجد: وجع يا عزوز .. شوله تتنهد .. عاشق ولا شايف لك شوفه ..
عبدالعزيز: لا حشى علي ماحب ولا ابي احب ..
كلمة عبدالعزيز احزنت يده ..
الجد: واللي رفع سابع سما يا بوسعود .. اني ازوجك وحده مافي مثلها ..
عبدالعزيز مبتسم بحزن: الله كريم .. وانا وراك وتحت امرك ..
مسح الجد على راس عبدالعزيز: والله انك غالي يا بوسعود ..
فاضل: شدعوه عزيز الغالي .. واحنا وين رحنا .. ؟
الجد: لا يبه محد يوصل غلاة بوسعود ..
علي: الغلا حق ناس وناس بس ..
عبدالعزيز: وايد يغارون مني .. شاسوي في عمري اذا انا محبوب هالكثر ..
علي: لا تصدق نفسك .. يالمحبوب ..
فارس ومحمد وفاضل ماتوا من الضحك ...
فاطمه: عاد كل شي ولا اخوي فديته ..
محمد طالعها بنظره خلاها تتحسف انها تكلمت ..
فاطمه نزلت راسها " ليش جي يطالعني محمد " ..
محمد شافها وابتسم لها .. رفع حاجب ونزل راسه .. هالحركه لخبطت فاطمه ..
عبدالعزيز: فديت اختي اللي فزعت لي والله ..
ايمان: اي عاد كل شي الا عزيز فديته ..
فارس: تكلمت ايمان ..
ايمان: اي نعم تكلمت ايمان ..
الجد: ملسونه هالبنت ..
بوفارس: فديتها بنت ابوها هاذي ..
فارس: من زينها ..
محمد: حدك عن ايمان .. ترا ما رضى عليها .. انت دلعك فطيم وانا ادلع ايماني ..
ايمان بوناسه: واخيرا ابتسم لي الحظ ..
ساره: من قدج يا ايمان .. محمد يدلعج ..
ايمان: اي والله من قدي ..
الجد: ملسونه ملسونه هالبنت ..
ساره: هههههه .. والله ايمان تجنن .. نصيحه يا ايمان .. استغلي محمد .. قبل ما يقلب عليج ..
ايمان: صج .. وووووي .. خل الحق على الدلع قبل ما تروح علي ..
محمد: لا والله .. احلفوا انتوا الثنتين ..
الكل: هههههههه ..
ام فارس دخلت و وراها جاسم وسلطان ..
هيا: وااي فديت طوله هالريال ..
جاسم ركض عند عمته وباسها ..
هيا: شو هالزين .. جسوم اخاف انت المعرس مب خالد ..
الكل: ههههههه ..
هيا: فديت سلطان والله .. تعال فديت قلبك خل اشم ريحتك ..
سلطان باس راس عمته وقعد جنبها ..
فاطمه تهمس لريم: سلطان يحب يسوي نفسه ثقيل جدامنا ..
الريم: هاي مشكله نعاني منها ..
فاطمه والريم ضحكوا بصوت واطي: هههههههه ..
التفت عليهم فارس: ضحكونا معاكم ..
فاطمه مبتسمه: ولا شي ..
ابتسم فارس وصد .. الريم كانت تحاول انها تتلاقى بعيون فارس بس فارس صد عنها ..
تموا الاهل يسولفون بوناسه .. وكانوا فرحانين بخالد ومريم .. كلن شل عمره وراح بيته يرتاح .. محمد خذ ساره وعياله .. بومحمد خذ عياله و زوجته وراحوا البيت .. الجد والجده وهيا راحوا بيتهم .. فضى بيت بوفارس الا من اهل البيت .. ام فارس و بوفارس راحوا غرفتهم فوق .. العيال تموا في الصاله ..
فارس: فطوم شلي العبايه انتي وايمان خل اشوف كشختكم عدل ..
جاسم: انا بعد ابي اشوفكم ..
فاطمه وايمان شلوا عباياتهم .. فارس وعبدالعزيز وجاسم بطلعوا عيونهم وهم يشوفون خواتهم بانبهار واعجاب
عبدالعزيز: تبارك الرحمن .. ماشاءالله عليكم يا خواتي .. شو هالجمال ..
ايمان: عيونك الحلوه ..
فارس: لا مسكتين خواتي .. لو مو اخوكم تزوجتكم ثنتينكم بليله وحده ..
فاطمه وايمان انحرجوا .. عبدالعزيز التفت على فارس ..
عبدالعزيز: هي .. شو تقول انت ..؟
فارس: ما قلت شي غلط .. حرام اتغزل بخواتي .. فديتكم الله يحفظكم ..
فاطمه قعدت جنب جاسم: وانت ما علقت ؟
فارس: الولد اغمى عليه وهو فاتح عيونه ..
الكل: ههههههه ..
عبدالعزيز: زين الحين جمالكم يتغنى فيه الشاعر .. يوم العرس شو بتسون ؟
فاطمه طالعت ايمان: لا يوم العرس مفاجأه ..
فارس: والله مفاجأت خواتي ..
جاسم: والله انكم حلوين ..
عبدالعزيز: تسمعون حد يتكلم ؟
الكل: هههههههههههه
فارس: صح النوم ..
جاسم: انا بروح انام ..
ايمان: انا بعد بروح انام تعبانه ..
طلعت ايمان فوق مع جاسم ..
عبدالعزيز: شو صار على معاريسنا ؟
فارس: اي والله نسيناهم .. تعالوا نشوفهم ..
فاطمه: خلوهم ياخذون راحتهم ..
عبدالعزيز: بسهم بسهم .. خل يروحون يرتاحون ..
فاطمه: يجي لكم يوم ..
فارس وعبدالعزيز: ههههههههه
فارس: لبسي عباتج يلا ..
فاطمه: ان شاءالله ..
لبست عباتها وراحت ورا اخوانها .. راحوا عند الميلس .. فارس طق الباب ..
فارس: احم احم .. ندخل ؟
خالد التفت على مريم اللي ضحكت على اخوها ..
خالد: ادخلهم ولا لأ ؟
مريم منحرجه: ها ؟
خالد وهو قايم: اموت في اللي تستحي .. راح وفتح الباب ..
فارس: ليكون كلت اختنا ؟
خالد: اي والحين امزمز عظامها ..
الكل: ههههههه ..
خالد: تفضلوا ..
فارس: غصبن عنك بنتفضل .. بيتنا وكيفنا .. لا واختنا بعد ..
خالد: ههههههه .. تذلني يا فارس .. يجي لك يوم ..
فارس: ابشرك مب جاي ذاك اليوم وفجأه سكت .. " اعوذ بالله شو قلت انا ؟" ..
عبدالعزيز: الا جاي ذاك اليوم ..
فاطمه: مبروك يا خالد .. الله يسعدكم ..
خالد: الله يبارك فيج .. الفال لج يا فطيم .. التفت على فارس .. شوف الذوق والادب .. مو انت داش هاد فيني ..
فارس: لازم لازم .. توك معرس ..
خالد: ههههههه ..
عبدالعزيز باس راس مريم: مبروك الغاليه .. الله يهنيكم ويسعدكم ..
مريم: الله يبارك فيك .. والفال لك فديتك ..
فارس سلم على مريم: مبروك يا عروسه ..
مريم ابتسمت: الله يبارك فيك .. والفال لك ..
فارس: فديت قلبج والله ..
فاطمه ومريم حضنوا بعض بقوه .. والكل التفت عليهم ..
فاطمه: مبروك حبيبتي .. الله يهنيج ويسعدج يالغاليه ..
مريم خنقتها العبره: الله يبارك فيج فطيم .. ان شاءالله اشوفج عروس انتي وايمان والريم بنت عمي ..
فاطمه: فديتج حياتي ..
فارس: ليش هالفلم خواتي ؟
فاطمه طالعت فارس: فارس ..
فارس: ههههههه .. زين زين ..
مريم قعدت جنبها فاطمه .. و فارس جنب مريم الصوب الثاني ..
فارس: يلا الشيخ متى بتروح بيتكم ؟
خالد طالع مريم: مريم شوفي اخوج يطردني ..
مريم نزلت راسها وابتسمت ..
فارس: حتى هي تمللت منك ..
مريم: لأ ما تمللت منه ..
خالد: يا قلبي ..
الكل: هههههههه ..
خالد قام من مكانه وراح عند فارس: قم قم خل اقعد عند مرتي ..
فارس: يه يه يه .. لاتدز .. كيفي اقعد عند اختي ..
فاطمه بنذاله: خالد تعال عند مرتك .. وقامت من مكانها وهي تضحك ..
فارس: افا يا فطيم ..
فاطمه انا قمت عشان اقعد عندك حبيبي ..
فارس: زعلتيني ..
فاطمه: واللي يسلمك الغالي ..
فارس: لا لا لا ..
عبدالعزيز: تعالي قعدي عندي الغاليه ..
فارس: لا قعدي ما زعلت ..
خالد يهمس لمريم: فديت اللي تبي قربي ..
مريم طالعت عيون خالد: فديتك ..
خالد مسك ايدها وضغط عليها وهو مبتسم ويناظرها ..
عبدالعزيز ضرب فارس: الربع منسجمين قوموا نطلع ..
فارس بصوت عالي: تامرونا على شي ..
خالد: باذبحك يا فارس ..
فارس: هههههه .. زين باقي من الوقت 10 دقايق .. اخلص علينا ..
الكل: هههههه ..
خالد: اطلع برا ..
فارس: ههههه ..
طلعوا وخلوا خالد ومريم على راحتهم ..
فارس: الله يهنيهم .. والفال لكم كلكم ..
فاطمه: وانت بعد ..
فارس طوق فاطمه بيدينه: وانا بعد فديتج ..
فاطمه: هههههه .. زين خل اروح ابدل وبجيك الغرفه ..
فارس: انتظرج ..
دخلت غرفتها وتمت تناظر نفسها بالمرايه وهي مبتسمه ..
فاطمه " يا ترى يوسف خذ الرساله ولا لأ ؟ .. هل قاعد يقراها الحين ؟ فديته قاعد ولا نايم ؟ اموت فيه " ..
بدلت ملابسها وخذت شور دافي رخى جسمها من بعد التعب .. لبست بجامه بيضه و راحت غرفة فارس .. طقت الباب ..
فاطمه: فارس نمت ؟
فارس: لحظه شوي اختي .. زين حياتي بكلمج بعدين ..
الذين يشاهدون الموضوع الآن: 12 (0 من الأعضاء و 12 زائر)
مواقع النشر (المفضلة)