يوسف: واحد يعرف خالي سلمان .. اسمه نواف ..
هنادي "نواف !" ..
الجوهره: زين عاد سألتوا عنه ؟
يوسف: خالي يعرفه عدل .. وسأل عنه بعد ومدحوه .. وانا سويت اتصالاتي وسألت لي كم واحد .. بعد مدحوا لي الريال .. كداد و يشتغل بتجارته الخاصه .. ريال راعي حلال وماعليه قصور .. لج الحق ترفضين او توافقين .. انتي حره ..
هنادي كانت ساكته وما تكلمت ..
يوسف: القرار الاول والاخير لج .. انتي فكري واحنا ننتظر قرارج ..
الجوهره حضنت هنادي: فديت اختي والله ..
يوسف قام: زين انا بسبح وبروح عند الربع ..
دخل سلمان: على وين ؟
يوسف: باطلع مع الشباب .. وهمس في اذن سلمان .. توني مكلم هنوده فالموضوع ..
سلمان ابتسم: مشكور ..
طلع يوسف وهو فرحان .. خذ له شور دافي .. لبس ثوب وغتره وكشخ حده .. طلع منديل فاطمه من الشنطه وتم يشمه وهو فرحان .. حطه في جيبه ونزل .. شاف سلمان يتكلم مع هنادي والجوهره .. طلع رايح للشباب ..
سلمان: يوسف قالج الموضوع ..
هنادي مبتسمه: اي قالي ..
سلمان: ابي اعرف رايج ..
هنادي: خالي تو الناس ..
الجوهره: يقصد .. موافقه مبدأيه عشان نسأل عن الريال اكثر ..
سلمان: عدل كلام جوجو .. واقصد انتي رافضه فكرة الزواج .. او متقبلتها ..
هنادي: اهاا ..
سلمان: وش اها ..
الكل: هههههه
هنادي: مو رافضه الزواج ..
سلمان: بارك الله فيج و وفقج حبيبتي ..
الجوهره: آمين ..
هنادي قامت وراحت غرفتها .. دخلت الغرفه وهي طايره من الوناسه ..
هنادي: واي واي واي .. مو مصدقه .. انا احلم ولا لأ .. وااااااااي ..
طبت على سريرها من الوناسه .. غمضت عيونها و رسمت مستقبلها مع نواف
الجوهره وسلمان كانوا يسولفون في عدة مواضيع ..
الجوهره: وين شافها صاحبك ؟
سلمان: كنا رايحين محله مره وكانت هنوده معاي ..
الجوهره: اها .. وحليله ..
سلمان: بصراحه ريال ما ينعاف .. وماعنده الا امه فالبيت .. عنده اخت وحده متزوجه .. وهو مع امه فالبيت .. ابوه متوفي من 5 سنين تقريبا .. ترك لهم حلال ونواف هو اللي يداري هالحلال ويشتغل فيه ..
الجوهره: ماشاءالله عليه .. وهنوده تستاهل ..
سلمان: الله يكبر حظها .. زين حبيبتي انتي خلاص مستعده ؟
الجوهره: اي خالي .. بس تدري ..
سلمان: وشو ؟
الجوهره: احتمال ما سوي عرس ..
سلمان: ليش يبه ؟
الجوهره: خالي .. احنا من نعرف يعني .. ربعي اللي فالمدرسه بعزهم في حفلة الخطوبه .. من زين الاهل عشان اعزمهم .. ولو عزمتهم يعني بيجون .. ماتوقع ..
سلمان: جوجو عيب هالكلام .. هذول مهم كان اهلج ..
الجوهره: واللي يسلمك يا خالي .. لا تقولي مهم كان هذول اهلج .. وش شفنا منهم .. محد يدري عنا ولاحد سأل فينا .. وحتى يوم دروا خوالي اني بملج .. حد فيهم رفع السماعه وبارك لي ؟ عمامي حد منهم سأل عن الريال ولا سأل فينا من الاصل .. يا خالي انت وايد طيب ..
سلمان: خلج احسن منهم ..
الجوهره: تعبنا واحنا احسن منهم .. الانسان كرامه .. وابوي الله يرحمه علمنا ان ما تنزل كرامتنا الارض ..
سلمان: محشومين يا بنات خليفه الله يرحمه .. زين قلتي حق ابراهيم انج تفكرين ما تسوين عرس ؟
الجوهره: اي قلت له ..
سلمان: وش قال لج ؟
الجوهره: ما عنده مشكله ..
سلمان: سوي اللي يريحج .. بعدين بيني وبينج .. ليش هالمخاسير كلها عشان عيون الناس ..
الجوهره: انا ادري ..
الجوهره وسلمان: هههههههههه ..
سلمان: خلاص الترتيبات للحفله جاهزه ؟
الجوهره: اي الحمدلله .. انت ويوسف وابراهيم ما قصرتوا .. يعلني افداكم
سلمان: حاضرين لج يالاميره ..
الجوهره حضنت خالها: والله يا خالي من رجعت لنا وحنا نفسياتنا متغيره .. مسكت يد خالها وكملت .. يوسف بدا يطلع .. هنادي رجعت ضحكتها الحلوه .. انا تغيرت نفسيتي ..
سلمان خنقته العبره: فديتكم يا بنات اختي .. جميل بو يوسف للحين في رقبتي .. يا جوجو ابوج الله يرحمه ريال والله اخواني ما وقفوا معاي وقفة ابوج .. بعد ما توفى ابوي .. ابوج الله يرحمه ما قصر فيني .. واللي اسويه لكم والله ولا شي من اللي سواه ابوج لي .. تنهد .. آآآآه .. الله يرحمنا برحمته يا رب ..
الجوهره: آمين ..
سلمان: الله المستعان ..
تموا سلمان والجوهره يسولفون .. يوسف تلاقى مع الشباب وكملوا سهرتهم فالقهوه .. خالد المسكين راح المستشفى وهو يتألم .. بس طمنه الدكتور وكتب له علاج ..
الدكتور: حصل ايه يا ابني ؟
خالد: متهاوش ..
الدكتور: طيب ازاي جات الضربه في كتفك ؟
خالد: كان المفروض تجي على راسي بس ربك ستر يا دكتور ..
الكتور: الحمدلله .. اتضربت بخشبه ؟
خالد: لا حصاه كبيره ..
الدكتور باستغراب: اعوذ بالله .. مين اللي قلبوه اسود كده ..
خالد: حسبي الله ونعم الوكيل ..
الدكتور: الحمدلله جت على كده .. بس كتفك الحمدلله مافيهوش حاجه .. بس الدم متخثر في مكان الكتف .. صور الاشعه سليمه العظام زي ما هيه .. الحمدلله ..
خالد: الحمدلله ..
الدكتور: بس شوية رضوض حاقنه الدم في الكتف مكان الضربه .. انا حكتب لك حبوب ومرهم تاخذهم بانتظام ..
خالد: ان شاءالله ..
الدكتور تفضل حضرتك .. وابتعد عن المشاكل يا ابني ..
خالد ابتسم: ما يهمك يا دكتور ..
الدكتور: سلامتك يا فندم ..
خالد: الله يسلمك .. السلام عليكم ..
طلع من المستشفى وهو متطمن .. صرف الدوا في الصيدليه وراح البيت .. حذف نفسه على السرير ونام بعمق
.....................
ان شاء الله تعجبكم الاجزاء
يتبع في الاجزاء القادمة
"
شوقي يسبقني للقاكم .. لو اشوفك من بعيد .. عايش العمر برجاكم .. غيركم لأ ما اريد " ..
اليوم حفلة خطوبة الجوهره وابراهيم .. ابراهيم اسعد انسان فالكون طاير وده لوالوقت يركض عشان يتلاقى مع الجوهره .. اما الجوهره كانت طايره من الوناسه بس التوتر خطف فرحتها .. كانت فالبيت تسوي شعرها ومكياجها .. دخلت عليها هنادي ..
هنادي: ها جوجو تبين شي فديتج ؟
الجوهره: ابي ماي فديتج ..
هنادي مسكت يد اختها: فديتج يا جوجو لا تتوترين ..
الجوهره مبتسمه: ان شاءالله ..
هنادي باستها على جبهتها: الحين بجيب لج الماي ..
الجوهره كانت حزينه لان امها وابوها مو موجودين .. كان حلم امها انها تشوفها عروس ..
نزلت هنادي تجيب ماي لاختها .. شافت سلمان ..
سلمان: اخبار عروستنا فوق ؟
هنادي: متوتره فديتها ..
سلمان: خلج معها فديتج خففي توترها ..
هنادي: هذاني كل شوي اشيك عليها ..
سلمان: بارك الله فيج .. وعقبال ما نفرح فيج يا هنوده ..
هنادي نزلت راسها وابتسمت .. ابتسم سلمان وراح يشيك على الحوش .. شاف عبدالعزيز وفاضل وعلي مع يوسف .. كانوا يساعدونه .. سلمان وايد استانس عليهم ..
سلمان: يعطيكم العافيه شباب ..
الشباب: الله يعافيك ..
سلمان: ها كل شي جاهز ؟
يوسف: اي الحمدلله .. والشباب والله ما قصروا ..
عبدالعزيز: هاي واجب يا يوسف .. انت اخونا ..
علي: صح
يوسف: الله لا يحرمني منكم ..
علي: زين تبون شي .. انا بروح البيت بتسبح وبلبس عشان ارجع مره ثانيه ..
سلمان: كفيتوا و وفيتوا ..
يوسف: يعطيكم العافيه شباب .. انا بعد بروح البس ..
كلن توجه لبيته عشان يكشخون ويرجعون بيت يوسف مره ثانيه .. يوسف اتصل في عبدالعزيز ..
عبدالعزيز: هلا والله
يوسف: شحالك ؟
عبدالعزيز: طيب ..
يوسف: ما قصرتوا والله ..
عبدالعزيز: هاي واجب ..
يوسف: جزاكم الله خير .. زين عاد أكد على الاهل يجون ..
عبدالعزيز: لا افا عليك .. مأكد عليهم .. وانا جاي بجيبهم معاي ..
يوسف: بارك الله فيك .. زين عيل خل اروح اتكشخ ..
عبدالعزيز: يا روحي على اللي بيتكشخ ..
يوسف وعبدالعزيز: هههههههه ..
عبدالعزيز: مع السلامه حبيبي ..
يوسف: الله وياك الغالي ..
وصل عبدالعزيز البيت .. نادا على ايمان ..
عبدالعزيز: ايماني ..
ايمان: هلا والله ..
عبدالعزيز: ها جهزتوا ؟
ايمان: تقريبا ..
عبدالعزيز: زين لا تتأخرون .. انا باخذ شور وبالبس ونطلع ..
ايمان: خلاص صار ..
عبدالعزيز: بلغيهم يا ويلكم لو تأخرتوا ..
ايمان مبتسمه: ان شاءالله ..
راح غرفته وخذ له شور .. لبش ثوبه والغتره .. تدهن بدهن العود .. دخلت عليه مريم وماسكه المبخر .. حطت له قطعتين عود و دخنته ..
مريم: فديتك يا عزيز .. معرس الله يحفظك ..
عبدالعزيز مبتسم: فديت قلبج والله .. فارس وينه ؟
مريم: مادري والله ..
رفعت المبخر وحطته صوب غترته ..
عبدالعزيز: بس فديتج ..
مريم مبتسمه: يعلني ابخرك معرس قول آمين ..
عبدالعزيز: هههههه
مريم: قول آمين فديتك ..
عبدالعزيز: آآآمين ..
تعطر بعطر رجالي .. مسح ويهه وفرك ايدينه ..
عبدالعزيز: ها جهزتوا ؟
مريم: تقريبا ..
عبدالعزيز: يلا مابي تقريبا .. ولا تعالوا مع فارس .. شوفي جويسم خلص ولا للحين .. ؟
مريم: زين بشيك عليهم ..
عبدالعزيز: بسرعه الله يرضى عليج ..
مريم وهي طالعه: ان شاءالله ..
مريم " فديت عبدالعزيز .. والله انه مزيون الله يحفظه .. مالت عليها نورو ردت اخوي .. يحصلها عبدالعزيز .. والله ما تلقى مثله الله يحفظه " .. راحت تشيك على ايمان وفاطمه .. دخلت عليهم في غرفة ايمان ..
مريم: ما خلصتوا .. يا ويلكم من عزيز ..
فاطمه: ليش مستعيل خل يصبر شوي .. الحين بنخلص ..
مريم: قال لو ما خلصتوا روحوا مع فارس ..
ايمان: زين انتي وماما روحوا مع عزيز وانا وفطيم بنجي مع فارس ..
مريم: بشوفه ..
طلعت عنهم وقالت لعبدالعزيز هالكلام ..
عبدالعزيز: زين ماعندي مشكله .. شوفي امي يلا انا انتظركم فالسياره ..
التفت على جاسم اللي كان كاشخ حده ..
مريم مبتسمه: بومحمد شو هالزين .. تحمل يخطفونك ..
جاسم: لازم هالزين ..
لبست عبايتها وطلعت هي وامها وركبوا مع عبدالعزيز وراحوا معاه ..
ايمان وفاطمه خلصوا وراحت فاطمه تشيك على فارس .. دخلت عليه الغرفه وشافته معلق السماعه يتكلم وهو يضبط الغتره ..
فاطمه: احم ..
التفت فارس على فاطمه وهو مبتسم ..
فارس: خلاص اكلمك بعدين الشيخ ..
مناف: زين حياتي ..
فارس: هلا اختي ..
فاطمه: خلصت ؟
فارس مبتسم: عشانج اخلص ..
فاطمه: الله على المزاج الرايق ..
فارس: شو قصدج اختي ..
فاطمه: آآه ولا شي ..
فارس: فديت الحلوه من الآه .. يلا خلصتوا ؟
فاطمه: اي جاهزين ..
فارس: يلا يالحلوه ..
طلعت جدام فارس .. سكر باب غرفته .. نزل وفاطمه نادت على ايمان ونزلوا .. ركبوا مع فارس وكان مشغل اغنية حمد العامري لايق عليك .. وكان يدندن هالمقطع ..
فارس: انت الغلا بد الملاين في داخلي يا اعز انسان .. روحي وروحك صدق روحين في جسم واحد طول الازمان
فاطمه: الله عليك يا فارس ..
فارس: عجبج صوتي اختي ..
ايمان: يجنن ..
فارس: تقدرين المواهب ..
فاطمه: ههههههه ..
فارس: ها جاهزين .. ما نسيتوا شي ..
البنات: لأ ..
فارس: زين يلا مشينا .. ابوي طلع ؟
فاطمه: اي .. راح بيت عمي وطلع معاه ..
فارس: اهااا ..
راحوا بيت يوسف .. فاطمه قلبها كان يدق بسرعه .. قربوا من بيت يوسف وفاطمه كانت متوتره ..
فارس: يلا خواتي نزلوا هني خل اروح صوب الميلس ..
فاطمه: ان شاءالله ..
نزلوا الخوات .. فارس حرك وراح صوب الريايل .. دخلوا الحوش وصوت الاغاني كان عالي ..
ايمان: وااااي دقدقه ..
فاطمه: هههههه .. زين وين نروح ؟
ايمان: اعتقد الباب اللي هناك ..
مشوا صوب باب الصاله .. توها فاطمه بتفتح الباب .. الا ينفتح الباب وتشوف شخص واقف .. انحرجت ورجعت على ورا ..
سلمان: السموحه اختي .. الباب اللي هناك ..
فاطمه نزلت راسها ومشت بسرعه وايمان مشت وراها ..
ايمان: وووووي فشله ..
فاطمه: سكتي ماقدر امشي من الفشله ..
راحوا صوب الباب الثاني ودخلوا وكل وحده فيهم متلخبطه من اللي صار ..
سلمان كان يراقبهم وهو مبتسم ..
سلمان " عيونها تذبح .. الله يحفظها " .. طلع وراح الميلس عند الشباب .. هنادي استقبلت البنات وقلطتهم .. خوات ابراهيم وامه وخالته قاموا بالواجب .. استقبلوا الضيوف وساعدوا هنادي اللي كانت منحرجه ..
منيره: هنادي فديتج قولي حق الخدامه تجيب البيتي فور ..
هنادي مبتسمه: ان شاءالله ..
منيره: يمه فديتج قعدي .. احنا بنضيف العرب ..
ام ابراهيم: معليه فديتج ..
منيره: لا يمه قعدي الله يرضى عليج ..
فاطمه قعدت جنب مريم وهي متوتره .. شافت هنادي اللي ملامحها تشبه ملامح يوسف ..
فاطمه " ماشاءالله عليها تشبه يوسف الله يحفظه " ..
ايمان: فاتج يا مريوم الموقف اللي صار لنا ..
فاطمه ضربت ايمان: هيييي مو الحين بعدين .. لا تسمعج امي ..
ايمان: وووووي ..
مريم: شو صار ؟
ايمان: بعدين بعدين ..
مريم مبتسمه: زين ..
قعدوا وتضيفوا والاغاني تشتغل والبنات يرقصون .. والحريم يصفقون .. حانت اللحظه اللي الكل يترقبها .. دخول العروس .. راحت منيره تنزل الجوهره .. لحقتها هنادي .. دخلوا عليها وكانت قاعده على السرير ومتوتره ..
منيره: الجوهره حبيبتي ليش هالتوتر فديتج ..
الجوهره رفعت راسها: خايفه ..
هنادي: فديت قلبج يا جوجو ..
منيره: يلا حياتي بننزل ..
الجوهره خذت نفس عميق .. غمضت عيونها ومسكت يد منيره وضغطت عليها ..
الجوهره: يلا ..
منيره: هنادي قولي لخالتي ام عبدالله بننزل .. وقولي حق المره مالت الدي جي تحط الموسيقى اللي اتفقتنا عليها
هنادي مبتسمه: ان شاءالله ..
نزلت هنادي .. اما منيره مسكت الجوهره و طلعت عند باب الغرفه ونزلوا من الدري متجهين للصاله ..
منيره: صبري خل تبدى الموسيقى ودخلي عليها ..
الجوهره: ان شاءالله ..
منيره: رفعي ايدج شوي خل المسكه تبين عدل ..
الجوهره رفعت يدها: جي اوكي ..
منيره: اي حبيبتي ..
بدت الموسيقى .. منيره التفت على الجوهره مبتسمه ..
منيره: يلا حبيتي امشي شوي شوي لين الصاله ..
راحت منيره الصاله .. والجوهره مشت بهدوء متجهه للصاله على انغام الموسيقى الهاديه .. اول ما دخلت البنات الصغار كانوا ينثرون عليها الورد والمشموم .. دخلت وهي منزله راسها ومنحرجه .. الحريم قاموا يلولشون بفرح .. قعدت الجوهره على الكرسي الكبير اللي كان مزين بالورد والشرايط .. قاموا الحريم يلولشون ويصفقون على الاغاني .. ام ابراهيم من فرحتها قامت ترقص وتصفق .. قربت من الجوهره وسلمت عليها ..
ام ابراهيم: مبروك يا بنتي ..
الجوهره: الله يبارك فيج عمتي ..
ام ابراهيم: الله يوفق لكم ويستر عليكم ..
الجوهره: آمين ..
الكل قام يسلم على العروس .. صديقاتها واهل زوجها .. اخر من سلم عليها هنادي اختها ..
هنادي: مبروك اختي الغاليه ..
الجوهره: الله يبارك فيج .. والفال لج حياتي ..
هنادي: الله يوفقج يا جوجو وان شاءالله نشوف عيالج يلعبون في بيتنا ..
الجوهره ابتسمت لاختها: مستعيله تبين تصيرين خاله ..
هنادي: وعمه بعد ..
الجوهره: وان شاءالله بتصيرين ام ..
هنادي: فديتج انتي يا اغلى اخت ..
الجوهره: هنوده فديتج رقصي خل اشوفج ..
هنادي من عيوني ..
هنادي قامت ترقص جدام اختها .. وشاركتها منيره اخت ابراهيم .. الجوهره كانت تشوفهم بفرح ..
ام فارس: ماشاءالله عليهم جميلات ..
فاطمه: اي ماشاءالله عليهم .. العروس نعومه ..
مريم: اي وحده اختها ؟
فاطمه: اللي لابسه الفستان الوردي ..
مريم: ماشاءالله عليها .. بس احلى من العروس ..
ايمان: بالعكس العروس جميله ..
مريم: انا اشوف اختها احلى منها ..
ام فارس: ثنتينهم جميلات الله يحفظهم ..
بدى العد التنازلي .. اتصل سلمان لهنادي ..
سلمان: هنوده يبه ..
هنادي: هلا خالي ..
سلمان: الريال فالميلس .. دخلوها ..
هنادي ان شاءالله خالي ..
سكرت من خالها والتفت على منيره ..
منيره: وين اخوي ؟
هنادي: دخلوها فالميس ينتظر ..
منيره: ان شاءالله ..
راحت صوب الجوهره ..
منيره: الجوهره حياتي يلا بندخلج على ابراهيم ..
الجوهره: ان شاءالله .. بس نادي هنادي اختي شوي ..
منيره: انشاءلله ..
نادت هنادي اللي لبست عبايتها وراحت صوب اختها ..
هنادي: هلا جوجو ..
الجوهره: اختي رتبي الفستان من ورا .. احس ظهري كله يبين ..
هنادي بخبث: حلاته .. اقصد ان شاءالله ..
الجوهره: هنود مو وقته ..
هناداي: هههههههه ..
رتبت اختها وعدلت فستانها ..
منيره: يلا يا عروسه ..
الجوهره مسكت ام ابرهيم ومشت بخطوات ثابته ومتساويه .. راحوا لين الميلس والحريم يلولشون وينثرون الورد والمشموم .. سلمان سمع اصوات الحريم .. استأذن من ابراهيم وطلع ..
سلمان: مبروك يبه .. الله يوفقكم ..
ابراهيم: الله يبارك فيك ..
طلع سلمان من الباب الثاني .. تم ابراهيم بروحه فالميلس .. انفتح الباب وشاف ملاك يتقدم بخطوات ثابته ناحيته الجوهره كانت منزله راسها وماسكه ام ابراهيم .. ابراهيم وقف وهو مبتسم .. قربت الجوهره من ابراهيم .. ام ابراهيم مسكت يدها ومدتها ناحية ابراهيم .. ابراهيم مد يده ومسك يدها .. تقدمت خطوتين و وقفت جنبه .. لما وقفت جنبه حست برهبة الموقف .. كانت منزله راسها من الخجل .. خوات ابراهيم سلموا عليه وامه وخالاته .. دخلت المصوره عشان تلتقط لهم كم صوره .. طلعوا الحريم وخلوا ابراهيم والجوهره مع المصوره .. الجوهره كانت مستحيه و مو قادره ترفع راسها من الخجل ..
المصوره: ارفعي راسك يا عروسه .. انتي خجوله أوي ليه ..
ابراهيم: حياتي جوهرتي رفعي راسج ..
الجوهره رفعت راسها بخجل ..
المصوره: ايوه كده يا حلوه ..
خذت لها كم صوره وهي جنب ابراهيم ..
المصوره: طيب يا عريس حط ايك فوق كتفها وقرب منها شويه ..
ابراهيم مبتسم: ان شاءالله .. زين حياتي رفعي راسج طالعيني ..
الجوهره رفعت راسها وتلاقت عيونها بعيون ابراهيم .. سرحت بعيونه وتمت اطالعه .. المصوره استغلت هاللحظه وخذت كم صوره لهم .. خلصت المصوره وطلعت عنهم .. وابراهيم اختلى بالجوهره ..
ابراهيم باس راسها: الف مبروك يا اغلى انسانه ..
الجوهره: الله يبارك فيك يا ابراهيم ..
الذين يشاهدون الموضوع الآن: 13 (0 من الأعضاء و 13 زائر)
ضوابط المشاركة
|
|
||
|
|
|
|
|
|
||
رد مع اقتباس
مواقع النشر (المفضلة)