{ نهاية حبك إعدامي } رووووووووووعه

[رامون]

فارس كان ينتظره فالحوش مع محمد وخالد .. دخل حوش بيت بوفارس ..
فارس: حيالله من جانا ..
سلمان: الله يحيك الغالي .. شحالكم شباب ؟
الكل: الحمدلله ..
سلمان: ها متى بنحرك ؟
فارس: ادخل اول نشرب شي بعدين بنطلع ..
سلمان بند السياره ونزل ..
سلمان: ولا يهمك يا بونايف ..
دخلوا الميلس .. قلطهم فارس وتموا يسولفون شوي .. بعدين طلعوا جماعه .. بعد ما طلعوا فاطمه كانت توها واصله من الجامعه .. نزلت ودخلت الصاله .. راحت صوب الميلس تشيك لو في حد هناك او لأ .. ما لقت حد وبسرعه فتحت الباب اللي يطلع على برا .. مشت خطوتين صوب صيص النتبته اللي اتفقوا عليه .. رفعت الصيص شوي وحطت الرساله تحتها .. رجعته مكانه وبنفس الترتيب .. دخلت الميلس مره ثانيه وراحت غرفتها وهي مستانسه .. صلت العصر ونزلت تتغدا .. كانت تتغدا بروحها وبملل .. دخلت عليها مريم ..
مريم: هلا فطوم ..
فاطمه: لا سلام على طعام ..
مريم: ههههه ..
قعدت مجابله اختها وتسولف معاها ..
مريم: لطوف خلصت معاج ؟
فاطمه: اي و وصلتها على دربي ..
مريم: شو سويتوا ؟
فاطمه: not much .. بعد ما رحتي بشوي .. طلعت مناف من محاضرتها وقعدنا نسولف ونحش شوي .. وبعدين رحنا احنا الثلاثه نتمشى فالحديقه شوي .. رحنا ماحضراتنا ..وتلاقينا قبل ما طلعنا .. تدرين ان مناف المسكينه تروح بالباص ..
مريم بحزن: مسكينه ..
فاطمه: تخيلي لو عندها محاضرتين يضيع يومها لان ما عندها سياره ..
مريم: يا حرام ..
فاطمه: وايد تعور قلبي .. احسها بحر من الهموم ..
مريم: باين عليها .. الله يعينها .. اللهم لك الحمد ..
فاطمه: الحمدلله على كل حال ..
دخل عليهم جاسم وهو يدندن ..
جاسم: "من بين الناس حبيتك .. وبكل احساس اغليتك .. حبك جرى بدمي .. نساني كل همي .. خلى حياتي غير مـــــن بيـــن كـــل الـــناس " ..
فاطمه ومريم طالعوا بعض وابتسموا ..
فاطمه: يه يه يه .. فديت هالصوت الحلو ..
جاسم مبتسم " من بين الناس حبيتك يا فطامي " .. شلونكم ..
فاطمه: فدته والله .. حضنته وباسته على خده ..
مريم: وانا بنت البطه السوده ..
جاسم: فديتج انتي والله .. راح صوبها وباسها بقوه ..
مريم: فديت قلبك يا بطل ..
قعد جاسم مع خواته ..
فاطمه: وين بتروح ؟
جاسم: بروح اشتري ملابس ..
فاطمه: من بيوديك ؟
جاسم: بروح مع عزيز ورفيجه ..
فاطمه ابتسمت: اي ي ي ..
مريم: سلطان بيروح معاك ؟
جاسم: اكيد .. نبي نشري ملابس حق المباراه ..
مريم: اي مباراه ؟
جاسم: بنروح الملعب نشجع .. ولازم نلبس ملابس تناسب الفريق ..
فاطمه: يعني شو بتشتري ؟
جاسم: بنطلون وفانيله .. بس لازم نكتب عليهم .. ونبي ناخذ كبابيس وصفارات حق المباره .. تدرين احنا مشجعين الفريق لازم نشجع عشان يلعبون الشباب ونفوز ..
مريم: حالتكم صعبه يا شباب ..

[رامون]

فاطمه: زين شدخل عزيز يوديكم ؟
جاسم: قالي عشان ما يقصون علينا .. وبوخليفه يعرف مكان بيسوي لنا الفنايل .. بيكتب لنا عليهم ..
فاطمه " فديته بوخليفه ": زين متى بتروحون ؟
جاسم: ننتظر سلطان و بوخليفه ..
فاطمه: اهااا ..
فارس وخالد ومحمد وسلمان .. راحوا المجمع وشافوا المحل وعجبهم الموقع ..
سلمان: توكلوا شباب ..
فارس: مقتنع ؟
سلمان: اي .. موقعه ممتاز ..
خالد: ما يتعوض بصراحه ..
محمد: توكلوا يا جماعه ..
فارس: خلاص بكره بحدد لك موعد مع مدير العلاقات العامه في المجمع .. واتفق معاه على كل شي ..
سلمان: بارك الله فيكم يا شباب ما قصرتوا ..
محمد: عزيز وغالي ..
طلعوا من المجمع راحوا صوب السياير ..
فارس: حمودي بروح مشوار بتجي معاي ؟
محمد: لا بطلع اليهال اليوم ..
فارس: زين عيل استأذن يا شباب ..
الكل: الله وياك ..
ركبوا خالد و محمد مع سلمان و وصلهم البيت .. اما فارس كان رايح صوب بيت مناف عشان يودي اخونها يفصل لهم ثياب .. اتصل لها وهو عالدرب ..
فارس: يا قلبه انتي ..
مناف مبتسمه: فديت قلبه والله ..
فارس: شخبار القمر ؟
مناف: الحمدلله .. وحبيب القمر شخباره ؟
فارس مبتسم: مشتاق لنظره من عيون القمر والله ..
مناف: حياتي انت يا فارس ..
فارس: ايه عليج ..
مناف: انت وين ؟
فارس: جايكم ..
مناف: اي ي ي .. كلمت فيصل ؟
فارس: اي كلمته الظهر وقلت له اني بمر عليهم ..
مناف: ما قالي ..
فارس: حياتي ضميان ..
مناف اسقيك فديت قلبك ..
فارس: ابي عصير فرش من هاليدين الحلوات ..
مناف: ولا يهمك فديت روحك .. لي وصلت قول لفيصل انك تبي ماي .. وانا بطرش معاه العصير ..
فارس: يا قلبي عليج يا مناف .. ما تقصيرن فديت روحج ..
مناف: عيوني لك يا فارس ..
فارس: فديت عيونج اللي ذابحتني ..
مناف: زين حبيبي خل اروح اجهز لك العصير على ما توصل ..
فارس: زين يا قلبه ..
سكرت من فارس وطلعت من الغرفه وهي مستانسه .. راحت المطبخ وسوت عصير برتقال فرش للكل .. اتصل فارس بفيصل لما قرب من البيت ..
فارس: هلا فيصل ..
فيصل: اهلين ..
فارس: جاهزين ؟
فيصل مبتسم: اي ..
فارس: يلا طلعوا انا عند الباب ..
فيصل: ان شاءالله ..
سكر من فارس ونادا على عبدالله ..
فيصل: عبود
عبدالله: انا عند الباب يلا ..
فيصل: مطيور هالعبود .. يمه احنا بنروح الحين ..
ام مناف: زين يبه .. هالله هالله باعماركم ..
فيصل: ان شاءالله ..
طلع عند الباب وكان عبدالله مرتز جدام مع فارس ويسولف معاه .. قرب من 00السياره وتوه بيركب ..
فارس: فيصل فديتك ابي ماي ..
فيصل مبتسم: ان شاءالله ..
راح داخل يجيب ماي لفارس .. شافته مناف ..
مناف: شعندك ؟
فيصل: فارس يبي ماي ..
مناف: زين هاك ود له عصير بعد ..
فيصل: لا بس هو قال يبي ماي ..
مناف: ود العصير توني مسويته ..
فيصل: ماله داعي ..
مناف: اقولك وده ..
صبت العصير في الكوب وعطته اياه ..
مناف: اسمع الكلام ..
فيصل: يعني هو طلب ماي .. اودي له عصير ليش ؟
مناف: انت مزعج .. زين هاك ود له الماي ..
فيصل: زين ..
طلع فيصل من البيت وراح عند الباب .. شافه فارس وهو ماسك الماي والعصير .. ابتسم وفتح الدريشه ..
فارس: ماله داعي يبه .. قلنا بس ماي ..

[رامون]

فيصل: سندروني عشان اجيب لك العصير .. بس تستاهل هالعصير الفرش .. توهم مسوينه ..
فارس مبتسم: ما قصرتوا .. شرب العصير مره وحده من العطش .. آآه الحمدلله ..
فيصل: بالعافيه ..
فارس: الله يعافيك .. زين يلا نحرك ..
فيصل: زين بس بحط الاغراض عند الباب ..
راح صوب الباب وحط الكوبين .. نادا مناف عشان تاخذهم ..
فيصل: مناف .. الاكواب عند الباب ..
مناف طلعت صوب الباب .. ومدت يدها تاخذهم .. الا تشوف فارس فالسياره وهو يضحك مع عبدالله .. وفقت تتأمله وهي فرحانه .. فجأه سمعت امها من وراها ..
ام مناف: ليش واقفه عند الباب ؟
مناف تخرعت: ها .. جيت اخذ الاكواب ..
ام مناف: شتسوين واقفه دام جايه تاخذين الاكواب ..
مناف انحرجت: ولا شي .. مشت عن امها بسرعه وراحت المطبخ .. ام مناف طلت صوب الباب وكانت السياره مشت من عند الباب .. راحت ام مناف عند مناف ..
ام مناف: الولد ما يقصر فينا .. لا تخلين الشيطان يلعب بعقلج ..
مناف منزله راسها: ان شاءالله يمه ..
مشت تبي تطلع من المطبخ مسكتها امها ..
ام مناف: حطي هالكلام في بالج .. ترا الولد شايف خير .. لا تتوقعين بيفكر في وحده فقيره ..

مناف نزلت دموعها .. راحت غرفتها تركض .. سكرت على نفسها الباب وقعدت تصيح .. اما ام مناف فكانت مضطره انها تقول هالكلام لبنتها ..
في سيارة فارس الشباب مروحين مع فارس .. يسولفون ومهيصين عالاخر ..
فارس: شو رايكم بعد ما نخلص من السوق اوديكم اصوركم ..
عبدالله: يااااااي ..
فيصل: مممممم .. زين .. بس بشرط ..
فارس مبتسم: شو شرطك ؟
فيصل: تتصور معانا انت بعد ..
فارس: ممممم .. زين بس صوره وحده ..
فيصل: صوره جماعيه لنا احنا الثلاثه ..
فارس: ما يهمك يبه .. نتصور صوره جماعيه ..
وصلوا الخياط .. ونزلوا ياخذون مقاسات .. فارس فصل لكل واحد منهم 6 ثياب .. بعد ما خلصوا من الخياط راحوا يشترون نعل و أزره ..
فارس: شو رايك بهالعطر فيصل ؟
فيصل يشم ريحته: حلو ..
فارس مبتسم: لو سمحت جيب لي من هالعطر ..
فيصل: عبود شتسوي ؟
عبدالله: اتطيب ..
فيصل: تعال لا تفشلنا ..
فارس التفت على عبدالله: هههههه .. والله انك كشخه يا عبود ..
مشى عبدالله مبتسم لفارس: ههااااااااااي ..
فارس وفيصل: ههههههه
اختار لهم فارس كم عطر وكم زرار .. وخذ لكل واحد فيهم نعالتين .. بعد ما خلصوا من السوق .. راحوا الاستيديو عشان يتصورون ..
فارس: السلام عليكم ..
المصوره: وعليكم السلام تفضل ..
فارس: ابي اصور الصغار ..
المصوره: صور عاديه ولا للجواز ؟
فارس: لا لا صور عاديه ..
المصوره مبتسمه: تفضلوا ..
دخلوا وراها الاستيديو الصغير .. نزلت لهم الخلفيات عشان يختارون .. بعد ما اختار فارس الخلفيات .. وقف عبدالله وتصور كم صوره حلوه .. وبعدين وقف فيصل ..
فارس: الحين ابي كم صوره للشباب مع بعض ..
المصوره: ان شاءالله .. يلا شباب .. شو اسمك انته ؟
فيصل: فيصل ..
المصوره: فيصل حبيبي حط ايدك على كتف اخوك واطلع بعيونه ..
فيصل: جي ..
المصوره: ايوه ..
خذت كم لقطه لفيصل وعبدالله ..
فيصل: يلا فارس تعال تصور معانا ..
فارس مبتسم: زين بس خل اعدل الغتره .. بعدين مو شي اتصور معاكم وانتوا بالجينز وانا بالغتره ..
فيصل: المره الجايه بنلبس ثياب وغتر وبنتصور ..
فارس التفت عليه مبتسم: حاضرين لك الغالي ..
وقف فارس معاهم وخذت لهم كم لقطه ..
فارس: بس لقطه وحده الشيخه ..
المصوره: انا خذت 3 لقطات وانت اختار وحده منهم ..
فارس: اي .. جي السالفه ..
عبدالله شاف مروحه كبيره .. استغرب من وجودها ..
عبدالله: ليش هالمروحه هني ؟
المصوره مبتسمه: عشان نحطها عليك وانت تتصور ..
فارس: شوفي باخذ الريش ونثره عليهم والمروحه تشتغل .. وانتي اخذي لهم لقطات ..
المصوره: ماشاءالله عليك .. فكره كتير حلوه .. بس انادي صاحبتي تشغل المروحه ..
.........
يتبع

[رامون]

فارس: اخذي راحتج الشيخه ..
المصوره وهي طالعه طالعت فارس .. غمزت له وهي مبتسمه .. فارس عقد حواجبه مستغرب .. تجاهل الحركه
فارس: تعالوا نختار لون يناسب ملابسكم ..
فيصل: الابيض مناسب .. الازرق والاسود ..
فارس يستعبط: شو رايك بالوردي ..
فيصل: لالالالالا .. لون بنات ..
فارس: ههههههه ..
دخلت المصوره ودخلت مساعدتها .. عطاهم فارس التعليمات .. شغلوا المروحه .. وطير فارس الريش على الشباب وطلب منهم انهم يحاولون يمسكونه ويطالعون فوق .. وطلب من المصوره تاخذ لهم لقطات عشوائيه .. كان شكلهم يجنن وهم بنقزون فالهوا يحاولون يمسكون الريش مبتسمين وحركاتهم عفويه .. كانت لقطات رهيبه المصوره عجبتها الفكره ..
المصوره: استاذ روح وقف معاهم لناخذ لك للقطه عالسريع ..
فارس مبتسم: اوكي ..
راح صوبهم .. وعبدالله ركض صوب فارس فاتح ذراعينه .. خذ المصوره هالقطه .. قعد فارس والشباب وقفوا جنبه وماسكين كتفه ومبتسمين .. خذت لهم هاللقطه بعد .. بعد ما خلصوا تصوير فارس رتب نفسه .. وفيصل وعبدالله كانوا ينفضون الريش عن ملابسهم .. المصوره نزلت الصور في الكمبيوتر عشان يختارون .. طبعا اغلب الصور كانت تجنن .. فارس اختار صور وايد .. وكانت له كم صوره معاهم وكان شكله فنان .. بعد ما اختار الصور راح يدفع للمصوره العربون .. وهي تحاسبه وتكتب له فاتوره كانت تتميع معاه شوي ..
المصوره: ماشاءالله عليك .. يتجنن فالصور ..
فارس " صج والله": زين كم ادفع لج عربون ؟
المصوره: اللي بدك اياه ..
فارس: ممكن ادفع المبلغ كامل ؟
المصوره بدلع: اي مو غلط اذا انت حاب ..
فارس"قوية عين": خلاص بدفع المبلغ كامل .. ومتى راح تجهز الصور ؟
المصوره: بكره الساعه 8 بالليل ..
فارس: خلاص بكره بمر استلمهم ..
المصوره: اي تكرم ..
خذت ورقه صغيره وكتبت فيها رقم .. مدت يدها لفارس وهي تعض شفتها ..
المصوره: هاي رقمي .. لو بدك شي كلمني عليه ..
فارس: لا ماحتاج شي .. ورقم المحل اعرفه ..
تغير ويها وانحرجت: احم .. على راحتك استاذ ..
فارس: سلام ..
طلع من المحل ولا هو مهتم لها .. كان ماسك يد عبدالله وفيصل يمشي جنبه .. ركبوا السياره وراحوا يتعشون ..
فارس: يلا اختاروا المطعم اللي تبونه ؟
عبدالله: انا ابي مثل ذاك اليوم .. معكرونه ..
فارس: وانت فيصل شو في خاطرك ؟
فيصل: عادي اي شي ..
فارس: زين خل نروح المجمع وناخذ حق عبود معكرونه .. وانت اختار المطعم اللي يعجبك ..
فيصل: زين ..
عبدالله: انت شبتطلب ؟
فارس: انا مو جوعان ..
عبدالله: لا عاد اكل معانا ..
فارس: بالعافيه يبه .. انا ماتعشى الحين ..
فيصل: عيل متى ؟ الحين الساعه 7 ونص ..
فارس: لا انا اتعشى الساعه 10 او 11 مع الشباب ..
عبدالله: امي تقول اللي ياكل متأخر يصير دب ..
فارس: هههههه .. بس انا ماكل وايد متأخر ..
عبدالله: ممممم .. زين ان شاءالله ما تصير دب ..
فارس وفيصل: ههههههه ..
وصلوا المجمع ونزلوا يتعشون .. خذوا لوهم لفه سريعه فالمجمع وهم طالعين ..
فارس: فيصل يبه شوف امك واختك يبون شي ؟
فيصل: ان شاءالله ..
اتصل بمناف وسألها .. وماكاانوا يبون شي ..
فيصل: ما يبون ؟
فارس: ليش ؟
فيصل: مسوين عشى ..
فارس: اي ي ي .. زين تبون شي شباب قبل ما نروح البيت ..
عبدالله: ابي ايس كريم ..
فيصل: اسكت فشلتنا كله تطلب ..
فارس ضحك: ههههه .. شدعوه فشلكم .. عادي يبه .. معاي انا طلبوا اللي تبونه ..
عبدالله: مالت عليك فصول .. ههاااااااي ..
فارس: هههههههه ..
مر الماركت وخذ لهم ايس كريم وشوكلاته .. اتجهوا صوب بيتهم .. وصلوا وكانوا فرحانين .. سلموا على فارس ودخلوا البيت .. بعد ما نزلهم فارس اتصل بمناف وماردت عليه .. استغرب .. طرش لها مسج ..
(( حياتي وينج؟ وحشتيني يا قلبه انتي .. كلميني اول ما تقرين هالمسج )) ..
مناف قرت المسج على طول .. وتمت تصيح بقهر ..
مناف " ليش يا دنيا ليش ؟ .. آآه يا فارس .. احبك واموت فيك يا فارس .. وربي اني اموت فيك .. لقيت فيك الابو والاخو .. لقيت فيك كل حنان فقدته .. آه يا دنيا .. ماتخلين حد في حاله .. ليش يا دنيا ليش؟" .. تمت مناف تصيح لين نامت ودموعها على خدها .. دخلت عليها امها ولقتها نايمه .. تمت اطالعها وهي حاسه بالذنب ومتحسفه .. قربت منها باستها على جبهتها .. غطتها عدل وطلعت عنها ..
ام مناف " يا مناف يا بنتي لا اطالعين فوق .. الله يرزقج بولد الحلال اللي بسعدج " .. راحت ام مناف الغرفه ونامت مع فيصل وعبدالله ..
فارس كان يحاتي مناف وخايف عليها .. بعد ما رجع من برا .. دخل الغرفه وخذ له شور دافي .. راح على سريره وكان مرخي عالاخر .. خذ جواله واتصل بمناف .. وبعد ما ردت عليه .. طرش لها مسج ..
(( حياته انتي .. وينج ما تردين .. شو صاير طمنيني عليج يا قلبه )) .. تم يحياتي مناف وغطت عيونه .. كان كل شوي يقوم يشيك على التلفون يمكن يلقى منها اتصال او مسج .. نام بقلق .. ومناف في باله ويحاتيها ..
قامت مناف مع الاذان .. شافت التلفون .. قرت مسج فارس بحزن .. كانت متردده تتصل تقعده للصلاه او لا .. قامت من سريرها وراحت تتوضأ وصلت .. رجعت على سريرها وهي تشوف التلفون ودموعها ملت عيونها .. غطت ويها باللحاف وتمت تصيح بحزن .. اما فارس دخل عليه جاسم وقعده للصلاه ..
جاسم: فارس .. فارس يلا قوم توه مأذن ..
فارس: مممممم .. من ؟