الله يرحم كل شهداء درعا
وانا متأكد انك اذا كنت شاهد عيان فأكيد انت مو متل شهود عيان الفضائيات لانك شاهد عيان حقيقي عزاءنا لك ولاهلنا بدرعا
وعاطف نجيب بالسجن وفيصل كلتوم بالسجن وان شاء الله بكون نتائج حسابهم ترضيكم وترضي الشعب السوري كله
بس في سؤال توضيحي لو سمحت (ومو قصدي كذبك بس لتوضيح الصورة ) كيف شفت عاطف نجيب ؟؟ هل انت من 8 الكبار بدرعا
وكيف سمعتوا بالحرف الواحد هيك عم يقول ؟؟؟ والله مو قصدي كذبك لاسمح الله بس لنعرف شو صار وانا متأكد ان عاطف نجيب السبب مع المحافظ بكل شي صار بدرعا
ومن ناحية ثانية انا متأكد انو اهل درعا بما نعرف عنهم من حمية وشهامة وإباء بس يشوفوا اصدقائهم عم ينقتلو بدم بارد وبطريقة استفزازية
كل واحد منهم عنده سلاح او مسدس او بارودة صيد اكيد لح يجيبها ويحاول الدفاع عن نفسه وعن اصدقائه واهله وهاد طبيعي كرد فعل
وهاد رد الفعل من قبل يلي عنده سلاح هاد يلي خلق مسلحين ويلي الدولة سمتهم مخربين ومع انهم عم يدافعوا عن نفسهم
وبس يصير هاد الوضع بكون الفرصة الذهبية للمخربين عن جد ليكبروا القصة بين الشعب المظلوم وقوات الامن
وبيحاولوا قدر المستطاع انهم يقتلوا من الطرفين وما يخلوا مجال للصلحة وهاد بصير وين ماكان وهاد يلي بخلي الفتنة تكبر .
بس لو فكرنا بعقل لمصلحة مين عم تكبر . فأكيد انه لا لمصلحة الناس يلي وقع عليهم الظلم ولا لمصلحة الدولة فمن المستفيد ؟؟؟
والله قلوبنا مع اهلنا بدرعا وعم ندعيلهم الله يرفع عنهم البلاء ويلهمهم الصبر
وكمان قلوبنا على بلدنا على سوريا كلها يلي بدنا ياها تكون احسن بلد واحلى بلد
ومرة ثانية الله يرحم كل شهداء البلد ويحقن دماء كل سوري
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــالمشاركة الأصلية كتبت بواسطة saherrr
أخي أشكرك عالرد الرائع ... واللي فعلاً بيستاهل الواحد يناقش فيه ... بالنسبة لعاطف نجيب فهالقصة من قبل أول مظاهرة بشي أسبوع راحوا لعندو 8 وبس طلعوا انتشرت إشاعات إنو قال هيك وما صدقنا إلا بخطبة الجمعة
الشيخ اللي راح قال يا جماعة نحنا ما بدنا مظاهرات وما بدنا تخريب و ما بدنا قتل وفتنة بس عاطف لازم نصر عالحكومة لتشيلو لأنو قال هيك هيك هيك ... وأخي لعلمك .. في بدرعا مخزن أسلحة أقسم بالله بيسلح جيش
بس كبارية درعا المسؤولين عنو لحد الآن مو رضيانيين تطلع قطعة سلاح وحدة ... أخي أنا إذا بفرجيك تصميماتي للرئيس بشار والله ما بتصدق إني عم قول هالحكي .. لأني كنت أكبر مؤيد .. فلا تسمع كلامي كمعارض ولا كدرعاوي .. سمعني كشاهد بدي إتحاسب عاللي شفتو .. في كتيبة جيش عطت الأمان لشباب درعا وبس قربوا رشتهم رش وماتوا بشر خيرات الله خلال دقيقتين ... وفي 12 واحد من شباب درعا انحبسوا من أهل درعا
لأنو شافوا معهم سلاح ... وواحد منهم أخوه انقتل قدام عينو وما خلوه يسعفو ... شال السلاح بالسر بس يوم شافوه أهل درعا حبسوه بغرفة ومو مخلينو يتحرك .. عم يحاولوا يفرجوا النظام إنو نحنا سلميين وما معنا شي
بس النظام مستغل هالشي .. وصدقني أقسم برب العزة إنو إذا شباب درعا بيتسلحوا وبيهجموا والله خلال يوم لتطلع درعا من سيطرة الحكومة السورية ... وأول مسيرة طلعت تأييد للرئيس بدرعا أنا كنت شايفها وكان
رئيسها شب طلعوه من السجن ونحنا منعرفوا إنو عليه قضية مخدرات والباقيين كانوا من حلب وناس مو من درعا .. الدرعاوية مابيطلعوا يحتفلوا وعنا ناس ميتيين أخي ... وعفكرة المقطع اللي تصور هادا أنا ما كنت عليه بسوريا بس قلي رفيقي والله هنن عم يصوروا ونحنا واقفين عالبرندات عم نتفرج عفريق التلفزيون السوري والملثمين اللي صورهم يعني عينك عينك عم يصوروا قدام البشر ... وعفكرة الشيخ من بيت الخليلي و الخطبة الثانية في الجمعة اللي بعدها مصورة وعاليوتيوب و كمان بيرد بيقول عن عاطف نجيب شو عمل معو ... ونقطة أخيرة .. عناصر الأمن اللي انقتلوا .. انقتلوا بحارتنا ومنون وفيون ... فاتوا عالمقر تبعون وبعدين شباب الحارة سمعوا رش رصاص جوا المقر وبعد شوي فاتوا الضباط وردوا كمان سمعوا إطلاق رصاص وصراخ ... وانعرف من بعض الضباط إنو واحد من الأمن خلا الشباب صحابوا يحطوا الأسلحة ليغيروا ملابسون وشال سلاحو وغدر فيهون . بس قتل 15 وليس 19 لأنو اللي ماتوا بدرعا 19 واحد من الأمن . أخي الحجرة ما بتقتل عسكري معو واقية ضد الرصاص ولابس خوذة ... وتقبل مروري
وانا بدوري بشكرك على طول بالك عليي
وانا واحد من الناس كتير انزعجت من الالعاب النارية يلي طلعت بدرعا والشهداء ما نشف ترابها
وعن حبس الاهالي للشاب هاد مو غريب عن حكماء اهل درعا
وبالنسبة للفيلم تبع الملثمين انا صرت اضحك متلك بس هاد ما بيمنع انو في مين عم يستغل الناس والامن للفتنة
ولاحظ انو انا ما عم قول انو الامن ملائكة.....
وبغض النظر انو في ناس عم تستغل للفتنة او مافي .بدي اسألك سؤال لو سمحت
وبعدين ؟؟ يعني شو الحل برأيك ؟
وعلى فكرة هلأ سمعت على العربية انو الرئيس اجتمع مع وجهاء درعا لمدة 3 ساعات ونصف
وقال المراسل انه تكلم مع احمد علي المحاميد احد الوجهاء
واخبره انه تكلم مع الرئيس بكل صراحة وقال للرئيس انه يظن ان بعض الناس من الامن لا يريدون الاستقرار بأفعال بعضهم الاستفزازية
وتكلم مع الرئيس عن الذين حطموا تمثال الرئيس حافظ ومزقوا الصور فقال له الرئيس هؤلاء ابنائي واخواني وانا مسامحهم وما عندي مشكلة عنهم
قصدي انه منشوف قرارات الرئيس منحس انو الدولة بدها التهدئة وبدها حلول ترضي الناس
وانا برجع بسألك شو الحل برأيك ؟ مع شكري الجزيل الك
ملاحظة : انا عندي اكتر من 30 صديق بدرعا وريفها وعشت معهم احلى ايامي بخدمة العلم وبعرف طيبة قلبهم وهاد مو مجاملة
والله العظيم حضرت اخر يوم عرس لصديقي بقرية علما بدرعا قام حلف يمين انو نام عنده مع انه ليلة عرسه واصر ابوه واخوته عليي اكتر من صديقي نفسه
الله يحمي البلد واهلها
شكرا أخي ساهر
بالنسبة لسؤالك الطفل الصغير ممكن يجاوب عليه
اتمنى انك ما تكون اقتنعت بالكلام اللي صار
كلنا نعرف الحقيقة
موقف الرئيس السوري ضعيف جدا الآن شعبياً
خاصة بعد أن خرجت المحافظات السورية كلها في مظاهرات منادية باسقاط النظام
وأيضا الضغط الذي يتعرض له من فضائحه المنتشرة على الانترنت ووسائل الاعلام
برأيك انت لماذا لم يعترف بشهداء درعا أثناء القائه كلمة في مجلس الشعب
لماذا لم يقل هؤلاء أبنائي وأنا أسامحهم
لماذا ضحك أثناء الخطاب أكثر من عشر مرات ودماء أبنائه تسفك في درعا واللاذقية وبانياس
لماذا لم يقف دقيقة صمت على أرواح أبنائه
هل من الممكن أن يقوم الأمن بقتل أكثر من 200 شخص من تلقاء نفسه
خاصة في هذه الأوضاع التي تهدد الدولة والحكم في سوريا
هناك تساؤلات أخرى كثيرة ليس هناك متسع لذكرها
الآن وقد وجد نفسه محاصرا من الشعب الذي ازداد صمودا واصرارا
وبدأ ينادي باسقاط الحكم من جهة
و وسائل الاعلام التي تفضح ممارسات أمنه وجيشه من جهة ثانية
والتنديد الدولي بالمجازر الوحشية من جهة ثالثة
أدرك أن القوة لا تنفع مع هذا الشعب الأبي
فانه بدأ يحاول اصلاح الأمور والسيطرة عليها
يوم الثلاثاء ألقي القبض على أكثر من 200 شخص من مدينة بانياس
وقالو انهم مسلحين وارهابيين
واليوم اطلق سراح معظمهم
وأيضا لا ننسى المهندس المصري الذي اعترف امام كميرات التلفزيون السوري بالتجسس وبعد عدة أيام يطلق سراحه ويعترف بأن الأمن ضغط عليه حتى يقول هذا الكلام
أخي الكريم الأمور واضحة ولا داعي لشرحها ابدا
أتمنى الأمن والاستقرار لسوريا ولكن أتمنى أيضا أن ننعم بالحرية
وأن يحاسب من ارتكب هذه الجرائم والمجازر مهما كانت مناصبهم
شكرا أخي على ردك الكريم
عاش شعب سوريا حرا أبياً
نعيب زماننا والعيب فينا
وما لزماننا عيبٌ سوانـا
ونهجو ذاالزمان بغير ذنب
ولونطق الزمان لناهجانا
الذين يشاهدون الموضوع الآن: 1 (0 من الأعضاء و 1 زائر)
ضوابط المشاركة
|
|
||
|
|
|
|
|
|
||
رد مع اقتباس
مواقع النشر (المفضلة)