خالد: اي اذكر فالثانويه هو طالع الاول على مستوى الدوله .. كانت نسبته %99 علمي .. ماشاءالله عليه ..
مريم: والجامعه خلصها في 3 سنوات ونص ..
خالد: ماشاءالله عليه .. لانه كان ياخذ صيفي ..
مريم: ودي اخذ صيفي عشان افتك .. بس خل اخذها على راحتي ..
خالد: احسن لج والله ..
مريم: زين انتوا من اشطركم فالبيت ؟
خالد: طبعا انا اولهم .. هههههه
مريم: يالمغرور .. هههههه
خالد: انا وعلوه وسلطون .. بس سلطون ماشاءالله عليه .. صج عليه مخ .. والله ولا مخي يوم كنت ثانويه ..
مريم: والله .. لا اله الا الله عليه ..
خالد: عطيه اي رقم يجمعه .. وفي ثواني يطلع النتيجه .. شيطان فالارقام والحساب .. يقولي انا بشتغل في بنك عشان ابوقهم وهم مايدرون ..
مريم وخالد: ههههههه ..
خالد: محمد كان ما يحب الدراسه .. واللي مشجعه فارس .. فهد طبعا لا له ولا عليه .. اسماء شطوره .. الريم فديتها تحب تثبت نفسها .. تلقينها طول السنه هامله .. بس قبل الامتحانات بشهر ماندري عنها .. فضول مستواه يعني بس نسبته فالثانويه كانت صدمه .. والفضل يرجع لزوجتي فديتها .. انتي وياه نسبكم قريبه من بعض .. ليكون كنتوا تغشون ..
مريم: هههههههه
خالد: فديت هالضحكه والله ..
مريم: فديت يا خالد .. زين بتمرنا اليوم ؟
خالد: بشوف الشباب .. اوه نسيت اقولج ..
مريم: شو ؟
خالد: ليفوتج الشباب مخططين يصيفون فالمكسيك ..
مريم: شو ؟! المكسيك !!!
خالد: هههههه .. اي والله .. اسمع محمد وعلوه يتكلمون امس ..
مريم: شاللي يوديهم المكسيك ؟
خالد: يعرفون شباب هناك .. لا واللي جننهم زياده وخلاهم يصرون انهم يروحون .. لما قالهم الريال في حلبة سباق يملكها واحد يعرفه .. واستخفوا .. كلهم بيودون سيايرهم السبورت ..
مريم: وووووي .. والله انهم استخفوا .. ليكون انت بتروح معاهم ؟
خالد: لا يا حبيبتي احنا بنكون في بارس بلاد العشاق نقضي شهر العسل ..
مريم انحرجت: فديتك يا خالد ..
خالد: بس تدرين احسهم بيستانسون .. لان رحلتهم حق مصر تكنسلت ..
مريم: صح ..
خالد: فقرروا يروحون المكسيك ..
مريم: حليلهم والله .. زين حبيبي .. صارت 9 ونص .. لازم اطلع من البيت عشان الحق اوصل واعرف قاعة الامتحان وين ..
خالد: خلاص فديتج .. موفقه .. واقري المعوذات قبل ما تدخلين الامتحان ..
مريم مبتسمه: ان شاءالله يا قلبي ..
خالد: الله يوفقج ..
مريم: تسلم حبيبي ..
خالد: مع السلامه ..
مريم: مع السلامه ..
الساعه 2 ونص في بيت بوفارس .. فارس وعبدالعزيز راحوا غرفة ابوهم وامهم .. طقوا الباب ودخلوا .. بوفارس كان قاعد وام فارس قاعده جنبه .. سلموا الشباب وقعدوا ..
بوفارس: شوفوا يا عيال محمد .. انا جبتكم اليوم عشان اخذ رايكم في موضوع ..
فارس: خير يبه ..
بوفارس مبتسم: كل خير ان شاءالله .. امس جاني سلمان .. وكلمني في موضوع بغيت آخذ رايكم فيه .. يوسف ولد اخته متقدم حق فطيم اختكم ..
ارتسمت ابتسامات الفرح على ويه عبدالعزيز وفارس ..
بوفارس: وانا اشوف ان الولد ما عليه كلام .. بس ابغي رايكم فيه .. لانكم تعرفونه عدل ودوم مع بعض ..
عبدالعزيز: وانا اقول وينه ما يبين الولد هاليومين .. ولا جاب لي خبر ..
بوفارس: هههههه ..
فارس: والله يشرفنا نسب ناس مثلهم ..
عبدالعزيز: وانا مع فارس .. بصراحه بوخليفه ريال .. اخلاقه عاليه .. محترم وقايم بأهله .. يعني بيحط اختنا فعيونه ..
ام فارس: بس هو غريب عنكم ..
بوفارس ما عجبه كلام ام فارس بس سكت ..
فارس: والله بوخليفه انا اعده اخو ..
عبدالعزيز: والله فطيم ما بتحصل واحد مثله .. والنعم فيه ..
فارس: يمه شلون يعني غريب ؟
ام فارس: والله ودي فطيم لو تاخذ ولد عمها .. منا وفينا ..
فارس: يمه علي ما يفكر مثل خالد ..
ام فارس: والله تمنينته لها ..
بوفارس: ردينا ..
ام فارس سكتت ..
فارس: ههههه .. ليش ؟
عبدالعزيز: لي يومين ما شفته .. واليوم عنده فالمكتب ولا جاب لي خبر .. حتى ما لمح ..
فارس: عاد كل شي ولا النسيب ..
فارس وعبدالعزيز: هههههههه ..
فاطمه كانت فالجامعه مع مناف ومريم .. وفجأه جاها احساس بالوناسه .. تم قلبها يدق بسرعه وكانت مستانسه استغربت سر هالشعور .. ؟
مناف: والله بشتاق لكم يا بنات ..
مريم: عاد لازم نتشاوف يا مناف ..
مناف: ما اوعدكم بس بحاول ..
مريم: ليش ما تقدرين ؟
مناف: ماعندي حد يوصلني .. وبيتنا بعيد وايد ..
مريم: زين احنا بمنرج .. ونطلع مع بعض مجمع او كوفي شوب ..
مناف: ممممم .. والله ماعتقد امي توافق .. بس لين ذاك اليوم بنشوف ..
فاطمه: قبل ما نسافر لازم نتشاوف ..
مريم: صح ..
فاطمه: انا اتكلم عنا احنا .. مو انتي ..
مريم: فطوم ..
مناف وفاطمه: ههههههه
فاطمه: انتي بتكونين مع ريلج ..
مناف: صح ..
مريم: احلفوا انتوا الثنتين ..
مناف وفاطمه: صج ..
مريم بدلع: اف منكم ..
مناف: تجنين .. دلوعه ..
مريم ابتسمت ..
تموا البنات يسولفون لين وصلت سيارتهم .. سلموا على مناف ورجعوا البيت .. فاطمه ومريم فالسياره كانوا يتكلمون عن مناف ..
مريم: تصدقين احسها تناسب فارس .. خلاص انحطت هالفكره في بالي ..
فاطمه: هي رقيقه وتجنن ..
مريم: وفارس ما عليج منه .. يحب يدلع .. شوفيه شلون معانا ..
فاطمه: اي والله ..
مريم: ان شاءالله تنجح الخطه ..
فاطمه: ان شاءالله ..
مريم: بس شلون بنقنع فارس لو بنتلاقى مع مناف ..
فاطمه: ما عليج من فارس خليه علي هالمره .. وخصوصا في هالموضوع ..
مريم: خلاص همتج ..
فاطمه: حاضرين ..
وصلوا البيت وفاطمه من وصلت لها الرساله هاي اول مره تحس انها ودها توصل البيت بسرعه .. اول ما وصلوا شافوا سيارة فاضل فالحوش ..
مريم: فضول عندنا ..
فاطمه: اي سيارته هاذي ..
مريم: شو عنده من العصر .؟
فاطمه: يمكن بيطلع من عزيز ..
مريم: يمكن ..
نزلوا من السياره ودخلوا الصاله وكان فاضل وعلي وعبدالعزيز فالصاله ..
مريم: السلام عليكم ..
الكل: عليكم السلام ..
فاطمه: الا الشباب عندنا اليوم ..
علي: ليش قاعدين على جبدج ..؟
فاطمه: سمالله على جبدي ..
مريم: هههههه ..
فاطمه: شحالكم عيال عمي ؟
علي: الحمدلله ..
فاضل: ما نشكي باس ..
علي: شو اخباركم مع الاختبارات ؟
فاطمه: الحمدلله ..
مريم: والله امورنا تمام ..
فاضل: الله يوفقكم ..
فاطمه قعدت جنب عبدالعزيز وباسته ..
فاطمه: شلونك فديتك ؟
عبدالعزيز: حبتج العافيه .. انتي شو سويتي فالامتحان اليوم ؟
فاطمه: الحمدلله تمام التمام ..
عبدالعزيز: موفقه فديت قلبج ..
فاضل: ها مرايم عيل بارس ..
مريم ابتسمت: ان شاءالله ..
علي: والله خلود يونس .. صج بيطيرج ..
مريم: حليله خالد ..
علي: وين خالد يسمعج ..
مريم انحرجت ونزلت راسها ..
فاضل وصله مسج .. طلع جواله عشان يقراه ..
عبدالعزيز: مسجاتهم بس ..
فاضل: هههههه .. احسن من رسايل الغرام يا حلو ..
فاطمه تمت اطالع فاضل باستغرب .. ويها صار احمر وعيونها غرقت .. استأذنت وراحت غرفتها .. طبعا كانت مو فاهمه شي من اللي يصير حولها .. ابوبها وفارس .. والحين فاضل .. حست انها في دوامه ومو قادره تطلع منها .. غطت ويها بيدينها وتمت تصيح .. اما الباقي كملوا سوالفهم .. لان فاطمه لما استأذنت ما حسستهم بشي
...............
يتبع
الساعه 6 بعد المغرب بوفارس كان راجع من المسيد ومعاه جاسم وسلطان ولد حمد اخوه ..
جاسم: يبه تودينا المجمع نبي نلعب .؟
بوفارس: مو الحين ..
جاسم: متى ؟
بوفارس: الساعه 7 بوديكم ..
سلطان: متأخر عمي ..
بوفارس: عيل شوفوا الشباب يودونكم .. انا بافضى الساعه 7 .. شوفوا فاضل ولا بوسعود ..؟
جاسم: شوف بنشوفهم .. ولو ما رضوا خل نطلع على الاقل الساعه 6 ونص ..
بوفارس: زين بشوف ..
خلاهم فالصاله وراح فوق حق فاطمه .. طق الباب عليها ..
بوفارس: حبيبة ابوها فطيم ..
فاطمه: لحظه بابا ..
لبست روبها وراحت تفتح الباب لابوها ..
فاطمه: هلا بابا ..
بوفارس باسها على راسها ..
بوفارس: فديت قلبج والله .. وينج ما نشوفج هالايام يبه ..؟
فاطمه: الامتحانات صعبه هالكورس ..
بوفارس: الله يوفقج فديتج قلب ابوج انتي .. زين قعدي ابي اكلمج بموضوع ..
فاطمه تمت اطالع ابوها بخوف و ويها صار احمر .. توترت وكانت شوي وتصيح ..
بوفارس: فاطمه ..
فاطمه: هلا بابا ..
بوفارس: الحين انتي كبرتي .. وغديتي مره .. في ناس متكلمين يبونج ..
فاطمه بلعت ريقها بصعوبه: ها ..؟
بوفارس: ناس كلموني .. رفيج عبدالعزيز اخوج تقدم لج .. انتي شو رايج ؟
فاطمه: بابا .. مممممم .. نزلت راسها بخجل ..
بوفارس: القرار الاول والاخير لج يا حياتي .. كلمني خاله امس .. وهو كان يشتغل ويدرس بنفس الوقت .. وقالي ان الولد توه مخلص الجامعه .. وانا عن نفسي ما شفت شي على الولد .. ريال وينشد فيه الظهر .. وعزيز اخوج يقول انه قايم بأهله وما عليه كلام الولد .. ومثل ما قال خاله من حقنا نسأل عنه .. واحنا بنسأل عنه في شغله ..
فاطمه: بابا .. والله ماعرف شو اقول ..
بوفارس: اول شي قولي لي .. انتي متقبله فكرة العرس ؟
فاطمه باحراج: اي ..
بوفارس: ومتقبله المتقدم لج ؟
فاطمه" فديته والله": اي ..
بوفارس: الله يتمم على خير يا بنتي .. الحين اللي عليج تسوينه انج تستخيرين .. واحنا علينا نسأل عنه اكثر ..
فاطمه: ان شاءالله ..
بوفارس: شوفي .. انا كلمت امج .. وامج هاذي مادري شلون تفكر والله ..
فاطمه بخوف: ليش ؟
بوفارس: اول شي قالت انه غريب عنا .. بعدين قالت ان مستواه اقل من مستوانا ..
فاطمه: زين مو عيب ..
بوفارس: بارك الله فيج .. هالرد اللي اعرف انج بتقولينه .. الله يكملج بعقلج يا فطيم .. والله يوفقج ويكتب لج الخير وين ما تروحين ..
فاطمه: الله يسلمك بابا .. والله يخليك لنا ذخر ..
بوفارس: زين يا قلبي .. فكري فالموضوع من اكثر من ناحيه .. ولو جات امج تكلمج عن الموضوع .. لاتخلينها تلعب براسج .. انا قلت لج .. مثل يوسف ما بتلقين .. كفايه الولد شاريج ..
فاطمه مبتسمه: ان شاءالله بابا ..
بوفارس: الله يقدم اللي فيه الخير ..
طلع بوفارس و سكر الباب وراه .. فاطمه قامت تناقز على السرير من الوناسه ..
فاطمه" واي فديته والله .. والله انه قدها .. وهاي مفاجأته لي .. فديته والله فديته " .. تمت تناقز على السرير من فرحتها .. فاطمه فرحتها ما تنوصف بهالخبر الحلو .. خذت لها شور ريح اعصابها .. نزلت تحت وطلبت من امها تسوي لها اكل ..
فاطمه: ماما جوعانه ..
ام فارس: فديت قلبج يا يمه ..
فاطمه: ابي اكل اي شي من ايدينج الحلوات ..
ام فارس: من عيوني الثنتين .. تعالي معاي المطبخ خل نسولف شوي ..
فاطمه" باسوي نفس ما قال لي بابا" : ان شاءالله ماما .. " مستحيل اخسر يوسف .. ماتخيل حياتي بدونه " ..
راحت المطبخ مع امها .. تموا يسولفون وام فارس كانت تطبخ .. فتحت الموضوع ..
ام فارس: فاطمه ماما ابوج كلمج عن موضوع الخطاب اللي تقدموا لج ؟
فاطمه: اي ماما ..
ام فارس: قولي لي شو رايج ؟
فاطمه: والله يا ماما فكرة الزواج انا متقبلتها ..
ام فارس تقاطعها: بس الريال اقل منا شوي ..
فاطمه تنرفزت: شلون اقل منا ؟
ام فارس: حبيبتي انتي مدلعه .. كل طلباتج اوامر .. اللي تبينه يوصلج ..
فاطمه: زين شدخل مستوانا ومستواهم ؟
ام فارس: يا يمه .. بكره لي خذج بيتعب معاج ..
فاطمه: ليش يتعب معاي ؟
ام فارس: حياتهم غير حياتنا ..
فاطمه: بس يا ماما انتوا ما علمتونا نشوف الناس اقل منا ..
ام فارس انحرجت من كلمة بنتها .. سكتت وما ردت عليها فتره ..
ام فارس: زين يا نتي انتي استخيري .. واللي فيه الخير رب العالمين بيقدمه ..
فاطمه: ان شاءالله ..
تمت فاطمه مع امها فالمطبخ .. بعد ما خلصت لها الاكل .. حطته لها في صحن .. تمت فاطمه تاكل وام فارس تراقبها .. خلصت فاطمه ..
فاطمه: تسلم يدج ماما ..
ام فارس: بالعافيه يمه .. خواتج وين ؟
فاطمه: يدرسون ..
ام فارس: بكره عندج امتحان ؟
فاطمه: لأ .. بس بروح عشان اكلم الدكتور واراجع شوي مع البنات .
ام فارس: الله يوفقج يا بنتي ..
فاطمه حضنت امها: فديت قلبج يا ماما .. دعواتج لنا ..
ام فارس: ادعي لكم في كل صلاه ..
فاطمه: عمري انتي يا ماما ..
ام فارس: يلا يمه روحي درسي ..
فاطمه: ان شاءالله ..
راحت غرفتها وهي فرحانه .. قل التوتر والخوف عند فاطمه ويوسف ..
كل الاحداث اللي عشناها مر عليها اسبوع .. البنات والشباب خلصوا امتحاناتهم .. والعطله الصيفيه بدت .. طبعا العطله الصيفيه تعبر موسم اعراس او سفر .. طبعا عرس هنادي .. وعرس مريم .. والعيلتين مشغولين .. هنادي عرسها بعد اسبوعين .. ومريم عرسها بعد 3 اسابيع .. في بيت بوفارس .. فاطمه وعبدالعزيز وايمان قاعدين ياكلون بوب كورن وهم يتابعون فلم ومندمجين حدهم .. نهاية الفلم كانت حزينه .. فاطمه صاحت ..
ايمان: حليلها الرقيقه ..
فاطمه تمسح دموعها: والله كسر خاطري البطل ..
ايمان: الا فلم .. ليش يكسر خاطرج ؟
فاطمه: والله انه طيب .. شلون ما تزوج حبيبته .. حرام ..
عبدالعزيز: زين يمكن فالجزء الثاني يتزوجها ..
فاطمه ببرأه: في جزء ثاني ؟
عبدالعزيز وايمان: هههههه
فاطمه: هييييييييي .. ليش تضحكون ؟
عبدالعزيز: والله انج بريئه اختي ..
ايمان: وينها و وين البرأه ..
فاطمه: اوهوووو .. مالت عليكم ..
طلعت عنهم فاطمه وهي معصبه .. عبدالعزيز وايمان ضحكوا عليها .. بوفارس شاف فاطمه وناداها ..
بوفارس: حبيبة ابوها ..
فاطمه معصبه: نعم بابا ..
بوفارس: من زعلج يبه ؟
فاطمه: عزيز وام كشه ..
بوفارس: افااا .. انتي محد يزعلج .. افا عليج بس .. تعالي خل اهزئهم ..
فاطمه ابتسمت: فديتك بابا ..
رجعت فاطمه لايمان وعبدالعزيز مع ابوها ..
بوفارس: ليش تضحكون على فطومه ..؟
ايمان: بس راحت تشتكي الدلوعه ..
عبدالعزيز: شدعوه شدعوه ..
بوفارس: لو زعلتوا عروستنا مره ثانيه مب احسن لكم ..
عبدالعزيز: اووووووب .. فديت عروستنا والله ..
فاطمه انحرجت وحضنت ابوها ..
بوفارس: زين تعالي ابي اكلمج برا شوي ..
فاطمه: ان شاءالله بابا ..
طلعوا يتمشون فالحوش ..
بوفارس: ها بنتي .. شو قرارج النهائي ؟
فاطمه ابتسمت: مممممم
بوفارس: ها اعتمد هالممممممم واقول موافقه ..
فاطمه: ههههه .. اي بابا ..
بوفارس حضن بنته بقوه ..
بوفارس: فديتج يا بنت محمد .. يعلني ازفج على يوسف ولد خليفه ليلة عرسج ..
فاطمه: فديت قلبك يا بابا ..
بوفارس: الله يوفقج معاه يا فطيم .. ريحتي قلبي الله يريح قلبج ان شاءالله ..
فاطمه: فديت قلبك يا بابا .. اهم شي رضاك علي ..
بوفارس: والله راضي عليج وعلى يوسف .. والله انه ريال ..
فاطمه: الله يسلمك بابا ..
بوفارس: يلا تعالي خل ابشر الكل فالبيت .. واتصل في بوخليفه ازف له هالخبر الحلو ..
فاطمه: زين ..
دخلوا وبوفارس جمعهم كلهم فالصاله ..
بوفارس: اليوم انا اسعد ابو فالدنيا ..
فارس: يعل هالسعاده دايمه يالغالي ..
بوفارس: فديتك والله .. اليوم فاطمه قالت لي انها فكرت عدل واستخارت وهي مرتاحه للموضوع .. بنتي فديتها صارت مره ..
ام فارس صاحت وحضنت فاطمه: الف مبروك يا بنتي .. الله يوفقج وياه يا قلبي ..
فاطمه صاحت: الله يبارك فيج ماما ..
تموا حاضنين بعض ويصيحون ..
عبدالعزيز: شدعوه قلبتوها دموع .. يمه لولشي ..
ام فارس: كلللللللللووووووش ..
بوفارس: الله يتمم على خير ..
مريم وايمان حضنوا فاطمه ..
مريم: فديت قلبج يا فطيم .. مبروك وتستاهلين والله ..
فاطمه: الله يبارك فيج حياتي ..
ايمان: مبروك فطوم .. والله يوفق بينكم ..
فاطمه: الله يبارك فيج حبيبتي .. والفال لج ..
عبدالعزيز: فديت قلبج يا توأمي .. مبروك .. و بوخليفه يستاهلج ..
فاطمه: الله يبارك فيك .. والفال لك يا عزيز ..
عبدالعزيز: الله يسلمج الغاليه ..
فاطمه ارتمت في احضان فارس وحضنته بقوه .. وفارس حضنها ومسح على راسها ..
فارس: حياتي دلوعتي فطيم .. تستاهلين والله .. وعقبال ما نشوف فارس الصغير يلعب في الحوش ..
الكل: ههههههه
فاطمه: الله يبارك فيك حبيبي .. وان شاءالله الفال لك يا فارس ..
ام فارس: الله يسمع منج يا فطيم ..
فارس: فديتج والله .. ترا بوخليفه ما ينعاف .. وانتي وهو لايقين لبعض .. الله يوفق بيتكم .. و ايسر اموركم ..
فاطمه: فديتك يا فارس والله ..
بوفارس: يا جماعه لا تجيبون طاري لبوخليفه .. انا باتصل ابشر خاله ..
الشباب: ان شاءالله يبه ..
الذين يشاهدون الموضوع الآن: 12 (0 من الأعضاء و 12 زائر)
مواقع النشر (المفضلة)