فاطمه ضحكت بخجل .. ويوسف كان ذايب في خجلها وهيمان برقتها .. سكروا من بعض .. فاطمه كانت حاضنه التلفون من الوناسه .. اما يوسف كان يشوف اسمها فالتلفون وهو فرحان .. كان مخزنها فالتلفون (حبيبتي) .. طلعت من غرفتها رايحه غرفة فارس .. سمعت صوت محمد عنده .. غيرت طريقها ونزلت تحت .. محمد كان يواسي فارس المهموم .. دخلت فاطمه الصاله ولقت خالد مع ابوها وامها فالصاله .. سلمت عليهم وقعدت ..
فاطمه: عيل وين مريم ؟
خالد: اختج ظالمه يا فطيم ..
فاطمه: ههههه .. ليش ؟
خالد: صار لها شهر ما تبي تشوفني ..
فاطمه: ههههه .. لازم يا خالد ..
بوفارس: عشان تشتاق .. ما بقى شي على العرس ..
خالد: ما يصير جي .. احتج ..
ام فارس: اصبر يا ولد .. على شو مستعيل ..
خالد: زين بس ابي اشوفها شوي ..
بوفارس: ههههه حالتك صعبه .. وين فارس عنك ..
الكل: ههههههه ..
ام فارس: فديت قلبه فارس .. مب عاجبني هالايام ..
بوفارس: ليش ؟
ام فارس: لا ياكل ولا يقعد معانا .. مادري شو فيه هالولد ؟
خالد: انا ملاحظ عليه ..
فاطمه " يا قلبي عليك يا فارس .. الله يستر منك "
ام فارس: خالد هو شلون فالشغل ؟
خالد: والله يا عمتي .. ما شوفه مركز في شغله .. كله تعبان ومصدع ..
ام فارس: سمالله على ولدي .. ليكون مريض فيه شي ..
بوفارس: ماعتقد ..
فاطمه" محد فاهم فارس الا ابوي .. اكيد يعرف شو فيه ؟" ..
ام فارس: عيل شفيه ولدي ؟ شو اللي تعرفه يا محمد ؟
بوفارس: ماعرف شي .. بس هو مب مريض ..
فاطمه " كلام بابا واضح .. دام مو مريض يعني يحب " ..
خالد: الله يعينه ..
تموا يسولفون شوي مع بعض .. وبعدين خالد استأذن منهم بيطلع .. وهو طالع من الصاله .. مريم كانت نازله من السياره رايحه صوب الصاله .. اول ما شافت خالد صرخت وركضت ورا البيت .. والكل مات عليها من الضحك ..
بوفارس: استخفت البنيه ..
خالد: تعالي مب شايفج ..
مريم كانت منخشه ورا الطوفه ..
ام فارس: هههههه .. روحي من باب المطبخ يمه ..
خالد بسرعه ركض صوب باب المطبخ .. قد مريم كانت رايحه صوب الدري .. مالحق عليها خالد ..
خالد: تعالي ..
مريم: اوريك ..
وركضت عنه وراحت غرفتها بسرعه ..
بوفارس كان يضحك عليهم ..
بوفارس: والله انكم ميانين ..
خالد: فطيم ..
فاطمه مبتسمه: هلا ..
خالد: تحملي تسوين في يوسف جي ..
فاطمه انحرجت ونزلت راسها ..
خالد: تعذيب بصراحه ..
ام فارس: ههههه .. والله انتوا يالريايل ما تصبرون ..
بوفارس: حددي لو سمحتي ..
الكل: ههههههه ..
خالد سلم على عمه ومرت عمه .. استأذن منهم وطلع .. فاطمه راحت عند مريم بسرعه .. دخلت عليها وهي تضحك ..
فاطمه: هههههه .. حلوه الحركه ..
مريم: ضحكي يا فطيم .. جايج الدور ..
فاطمه: هههههه .. لا يا عيوني انا ما بخلي يوسف يشوفني من الحين ..
فاطمه ومريم: هههههههه ..
فاطمه: مريوم .. كلمته اليوم ..
مريم بوناسه: والله .. شو قلتوا فطوم قولي لي ..
فاطمه: زين صبري شوي ..
مريم: يلا يلا ..
فاطمه: ههههه .. ما قلنا شي ..بس تمينا نسولف سوالف عاديه ..
مريم: زين شلون حسيتيه ؟
فاطمه: شلون يعني ؟
مريم: يعني رومنسي .. دمه خفيف .. جاد .. بليد ..
فاطمه: لا افا عليج .. الا يجنن ..
مريم بخبث: هااا .. بدينا من الحين يجنن ..
فاطمه انحرجت: يالدبه ..
مريم وفاطمه: هههههه
مريم: زين شو قلتوا ..؟
فاطمه: كنا نسولف سوالف عاديه .. هو وايد حليو .. بس عور قلبي ..
مريم: شلون ؟
فاطمه: يعني كسر خاطري يوم قالي انه اشتغل ودرس في نفس الوقت .. صج حسيته انسان كافح في حياته ..
مريم: حليله والله .. بس الله عوضه ..
فاطمه: ها ..
مريم: اي .. الله عوضه بفطومه اختي .. اللي تسوى بنات البلاد كلهم ..
فاطمه حضنت مريم بحنان ..
فاطمه: فديت قلبج يا مرايم ..
دخلت عليهم ايمان ..
ايمان: صادوه .. شو تسون ؟ ليكون تتدربون حق العرس ..
مريم وفاطمه: بايخه ..
ايمان: ههاااااي .. زين فطوم ابي البالطو الاسود مالج ..
فاطمه: ليش ؟
ايمان: حق السفر ..
فاطمه: لا والله .. يعني انا شو البس ؟
ايمان: لبسي اي شي ..
فاطمه: لا والله ..
ايمان: هههههه .. زين وينه بس ابي اجربه .. عشان افصل لي عليه ..
فاطمه: اها .. على بالي بعد ..
ايمان: زين وينه ؟
فاطمه: باجيبه لج ..
ايمان: مرايم خلاص جهزتي كل شي ؟
مريم: اي الحمدلله ..
ايمان: عيل متى بتروحين بيت عمي عشان تودين اغراضج ؟
مريم: امي ودت نص الاغراض ..
ايمان: خلاص عيل بتنامين في غرفة خلود ..
مريم: خلود فعينج .. اسمه خالد ..
ايمان: خفي علينا .. اسمه خالد .. زين زين ..
مريم: على بالي بعد ..
ايمان: مشكله اللي ما يرضون .. عاد انكم ..
فاطمه: حالتكم صعبه ..
ايمان: تعالي شو اخبار المعرس ؟
فاطمه بدلع: طيب ..
ايمان: حلاتين حلاتين ..
مريم: بنشوفج لي عرستي يا ايمانووو ..
الكل: هههههه ..
فاطمه: اي بنشوف ..
مريم: بس من ممكن يكون عريس الغفله ؟
فاطمه: انا اتوقع واحد من عيال عمي ..
مريم: من ممكن يكون ؟
فاطمه: احس فضول ..
ايمان: وليش يعني ؟
فاطمه: مادري .. احسكم لايقين لبعض ..
ايمان: الله يخليكم .. عاد فضول .. قولوا علي ..
فاطمه ومريم: هاااا ..
ايمان: شو ها .. فضول خبل مال سياير و بطابط و مسابق .. علي اثقل منه ..
فاطمه: انتي يبيلج علي .. تعرفينه عصبي و ماعنده مشكله فالتصفق ..
ايمان: ما دريت اخليه يصفقني .. باسوي له حفله لو بس فكر انه يصفقني ..
مريم: داشه بقوه البنت ..
ايمان: عيل شلون عيل ..
فاطمه: زين انا بروح اتعشى ..
ايمان: زين عزمينا يالبخيله ..
فاطمه: ولا اانا مب شاريه العشى .. العشى موجود تحت .. تبون تعالوا ..
مريم: يمه منج .. دبه
فاطمه: عادي ..
طلعت عنهم و نزلت تحت .. بوفارس كان قاعد بروحه وام فارس كانت تجهز العشى .. قعدت مع ابوها تسولف معاه ..
بوفارس: شو اخبار معرسنا ؟
فاطمه مبتسمه: طيب الحمدلله ..
بوفارس: ما كلمتيه ؟
فاطمه: بلا كلمته اليوم ..
بوفارس: ها شلون حسيتيه ؟
فاطمه: ليش كلكم تسألوني هالسؤال ؟
بوفارس: ههههه .. لازم نعرف انطباعج عن الولد ..
فاطمه: اي ي ي .. والله حليو وحبوب ..
بوفارس " اكيد حليو و حبوب بعد " ..
بوفارس: الله يوفقكم يا بنتي .. ولا تسمعين كلام الحريم .. ولا تخلينهم يلعبون بمخج .. بقولج قصة وحده لعبوا في مخها الحريم ..
فاطمه مبتسمه: زين ..
بوفارس مسك يدها وباسها ..
بوفارس: سمعي هالقصه .. في زمان قبل البترول .. العرب كانوا عايشين بالخيام وحياتهم كانت صعبه .. في ريال تقدم به العمر .. وماعنده الا ولد واحد .. طلب من ولده انه يتزوج بنت ريال شهم .. لان بنت الريال الشهم متربيه تربيه طيبه و ابوها بيكون حكيم .. الولد وافق ابوه على هالكلام وطمنه .. مر زمن ومات هالشيبه بعدها الولد نفذ بوصية ابوه .. لقى ريال شهم وتقد لخطبة بنته .. ابو البنت وايد حكيم .. قال للولد انا بزوجك بنتي بس عندي شرط .. لو وافقت عليه لك بنتي .. الولد سمع شرط الريال .. وكان شرطه ان بعد ما يتزوج و زوجته زعلت وراحت بيت اهلها ما يجي يراضيها الا بعد سنه كامله ..
فاطمه بدهشه: سنه كامله ؟ ليش بابا ؟
بوفارس: الحين بتعرفين يا قلبي .. زين الولد وافق على الشرط والله تمم لهم وتزوج البنت وكانوا عايشين حياه سعيده .. وكانت الزوجه تعجن وتخبز وتجهز الاكل لزوجها .. وتغسل ملابسه وتنظف له مكانه .. وكانت ما تختلط بجيرانها ولا تطلع من بيت زوجها بالمره الا للضروره .. مرت الايام وصار عند اهل زوجها عرس .. فاقترحت على زوجها انها تحضر العرس .. الزوج رفض فالبدايه وقالها اخاف عليج من جمعة النسوان .. جمعت النسوان ما من وراها خير .. قالت له ما عليك ما يقدرون يأثرون علي عندي عقل اميز به كل شي .. وافق الزوج و راح مع زوجته العرس .. اول ما دخلت عليهم استلموها الحريم .. قالوا لها ليش دومج فالبيت ولا تطلعين ولا تزورين حد ؟ وش الي تشغلين وقتج فيه ؟ ردت عليهم اقوم بشغل البيت واسنع الاكل لزوجي وارتب له مكانه واحنا بخير والحمدلله .. قالوا لها انج قليلة عقل .. احنا ريايلنا يسون كل هالامور عنا .. واصلا هاي شغل الريايل مو شغلنا انتي مو خدامه عنده .. رجعت الحرمه بيتها وهي تفكر في كلام النسوان .. فظنت انها غبيه وانقص عليها ..
فاطمه: ول عليهم هالنسوان ..
بوفارس: شفتي شلون .. المهم .. قررت الحرمه انها تسوي مثل باقي الحريم .. فاليوم الثاني رجع زوجها ولقاها نايمه .. ماحب انه يزعجها فتركها نايمه وقام سنع له ولها اكل وكلوا مع بعض .. رجع اليوم اللي بعده ولقاها على نفس الحال .. فسألها عن حالها .. ردت عليه انا مو من واجباتي اسوي هالشغل كله .. انت تسوي شغل البيت كله انت فاكرني مغفله كل الحريم ازواجهم يسون شغل البيت .. استغرب الزوج وسألها من اللي حط هالافكار السوده في مخج .. قالت له الحريم اللي قالوا لها وانها قررت تسوي مثلهم وما راح تشتغل له فالبيت .. كبر عقله من سمع هالكلام .. وقالها ما عليج من كلام الحريم يقصون عليج .. قالت له بعناد لا ما يقصون علي قالها دام هاي رايج .. شلي اغراضج و روحي بيت اهلج ..
فاطمه: صج انها غبيه .. لعبوا في مخها الحريم ..
بوفارس ابتسم لها ومسح على راسها ..
فاطمه: آسفه بابا .. كمل ..
بوفارس: زين يا طويلة العمر .. راحت بيت اهلها وشافها ابوها جايه من بعيد فعرف انها زعلانه مع زوجها .. راح للام وقالها بنتج جايه من بيت زوجها .. لا تضحكين معاها وكشري في ويها .. اول ما دخلت البنت بيت ابوها ارتاحت شوي وبعدين طلب منها ابوها تسقي الغنم وتنظف حضاير الغنم .. وطلب منها تسوي اشياء وايد لين تعبت وصار كل يوم يشغلها باعمال شاقه ومتعبه .. لين ندمت وعرفت انها غلطانه وان النسوان خدعوها لانها كانت تعيش سعيده مع زوجها ..
فاطمه: مسكينه والله ..
بوفارس: المسكينه على قولتج تمت تنتظر زوجها يجي يراضيها .. بس كان شرط ابوها فالبدايه انهم لو تزاعلوا ما يجي الزوج ياخذها من بيت ابوها الا بعد سنه .. والمده طويله بالنسبه لها .. وبعد سنه بالضبط راح الزوج يراضي زوجته .. طلب الاب من زوجته انها تستقبل زوج بنتها بفتور و تكشر في ويهه .. وتفرش له كيس يقعد عليه وتطبخ له عدس .. اهل الصحراء يكرهون العدس .. وهاللي يسويه الاب كان احتقار للضيف والبنت كانت تلوم نفسها .. وبعد ما قلطوا النسيب طلب الاب من زوجته انها تفرش له كيس عشان ينام عليه وتعطيه لحاف قديم .. لما حل عليهم الليل راح الاب حق نسيبه وقاله روح نام في مكان ثاني .. وكان الاب مرتب فراش نظيف له نام في المكان اللي قال لزوجته تجهزه .. تغطى وسوا نفسه نايم .. بعد فتره راحت البنت عند ابوها وهي تعتقد انه زوجها .. كانت شايله له اكل طيب وقالت له انه ابوها ماعرف قيمته .. وان قيمته عندها هي كبيره .. وقالت له ان ابوها رواها انواع العذاب وانها كانت معززه مكرمه عنده .. مارد عليها ابوها وهي كانت مفتكره انه زوجها ومن التعب ما رد .. تركت الاكل عند راسه وراحت عنه ..
فاطمه: صج حكيم هالابو ..
بوفارس: واليوم الثاني قال الاب لبنته الحين رجعي مع زوجج ولا تغضبينه وكوني مطيعه .. رجعت مع زوجها بفرح وكانت تشكي لزوجها عن حالها عند ابوها .. واليوم اللي بعده مروا عليها النسوان يباركون لها على رجعتها .. ما استقبلتهم فالبيت .. وقفت لهم عند الباب وقالت لهم ولا وحده فيكم تجي بيتي .. خربتوا علي حياتي مابي اشوف اي وحده فيكم مره ثانيه .. ومن بعدها عاشت البنت مع زوجها حياة سعيده ..
فاطمه: بس بابا احنا زمنا غير زمنهم ..
بوفارس: ادري .. وانا ما قولج قطعي الناس .. الا تواصلي معهم .. بس لاتسمعين من النسوان .. لانهم بيخربون عليج حياتج .. كل وحده بتقول انا زوجي يسوي لي و يوديني .. وانتي بتقولين ليش ما يوديني ويسوي لي .. لا تاخذين وتعطين معاهم في مجال حياتج .. ولاتعطينهم مجال يتدخلون في حياتج .. ولا تسمعين كلام فلانه وغيرها مو تقولج امج والله اجبريه يطلعج بيت بروحج .. ولا تقولج اختج زوجي سوا وغيره .. خلج حكيمه فكري عدل محد بينفعج الا زوجج .. لا تهدمين بيتج بيدج .. وكلام الحريم ابتعدي عنه ..
فاطمه مبتسمه: ان شاءالله بابا ..
بوفارس: فديت فطيم الغاليه ..
بعد هالقعده الحلوه مع ابوها نزلوا خواتها وتعشوا كلهم الا جاسم .. الكل استغرب من عدم وجود جاسم .. وان بوفارس ما ناداه .. وطبعا فارس ما نزل يتعشى معاهم تحجج بوجود محمد ولد عمه معاه .. بعد هالعشى العائلي كلن توجهه لغرفته عشان يرتاح .. كانت الساعه 10 ونص .. ومحمد كان مع فارس فالغرفه ..
محمد: زين انت شو اللي خلاك تسألها هالسؤال يا فروس ؟
فارس: والله مادري .. يمكن اشتطيت يوم شفت الشباب بيعرسون .. فكرت في هالشي..
محمد: بس يا فروس انت اتخذت قرارك .. وللحين ما كلمت هلك
فارس: والله متردد يا حمود ..
محمد: لا تعلق البنت يا ريال .. انت اتخذت قرار خلاص go for it
فارس: ان شاءالله .. بس يا حمودي اللي محيرني حزنها .. ودموعها اللي ما توقف ..
محمد: ليش ؟
فارس: مادري .. يعني مستحيل عشان سألتها عن نهايتنا بتحزن هالحزن ..
محمد: زين انت تذكر يمكن قطيت عليها كلمه قويه ..
فارس: متأكد من كلامي .. قلت لها يا فلانه انا وانتي لين متى ؟ بس هي انصدمت وتمت ساكته .. سكرت مني بحزن .. حاولت اخليها عالخط بس اصرت تسكر .. خليتها على راحتها .. رجعت كلمتها قبل ما نام ما ردت اول مره .. بعدها بفتره اتصلت لي .. بس كانت حزينه وايد وتصيح .. كانت تصيح بصوت مسموح يا حمود .. عورت قلبي ..
محمد: زين ما سألتها شو فيها ؟ يمكن تعبانه يمكن اهلها فيهم شي؟
فارس: اكلمها وماترد .. تخيل طول المكالمه وانا اهدي فيها وهي تصيح .. ما خذت منها لا حق ولا باطل ..
محمد: لا حول الله .. شو الحل ؟
فارس: اي والله شو الحل .. مادري اخلي وحده من خواتي تكلمها ؟
محمد: لا تحمل .. بطيح من عين خواتك جي ..
فارس: عيل شاسوي قولي يا محمد قولي .. تعبت والله تعبت ..
رن جوال فارس ومناف كانت المتصله .. شاف التلفون بحزن ..
محمد: رد عليها ..
فارس: خل تسكر باتصل لها ..
اتصل فارس بنماف وردت هي ميته من الصياح .. فارس خاف عليها ..
فارس: مناف شفيج .؟
مناف: فارس الحقني يا فارس ..
فارس: الله يخليج يا مناف اهدي شوي ..
مناف وسط دموعها: فارس .. امي
فارس بخوف: شو فيها امج ؟
مناف تمت تصيح و مو قادره تتكلم .. فارس كان مطول باله معاها .. انتظرها تهدى شوي وتتكلم ..
مناف: فارس انا ماعرف شلون ابتدي الموضوع معاك .. فارس انت تدري اني احبك واموت فيك ..
فارس تسارعت دقات قلبه مع كلام مناف ..
مناف: والله العظيم اني اموت فيك يا فارس ..
فارس: مناف طيرتي عقلي .. قولي لي شو صاير ؟
مناف: في واحد متقدم لي ..
فارس بطل عيونه .. تم يطالع محمد و هو مو مستوعب الكلام اللي سمعه .. محمد خاف على ولد عمه ..
فارس: مـ مـ مناف انتي تمزحين ؟
مناف بحزن: لا والله مامزح يا فارس .. ارجوك انقذني ..
فارس بصدمه: من يكون هالشخص؟ من اهلج ؟
مناف: لا .. دكتوري فالجامعه ..
فارس: آآآه يا قلبي .. ليش يا مناف ليش ؟
مناف: والله مابيدي شي .. امس زارتنا امه .. وامي تحن علي يا فارس .. طلعني من اللي انا فيه ..
فارس: انتي تبينه ؟
مناف بصراخ: انا ابيك يا فارس .. بس انت ..
فارس: زين مناف يا قلبي استهدي .. قومي صلي ركعتين واذكري ربج .. انا جايج فالطريق ..
مناف وتشهق من الصياح: ان شاءالله حبيبي ..
سكرت مناف من فارس و سوت اللي قالها عليه .. فارس سكر التلفون وطالع محمد اللي عيونه كانت حايره تدور اجوبه على ردة فعل فارس من مكالمة مناف ..
محمد: شسالفه ؟
فارس: في واحد متقدم لها ..
محمد انصدم .. خاف على فارس .. خاف من اللي ممكن يصير لفارس لو تم هالزواج ..
محمد: وليش بتروح لها الحين ؟
فارس: والله مادري .. ترا الشيطان يلعب في عقلي .. شوري يقولي اخطفها واخذها بعيد عن كل الناس ..
محمد: فروس كبر عقلك وعن الينون ..
فارس: خلها على الله ..
غلغل اصابعه في شعره وغمض عيونه بقوه .. قام من السرير ولبس ثوبه ..
فارس: زين انا طالع يلا قوم ..
محمد: انت بتروح شو بتسوي ؟
فارس: والله مادري يا محمد .. بس ابي اكون حولها .. فيني غل وغضب ..
محمد: اذكر ربك يا فارس ولا تتهور ..
رن جوال فارس وكانت مناف المتصله .. رد عليها وطلعوا هو ومحمد من الغرفه ..
فارس: انا جاي الحين .. لما اوصل باتصل ..
مناف: زين حبيبي ..
سكر منها و ركب السياره .. سلم على محمد وحرك .. طبعا محمد خاف على فارس .. مشى وراه بس من بعيد .. فارس انطلق بسرعة البرق لبيت مناف .. اول ما وصل اتصل لها تلفون وطلعت له .. اول ما شافها كان وده يطوقها بذراعينه .. وقف جنبها وتم يطالع عيونها الحزينه .. مناف قربت منه ونزلت راسها ..
فارس: رفعي راسج حبيبتي ..
مناف كانت منزله راسها ونزلت دموعها .. فارس رفع راسها ونزلت دمعه على يده .. حس بحزنها ..
فارس: مناف عشاني لا تصيحين .. دموعج غاليه يالغاليه ..
مناف بصوت مبحوح: فارس ..
فارس غمض عيونه: يا عيون فارس انتي ..
مناف: فارس انا ابيك انت ..
فارس: وانا ماتصور حياتي بدونج يا قلبه ..
مناف: مابي الدكتور .. وامي من امس وهي تحاول تقنعني ..
فارس: من وين يعرفونكم ؟
مناف: هالدكتور عندنا فالجامعه .. انا ماخذه عنده مقرر ..
فارس: يا قلبي يا مناف .. لا تزعلين نفسج يا قلبه .. كل شي بيكون بخير ..
مناف: ماقدر انام اليل من كثر التفكير .. وكل شي جى مره وحده .. يوم انك سألتني ذاك اليوم انصدمت واليوم اللي بعده تدخل امه علينا .. آآآه يا فارس تعبت ..
فارس: سمالله عليج يا قلب فارس انتي ..
فتح باب السياره وطلع علبة الكلينكس .. خذ الكلينكس ومسح دموعها ..
فارس: تعالي قعدي هني حياتي ..
ركبت السياره وفارس كان واقف مواجهها .. تم يهديها و يطمنها .. تم معاها تقريبا ساعه و شوي .. مناف حست بالراحه شوي .. هدت و ما قامت تصيح ..
فارس: حياتي ..
مناف ابتسمت: قول حبيبي ..
الذين يشاهدون الموضوع الآن: 12 (0 من الأعضاء و 12 زائر)
مواقع النشر (المفضلة)