طلعوا خالد ومحمد ... وخالد ترك الكل بحيره من تصرفه ... "ما ينلام الولد"
ساره بخبث: يلا مريم شدي حيلج .. خالد يحب اليهال .. وهي ما تدري ان الجو متكهرب
الريم تهمس في اذن ساره: سوير مو وقته ..
ساره: احم .. اسفه
فاطمه: مريامي .. الجسمي .. يلا بنروح البيت
ساره: اسفه مريامي
فاطمه بعصبيه: يلا بسرعه .. قامت مريم و وراها الجسمي وراحوا بيتهم .. وهم في السياره ولا حد منهم نطق بكلمه ..
في نفس الوقت في بيت بومحمد ..
ساره: الريم .. انا قلت شي غلط .. ليش فاطمه عصبت وطلعت
الريم: لا لاتشيلين هم .. ما زعلت بس ماحبت اللي صار بوجود جاسم وسلطان
ساره: باتصل استسمح منها
الريم: سوير لاتكبرين الموضوع .. عادي ما صار شي صدقيني
نرجع لخالد ومحمد اللي راحوا غرفة خالد .. خالد لمح لمحمد انه يبي مريم بنت عمه بس ما اعترف له بحبه لها .. وقاله عن البنت اللي تطلع له .. اللي شافها في البر
خالد: والله يا محمد حتى وانا اكلمك .. اشوفها في زوايا الغرفه .. بس الحمدلله ايماني بالله قوي .. اول الايام حسيت لساني مربوط .. وماحب اوقف جدام المرايه اخاف من شكلي .. .
محمد: بالعكس اشوف ان جروحك خفت والحمدلله ... بس الخياطه اللي في حاجبك علمت وصار خط فارغ في حاجبك .. بس مغيره بشكلك ياخي .. صاير سكبه ما عليك زود بو وليد .. ههههههههه
خالد مبتسم: الله يقطع سوالف .. يا محمد ههههه
محمد: زين الحين شلون تحس نفسك ؟؟
خالد: الحمدلله .. من قرى علي المطوع واحس نفسي احسن .. وقالي لازم اتحصن اول ماقعد من النوم وقبل ما نام .. بس فيني خوف منها .. اخاف اشوفها على غير هيئتها .. واخاف تلازمني طول عمري ..
محمد: اذكر ربك يا ريال .. تحصن على طول .. ورطب لسانك بذكر الواحد الاحد ...
خالد: الحمدلله على كل حال..
محمد: زين خلود .. حلوه ؟
خالد: هااا ... من ؟
محمد: اللي شفتها ..
خالد: الله يغربلك حمود .. خل عنك السوالف ..
محمد: يا ريال
خالد: ما شفت بجمالها .. كامله والكامل الله ..
محمد بعبط: ما تطلع لي هههههههه
خالد ويضرب محمد على كتفه: ماتدري عنك سويره .. ام الزين على قولتك
محمد: هاي ساره محد يسواها .. الله يسخرها لي انشالله
خالد: الله يتمم على خير ويوفقك ياخوي .. والحين انا ابي اشوف نفسي بعد ..
محمد: مبروك الغالي .. تستاهل .. الا تعال بقولك شو هالكلام اللي قلته لمريم .. تراك عصبت بي
خالد منحرج: السموحه انك معصب علي .. وادري اني احرجت بنت عمي بس غصبن عني
محمد: شو اللي غصبن عنك يا خالد ؟
خالد: انا ابي اتزوج بنت عمي وهي اشوفها في احلامي .. تقولي باخذ مريم عندي .. بحرق قلبك عليها ..
محمد: لا حول ولا قوة الا بالله .. كل شي بيد رب العالمين .. انت انسان مؤمن ياخالد .. خل ايمانك بالله اقوى واقوى ..
خالد: والنعم بالله .. بس يا محمد انا من زمان حاط مريم في بالي واخاف تكون لغيري ..
محمد: افهم من كلامك انك تحبها ياخالد
قعد خالد على الارض وحضن ريوله لصدره: احبها ... ومريم لي انا ..
محمد: والله بنت العم ماتنعاف .. والله يكتبكم من نصيب بعض انشالله .. الليله باكلم الوالد ..
خالد بخوف: لا لا لا لا ارجوك يا محمد .. لالالا
محمد مستغرب: ليش لأ ؟
خالد: مو وقته .. اصبر كل شي بوقته حلو
محمد: ومخطط بعد .. سلامي عليك يا بو وليد
خالد اكتفى بابتسامه وقام من الارض وانسدح على السرير ..
طلع عنه محمد ونزل تحت عند البنات
محمد: وين بنات عمي ؟
ساره: راحوا البيت
محمد: ليش؟
الريم: قالت فاطمه ان الوقت تأخر ..
دخل عليهم فاضل: السلام عليكم
الكل: عليكم السلام
فاضل: وين بنات العم ؟
الريم بحزن: راحوا البيت ..
فاضل: وخالد ؟
محمد: في غرفته
فاضل طالع الريم وطلعوا فوق مع بعض .. وتم محمد وزوجته ساره في الصاله
محمد: سويرتي حبيبتي ..
ساره: عيون ساره .. هات من الاخر
محمد متفشل: افاااا ... شلون بعد هات من الاخر ؟؟
ساره تضحك: فديت روحك يالغالي .. انت تامر امر
محمد: ماقدر على الغزل انا
ساره منحرجه: ...........................
محمد مسك ايد ساره وباسها .. شو رايج تفكرين .. انا قلت تفكرين .. في اخت او اخو لنايف وناصر؟
ساره: بدري توهم صغار
محمد: زين انتي ماعندج شي .. وبدل الخدامه بجيب لج عشره .. .
ساره: هي مو مسألة خدم .. انا مو عيزانه عن عيالي .. بس خل يكبرون شوي ..
محمد متحطم وخاضع لكلام ساره: اللي تشوفينه ..
ساره بأبتسامه ذبحت محمد: شو رايك نطلع نتمشى شوي ؟
محمد: فالج طيب .. بس وين خاطرج تروحين ؟
ساره: المكان اللي يعجبك ..
محمد: بخليها مفاجأه و ...... توه بيكمل كلامه ودخل عليهم فهد ..
محمد: لا حول الله ... محد معقدني في حياتي الا هالفهد ..
ساره ميته من الضحك: وحليله .. حرام هههههههه
فهد: خير اخ محمد .. اقدر اخدمك بشي .. ؟
محمد: يالله ... روح غرفتك ارتاح اخ فهد .. باين عليك التعب
فهد: تبي تصرفني ... ههههه ... احلم
ساره: انا بروح البس .. اوكي
محمد: تعالي خذيني معاج .. بدل ما جابل ويه الاخ
فهد: شو فيه ويهي .. احمد ربك انك تشبهني .. والله حاله
ساره + محمد: هههههههههههه وراحوا عنه .. تم فهد بروحه في الصاله .. يطالع التلفزيون ودخل عليه فاضل
فاضل: هلا فهودي
فهد: هلا فضولي
فاضل: ما اعبطك
فهد: خخخخخخخخخخخ
فاضل: ليش مارحت مع سلطون والجسمي اليوم ؟
فهد: رحت مع ابوي بيت رفيجه بوشهاب .. يملل افففففففف
فاضل: هههههههه ... ليش ؟
فهد: يسولف مع ابوي .. وانا ضايع في الطوشه .. اشرت على ابوي كم مره يطالعني ويرد يكمل سوالفه وكل شوي يقول بوشهاب ان عنده ولد قدي اسمه عبدالرحمن قدي ويمدح فيه .. بس ما شفته تقول بيض الصعو مو عبدالرحمن ..
فاضل: ههههههههههه .. زين ابوي وينه ؟
فهد: نزلني وراح .. عنده مشوار
فاضل: اما اليوم فاتك يالفهدي ..
فهد بفضول: شو صار؟
قال فاضل لفهد عن اللي صار .. فهد استانس وقال لفاضل
فهد: عندي احساس ان قريب بنفرح فيهم
فاضل: الله يسمع منك .. وفي احلى من هالاخبار
في مجلس بوفارس الشباب قاعدين يسولفون مستانسين ...
احمد: ها فارس .. ما رديت على موضوعي ..
فارس باحراج: اسمحلي احمد بس انت ادرى بالظروف اللي مرينا فيها ..
احمد: انا مقدر هالشي .. بس كنت ابغي اقولك .. من فتره شقت وحده جايه بيتكم واظنها مو من اهلكم بس طلبتك تسأل هلك عنها .. ابغي اعرف من بنته.. عشان اسأل عنها
فارس ارتاح من كلام احمد .. لانه كان خايف انه يقصد وحده من خواته: خلاص صار يا بو راشد
استانس احمد من خاطره .. قال بينه وبين نفسه " اخبرا بكمل نص ديني " الله يوفقني ويعطيني على قد نيتي ..
دخل عليهم خالد والكل التفت عليه .. وخالد طاحت عينه في عيون احمد بن راشد .. تضايق وكان بيطلع بس كبر عقله ورجع سلم على الشباب ..
خالد: السلام عليكم
الكل: عليكم السلام
قعد خالد جنب فارس: هلا ولد العم ... شحالك ؟
فارس: هلا والله .. طيب الله يسلمك وانت ؟
خالد: الحمدلله
احمد: خويلد .. حيالله ذا الولد النشمي .. صدق اللي سمعته .. انك مركب مخفي
خالد ما كان طايق احمد بس غصبن عنه ضحك: هههههههههه اي مركب مخفي
احمد: وش بلاك تعصر عمرك
خالد: شو شايفني برتقاله .. اعصر عمري
احمد قام ويقلد بنات البرتقاله: يالبرتقاله .. عذبتي حاله
خالد حذف المخده على احمد: اقعد الله يرجك ..
والشباب ميتين من الضحك
قعد احمد جنب خالد: الا بنشدك بو وليد .. غديت ريال ونبي نشوف عيالك ؟
خالد: ليش طايح بجبدك .. ولا تصرف علي ؟
احمد: الله يرجك ... اقصد غديت شيبه
خالد: وليش انت ماتعرس يالياهل ؟
احمد: قريب انشالله لو الله كتب لي بكمل نص ديني .. وهذا هو فارس عندك اسأله
انصدم خالد: هاا .. فارس .. شو دخل فارس ؟
احمد: ساله وهو يقولك .. ادعي لي عاد .. يلا انا استأذن .. تشااااو
الشباب: الله وياك
خالد ماقدر يقعد مكانه .. كلام احمد بن راشد يرن في اذنه ..
خالد: فارس تعال شوي عندي
راح فارس عند خالد: خير شو فيك مصفر ..
خالد: شو سالفة الشيخ احمد؟؟
فارس مستغرب من اسلوب خالد: اي سالفه .. وليش تتكلم جي ..؟
خالد: يقولك يبي يعرس .. وانت متفق معاه على شو ؟؟
فارس: زين ليش تصرخ .. شوي شوي بافهمك .. اذكر ربك ياخالد
خالد تنفس بعمق: اعوذ بالله من الشيطان الرجيم
فارس: زين اسمع .. احمد بن راشد يبغي يعرس .. ومره شاف وحده من صديقات خواتي عندنا فالبيت .. وطلب مني اسأل خواتي عنها عشان يسأل عنها .. ويكمل نص دينه
خالد تنفس: آآآآه .. اسأل خواتك يا فارس ..
فارس مستغرب: خالد شو فيك ...؟!!!؟
خالد مبتسم: ولاشي .. احمد يستاهل .. اسأل خواتك ولا تطول عليه ..
فارس: انشالله .. احمد يستاهل .. صح صح .. وفارس يقول هالكلام كان متعجب من ولد عمه .. ويقول في خاطره اكيد هاي اللي تطلع له مسويه فيه جي .. بسم الله لا وانا ابيها تطلع لي بعد " يا ويلي " ...
" من بين الناس حبيتك .. من بين الناس .. وبكل احساس اغليتك .. حبك جرى بدمي نساني كل همي وخلا حياتي غير .. من بين كل الناس "
طق .. طق .. طق ..
بوفارس: ادخل ..
عبدالعزيز: السلام عليكم يبه .. وباسه على راسه
بوفارس: هلا والله .. اهلين بوليدي ..
عبدالعزيز متوتر: شحالك الغالي؟ بغيتك بسالفه ..
بوفارس يعتدل في قعدته: يسرك الحال يبه ... امرني ..
عبدالعزيزويمسح العرق من جبهته: احم .. يبه .. انا .. ممممممم تشجع وقالها .. ابي اتزوج
بوفارس استغرب: تتزوج ؟؟!؟
عبدالعزيز بخوف: اي يبه ..
بوفارس: زين .. انت حاط حد في بالك ؟
عبدالعزيز: اي يبه .. .
بوفارس بنظره ربشت عبدالعزيز: من طال عمرك ؟
عبدالعزيز: صديقة مريامي اختي .. شفتها كم مره وانا اخذها من الجامعه .. وعجبتني
بوفارس: وحليك يا بوالزوز .. والله كبرت هههههه
عبدالعزيز ارتاح من ردة فعل ابوه
بوفاس: خلاص يبه .. خل موضوعك علي باكلم امك ونشوف البنت واهلها
عبدالعزيز باس ابوه على راسه من الفرحه: مشكور الغالي .. بس بس لاتعلم حد الحين ارجوك يبه
بوفارس يضحك على عبدالعزيز: ههههههههه انشالله يبه بس فكني من حنتك
عبدالعزيز طلع من الغرفه مستانس وبوفارس يضحك على خباله ...
بوفارس: والله وكبرت ياعبدالعزيز ... عقبال فارس اللي راسه ناشف .. طلع بوفارس من الغرفه نازل تحت وسمع ايمان تتكلم فالتلفون ...
ايمان: يه من صجج انتي ... شوفي شو تلبس .. الحمدلله والشكر
مها: لا تعيبين ايمانوه
ايمان: ما عيب بس ملابسها خرابيط ... يعني شدخل البني في الاصفر .. مووووول مايركب الله يخلي الذوق ياختي
مها: ههههههههههههههه ايمانوه الله يغربلج
ايمان: خخخخخخخخخخخ
مها: لا وشفتي مدرسة العلوم شو لابسه اليوم ... لا يفوتج
ايمان: لا ما شفتها .. اففف بكره هي علينا الحصه الرابعه
مها: لا عيل فاتتج الكشخه
ايمان: لاتخافين ما راح تفوتني ... اذا ماتحلل اللبسه وتخلل عليها وووووووووووع
مها: ايمانوه يا ام لسان ... محد يسلم من لسانج انتي
ايمان: ههههه لا محد
بوفارس: كح كح
ايمان: هلا بابا
بوفارس يطالعها: الحمدلله والشكر .. الله يساعدج يا بنتي
ايمان: هههههههه
مها: شو فيج ؟ على شو تضحكين
ايمان: ابوي .. يتحمد ويتشكر علي .. خخخخ الظاهر سمعني
مها: على قولة ابوج الحمدلله والشكر
ايمان: زين يلا بسكر باروح عند ابوي
مها: اوكي حبيبتي .. نشوفج بكره انشالله
ايمان: باي فديتج
كمل بوفارس دربه تحت ولحقه ايمان
الذين يشاهدون الموضوع الآن: 15 (0 من الأعضاء و 15 زائر)
مواقع النشر (المفضلة)