{ نهاية حبك إعدامي } رووووووووووعه

[رامون]

تموا الشباب يسولفون بوناسه وفرح .. وخالد من بينهم كان مستخف يبي يشوف مريم .. محمد كان يفكر في فاطمه .. ويحسد يوسف عليها .. المعاريس عاشوا احلى ليله فوق .. وباقي المعازيم تعشوا وتوكلوا .. كلن توجه لبيته .. الجوهره مر عليها ابراهيم .. ام فارس وبناتها توزعوا ما بين سيارة عبدالعزيز و بوفارس .. الريم راحت تنام بيت عمها عشان فارس .. ساره محمد كان ينتظرها .. الشباب (فاضل وعلي وسلطان) راحوا يتمشون شوي وبعدين رجعوا البيت .. فارس راح يتمشى عند البحر .. سلمان و يوسف رجعوا البيت .. اول ما دخلوا حسوا ان البيت مو حلو بدون البنات ..
سلمان: ملل ..
يوسف: مالي خاطر اقعد فالبيت ..
سلمان: ولا انا
يوسف: شرايك نروح بيت جوجو ؟
سلمان: لا خل البنت مع ريلها ..
يوسف: احنا مب نايمين معاهم .. بنام عندهم ..
سلمان: ههههه ..
يوسف: خل اتصل بجوجو ..
سلمان: زين ..
اتصل يوسف والجوهره ردت على طول ..
الجوهره بخوف: هلا يوسف ..
يوسف: شلونج اختي ؟
الجوهره: الحمدلله .. شفيكم يا يوسف ؟
يوسف مبتسم: ما فيني شي .. بس انتي ما نمتي للحين ؟
الجوهره: لا والله ..
ابراهيم قرب من الجوهره ..
ابراهيم: جهزي الغرفه حق اليهال ..
سلمان: هههههه .. طلعنا يهال ..
ابراهيم: هههههه ..
الجوهره تلخبطت: شفيكم ؟
ابراهيم: سلمان معاي عالخط ويوسف معاج .. حليلهم يخافون ينامون بروحهم ..
الكل: ههههههه ..
سلمان: يلا جهزوا غرفنا جاينكم ..
سكروا من بعض وتمت الجوهره تضحك على اخوها و خالها .. طلعوا من البيت و راحوا بيت الجوهره .. وصلوا و ابراهيم كان ينتظرهم فالحوش .. والجوهره كانت تجهز لهم الغرفه اللي بينامون فيها ..
سلمان: طلعتنا يهال جدام المدام ..
ابراهيم: ههههه ..
يوسف: والله البيت كئيب بدونهم ..
ابراهيم: حليلكم والله .. عيل متى بيسافرون معاريسكم ؟
سلمان: بعد بكره ان شاءالله ..
ابراهيم: المانيا ؟
سلمان: بأذن الله ..
ابراهيم: حياكم شباب ..
دخلوا الشباب والجوهره استقبلتهم بحب و حنان .. كانت مبتسمه لهم وترحب فيهم ..
الجوهره: هلا وغلا .. فديتكم نورتوا البيت ..
سلمان: البيت منور باهله ..
يوسف حضن الجوهره بشوق .. وسلمان وابراهيم استغربوا منه .. ابراهيم مسك سلمان وطلعوا من الصاله راحوا فوق .. تركوهم بروحهم .. الجوهره حضنت اخوها وصاحت .. تمت تكلمه وتمسح على ويهه ..
الجوهره: فديت قلبك يا خوي .. ليش هالحزن ؟
يوسف بحزن: فقدتكم فالبيت يا جوجو .. ابيكم ترجعون ..
الجوهره: فديت قلبك يا يوسف .. هاي سنة الحياة .. انا كل يوم امركم .. وهنوده بعد بتمركم ..
يوسف يمسح دموع اخته: ادري فديتج .. بس وجودكم فالبيت غير يا اختي ..
الجوهره: يعني انت عندك الماسه .. وتزعل ..
يوسف: فديت الماستي والله .. هي ضافت على حياتي الفرح .. بس وجودكم حولي اول ماقوم من النوم وقبل ما نام غير ..
الجوهره: فديت روحك يا يوسف .. انت بعد بتنشغل مع فطومه وبتنسانا ..
يوسف: عمري ما نساكم يا خواتي ..
الجوهره حضنت يوسف: فديتك يالغالي ..
يوسف: ترا حتى خالي زعلان .. من تزوجتي وهو كله يفكر ويدور فالبيت يفتح غرفتج ويشيك عليج ..
الجوهره صاحت: بس يا يوسف عورت قلبي والله ..
يوسف: فديت قلبك يالغاليه .. الله يوفقكم يا خواتي ..
الجوهره: فديت روحك والله ..
يوسف ابتسم: وين راحوا الشباب؟
الجوهره: راحوا فوق .. يلا نروح لهم ..
يوسف: يلا فديتج ..
راحوا فوق عند الشباب .. سلمان وابراهيم اشغلوا نفسهم بالتلفزيون لين ما دخلوا عليهم يوسف واخته ..
الجوهره: تبون اسوي لكم شي ؟
يوسف: متى بتنامون ؟
ابراهيم: تو الناس .. سهره شباب ..
سلمان: والله انك شي يا ابراهيم ..
الجوهره: هههههه ..
يوسف: سهره سهره ..
ابراهيم: زين شرايكم نروح نجيب شي من برا ؟
الجوهره: والله انا متعشيه .. وليش تجيبون من برا .. انا بسوي لكم اللي تبونه ..
سلمان: والله انا مابي اتعشى .. بس جان بنجيب مكسرات ولا ايس كريم ..
ابراهيم: زين تجي معاي سلمان ؟
سلمان: اوكي .. ها وشو في خاطركم يا جماعه ؟
الجوهره: ابي ايس كريم فانيلا مع مكسرات ..
يوسف: وانا ابي ايس كريم برتقال مع صوص الفراوله ..
سلمان: ما يهمكم .. مشينا يا ابراهيم ؟
ابراهيم: مشينا ..
ابراهيم راح الغرفه يلبس .. ولحقته الجوهره ..
ابراهيم مبتسم: فديت قلبج جوجو ..
الجوهره وهي تعطيه الثوب: حياتي يا ابراهيم .. بس هالله هالله بالمكسرات ..
ابراهيم: حاضرين لج ..
الجوهره: مادري شفيني هالايام كله في خاطري مكسرات ..
ابراهيم: ليكون حامل ؟
الجوهره مبتسمه: لا بدري على الحمل ..
ابراهيم باسها على جبهتها ورطلع من الغرفه .. الجوهره رتبت نفسها وطلعت وراه .. لقت يوسف قاعد يطالع التلفزيون .. قعدت معاه .. سلمان وابراهيم راحوا ياخذون الايس كريم ورجعوا .. تموا الحبايب سهرانين لين اذن الفجر .. الشباب راحوا يصلون فالمسيد وبعدين رجعوا وكلن نام بهدوء ..
كل العيون نامت من بعد احداث اليوم .. الا فارس اللي عيونه ما ذاقت النوم من حزنه وقلقه على مناف .. صلى الفجر في اقرب مسيد ورجع البيت .. مناف الفقيره اللي ماتعرف النوم .. صارت هي ودموعها يواسون بعض ..
يوم جديد وصباح حلو الكل حس فيه الا فارس اللي ما غمض له جفن .. الجوهره والشباب راحوا بيتهم عشان يجهزون للغدا .. هنادي ونواف قعدوا من النوم بنشاط .. تريقوا وتموا فالفندق لين الساعه 11 ونص .. طلعوا وراحوا بيت هنادي .. الكل استقبلهم بفروح وحب .. انقضى اليوم بفرح بالنسبه لعيلة سلمان ..

[رامون]

في بيت مناف كان الجو مشحون ..
ام مناف: وليش ترفضينه يا بنتي الريال ما عليه كلام مركز وتعليم وفي خير ..انا ابي الاحسن لج يا بنتي
مناف تصيح: يمه مابيه ..
ام مناف: يا بنتي ليش ؟
مناف: ابي اكمل دراستي واعتمد على نفسي .. بعدين بفكر فالزواج ..
ام مناف: يا بنتي هو ما راح يمنعج من دراستج .. وبعدين انت تدرين ان مب بيدج تقررين متى تتزوجين .. احنا في مجتمع الريال هو اللي يتقدم للبنت مو البنت تقرر من تبي ..
مناف: يمه اعرف كل هالكلام ..
ام مناف: دامج تعرفينه .. ليش ترفضين ؟ يا مناف انتي تعرفين وضعنا شلون .. لا اهل يسألون ولا غيره .. احنا نعتبر مقطوعين من شجره .. خالاتج تبروا مني عشان خذت ابوج ..
مناف بغيض: وش فيه ابوي يمه .؟
ام مناف: يا بنتي .. خواتي كل وحده فيهم تزوجت واحد في خير ونعمه .. ويوم ابوج تقدم لي رفضوا بس انا اصريت اخذه .. وقطعوني عشاني تزوجته ..
مناف: يمه بس انتي قلتي لي انكم ما كنتوا اغنياء ..
ام مناف: الله الغني يا بنتي .. احنا على قد حالنا .. بس خواتي كانوا وايد يطالعون فوق .. وكل وحده الله وفقها وانا الحمدلله الله وفقني مع ابوج الله يرحمه .. بس من بعد ما جبت نايف ابوج مرض .. والله ما كتب له عمر .. مناف: وبعدين محد سأل فينا وجينا هني .. آه يالقهر ..
ام مناف: يا بنتي احنا عندنا عزة نفسنا وكرامتنا ..
مناف: وهالشي اللي ابوي علمنا اياه ..
ام مناف: يا بنتي فكري عدل فالريال
مناف: يمه خلاص اتخذت قراري .. مابي اتزوج الحين ..
ام مناف: اللي تشوفينه يا بنتي .. مابي اضغط عليج زود .. وانتي تتحملين نتيجة قرارج ..
مناف نزلت راسها وحست بفرحه في قلبها .. ام مناف كانت حزينه بس ماحبت انها تضغط على بنتها وتركتها تقرر لمستقبلها .. طلعت من غرفة مناف وراحت تشيك على الشباب ..
عبدالله: فصول كلم فارس .. من زمان ما طلعنا معاه ..
فيصل: اي والله حتى هو ما مر علينا ..
اتصل فيصل بفارس .. فارس اول ما شاف الرقم ابتسم ..
فارس: هلا والله ..
فيصل: السلام عليكم ..
فارس: وعليكم السلام .. حيالله فيصل ..
فيصل: الله يحيك .. شخبارك ؟
فارس: الحمدلله .. اعلومكم ؟
فيصل: طيبين .. وينك ما شفناك من زمان ؟
فارس: فيك الخير يا فيصل .. والله انك ريال ..
فيصل حس بالاحراج .. واستانس من كلام فارس ..
فارس: بمركم اليوم ان شاءالله على الساعه 6 ونص ..
فيصل: حياك الله ..
عبدالله خذ التفون من يد فيصل ..
عبدالله: ههاااي ..
فارس: هههه .. هلا والله عبود شخبارك يا بطل ؟
عبدالله مبتسم: طيب ..
فارس: عيل ما في مدارس .. وناسه الحين كله لعب ..
عبدالله: ههااااي .. والله وناسه بدون المدارس ..
فارس: اليوم بجيكم .. تبون اجيب لكم شي وانا جاي ؟
عبدالله يفكر: مممم .. اي ..
فارس: شو تبي يبه ؟
عبدالله: ابي كوره قدم عشان العب فيها ..
فارس: ولا يهمك ..
عبدالله: مشكور فارس ..
فارس: ما يهمك .. لو خاطركم شي قولوا زين ..
عبدالله: زين .. والله انت طيب ..
فارس مبتسم: زين فديتك .. انتظروني الساعه 6 ونص ..
عبدالله: يااي..
فارس سكر من عبدالله وهو يضحك عليه ..
فارس: حليلك يا عبود .. على نياتك ..
انسدح على السرير وهو يفكر في مناف كان قاعد فالظلام بهدوء .. دخلت عليه امه ..
ام فارس: فارس يبه ..
فارس: هلا يمه ..
ام فارس: شو فيك ؟
فارس: ما فيني شي ..
ام فارس: وين ما فيك شي .. ويهك اصفر .. جسمك نحل .. عيونك ذبلت .. شو فيك يا يمه .. شوله قاعد في هالظلام .؟
فارس ابتسم: مافيني شي يمه ..
ام فارس: حتى الشركه ما قمت تروح ..
فارس: ما في شغل وايد هالايام ..
ام فارس ما قدرت تاخذ من ولدها لا حق ولا باطل .. استسلمت وطلعت عنه .. فارس تم على حاله .. قاعد فالظلام ومنسدح على السرير .. ام فارس راحت عند بوفارس ..
ام فارس: محمد ..
بوفارس: هلا يبه ..
ام فارس: فارس مب عاجبتني حالته ..
بوفارس: عسى ماشر ..
ام فارس: الولد فيه شي ..
بوفارس: ما فيه شي .. شو بيكون فيه ؟
ام فارس: والله اخاف حد لاعب بعقله و يحب ..
بوفارس: ولدج مب ياهل ينلعب بعقله ..
ام فارس: عيل ليش ما يبي يتزوج .. وكله حزنان ..
بوفارس: شو فيج يا حرمه .. الولد عنده خصوصيات .. بعد نتدخل في حياته .. مايصير ..
ام فارس: بعد ضناي ولازم اعرف شو فيه ؟
بوفارس: انتي لي تضايقتي من شي بينج وبين هلج ولا ربعج .. حد يتخل ويقولج لازم نعرف غصب .؟
ام فارس: مالهم حق ..
بوفارس: قلتيها .. مالهم حق .. يعني مالج حق تدخلين في حياة الولد .. هو كبير وعاقل .. وعقله يوزن بلد ماشاءالله عليه .. فارس ما ينقص عليه ويعرف يتصرف ..
ام فارس: والله اخاف وحده من هالفارطات لاعبين بعقله وطمعانين بفلوسه ..
بوفارس: وين راح فكرج .. وبعدين اي فلوس تتكلمين عنها .. الولد توه باول المشوار .. لا هو بصاحب الملاين ولا اللي يلعب بالفلوس لعب .. اذكري ربج وخلي عنج هالكلام ..
ام فارس: والله انت قلبك بارد .. الولد بيروح من ايدينا ..
بوفارس: الولد ما عليه شر .. وفضيها سيره ..
طلع من الغرفه وترك ام فارس تاكل بنفسها .. اذن المغرب طلع بوفارس مع عياله المسيد حق الصلاه .. وهم فالدرب بوفارس كان يكلم ولده ..

[رامون]

بوفارس: عسى ما شر يبه ؟
فارس مبتسم: ماشر يبه ..
بوفارس: الكل ملاحظ انك تعبان ..
فارس: مب تعبان والحمدلله ..
بوفارس: انا اقصد ان بالك مشغول .. انت تحب ؟
فارس منحرج: لا ما حب ..
بوفارس: انا ابوك يا فارس .. بحاول اساعدك لو قدرت ..
فارس مبتسم: ما تقصر يالغالي .. وادري انك بتساعدني .. بس لا تشغلون بالكم فيني ..
بوفارس: على راحتك يبه .. بس انا موجود اي وقت ..
فارس حط يده على كتف ابوه: يسلم راسك الغالي .. وباس راس ابوه ..
دخلوا البيت وفارس راح غرفته على طول .. عبدالعزيز اتصل بيوسف ..
عبدالعزيز: حيالله النسيب ..
يوسف: هلا وغلا ..
عبدالعزيز: يعطيك العافيه ..
يوسف: الله يعافيك .. شحالك الغالي ؟
عبدالعزيز: طيب .. اعلومك انت ؟
يوسف: تمام ..
عبدالعزيز: انت وين ؟
يوسف: فالبيت .. وانت ؟
عبدالعزيز: والله فالبيت .. نتلاقى فالقهوه ؟
يوسف: شرايك تمرني الحين .. ونطلع بعد صلاة العشاء ..
عبدالعزيز: شوف .. انا بمر على يدي شوي .. بصلي العشاء وبجيك البيت ..
يوسف: خلاص انتظرك بعد صلاة العشاء ..
عبدالعزيز: بأذن الله ..
يوسف: مع السلامه ..
عبدالعزيز: الله وياك ..
سكر من يوسف وراح بيت يده .. اول مادخل لقى يده قاعد فالحوش .. ماسك الهوز ويرش الحوش بالماي ..
عبدالعزيز: شو تسوي يالكشخه ؟
الجد: ابرد الجو شوي ..
عبدالعزيز: كيف تبرد الجو بعد ؟
الجد: شو عرفكم .. انتوا عيال المكيفات ..
عبدالعزيز وهو نازل من السياره: ههه ..
الجد: تعال خل اعلمك يالعوي .. عيزت وانا اعلم فيك .. ما منك فايده ..
عبدالعزيز وهو يبوس راس يده: حشى حشى .. كل هاي فيني .. سمالله علي ..
الجد: لوع الله جبدك ..
عبدالعزيز: مقبوله منك ..
الجد: غصبن عنك ..
عبدالعزيز مبتسم: وين علمني شلون بتبرد الجو ؟
الجد: ارش ماي على الارض .. ولما يدور الهوا علينا .. يجينا هوا بارد .. نسمات تبرد على الويه ..
عبدالعزيز بخبث: اهااا .. زين هات الهوز خلني ارش الماي ..
الجد: زين هاك ..
عبدالعزيز خذ الهوز وتم يرش الماي بعيد .. كان يهوس على طرف الهوز ويطلع الهوز مثل النافوره ..
عبدالعزيز: والله فكره زينه ..
الجد: اقولك انتوا شعرفكم ..
عبدالعزيز: صج والله .. و رش يده بالماي ..
الجد: وجع يا عزوز ..
عبدالعزيز: هههه .. انا تقولي وجع .. اصبر علي يالشيبه .. و يرش يده بالماي ..
الجد راح بعيد وهو يصرخ على عبدالعزيز ..
الجد: عزوز الله لا يبارك فيك .. سبحتني ..
عبدالعزيز: ههههه .. اصبر علي ..
ركض ورا جده ويسبحه بالماي .. والجد كان معصب ويشرد من الماي .. وعبدالعزيز يضحك عليه بشماته ..
الجد: والله بالتهك بالخيزران .. وخر مناك يا عزوز ..
عبدالعزيز وهو يرش يده بالماي: عيد كلامك الشيخ ..
الجد وهو يمشي بعيد: عزوز ومره تاخذك ..
عبدالعزيز: ههااااي ..
طلعت لهم هيا .. شافتهم وماتت من الضحك على عبدالعزيز ..
هيا: عزوز اقعد عن ابوي ..
عبدالعزيز: متفرعن الاخ ..
الجد: حسابك بعدين ..
هيا: حرام عليك يا عزيز بيمرض ..
عبدالعزيز: لا تخافين عليه .. هاذي ما يمرض ..
الجد: حسبي الله ونعم الوكيل ..
هيا: زين تعال سلمي علي ..
عبدالعزيز: ان شاءالله ..
عبدالعزيز قط الهوز على الارض وراح يسلم على عمته .. الجد استغل الفرصه وخذ الهوز .. بدل ما يرش عبدالعزيز بروحه .. رش هيا وعبدالعزيز في نفس الوقت ..
هيا: وااي .. ليش يبه ؟
الجد: ووووي .. ابي ارش عزوز ..
الكل: هههه ..
لكن الجد مسك عبدالعزيز وسبحه بالماي ..
الجد: انا ما ينلعب علي يا عزوز ..
عبدالعزيز ينرفز يده: عادي سبحني بالماي .. انا حران اصلا ..
الجد: يعلك العافيه يا عزوز ..
هيا: هههه ..
الجده: اللهم لك الحمد .. قله العقل مصيبه ..
هيا: انا ما عتقوني يا يمه ..
الجده: انهبل ابوج .. على باله توه بو 12 سنه .. قاعد يلعب فالماي ..
هيا: والله ابوي لي شاف عزوز يستخف ..
الجده: ثنينهم ميانين ..
تمت هيا وامها يطالعوا عبدالعزيز والجد .. لما تعبوا هم الثنين .. قعدوا على الدري اللي عند باب الصاله .. وهم مبللين .. تموا يسولفون شوي .. هيا جابت القهوه والشاي والفواكه .. قعدوا كلهم وتموا يسولفون .. هبت عليهم نسمة هوا .. وعبدالعزيز حس ببرودة المكان ..
عبدالعزيز: يا زين هالنمسه البارده .. والله تبرد على القلب ..
الجده: على ايامنا .. ما كان عندنا مكايفات .. كنا نرش الحوش بالماي .. وذيك الايام ما كنا نبلط بيوتنا .. الماي كان يتم فالطين اكثر ..
الجد: اي والله .. و في عز القيظ .. كنا ننام فوق السطح .. والله كنا نرش السطح بالماي و ننام ..
الجده: اي والله كانت نسمات الهوا حلوه ..
الجد: الحين هالمكيفات ذبحتنا .. عظامنا تكسرت منها ..
الجده: وين اول نمشي حفي فالبيت ولا نتويع .. يا زين الرمله لي مشينا عليها ..
هيا: اي والله ايام احلى من ايامنا ..
الجد: انتوا الا مدلعين ..
الكل: هههه ..

[رامون]

دخل عليهم بومحمد وبوفارس .. استغربوا من منظر الجد وعبدالعزيز ..
بومحمد: شو صاير ؟
الجده: ما تعرف اليهال بعد ..
الكل: هههه ..
الجد: ولدك يا محمد ابليس .. اول ما شافني شغل هوز الماي ورشني ..
عبدالعزيز مبطل عيونه: الله واكبر ..
الجد: وعليه علي انا ..
بوفارس: اي اعرفك يبه ما تسوي شي .. دوم في حالك ..
بومحمد: ايه عليك يبه .. عبدالعزيز يبيله خيزران .. وغمز حق عبدالعزيز ..
الجد: اي يبيله ..
عبدالعزيز همس لجده: كل شي بوقته حلو يا حلو ..
الجده: ولا خيزران ولا غيره .. ابوكم وتعرفونه ..
الجد: حليلي فقير .. لا تصدقون امكم ..
هيا: حالتكم حاله يا الشياب .. قعدوا فديتكم .. جان على هالثلاثه محنا بخالصين ..
بومحمد وبوفارس قعدوا .. هيا فنيلتهم وتموا يسولفون كلهم مع بعض .. عبدالعزيز استأذن عشان يروح البيت يبدل .. وبعدين بيتلاقى مع يوسف ..
فارس ومحمد كانوا مع فيصل وعبدالله .. فيصل وفارس ومحمد كانوا قاعدين عند الباب ويسولفون .. اما عبدالله كان مستانس ويلعب بالكوره اللي جابها فارس .. محمد كان يراقبهم بهدوء ..
فيصل: فارس انت تعبان ؟
فارس: لا .. ليش هالسؤال ؟
فيصل: ويهك مبين عليه التعب .. ما تاكل ؟
فارس ما عرف يرد علي فيصل .. تم ساكت فتره ..
فارس: ماكل وايد هالايام .. مشغول وايد
فيصل: يعطيك العافيه ..
فارس مبتسم: الله يعافيك ..
فيصل: بس مب زين عليك .. لازم تاكل ..
فارس مسح على راس فيصل: ان شاءالله يا فيصل ..
فيصل: بتسافر فارس ؟
فارس مبتسم: ان شاءالله ..
فيصل: وين بتروح ؟
فارس: ان شاءالله بنروح المكسيك ..
فيصل متعجب: وين هاي المكسيك بعد ؟
فارس: هههه .. بعيده عنا .. صوب امريكا ..
فيصل: اي ي ي ..
عبدالله: تعالوا العبوا معاي شوي ..
فارس: زين ..
راح صوب السياره وفصخ الغتره .. محمد وفيصل كانوا في فريق .. وفارس وعبدالله في فريق .. تموا يلعبون و فريق فارس فاز .. عبدالله كان طاير من الوناسه ..
فيصل: ما يصر .. ما نشوف عدل ..
عبدالله: افف من فريجنا كلش ما فيه نور ..
محمد: مره ثانيه بنلعب العصر ..
عبدالله: بس فزنا عليكم .. هههاااااي ..
الكل: هههههه ..
محمد: فيصل الله يرضى عليك جيب لنا ماي ..
فيصل مبتسم: ان شاءالله ..
راح داخل يجيب لهم الماي .. عبدالله تم يلعب فالكوره حولهم ..
محمد: شو صار على الموضوع ؟
فارس: ولا شي للحين ..
محمد: الله يعين .. ما كلمتها ؟
فارس: لا للحين .. مابي اكون سبب تعاستها .. مخليها على راحتها ..
محمد: ايه عليك يا فروس .. الله يعينك ..
فارس: آمين ..
فيصل: تفضلوا ..
فارس: جزاك الله خير ..
محمد: مشكور يبه ..
فيصل: عبود تبي ماي ؟
عبدالله: اي ..
تجمعوا كلهم حول بعض وشربوا الماي وتموا يسولفون لين الساعه 8 .. محمد وفارس استأذنوا ..
فارس: زين فيصل احنا بنحرك .. تبون شي ؟
فيصل: لا تسلم ..
عبدالله: فارس من زمان ما رحنا المجمع ..
فيصل ضربه: عبود ..
فارس مبتسم: ولا يهمك .. بنروح بعد بكره ..
فيصل منحرج: لا ماله داعي ..
فارس: شدعوه تستحي من يا فيصل .. انا اخوك الكبير ..
فيصل نزل راسه منحرج ..
محمد: شوفوا ترا فروس زطي .. طلبوا منه اللي تبونه قبل ما يطلع على حقيقته ..
فارس: افااا
الكل: ههههه ..
عبدالله: ههاااااي .. فارس طيب وايد ..
فارس مبتسم: فديت قلبك .. زين بعد بكره بمركم .. عبود عندي لك مفاجأه ..
عبدالله بفرح: شنو المفاجأه ؟
فارس: بعد بكره بتعرفها ..
عبدالله: ياااااي .. تم ينط من الوناسه ..
فيصل: ما تقصر يا فارس ..
فارس: حاضرين .. زين يلا دخلوا البيت يبه ..
فيصل: ان شاءالله ..
دخلوا البيت وفارس ومحمد حركوا ..
فارس: وايد تعلقت فيهم ..
محمد: مبين عليك .. هم اصلا يجننون الله يحفظهم .. بس فيصل وايد يستحي ..
فارس: وايد .. عبود عفوي ولو بغى شي بيقوله .. لكن فيصل عكسه يسكت وما يقول ..
محمد: بس عبود ماشاءالله عليه جريء .. اما فيصل عقله اكبر من سنه ..
فارس: والله من اللي شافه ..
محمد: بس موت اخوه ..
فارس: شوف موت اخوه الصغير كان شي متوقع ..
محمد عقد حواجبه: شلون ؟
فارس: لانه دوم يشوفه تعبان .. وفي الفتره الاخيره كانوا وايد ياخذونه المستشفى .. وفيصل كان عارف ان وضعهم ما راح يتغير .. فحط موت اخوه احتمال كبير و زعل عليه من قبل ما يموت .. يعني فالمستشفى كنت منصدم هدوئه فالبدايه .. بعدين صاح عليه بحزن .. و من معرفتي ومعاشرتي بفيصل فهمت شخصيته .. دوم يحط احتمالات لكل شي .. نفسه عزيزه وايد .. بس حياته بين المدرسه والبيت علمته اشياء وايد .. يعني فالبيت كان يشوف حالتهم كانت تمر عليهم ايام بدون اكل .. وتمر عليهم اعياد ما يلبسون فيها .. في حياته ما وجهه ريال .. ابوه توفى وهو صغير وما يذكره .. و هو مايعرف غير امه واخته واخوانه .. فالمدرسه الصبيان اللي بسنه يشوفهم عكس اللي يشوفه في بيتهم .. يعني اللي ولد عمه يفزع له .. ولا ابوه يجي المدرسه يفزع له .. هاي غير الدلع من جوالات وملابس وطلعات وسفرات .. يسمع الصبيان يقولون هالامور ويقارنها بوضعهم فالبيت .. انا متأكد انه الحين يفكر متى يكبر ويحقق كل اللي شافه في حياته .. لاحظ انه مو وايد شاطر بس يحاول انه يجيب اعلى الدرجات وينجح .. يبي يخلص دراسه بسرعه عشان يطلع من اللي هو فيه .. ويطلع امه واخوانه من اللي هم فيه .. فيصل يفكر على كبير ..
محمد: ماشاءالله عليه .. بس انت مو مقصر فيهم يا فارس ..
فارس: انا مو مقصر والله يعلم .. بس مثل ما قلت لك الولد نفسه عزيزه .. صج الحياه علمته ..
محمد: ماشاءالله عليه .. الله يعطيه على قد نيته ..
فارس: آمين ..
فارس وصل محمد بيتهم وراح البيت .. خذ له شور وحذف نفسه على السرير ..
...............
يتبع