لا حول ولا قوة الا بالله العلي العظيم

[همسات مغترب]

السلام عليكم ..

الكلام موجه لكل الاعضاء ..

اعذروني لو كان كلامي قاسي ..

يا جماعة الخير .. الانسان مهما كان وضعو .. ومهما كان من اي مكان .. بالنهاية بيتمنى متلو متل اي واحد انو يتزوج وتصير عندو عيلة واولاد ..

والكل شايف وضع البلد كيف ..

الناس مو كلها مهندسين ولا اطباء ولا اصحاب مناصب كبيرة .. الناس مو كلها وضعها المادي ممتاز او حتى اقل من ممتاز او حتى جيد ..

انا واحد من الناس ما بقدر انزل عسوريا بسبب هالاوضاع كرمال ما اخسر شغلي هون لان ما حدا عم يضمن حالوابدا بالبلد

يعني تخيلوا عم ابعت الوالدة تدور عبنت حلال بسوريا ..وانتبهوا للكلمة ( بنت حلال ) يعني ما عم دور لا على بنت عندا اكبر شهادات ولا عبنت ملكة جمال ولا على بنت وضعا المادي ممتاز

عم دور على بنت حلال وبس

وكل ما عم تروح الوالدة عند جماعة بتبدا العائلة الكريمة سلسلة طلبات .. بيت ملك وظيفة بالدولة راتب ثابت شهادة جامعية ما منعطي بنتنا للغربة وووووو

اقسم بالله هاد اللي صار وعائلات كتير المشكلة هاد كان ردهن

يعني وقت عم بيسمعوا اني بشتغل بالسعودية بيفكروني كأن عايش فوق الريح وكانو خلاص اي طلب رح ينطلب كن فيكون ..

طيب انا زلمة عقد الحال راتبي محدد ووضعي محدد يعني ممنوع علي فكر اني اتزوج

شفت جماعة من فترة وافقوا عكل شي بس كان عندن شرط اساسي انو بنتهن اعمللها استقدام نهائي عالسعودية وهية موجودة بسوريا ..

اولا عملية الاستقدام بالاواضاع هي شبه مستحيلة .. ما عم بيوافقوا عليها من هون تانيا مبلغ الاستقدام المطلوب بيفتح بيت ..

قلت لازم دور على عائلات سورية عايشين هون بالسعودية بلكي الله بيوفقنا ..

كمان عم نرجع لنفس الوضع للاسف
وقت بتقدم لعائلة شامية من اولها بيقلك نحنا ما منعطي بنتنا الا لشب من الشام

منشوف جماعة من حماة بتسمع منن نفس الشي

منشوف جماعة من حلب كمان نفس الشي

هلا لاني من ادلب يعني صرت ماني سوري ولا الناس ما بقا تتشرف باهل ادلب

حسبي الله ونعم الوكيل عكل واحد عندو هيك تفكير لانو ما بيخاف الله

اقسم بالله تعبت .. ما بعرف شو صاير للناس

ما حدا عم يعتبر ويتعظ من اللي صاير بالبلد

اذا في ولاد حلال بيخافوا الله بيقدروا يساعدوني بهالموضوع ما بنساهلم هالمعروف ابدا لا والله

واللي بيستر على عبادو الله من عندو بيستر عليه ..

انا جاهز لاي وسيلة اذا في حدا بيحب يتواصل فيها معي ..

ومتفائل كل خير فيكم اخوتي

[Sanaa]

أهلا و سهلا فيك ....
اولا ... كلامك صح تماما ... و بعتقد كتير شباب مغتربين بيضموا صوتهم لـ صوتك ....
للأسف هاد فعلا يلي بيصير ........

كونك مغترب ... فـ الطلبات بتكون أضعاف الشي يلي بينطلب من غير المغترب ...
لانو الفكرة السائدة ... انو الشب المغترب مزبط أمورو ع الآآخر ......

و طبعا أهل إدلب ع العين و ع الراس .... و بالنهاية كلنا سوريين ....
بس ما فينا ننكر انو في كتير ناس بتفكر بـ هالطريقة ........!

ع العموم ... إن خليت خربت ...
و أكيد في ناس كتير ما بيفكروا بهالطريقة ..... بس انت لسا ما اجتمعت فيهم ....
لأنو ببساطة .... نصيبك لسا ما اجا ........
و لما بيجي النصيب ... بيسكت الكبير و الصغير ( متل ما بيقولوا ) ...

بـ كل الأحوال ... الله يختارلك الخير ...
و ان شا الله بتجتمع بـ بنت الحلال يلي بتستاهلك و بتستاهلها عن قريب .....

بنتمنى حدا يقدر يساعدك بـ هالخصوص .....
و كرمال يكون في فرصة أكبر للاطلاع ... رح يتم إرسال موضوعك على ايميلات الأعضاء إذا الله راد ....

بالتوفيق

[همسات مغترب]

اختي الكريمة مشكورة جدا ..

انا ما بدي اي من الاخوة الاعضاء انهم ياخوا موقف مني لاني ذكرت 3 محافظات .. بس انا حبيت اني احكي الصورة بشكل عام

انا على عيني وراسي كل اهل سوريا ..وبتشرف اني سوري ..

بس الواحد من الوجع والقهر احيانا بيصرخ .. وما بيرتاح الا حدا يسمع هالصرخة ويحس فيها ..

فما بعرف ..

الله يختار اللي فيه الخير للجميع ..

والله الموفق ..

[Sanaa]

و لا يهمك ... ما حدا رح ياخد موقف ان شا الله ...
خاصة انو معك حق بـ الكلام يلي قلتو ..... يعني ما عم تفتري على حدا ...
و لا عم تجيب كلام من الهوا ....

وصلت فكرتك ... و أكيد اي حدا بيقدر يساعدك .. ما رح يقصر بنووب ....


بالتوفيق