احلف برب البيت ياشوق مفصـول
خطي بوقت انـك طلبـت اتصالـي
ازريت اسدد والسبب حيل مشغـول
واكيد تعرفهـا دواعـي انشغالـي
عذرٍ كتبته هقوتـي منـك مقبـول
بعده عزاي اليوم في فقـد غالـي
هذا القدر مافيـه قـوه ولا حـول
والحمـد لله دوم فـي كـل حالـي
انا معك وقت الشدايد علـى طـول
اشيل حملٍ عنـك كبـر الجبالـي
بلاش تترك خـط هاتفـك مقفـول
هذا طلـب منـي اذا لـك مجالـي
وان كان فعلي يوم ماجا على القول
حرام ماجلس يوم بيـن الرجالـي
معقول بنسى وقفتك ذيـك معقـول
يومك تواسيني على اللي جراللـي
يومك تقـول الهـم ايـام ويـزول
ولابد عقـب المـر ياتيـك حالـي
مانجحد المعروف واشكرك واقـول
انا اشهد انك دايـمٍ وسـط بالـي
ليت الحزن يجفاك ويصير مقتـول
وليته يطيب اليـوم فالـك وفالـي