عجبي عليك يا ابن ادم يا كبير الدار
قومت الدنيا وما قعدت لما قالو حمار
هو اسمي شتيمه ولا جنسي ده عار
خلقني ربي وخلقك ولا حدش له خيار
وانا مهما زاد الحمل فوقي صابر على المشوار
لافي يوم اقول اشمعنى اخويا واخذ منه تار
ولا يوم ابص لرزق غيري واطق منه واغار
ولا ارفع في يوم عيني على جارتي واصون الجار
ولا مهر ادفع لحمارتي وشبكه وسوار
ولا شقه اجمع في تمنها ولا اجهز دار
ولا حرمي حامل تتوحم عايزه الكافيار
ولا بنت تخرج عن طوعي وتجيب العار
ولا ابن يدمن ويهلوس ويقع ينهار
عايش في حالي متهني وليه افكار ؟
باكل وباشرب وانهق وما فيش اسرار
وعندي ابن ادم يخدمني ليل ويا نهار
ان جعت يشتري برسيمي باغلي الاسعار
وفي مرضي يفضل يعالجني ويدعي الستار
خادم امين من غير راتب ولا حتى ايجار
والحين عرفت يا ابن ادم ....
مين فينا حمار ؟ ؟